Na Latou Potopoto o ni ē Vivii ma le Olioli

NA FAATONUINA tagata anamua o Ieova le Atua ina ua faapotopoto mo le tapuaiga, ina ia “olioli ai lava.” (Teuteronome 16:15) O Tauaofiaga Itumalo “O Ē Vivii ma le Olioli” o le 1995 ma le 1996 ua mautinoa le avatua ai i Molimau a Ieova o mafuaaga lelei mo le olioli.

Talu ona amataina nei faasologa o tauaofiaga, ua atiina aʻe ai le faatuatua. Ua faaalia mai ai foi le auala e mauaina ai le olioli i se lalolagi lē fiafia. Seʻi o tatou iloiloina aso taitasi o le tauaofiaga.

ʻIa Outou Vivii atu ia Ieova . . . Ia Olioli!’

O le matua o loo i luga o le aso muamua o le tauaofiaga sa faavae mai i le Salamo 149:1, 2. O le lauga “Ua ia i Tatou Mafuaaga e Alalaga ai ma le Olioli” na iloiloina ai le faatatauga o le valoaga i le Isaia mataupu e 35. Sa iai se faataunuuga i Isaraelu anamua ae ua faapitoa lava i o tatou aso i le toe faafoisia o tagata tapuai o Ieova i le manuia ma le soifua mālōlōina lelei i se parataiso faaleagaga. Na maua ai la e le au usufono se mafuaaga e alalaga ai i le olioli i mea ua fuafuaina e le Atua mo ona tagata i se parataiso faaleagaga ma le Parataiso faaletino o loo fotuai mai ua matuā latalata mai lava.

O le lauga autū o lea aso, “Ia Vavaeese e Avea ma Ē Vivii ma le Olioli i le Lalolagi Aoao,” na taliina ai le fesili e faapea: O le ā ua na faaesea i tatou mai lenei lalolagi? O la tatou tapuaiga autasi ia Ieova. Po o fea lava o ola ai Molimau a Ieova i luga o lenei lalolagi, latou te tautatala ma aʻoaʻo i se tulaga autasi. Ua latou olioli foi, i le fuafuaga sili a Ieova e faapaiaina lona suafa paia ma faamaonia le tonu o lana pule silisili ese e ala i lona Malo. E faapefea la ona fesoasoani mai Ieova ia i tatou ina ia fai ai sa tatou vaega i lana fuafuaga? Ua ia faatuatuaina mai ia i tatou le upu moni o lana Afioga paia. Ua aumaia e le Atua ia i tatou lona agaga paia. Ua ia faamanuiaina i tatou i se auuso i le lalolagi aoao ma se fuafuaga mo le tapuaiga moni. Ua fesoasoani mai lo tatou aiga faavaomalo ia i tatou ina ia auauna ia Ieova ma le olioli tele o le loto.

Na faamamafaina mai e le lauga “Faaauau ona Vavaeese ma ia Lē Pisia Mai le Lalolagi” le manaoga ia alofia le pisia i uiga faailoga tagata ma le faaituau. (Iakopo 2:5-9) O nisi atonu o loo faifaimea lava na o i latou e tutusa o latou talaaga po o le tulaga tau tupe, ae faagaloina ai uso Kerisiano e matitiva pe faalētaualoa. O isi atonu e māfuli atu e faaituau ia i latou o loo iai tulaga o tiute tauave i le faapotopotoga. E galo ia i latou o le faaeaga silisili e mafai e so o se tasi ona maua o le avea lea o se Molimau a Ieova. O lona uiga la, e lē tatau ona tatou faatagaina uiga faalelalolagi e pisia ai i tatou ma faagaepu ai le filemu o le faapotopotoga.—2 Peteru 3:14.

O le lauga “Pe ua Ou Nofo Sauni ea e Faaipoipo?” na faasino mai ai le toatele ua vave ona ulu atu i le faaipoipoga. O nisi ua faaipoipo ina ia sola ese ai mai faafitauli faigata i le aiga pe ona ua faaipoipo foi a latou aumea. E ui i lea, o mafuaaga tatau mo faaipoipoga e aofia ai se faanaunauga o i laua uma ia tuliloaina ni sini faatiokarate, ona o le alofa moni, se manaoga mo se paaga ma mo le saogalemu, ma le faanaunauga ina ia faia ni fanau. E manaomia ai tele le toleniga faaleagaga i sauniuniga mo le faaipoipoga. O se isi mea e aofia ai, o loo iai se manaoga ina ia atiina aʻe uiga moomia e ala i le ofuina o le tagata fou. O se mea poto foi le faamautinoa po o iai moni i le paaga o le a faaipoipo i ai faamaoniga o le ia te ia o se faiā moni ma Ieova ma feutagai ma le faaaloalo ma isi. O  le sailia o fautuaga mai Kerisiano matutua o se mea poto foi lea.—Faataoto 11:14.

