Faamafanafanaga ma Faalaeiauga—O ni Maatāua e Tele Tafa

O LE toatele o i tatou, na oo i ni taimi na tatou lagona ai le matuā mativa—e lē o le mativa i tupe, ae o le mativa i le faaleagaga. Na oo ai ia i tatou le matuā loto vaivai ma le loto mafatia. Ae peitai, i taimi faapena, atonu sa iai se mea e sili ona tāua na mafai ona tatou tapa atu i ai na mafai ona tele sona aogā mo i tatou. O lena “maatāua” o faalaeiauga.

I le Tusi Paia, e tasi lava le upu Eleni o loo faaaogā mo le “faalaeiau” ma le “faamafanafana.” O na upu uma e lua, o loo iai le manatu, o le tuuina atu o le lototele, le malosi, po o le faamoemoe. E manino lava la, pe a tatou lagona le loto vaivai po o le loto mafatia, o le mea moni lava ua tatou manaomia se faamafanafanaga ma se faalaeiauga. O fea e mafai ona maua ai na mea?

Ua faamautinoa mai e le Tusi Paia ia i tatou e faapea, o Ieova, “o le Atua foi e ana le faamafanafanaga uma.” (2 Korinito 1:3) Ua taʻu mai ai foi ia i tatou e faapea, “e le mamao o ia ma i tatou taitoatasi.” (Galuega 17:27) O lea, e mafai ona maua le faamafanafanaga ma le faalaeiauga. Seʻi o tatou talanoaina ni auala masani se fa ua saunia e Ieova e auala mai ai faalaeiauga.

E Ala i se Faiā Totino ma le Atua

O le puna aupito sili o faamafanafanaga, o le iai lea o se faiā totino ma Ieova le Atua. O le iai o se faiā faapena, e mafai ona faalaeiauina ai. Ae maise o ai se taʻitaʻi o le lalolagi e mafai ona tali mai pe a tatou telefoni atu pe faaalia foi se naunau totino i o tatou faafitauli? O Ieova e matuā silisili atu ona malosi nai lo o na tagata. Ae peitai, e loto maulalo o ia—e sili ona naunau e feutagai ma tagata faatauvaa, lē lelei atoatoa. (Salamo 18:35) Ua solomua foi ia Ieova ona faaalia lona alofa ia i tatou. Ua faapea mai le 1 Ioane 4:10: “O le alofa lava lenei, e le ona ua tatou alofa i le Atua, a ua alofa mai o ia ia te i tatou, ua na auina mai foi lona Alo o le togiola [“talafeagai o ia,” NW] mo a tatou agasala.” E lē gata i lea, ua tosina atu foi ma le alofa i tatou e Ieova i lona Alo.—Ioane 6:44.

Po ua e tali atu ma saili le faamafanafanaga i le faia o se faauooga ma le Atua? (Faatusatusa i le Iakopo 2:23.) Mo se faataʻitaʻiga, afai e iai sau uo mamae e pele, pe e lē o se fiafiaga ea le faaalu o se taimi na o oulua ma lena uo, e talanoa ma le saʻoloto e uiga i ou popolega ma ni mea o e manatu mamafa i ai, i ou faamoemoega ma ou fiafiaga? Ua valaaulia oe e Ieova ia faia faapena ia te ia. Na te lē o faatapulaaina le umi e mafai ai ona e talanoa atu ai ia te ia i le tatalo—ma e faafofoga mai lava o ia. (Salamo 65:2; 1 Tesalonia 5:17) Sa tatalo ma le faatauanau e lē aunoa Iesu. O le mea moni, a o lei filifilia lona au aposetolo e toʻa 12, na alu le po atoa o tatalo o ia.—Luka 6:12-16; Eperu 5:7.

E mai lea taimi i lea taimi, e mafai ai e i tatou taitoatasi ona iai na o i tatou ma Ieova. I le na o le nofonofo filemu i se faamalama po o le faia foi o se savalivaliga toafilemu, e mafai ona maua ai se avanoa lelei e tatala atu ai lou loto i le tatalo ia Ieova. O le faia faapea, e mafai ona avea ma puna o le mapusaga sili ma faamafanafanaga. Afai e iai se vala o le foafoaga a Ieova e tepa taulai atu i ai a o mafaufau loloto—e tusa lava pe na o sina vaega o le lagi, ni laau po o manulele—e mafai lava ona tatou maua ai i na mea ni faamanatuga e faamafanafanaina ai e uiga i le alofa o Ieova ma lona manatu mamafa mai ia i tatou.—Roma 1:20.

