Le Malo o le Atua—Po o E Lagona ea Lona Uiga Moni?
Le Malo o le Atua—Po o E Lagona ea Lona Uiga Moni?
“A o le mea sa luluina i le eleele lelei, o ia lea ua faalogo i le upu, ma ia lagona le uiga moni.”—MATAIO 13:23, NW.
1. O ā nisi o talitonuga taatele e tusa ai o ‘le malo o le lagi’?
PE UA e ‘lagona ea le uiga moni’ o le Malo o le Atua? O manatu e faatatau i ‘le malo o le lagi’ ua matuā eseese a o faagasolo le tele o senituri. O se talitonuga taatele i tagata lotu i aso nei e faapea, o le Malo o se mea ua tuu e le Atua i totonu o le loto o se tagata i le taimi e liu lotu ai. O isi e lagona faapea o se nofoaga e ō atu i ai tagata lelei pe a feoti ina ia olioli ai i le parataiso e faavavau. Ae o loo manatu lava foi nisi e faapea ua tuu atu e le Atua i tagata ina ia aumaia le Malo i le lalolagi, e ala i a latou galuega e faamausalīina ai aʻoaʻoga ma faiga faa-Kerisiano i totonu o mataupufai a tagata lautele ma mataupufai faalemalo.
2. E faapefea ona faamatalaina e le Tusi Paia le Malo o le Atua, ma o le ā o le a ia faataulauina?
2 Peitai ane, ua faaalia manino mai e le Tusi Paia e faapea, o le Malo o le Atua e lē o se faalapotopotoga i le lalolagi. E lē o se tulaga foi o le loto, e lē o se faa-Kerisianoina foi o le olaga masani o tagata. E moni, o le malamalamaga saʻo o le uiga o lenei Malo e taʻitaʻia atu ai i ni suiga tetele i olaga o i latou o ē faaalia i ai le faatuatua. Peitai o le Malo lava ia o se pulega faalelagi na faavaeina e le Atua, lea e aumaia ai le finagalo o le Atua, e ala i le tafiesea o aafiaga o le agasala ma le oti ae toe faafoisia tulaga amiotonu i luga o le lalolagi. Ua maeʻa ona faatūina le pule a lenei Malo i le lagi, ma ua lē o toe umi ae ia “tuʻimomomoina ma faaumatia ia malo [faaletagata] uma lava, a o ia e tumau lava e faavavau.”—Tanielu 2:44; Faaaliga 11:15; 12:10.
3. Ina ua amata e Iesu lana faiva, o le ā na tatala atu ai mo tagata?
3 Na tusi le tusitala o H. G. Wells e faapea: “O lenei aʻoaʻoga i le Malo o le Lagi, lea sa avea ma aʻoaʻoga autū a Iesu, ma e itiiti lava sona aafiaga i talitonuga faavae faa-Kerisiano, e mautinoa lava o se tasi o aʻoaʻoga e sili ona tetele suiga na te faia, ua faagaepu pe suia ai mafaufauga faaletagata.” Mai lava i le amataga, o le matua o le faiva a Iesu e faapea: “Ina salamo ia outou; auā ua latalata mai le malo o le lagi.” (Mataio 4:17) Sa iai o ia iinei i le lalolagi o se Tupu faauuina, ma o le olioli sili lava, o le avanoa ua tatala mai nei mo tagata e lē gata ina ia latou maua ai faamanuiaga o lea Malo ae ia avea foi ma pule lagolago ma ositaulaga faatasi ma Iesu i lea Malo!—Luka 22:28-30; Faaaliga 1:6; 5:10.
4. I le uluai senituri, na faapefea i le vao o tagata e toatele ona tali atu i le “tala lelei o le malo,” e taʻitaʻiina atu ai i le ā le faamasinoga?
