Pe e Mafai Ona Iai le Filemu?

“O LE a iai lava se vaipanoa o faia ai pea se taua. O le upu moni faanoanoa lena e uiga i tagata.” O le manatu lena na aliali mai talu ai nei i se tusi mai se tagata faitau o le mekasini o le Newsweek. Pe e te ioe i ai? Pe e lē mafai ea ona taofia taua ma pe o se mea ea e lē mafai ona iai le filemu? Pe afai e fua le mataupu i le talafaasolopito, e lē faigata la ona tali atu i le ioe i nei fesili uma e lua. O le tala faamaumau atoa o le tagata, ua faapena ona lilofia i lea taua ma lea taua, ma ua avea ai fetauaiga ma auala ua sili atu pea ona faaumatiaina ai a o atiaʻe e tagata le tele atu o isi mau auala e fasiotia ai e le tasi le isi.

Ua matuā lē faaesea mai ai lava le lona luasefulu o senituri. O le mea moni, ua molimauina ai taua e pito i sili atu ona faamasaatoto nai lo isi lava taua, ae ua molimauina ai foi se isi mea fou. I le limasefulu tausaga ua mavae, na muai faatulaia mai ai e le Iunaite Setete le vaitaimi o mea faaniukilia i le faapauu ane o pomu atomika e lua i luga o Iapani. I le limasefulu tausaga mulimuli ane ai, na fausia ai loa e malo le mau faaputuga o meatau faaniukilia e faatele taimi e mafai ona latou matuā faaumatiaina ai tagata uma. Pe o le a avea ea le iai o meatau faaniukilia ma mea e fefefe ai loa tagata ma lē toe fetauai? Ua aumaia e mea moni ua tutupu le tali. Talu mai le 1945, ua maliliu ai le faitau miliona i taua—e ui lava ina e lei toe faapauuina ifo ni pomu niukilia.

Aisea ua māfuli ai tagata e tau? Ua taʻua mai e le Encyclopedia Americana nisi o vala o le sosaiete o tagata e tusa ai i talafaasolopito na taʻitaʻia atu ai i taua. E aofia ai le feitagai i va  o lotu, o le faailoga lanu, o eseesega i aganuu, o le eseese i manatu i le olaga (e pei o le Faakomunisi ma le capitalism), o le lotonuu ma le talitonuga o le sili o le malo o le isi i le isi, o tulaga tau tamaoaiga, ma le taliaina e le lautele o faiga faavaegaau. Pe a e faitau i lena lisi, pe o e iloa ai se mea e foliga mai o le a suia i le lumanai lata mai? Pe o le a tau faaitiitia ea le taumafai o malo e faasaosao lo latou tulaga fia pule aoao? Pe o le a faaitiitia le faailoga lanu o tagata? Pe o le a faaitiitia faiga tumau fia mamapo tau tapuaiga? E foliga mai e matuā leai lava.

Pe ua matuā leai ea la se faamoemoe e faapea i se aso o le a sili atu ai ona lelei mea ma o le a iai foi le filemu e faavavau? Ioe, o loo iai le faamoemoe. E ui lava i le tulaga fevesiai o lenei lalolagi, ae e mafai, e oo lava i aso nei, ona mauaina le filemu. E faitau miliona ua faia faapea. Seʻi o matou faamatalaina atu ia te oe nisi o ia tagata ma vaai po o le ā le uiga o mea na tutupu ia i latou mo oe.

 [Ē Ana le Ata i le itulau 2]

Background cover and page 32: Reuters/Bettmann

[Ē Ana le Ata i le itulau 3]

Reuters/Bettmann