E Ala i se Suesuega Totino o le Afioga a le Atua

E ala i le suesueina totino o le Tusi Paia, ua faaalia moni mai ai uiga o Ieova ia i tatou. Ua faailoa mai pea e le Tusi Paia ia Ieova e faapea “o le Atua alofa mutimutivale ma le alofa fua, e telegese lona toasa, a e tele le alofa ma le faamaoni.” (Esoto 34:6; Neemia 9:17; Salamo 86:15)  O le faanaunauga e faamafanafanaina ana auauna faalelalolagi, o se vaega tāua lea o uiga o Ieova.

Seʻi manatu mo se faataʻitaʻiga, o afioga a Ieova i le Isaia 66:13: “E pei o le tagata ua faamaiseina [faamafanafanaina] e lona tinā, e faapea ona ou faamaise [faamafanafana] ia te outou.” Na fuafuaina e Ieova le alofa o se tinā i lana fanau ia faataulagaina totino ma ia faamaoni. Afai na e vaaia se tinā alofa o faamafanafana i sana tama ua manuʻa, ona e iloa lea o le uiga o le fetalaiga a Ieova e faapea o le a ia faamafanafanaina lona nuu faamaoni.

Ua faaalia i le tele o faamatalaga a le Tusi Paia le faatinoina o lena faamafanafanaga. Ina ua faamataʻuina le perofeta o Elia i le oti e le masiofo amioleaga o Iesepela, sa fefe o ia ma sola mo le fia faasaoina o lona ola. Sa matuā loto vaivai o ia lea na savali ai mo le aso atoa i le vao, e foliga mai na te lei aveina ni vai po o ni meaʻai. I le matuā tiga na fai atu ai Elia ia Ieova, ua fia oti. (1 Tupu 19:1-4) O le ā na faia e Ieova e faamafanafana ai ma faalaeiau ai lana perofeta?

E lei otegiaina e Ieova Elia ona o le iai o le lagona tuuatoatasi, faapea ua lē aogā, ma fefe. Nai lo o lena, na faalogoina e le perofeta se “leo filemu ma le itiiti.” (1 Tupu 19:12) Afai e te faitauina le 1 Tupu mataupu e 19, o le a e mātauina ai le auala na faamafanafanaina ai e Ieova ia Elia, faatoafilemu o ia, ma atiina aʻe lona faatuatua. E lei faataʻetaʻealuga lenei faamafanafanaga. Na matuā oo lava i le loto mafatia o Elia, ma faalaeiauina ai le perofeta ina ia faaauau pea i lena auaunaga. (Faatusatusa i le Isaia 40:1, 2.) E lei pine, ae toe foi o ia e faia lana galuega tofia.

Ua faapena foi ona faamafanafanaina ma faalaeiauina e Iesu Keriso ona soo faamaoni. O le mea moni, na vavalo Isaia e uiga i le Mesia e faapea: “Ua auina mai aʻu e le Alii Pule Silisiliese o Ieova . . . e fufusi i e loto momomo, . . . e faamatalaloto [faamafanafana] i e faanoanoa uma lava.” (Isaia 61:1-3) A o soifua o ia i le lalolagi, sa lei masalomia lava e Iesu le faatatauina o nei upu ia te ia. (Luka 4:17-21) A e lagona ua e manaomia se faamafanafanaga, ia mafaufau loloto i feutagaiga mafana ma le alofa a Iesu ma tagata o ē sa mafatia ma manaomia se fesoasoani. E moni lava, o le suesue ma le faaeteete i le Tusi Paia, o se puna sili lea o faamafanafanaga ma faalaeiauga.

E Ala i le Faapotopotoga

I le faapotopotoga Kerisiano, e feilafi ai tafa uma o maatāua o faamafanafanaga ma faalaeiauga. Na faagaeeina le aposetolo o Paulo e tusi e faapea: “O lea ia outou feapoapoai ai, ma ia fefaamafanafanai.” (1 Tesalonia 5:11) E mafai faapefea ona maua faamafanafanaga ma faalaeiauga i sauniga a le faapotopotoga?

O le mea moni, o le autū o lo tatou auai i sauniga faa-Kerisiano, ina ia ‘aʻoaʻoina ai e Ieova,’ ia maua ai faatonuga e uiga ia te ia ma ona ala. (Ioane 6:45) O na faatonuga ua faia ina ia faalaeiauina ma faamafanafanaina ai. I le Galuega 15:32, ua tatou faitau ai e faapea: “O Iuta foi ma Sila, . . . ua la faamafanafana atu, ma faamalosi atu i le au uso i upu e tele.”