4 E ui ina sa iloa e le vao o tagata e toatele le “tala lelei o le malo” lea e faafiafiaina ai loto, ae sa na o se vaega toaitiiti na talitonu. O se tasi o mafuaaga talu ai na taumafai taʻitaʻi lotu e “pupuni le malo o le lagi i tagata.” Na latou ʻave ese le ki o le malamalama e ala i a latou aʻoaʻoga sese. Talu ai o le toatele o tagata sa latou teena Iesu e avea ma Mesia ma o le Tupu faauuina o le Malo o le Atua, na fetalai atu ai Iesu ia i latou: “E aveesea le malo o le Atua ia te outou, a e tuuina atu i se nuu e au mai ai ona fua.”—Mataio 4:23; 21:43; 23:13; Luka 11:52.
5. Na faapefea i le toatele o i latou o ē na iloa talafaatusa a Iesu ona faaalia atu sa latou lei faalogo ma malamalama?
5 A o aʻoaʻo atu Iesu i se aofia toatele i se tasi taimi, na ia faaaogā ai e tusa ai o lana masani, se faasologa o talafaatusa ina ia tofotofo ai le aofia e toatele ma vavae ese ai i latou o ē sa pepelo lo latou naunau i le Malo. O le talafaatusa muamua sa aofia ai le tagata lulu saito o lē na ia luluina saito i ituaiga e fa o eleele. O ituaiga muamua e tolu sa lē lelei mo le ola aʻe o laau, ae o le ituaiga mulimuli o se “eleele lelei” lea na te fuaina mai fua lelei. Na faaiu le talafaatusa puupuu i le timaʻiga: “O le ua i ai taliga, ina faalogo mai ia o ia.” (Mataio 13:1-9) O le toatele o i latou na auai sa latou iloa mea na ia fetalai ai, peitai sa latou lei “faalogo.” Sa leai se uunaiga o o latou loto, leai se naunau moni e fia iloa pe na faapefea ona faatusatusa atu le luluina o saito i tulaga eseese, i le Malo o le lagi. Sa latou toe foi atu i o latou aiga ma toe fai o latou lava olaga e masani ai, atonu sa mafaufau o talafaatusa a Iesu e tutusa ma ni tala mālie o aumai ai ni aʻoaʻoga tauamio. Maeu se malamalama sili ma e maeu ni faaeaga ma ni avanoa tetele na latou lē taulau ona mauaina ona o le leai o ni loto talisapaia!
6. Aisea na foaiina atu ai ia iloa “mea lilo o le malo” i na o soo o Iesu?
6 Na fetalai atu Iesu i ona soʻo: “Ua foaiina atu ia te outou ia outou iloa mea lilo o le malo o le lagi, a ua le foaiina atu ia te i latou.” I le sii mai o upu a Isaia, na ia fetalai atu atili: “Auā ua mafiafia loto o lenei nuu, ma ua faalogo gata o latou taliga i faalogo, ua moeiini foi o latou mata; neʻi vaai o latou mata, ma faalogo o latou taliga, ma lagona i o latou loto le uiga moni, ma liliuina i latou, ma ou faamaloloina i latou. Amuia o outou mata, auā ua vaavaai; ma o outou taliga, auā ua faalogo.”—Mataio 13:10-16, NW; Mareko 4:11-13.
ʻIa Lagonaina le Uiga Moni o’ le Malo
7. Aisea e tāua ai le ‘lagonaina o le uiga moni o’ le Malo?
7 Na faasino saʻo atu e Iesu le faafitauli. Sa aafia ai le ‘lagonaina o le uiga moni o’ le feau o le Malo. Na ia fetalai atu i na o ona lava soʻo: “ʻO lenei, ina faalogologo mai ia outou i le faataoto i le tagata lulu saito. A faalogo se tasi i le upu o le malo, a e le lagona, ona alu ane ai lea o le ua leaga, ua fao le mea sa luluina i lona loto.” Na ia faaauau ona faamatala e faapea, o ituaiga e fa o eleele sa faailoa mai ai tulaga eseese o le loto lea o le a luluina i ai “le upu o le malo.”—Mataio 13:18-23; Luka 8:9-15.
