Lipoti a ē Faalauiloa le Malo

“Ua Tupu Foi le Afioga a le Atua”

O LE faapotopotoga Kerisiano na amata mai i sui e 120 ae e lei umi talu ona mavae lona faavaeina ae oo atu i le silia i le 3,000. (Galuega 1:15; 2:41) Ua faamatalaina e le Tusi Paia e faapea “ua tupu foi le afioga a le Atua, ua matuā faatoateleina le au soo i Ierusalema.” (Galuega 6:7) Ina ua mavae ni nai tausaga, na avea le faapotopotoga fou na faavaeina ma faalapotopotoga faavaomalo e faatasi atu i ai Kerisiano mai Aferika, Asia, ma Europa.

Ua faapea foi ona oo i le faapotopotoga Kerisiano i aso nei le vave faatuputeleina o lea faatelega. Mo se faataʻitaʻiga, i Mekisikō, i totonu o le lima tausaga na faateleina ai le faitau aofai o ē faalauiloa le Malo mai le sili atu i le 130,000 i le 443,640! I le 1995, e 1 mai le 59 o tagata i Mekisikō na auai i le Faamanatuga o le maliu o Keriso e pei ona faamanatuina e Molimau a Ieova. Peitai e lei maeʻa le seleselega faaleagaga i lena atunuu e pei ona faailoa mai i le mea na tupu o loo mulimuli mai.—Mataio 9:37, 38.

I se tasi aai i le setete o Chiapas, e leai lava se tasi na taliaina se suesuega faale-Tusi Paia ma Molimau a Ieova, e ui lava ua 20 tausaga talu ona talaʻia le tala lelei iina. E lē taumatea e toatele tagata o le aai na faafefe e se tasi o tamaloa o lē e iai sona talaaga e sauā. Na latou matataʻu i se mea na te faia pe afai na te iloaina ua latou suesue le Tusi Paia ma Molimau.

Na manatu ni Molimau loto tetele se toalua o ē na siitia atu ma nonofo i lea aai e faafetaiaia le faafitauli e ala i le ō atu e vaai le tamaloa lea. Ina ua la taunuu i le aiga, na faafeiloaia i laua e lana avā ma na faalogologo lelei o ia i le la sāvali. Sa naunau faapitoa o ia i le mea ua fai mai ai le Tusi Paia e uiga i le ola i se lalolagi parataiso. Peitai na ia faailoa mai o le a faafaigata e lona toʻalua lona suesueina o le Tusi Paia. Na faamatala atu e Molimau ia te ia e lē mafai ona ia aʻoaʻoina le auala e auauna ai i le Atua ma olioli ai i le ola e faavavau i le lalolagi seʻi vaganā ua ia sailiili ma le faaeteete i mea ua fai mai ai le Tusi Paia. O lea na ia talia ai le suesuega faale-Tusi Paia.

E pei lava ona ia faatalitalia, e lei fiafia lana tane i lana faaiuga. Na ia faasaina o ia mai le faaaogāina o lana taavale e alu ai i sauniga faa-Kerisiano, e ui lava e mafai ona ia faaaogāina mo isi fuafuaga. E ui ina tetee le tamaloa, ae na savali le fafine e lē aunoa i le Maota o le Malo o Molimau a Ieova e latalata ane, e tusa ma le 6 maila [10 kilomita] le mamao. E lei leva ae matauina e isi tagata o le aai le lototele ma le maumauai o lenei fafine. Ona amata ai lea ona faalogo tagata i Molimau pe a asiasi atu i o latou aiga. O nisi ua oo lava ina latou ō faatasi ma le fafine i sauniga. Ina ua mavae sina taimi, ona taulimaina ai lea e Molimau suesuega faale-Tusi Paia e 20 i lena taulaga!

Na manao foi se uo a lenei fafine e suesue le Tusi Paia e ui i teteega mai lana tane. O le mea e faateia ai, sa faalaeiauina o ia e le tane a le fafine lea na muai suesue. Ina ua uma ona talanoa atu le tamaloa uiga sauā i le tane a le fafine lea, na faamutaina loa teteega. O lea ina ua mavae le 20 tausaga na tupu aʻe ai loa le fatu o le upu moni o le Tusi Paia, ma e sili atu i le 15 tagata ua suesueina le Tusi Paia ma auai i sauniga faa-Kerisiano, e aofia ai fafine ia e toalua, o ē o faalauiloaina atu nei le tala lelei.