Na Latou Faia le Finagalo o Ieova

Mose ma Arona—O Ē Faalauiloa ma le Lototele le Afioga a le Atua

SEʻI faaata i lou mafaufau le vaaiga: O Mose ua valusefulu ona tausaga ma lona uso o Arona o loo tutū i luma o le tagata ua sili ona taʻutaʻua i le lalolagi—o Farao i Aikupito. I manatu o tagata Aikupito, o Farao ua sili atu nai lo le avea ma sui o atua. Ua latou talitonu o ia o se atua. Ua manatu ia te ia o foliga ia ua toe fanau mai ai Huro, o se atua e ulu i nesa (le manu e pei se aeto). I le faatasia ma Isis ma Osiris, ua avea ai Huro o le tolutasi autū i atua o Aikupito faapena ma ona atua fafine.

O so o se tasi e faalatalata atu ia Farao, e manino lava lona iloa atu o le faailoga taufaamataʻu o le ulu o se gata o aliali mai i le ogatotonu o lona palealii. O lenei gata sa manatu i ai e faapea, e mafai ona ia luaiina mai le afi ma le faafanoga i so o se fili o Farao. Ae ua tatau nei ona ō atu Mose ma Arona i luma o lenei tupu ua avea foi ma atua ma se talosaga sa lei faapea ona lagā muamua—ina ia ona tuuina atu Isaraelu o loo faapologaina e ō ina ia latou faia se tausamiga i lo latou Atua o Ieova.—Esoto 5:1.

Ua uma ona valoiaina e Ieova e faapea o le a faamaaaina le loto o Farao. O lea, sa lei faateia Mose ma Arona i lana tali faamaualuga ane: “O ai ea Ieova ou te faalogo ai i lana upu, ma ou tuuina atu ai o Isaraelu e o? Ou te lei iloa Ieova, ou te le tuuina atu foi Isaraelu e o.” (Esoto 4:21; 5:2) Na saunia ai i lea mea se fetaiaiga mataina. I le isi feiloaiga na sosoo ai, na tuuina atu ai e Mose ma Arona le faamaoniga ofoofogia ia Farao e faapea o i laua o sui o le Atua moni ma lē ona le malosi uma lava.

Ua Faia se Vavega

E pei ona sa faatonuina e Ieova, na faia ai e Arona se vavega na faapea ona faamaonia ai le silisili ese o Ieova i atua o Aikupito. Sa togi e Arona lona tootoo i luma o Farao, ma avea ai lava i lena taimi ma gata lapoa! I le ofo i lenei vavega, na faapotopoto ai e Farao ana ositaulaga faataulaitu. * Na fesoasoani atu temoni i nei tamaloloa ma mafai ai foi ona latou faaliu gata o latou tootoo.

Pe a meia Farao ma ana ositaulaga, sa mo na o sina taimi. Seʻi manatu i o latou foliga a o foloina taitasi e le gata a Arona a latou gata! O i latou uma na iai sa mafai ona latou iloaina atu ai sa lē taitai ona tutusa atua o Aikupito ma le Atua moni o Ieova.—Esoto 7:8-13.

E ui i lea, ina ua mavae lea mea, sa faamaaaina pea le loto o Farao. Ina ua uma ona faaooina mai e le Atua ta matautia po o mala e sefulu i luga o Aikupito, ona faatoʻā fai ai loa lea o Farao ia Mose ma Arona e faapea: “Ina tutū ia, o ese atu ia i loʻu nuu, oulua atoa ma le fanauga a Isaraelu, o atu ia outou, ma auauna ia Ieova, faapei ona oulua fai mai [ai].”—Esoto 12:31.

O Lesona mo i Tatou

O le ā na mafai ai ona ō atu Mose ma Arona i le Farao sa sili ona tāua o Aikupito? I le taimi muamua, na faaleo atu ai e Mose le leai o sona mautinoa i lona tomai, i le faapea atu “ua le matala loʻu gutu, ua le matala foi loʻu laulaufaiva.” E ui lava ina ua maeʻa ona faamautinoa atu lona mauaina o le fesoasoani a Ieova, ae na ia ole atu e faapea: “A ē alofa, le Alii e, ia e auina atu se tasi e tatau ona e auina atu ai.” O se isi faaupuga, na augani atu Mose e faapea ina ia auina atu se isi tagata ae e lē o ia. (Esoto 4:10, 13) E ui i lea,  na faaaogaina e Ieova ia Mose o le tagata agamalu, i le foaiina atu ia te ia o le atamai ma le malosi na manaomia ina ia faataunuuina ai lona tofiga.—Numera 12:3.

I aso nei, o loo faataulauina ai e auauna a Ieova le Atua ma Iesu Keriso le poloaiga ia “fai nuu uma lava ma soo.” (Mataio 28:19, 20) Ina ia fai la tatou vaega i le faataunuuina o lenei poloaiga, e tatau ona tatou faaaogaina lelei lo tatou poto i le Tusi Paia ma so o se tomai lava o ia i tatou. (1 Timoteo 4:13-16) Nai lo le taulai atu i lo tatou lē agavaa, seʻi o tatou taliaina i la le faatuatua so o se tofiga e faapea ona foaiina mai e le Atua ia i tatou. E mafai ona ia faaagavaaina ma faamalosia i tatou ina ia faia lona finagalo.—2 Korinito 3:5, 6; Filipi 4:13.

Ona e talu ai sa feagai Mose ma tagata ma faapena ma teteega faatemoni, sa manaomia moni lava e ia le fesoasoani e sili atu nai lo le tagata. O le iuga, na faamautinoa atu Ieova ia te ia e faapea: “Faauta mai, ua ou tofia oe e fai ma Atua ia Farao.” (Esoto 7:1) Ioe, sa ia Mose le lagolagosua tauatua ma le pule. I le faatasi ai o le agaga o Ieova ia te ia, sa leai se mafuaaga e fefe ai Mose ia Farao po o ʻau a le tupu faamaualuga.

E tatau foi ia i tatou ona tatou faalagolago atu i le agaga paia o Ieova po o le malosi galue, ina ia faataulauina ai la tatou faiva. (Ioane 14:26; 15:26, 27) Faatasi ai ma le lagolagosua tauatua, e mafai ai ona tatou faaleo atu upu a Tavita, o lē na pese e faapea: “Ua ou faatuatua i le Atua; ou te le fefe i se mea e faia e tagata ia te au.”—Salamo 56:11.

I le faaalia o lona alofa, sa lē tuua ai e Ieova na o Mose i lana tofiga. Nai lo lena, na fetalai atu le Atua: “O lou uso foi o Arona, e fai o ia ma perofeta ia te oe. E te fai atu mea uma lava ou te fai atu ai ia te oe; e tautala atu foi lou uso o Arona ia Farao.” (Esoto 7:1, 2) Maeu se agaalofa o Ieova i le fesoasoani atu e tusa ai ma tapulaa o tulaga sa mafai ona faafoeina lelei e Mose!

Ua saunia mo i tatou e le Atua se aufaatasiga o uso Kerisiano o ē taliaina le luʻi o le avea ma Molimau a Ieova, Lē Silisili ese. (1 Peteru 5:9) O lea la, e tusa lava po o ā toatugā o tatou feagai, ae ia tatou pei o Mose ma Arona—o ē na faalauiloa ma le lototele le afioga a le Atua.

[Faaopoopoga i lalo]

[Ata i le itulau 25]

Na faailoa atu ma le lototetele e Mose ma Arona i laua o ni sui o Ieova i luma o Farao