Po ua oo ia te oe se tulaga e faapea na e alu i se sauniga faa-Kerisiano ma le loto mafatia ae foi mai i le aiga ua lagona le mafanafana ma le faalaeiauina? Atonu na iai se mea na fai mai i se lauga, i se faaopoopoga, po o se tatalo na pāʻia ai lou loto ma saunia ai se faamafanafanaga manaomia ma se faalaeiauga. O lea, ʻaua neʻi lē auai i sauniga faa-Kerisiano.—Eperu 10:24, 25.

O le auaufaatasi ma o tatou uso ma tuafāfine i le faiva ma i nisi taimi, e mafai ona maua ai se aafiaga faapena. I le faa-Eperu, e iai le tele o veape e uiga faapea “ia fusi faatasi” e faasino foi i le “malosi” po o le “faamalosia”—o le manatu e foliga mai e faapea, e sili atu ona malolosi o mea pe a fusifusi faatasi. O lenei mataupu silisili, e moni pe a faasino atu i le faapotopotoga. E faamafanafanaina i tatou, faalaeiauina, ioe, e faamalosia e ala i le auaufaatasi. Ma o le alofa, ua fusia faatasi ai i tatou, le fusi e aupito sili ona malosi o fusi uma.—Kolose 3:14.

I nisi taimi, e faalaeiauina i tatou ona o le faamaoni o o tatou uso po o tuafāfine faaleagaga. (1 Tesalonia 3:7, 8) I nisi taimi, ona o le alofa ua latou faaalia. (Filemoni 7) Ma i nisi taimi, o le mea moni, ona o le galulue soosoo tauʻau faatasi, a o talanoa atu i isi e uiga i le Malo o le Atua. A e lagona le vaivai ma e manaomia se faalaeiauga i le faiva, aisea e lē fuafua ai e galulue ma se tagata  talaʻi o le Malo ua matua pe sili atu foi ona agavaa? O le a faapena ona e maua ai se faamafanafanaga atili i le faia faapea.—Failauga 4:9-12; Filipi 1:27.

E Ala i “le Auauna Faamaoni ma le Mafaufau”

O ai e faamaopoopoina vala eseese o faamafanafanaga i la tatou tapuaiga? Ua faasino mai e Iesu se vasega o lē ua ia tofia e faapea o “le auauna faamaoni ma le mafaufau” na te faasoa mai ‘meaʻai faaleagaga i ona itu aso tatau.’ (Mataio 24:45) I le uluai senituri T.A., na amata faatinoina ai galuega a lenei vasega o Kerisiano faauuina e le agaga. Na aauina atu e le vaega pule o toeaina i Ierusalema ni tusi o faatonuga ma taʻiala i faapotopotoga. O le ā le iuga? Ua faamauina i le Tusi Paia le auala na tali mai ai faapotopotoga i se tasi o na tusi: “Ua latou faitauina, ona olioli lea o i latou ona o le faamafanafanaga.”—Galuega 15:23-31.

E faapena foi i nei taimi faigata o aso e gata ai, o loo faasoaina mai e le auauna faamaoni ma le mafaufau meaʻai faaleagaga ua saunia ai faamafanafanaga ma faalaeiauga sili mo tagata o Ieova. Po o e taumafa ai i na meaʻai? O loo maua pea e ala i lomiga ua saunia e le vasega o le auauna mo le lalolagi atoa. O mekasini o Le Olomatamata ma le Awake! faapea tusi, polosiua, ma sāvali ua lomia e le Sosaiete o le Olo Matamata e aumaia ai faamafanafanaga i le lē mafaitaulia o le au faitau.

Na tusia e se tasi ovasia faimalaga e faapea: “O le toatele o o tatou uso ma tuafāfine e mananao ina ia faia le mea saʻo, ae e masani ona latou tauivi ma mea e lē fiafia ai, o le mataʻu, ma le faalogona e faapea, e lē lava lo latou malosi e fesoasoani ai ia i latou lava. O mataupu i a tatou mekasini, o loo fesoasoani i le toatele e maua ai le malosi e faaleleia ai o latou olaga ma faalogona ootia. O mataupu, ua maua ai foi e toeaina ni mea se tele e mafai ona faalaeiau atu ai nai lo o se faalaeiauga e faataʻetaʻealuga.”