O lea talanoaga faamalamalama sa mulimuli mai ai se lauga o lona matua o “Mātua ua Olioli Ona o A Latou Fanau.” O le fanau mai o se tamaitiiti e masani ona avea o se taimi o le olioli tele. Ae peitai, o le faia o fanau e aumaia ai foi se tiute tauave mamafa. (Salamo 127:3) O lea, e tāua tele ai le aʻoaʻo o tamaiti ina ia alolofa ia Ieova. E mafai e mātua ona faia lenei mea i le talanoa atu e lē aunoa i a latou fanau e uiga ia Ieova ma faatatauina mataupu silisili o lana Afioga i totonu o le aiga.

O le aso muamua o le tauaofiaga na faaiuina i se mea e faateia ai—le tatalaina o le polosiua fou Molimau a Ieova ma Aʻoaʻoga. Ua faamatala manino mai ai e faapea “e faalaeiauina [e Molimau] a latou fanau iti ina ia galulue ma manatu mamafa i galuega e tofiaina atu ia i latou i le aʻoga.” Ua faamatala mai foi e lenei lomiga iuga mataina o vasega e aʻoaʻoina ai le faitau ma le tusitusi ua faia e Molimau a Ieova mo le tele o tausaga i Nigeria, Mekisikō, ma isi atunuu. E tatau ona fesoasoani le polosiua i faiaʻoga ina ia o latou iloa ai o loo tatou faatāuaina tele aʻoaʻoga.

ʻIa Avatu Soo le Taulaga o le Viiga i le Atua’

O le matua o loo i luga o le aso lona lua sa faavae i le Eperu 13:15. O le polokalame i le taeao na aumaia ai se faasologa o lauga i le “Tali Atu i le Valaau e Vivii ia Ieova.” E lē faapitoa ni tausaga o ē e tali atu i lenei valaau. Ua uunaia e le Salamo 148:12, 13 ia taulelea, teine, o toeaina atoa ma tama ina ia vivii atu ia Ieova. O le toatele o auauna olioli a Ieova ua mafai ona faateleina la latou viiga. I le lalolagi aoao, e sili atu i le 600,000 ua auai i le galuega talaʻi faataimi atoa, po o le auaunaga paeonia. E sili atu i le 15,000 ua auai i le galuega paeonia faapito, ma e i luga atu o le 15,000 ua i le auaunaga i Peteli.

Sa faaalia mai e le lauga “Auauna Pea ma le Faamaoni Faatasi ma le Faalapotopotoga a Ieova” e faapea e tāua tele le faamaoni mo auauna a le Atua. Ina ia faamaoni ia Ieova o lona uiga ia piiama atu ia te ia faatasi ma se tuutoina atu malosi e galue e pei o se kelū faapipii e malosi tele. O le faamaoni e manaomia ai le alofia o le solia ma le loto i ai o faatonuga a le Tusi Paia, pe vāai mai isi ia i tatou pe leai. E moomia ai foi lo tatou lagolagoina ma le faamaoni o aʻoaʻoga a le Tusi Paia o loo maua i mekasini o Le Olomatamata ma le Awake! faapena foi ma isi meaʻai uma faaleagaga ua saunia mai e le Sosaiete o le Olo Matamata. Na sosoo mai ai ma le lauga o le papatisoga. E maeu se olioli na iai ina ua faamaoniaina mai e sui papatiso lo latou tuuina atu ia Ieova!

O upu a le Hosea 4:1-3 na faatulagaina ai le auala na fai ai le lauga o le aoauli “Amio Mamā po o le Amioleaga—O lē Fea o E Sailia?” E ui lava ina paʻū le tulaga ua vaai ai le lalolagi i le amio mamā, ae tatau i Kerisiano ona “matuā faamalosi” ina ia sailia ai le tulaga silisili ona lelei tauamio. (2 Peteru 1:5) E amata lenei tulaga i le auala e mafaufau ai se tagata. Afai e lelei ona manatunatuga, o le a ia tautala foi i mea mamā, lelei, ma upu e atiaʻe ai, ma o le a tauivi ina ia faamaoni i ana feutagaiga ma isi. O le sailia o le amiolelei e aofia ai foi le tauivi ina ia malamalama ma alofa mutimutivale agaʻi i se uso Kerisiano o loo pagatia i se puapuaga po o se mafatiaga o le mafaufau.—1 Tesalonia 5:14.

O le isi lauga, “Leoleo Faasaga i Mailei a le Tiapolo,” na lapataia ai Kerisiano i le faaaafia o i latou i taaʻiga faatemoni. I le togafitia o maʻi, e manaomia ai i Kerisiano ona mataala i faiga, e pei o le faasioa, lea e aafia ai i faiga faataulaitu. A o gaoioiga a le tagata lava ia e puipuia ai lona soifua mālōlōina faaletino, e fitoitonu lava lea ia te ia.

