Fesili Mai Le Au Faitau

Ua fai mai le Efeso 3:14, 15 e faapea o le Atua “ua faaigoaina ai le aiga uma o i le lagi atoa ma le lalolagi.” Pe e iai ni aiga i le lagi, ma pe o lona uiga ea ua maua mai ia Ieova igoa o aiga taitasi o tagata?

E leai ni aiga i le lagi e pei ona iai i le lalolagi, e iai se tamā, se tinā, ma se fanau—e faiā i latou uma o le tasi i le isi i se auala faaletino. (Luka 24:39; 1 Korinito 15:50) Na faailoa manino mai e Iesu faapea e lē faaipoipo agelu, ma e leai lava ma se faamatalaga o faapea mai ai e iai se auala latou te fanauina mai ai ni fanau.—Mataio 22:30.

E ui i lea, ua tautala le Tusi Paia i se auala faafaatusa faapea ua faaipoipo atu Ieova le Atua i lana faalapotopotoga faalelagi; ua faaipoipo o ia i se uiga faaleagaga. (Isaia 54:5) O lena faalapotopotoga faalelagi ua ia fanauina mai fanau, e iai agelu. (Iopu 1:6; 2:1; 38:4-7) I lenei la uiga, ua iai ai se aiga matagofie faaleagaga i le lagi.

E lē gata i lena, ua faagasolo ona atiaʻe i le lagi se aiga faafaatusa fou, e aofia ai Iesu Keriso ma lana faatoafaiava faalefaapotopotoga, o le 144,000. (2 Korinito 11:2) O le toatele o nei tagata faauuina ua maliliu ua iai so latou faamoemoe i le olaga faalelagi. O nisi o loo soifua pea i le lalolagi. O loo vaavaai atu ma le naunautai i latou uma i le ‘faaipoipoga [faalelagi] a le Tamai Mamoe.’ Ua faafesootai atu e le Tusi Paia lena faaipoipoga i le taimi o loo fotuai mai ai le puapuaga tele—le faaumatiaga o Papelonia le Aai Tele, ma sosoo ane ai ma le tafiesea o le vaega faaiu o le faiga o mea a Satani.—Faaaliga 18:2-5; 19:2, 7, 11-21; Mataio 24:21.

E tusa ai i aiga faalelalolagi, e lē o faailoa maia e le aposetolo o Paulo i le Efeso 3:15 faapea e maua tuusaʻo mai ia Ieova igoa o aiga taitasi uma lava. Nai lo lea, e manino mai na manatu Paulo i gafa o aiga o loo faaolaolaina mai pea se igoa. Ua aumaia i le Iosua 7:16-19 se faaaoaoga. O iina na faailoa mai ai i lumāmea e Ieova le agasala a Akana. Muamua, sa faaautū pe na taulai tonu atu le tulaga nofosala i le ituaiga o Iuta. Ona taulai atu lea i le aiga o sa Serā. Mulimuli lava, na faaalialia ai loa le aiga o Akana. O Akana faatasi ma lana avā ma le fanau na manatu i ai pe na taʻua o le vaega o le auaiga (po o le aiga) o Sapata, le tamā o le tamā o Akana. O le aiga lena na iu ane ina avea ma se vaega toatele na faaolaolaina le igoa o lo latou tupuaga o Sera.

I tagata Eperu, o gafa o auaiga sa tāua tele, o le toatele na taʻuina mai i le Tusi Paia igoa. Na lagolagoina e le Atua le faaolaolaina o lo latou igoa i le faia o se sauniuniga pe a tatau ai o le faaipoipo atu o le uso o lē ua maliu i le avā a lē ua maliu ina ia maua ai ni suli e faatumauina ai le igoa o le aiga.—Kenese 38:8, 9; Teuteronome 25:5, 6.

O se isi faaaoaoga o se aiga toatele faapea, seʻi manatu ia Iesu i le avea ma atalii o Tavita. Sa lei avea moni o ia o se fanau tuusaʻo mai a le tupu o Tavita, ma na faatoʻā fanau mai ina ua mavae le tele o senituri o le maliu o Tavita. Ae peitai, o se faailoga vaaia e iloa ai le Mesia sa faapea e tatau ona sau o ia mai le aiga o Tavita, e pei ona sa iloa lautele ai e tagata Iutaia. (Mataio 22:42) Sa fanau mai Iesu i le gafa o Tavita e ala uma mai i lona tinā ma lona tamā fai.—Mataio 1:1; Luka 2:4.

Ae na faapefea ona maua mai e na aiga o latou igoa mai ia Ieova? O le mea moni e faapea sa iai ni taimi—e pei o le tulaga o Aperaamo ma Isaako—ina ua faaigoa moni mai e Ieova se ulu o se aiga. (Kenese 17:5, 19) O ni tulaga ia e lē masani ai. O le tele lava o tulaga, e lē avatua e Ieova i aiga taitasi le igoa lea e tuuina atu i fanau.

Ae ui i lea, sa amataina e Ieova le lio faaleaiga ina ua poloaiina Atamu ma Eva ina ia “fanafanau . . . ma ia uluola, ma ia tumu ai le lalolagi.” (Kenese 1:28) Na faatagaina foi e Ieova ia Atamu ma Eva lē lelei atoatoa e fanauina mai ni fanau, ma faapea ona faataatia ai se galuega tele mo aiga faaletagata uma lava. (Kenese 5:3) O lea la, i le sili atu i le tasi se uiga, e mafai ai ona taʻua le Atua o Lē na Faaigoaina ai aiga uma lava.

O le tele o aganuu i aso nei ua lē o toe lagonaina le manaoga ia tausisia pea mo o latou tupulaga ia igoa o o latou aiga. E ui i lea, i atunuu uma lava, ua faafetai ai Kerisiano ia Ieova mo le fuafuaga o le aiga ma ua āva ia te ia i le galulue mamafa ia faamanuiaina le fusi o o latou aiga taitoatasi.