Ia faaaogā atoatoa lomiga mai le vasega o le auauna faamaoni. O mekasini, tusi, ma isi lomiga talafeagai, ua mafai ona fesoasoani ia i tatou e maua ai faamafanafanaga pe a oo mai taimi faigata. I le isi itu, afai o e i se tulaga e ono ofo atu ai se faalaeiauga i se tasi ua loto mafatia, ia faaaogā faamatalaga faale-Tusi Paia o loo i mekasini. Ua tusia ma le faaeteete mataupu ma e masani lava, pe a mavae ni vaiaso se tele po o ni masina o faia i ai ni iloiloga fitā, suesueina faatasi ma le tatalo. O fautuaga e faavae i le Tusi Paia, ua uma ona faataʻitaʻia, ma faamaonia le moni. Ua iloa e nisi le matuā aogā o le faitauina o se mataupu talafeagai po o ni mataupu se lua faatasi ma sē ua lagona le loto vaivai. E mafai ona iu lenei mea i le matuā faamafanafanaina ma faalaeiauina ai.

Afai e te maua ni maatāua tautele, po o le a e teuina po o le a e tufaina atu ma le matamau le oa i isi? Ia avea ma ou sini le avea o oe ma puna o faamafanafanaga i ou uso ma tuafāfine i le faapotopotoga. Afai e te atiaʻe nai lo o le lepetia, faamālō nai lo o le faitio, ia tautala i le “laulaufaiva o e ua aʻoaʻoina” nai lo o le ‘tautala i upu e pei ua tutuʻi i le pelu,’ o le a mafai ai ona e fesoasoani e faaleleia olaga o isi. (Isaia 50:4; Faataoto 12:18) O le mea moni, o le a faapena ona e manatu ia te oe lava o se maatāua—o se puna o faamafanafanaga moni ma faalaeiauga!

 [Pusa i le itulau 20]

Faamafanafanaga mo i Latou o Manaomia

E TOATELE ua faamatala mai le auala ua faaloloto ai e nisi o mataupu o Le Olomatamata po o le Awake! a latou faiā totino ma Ieova. Na faapea mai se tasi tamaitai: “Ina ua uma ona faitauina lenei mataupu, na ou lagona ai, o le malosi uma lava o Ieova ma lona silisili ese, sa faatasi ai ma aʻu. Sa ou lagona, o ia o se peresona moni lava.” Na taʻua i se tasi tusi e faapea: “Ua matuā suia ato­atoa o matou loto ma mafaufau ma o matou manatu e uiga ia Ieova, ua faapea ona lē toe avea ai i matou ma tagata e pei ona sa iai muamua. E peiseai ua solo mamā e se tasi a matou matatioata, ma ua mafai nei ona matuā manino la matou vaai i mea uma.”

Na tusi mai nisi e faailoa mai le auala na fesoasoani ai mekasini e faaleleia faafitauli patino po o luʻi, i lea ua faamautinoaina ai o loo naunau totino Ieova ia i latou. Ua faamatala mai e se tasi tagata faitau e faapea: “E toe faafetai tele atu foi ona o le faailoa mai ia i matou o le tele o le manatu mamafa ma le alofa mai o Ieova i ona tagata.” O se fafine Iapani o lē na maliu sana tama, na faapea mai e uiga i mea na tusia i le Awake! e faatatau i lena mataupu: “E matuā tele le alofa mutimutivale o le Atua na liligi mai i itulau o le Awake!, ma sa ou matuā tagi ai lava. Ua ou tuuina nei lomiga i se nofoaga e mafai ona ou tapa vave atu i ai ma faitau i so o se taimi e oo mai ai ni faalogona faalēlelei ma le tuuatoatasi.” Na tusi atu foi se tasi fafine faanoanoa e faapea: “O mataupu i Le Olomatamata ma le Awake! ma le polosiua “Pe a Maliu se Tasi e Pele ia te Oe” ua ou maua ai le malosi na ou manaomia ina ia tumau ai i taimi o oʻu faanoanoaga.”

O le Tusi Paia o le puna sili lea o faamafanafanaga. (Roma 15:4) E pipii atu Le Olomatamata i le Tusi Paia e avea ma ona pule, ma e faapena foi ma le mekasini ua fai ma ona soa o le Awake! Ona o lea, ua faamaonia ai o nei mekasini ua avea ma faamafanafanaga ma faalaeiauga i ē o faitau i ai.

[Ata i le itulau 23]

O le Atua o faamafanafanaga uma o Ia foi o le Faafofoga Tatalo