O le aso lona lua na faaiuina i se mea e sili ona olioli tele ai e faateia ai—le tatalaina o le tamai tusi fou e ofi i le taga na saunia e fesoasoani ai i tagata loto faamaoni ia agaigai vave i luma i le tuuina atu ma le papatisoga. O lenei tusi fou e 192 itulau ua faaulutalaina o Le Poto e Taʻitaʻia ai i le Ola e Faavavau. Ua folasia mai e le tusi o le Poto ia le upu moni i se auala e atiina aʻe ai. E lē o talanoaina umi ai le pepelo  o aʻoaʻoga sese. O le manino o le gagana ma lona faagasologa lelei e ao ona faafaigofie ai ona faaaogā lenei tusi e fai ai suesuega faale-Tusi Paia ma fesoasoani ai i tagata ia latou maua le poto faamafanafana loto o le Atua.

“Ia Outou Olioli ma Fiafia e Faavavau”

O nei upu mai le Isaia 65:18 sa avea ma matua o le aso lona tolu o le tauaofiaga. O le faataunuuga o le valoaga a le Tusi Paia ua faasino atu i le 1914, le tausaga lea na ulu atu ai lenei faiga amioleaga o mea i ona aso mulimuli. O lea, o lauga faasolo na faaulutalaina “O Ē Vivii ma le Olioli i Vaitaimi Faaiuiu o Lenei Faiga o Mea” na matuā tosina mai ai le faalogo a le aofia. Na faaalia e le au failauga le auala ua matuā aafia ai le faitau piliona o tagata i le matapeapea ma le agaga sauā o le lalolagi. Ae e iai le taimi, o le a faamasinoina ai i latou o se vaega o le lalolagi lea e pule ai Satani. O lea, o le taimi lava lenei e faia ai se filifiliga. O lē fea itu tatou te mananao ia tatou iai? Pe tatou te mananao e tapuai ia Ieova ma faasilisilia lana pule silisili ese, pe o le a tatou faatagaina Satani e avea ma o tatou pule i le faia o mea e fiafia i ai o ia? E tatau ia i tatou uma lava ona tatou iai atoatoa i le itu a Ieova.

 O le lauga lautele o le tauaofiaga, “Vivii atu i le Tupu o le Vavau!” na avatua ai i le aofia meaʻai aano e mafaufau i ai. E ui lava o le manatu i le faavavau e foliga mai e mamao lava ma le malamalamaga o tagata, ae ua matuā malamalama lelei i ai Ieova. Na pese le faisalamo e faapea: “O Ieova o le Tupu ia e faavavau faavavau lava.” (Salamo 10:16) O lenei Tupu o le vavau ua ia tatalaina mai mo tagata le auala e olioli ai i le ola e faavavau e ala i lona Alo, o Iesu Keriso. (Ioane 17:3) Na faapea mai le failauga: “Ioe, e mafai e i tatou o tagata agasala ona maua le ola e faavavau e ala i aʻoaʻoga mai le Atua ma le faatuatua i le taulaga togiola a Iesu.”

A o faasolo ina faaiuina le tauaofiaga, na faalaeiauina i latou na auai i le lauga mulimuli o lona matua e faapea “O loo Vivii ma le Olioli ia Ieova i Aso Uma.” Sa faafiafia loto le mauaina o tala i le agaigai i luma o le galuega o le faia ma soo i le lalolagi aoao. Ma na faagaeeina ai le au tauaofia e ‘faamanū ia Ieova i le aso atoa ma vivii i lona suafa e faavavau.’—Salamo 145:2.

 O gaoioiga lē mafaamatalaina o faiga sauā ua aveesea ai le olioli o le lalolagi. E ui i lea, o i latou taitoatasi o loo iai le faatuatua atoatoa ia Ieova e mafai ona latou maua le olioli faaleatua. Ua faapea ai ona mafai e Molimau a Ieova o se auuso i le lalolagi atoa ona toe taʻua upu o loo mulimuli mai o le Salamo 35:27, 28 e faapea: “Ia pepese ma taufaiolioli o e loto i laʻu amiotonu; ia fai ane pea lava i latou, Ia viia Ieova, o le ua finagalo ia manuia lana auauna. E taʻutaʻu atu foi loʻu laulaufaiva i lau amiotonu, ma vivii atu ai ia te oe i le aso atoa.”

[Ata i le itulau 7]

O le a maua e aiga aogā mai le polosiua “Molimau a Ieova ma Aʻoaʻoga”

[Ata i le itulau 8, 9]

O le tusi fou, “Le Poto e Taʻitaʻia ai i le Ola e Faavavau,” ua na aumaia upu moni o le Tusi Paia i se auala e atiaʻe ai

[Ata i le itulau 9]

E toatele na papatisoina e faailogaina ai lo latou tuuina atu ia Ieova

[Ata i le itulau 9]

Na uunaia loloto le au usufono i le tala “Ia Āva i Ē ua Tatau i ai i O Latou Tausaga Matutua”