8. O le ā na taofiofia le “saito” lea na luluina i ituaiga muamua e tolu o eleele mai le fuaina o ni fua?
8 Sa lelei lava le “saito” i tulaga uma, peitai o le fua mai o le a faalagolago atu i le tulaga o le eleele. Pe afai sa pei le eleele o le loto o se auala e pisi, e malō, sa faamaaaina ona o le tele o gaoioiga lē faale-Tusi Paia, o le a faigofie la mo lē o loo iloa le feau o le Malo ona faia ni ana faamolemolega, i le faapea mai sa leai sona taimi mo le Malo. O le saito ua tuulafoaiina e faigofie lava ona liaieseina a o lei mausalī ona aa. Ae faapefea pe a luluina le saito i se loto ua faatusaina i le eleele papa? Atonu e tatupu aʻe le saito, ae o le a faafaigata ona sosolo ifo i lalo ona aa mo le tausiaina ma le faamausalīina. O le faamoemoe o le avea ma auauna usiusitai a le Atua, ae maise lava i le aasa o sauāga, o le a aumaia ai se luʻi tele, ma o le a tausuai ai le tagata. Ma, afai foi o le eleele o le loto sa matuā tumu i popolega pei ni vaotuitui po o faanaunauga matapeapea i le oa, o le a mate ai la le laau o le Malo lea sa ola faalautagitagi. I nei tulaga tutusa e tolu i le olaga, o le a leai ai se fua o le Malo e fuaina mai.
9. Aisea na mafai ai e le saito na luluina i le eleele lelei ona fuaina mai fua lelei?
9 Peitai ane, ae faapefea le saito o le Malo lea na luluina i le eleele lelei? Ua tali mai Iesu: “A o le mea sa luluina i le eleele lelei, o ia lea ua faalogo i le upu, ma lagona [lona uiga moni, NW]; ua fua mai lava ia, e taiselau i nisi, e taionogafulu i nisi, e taitolugafulu foi i nisi.” (Mataio 13:23) O le ‘lagonaina o le uiga moni o’ le Malo, o le a latou fuaina mai ai fua lelei e tusa ai ma o latou tulaga taitoatasi.
O Tiute Tauave e Ō mai Faatasi ma le Malamalama
10. (a) Na faapefea ona faaalia e Iesu faapea o le ‘lagonaina o le uiga moni o’ le Malo e aumaia ai faamanuiaga ma tiute tauave? (e) Po o le poloaiga ea a Iesu ina ia ō atu e fai ni soo, sa faatatau atu i na o soo o le uluai senituri?
10 Ina ua uma ona tuuina atu isi talafaatusa e ono e faamatala ai vala eseese o le Malo, ona fesili lea o Iesu i ona soo: “Ua outou lagona [moni, NW] ea nei mea uma?” Ina ua latou tali mai “ioe,” ona ia fetalai atu lea: “O lenei, o tusiupu uma o e ua aʻoaʻoina i le malo o le lagi, e tusa i latou ma le matai o le aiga, ua au mai mea fou ma mea tuai mai lona tuugāoloa.” O aʻoaʻoga ma le toleniga na saunia e Iesu o le a atiina aʻe ai ona soo ia avea ma Kerisiano taʻumatuaina o ē mafai ona aumaia mai o latou ‘fale teu oloa’ se faaputuga tele e lē uma o meaʻai silisili faaleagaga. O le uiga tele o lenei mea e fesootai atu i le Malo o le Atua. Na faamanino atu e Iesu e faapea, o le ‘lagonaina o le uiga moni o’ le Malo o le a aumaia ai e lē gata i faamanuiaga ae faapea foi ma tiute tauave. Na ia poloai mai: “O lenei, ia outou o atu e fai nuu uma lava ma soo, . . . aʻoaʻo atu ia te i latou ia tausi i mea uma ua ou fai atu ai ia te outou; faauta foi, ou te ia te outou i aso uma lava, e oo lava i le gataaga o le lalolagi [“vaitaimi faaiuiu o le faiga o mea,” NW].”—Mataio 13:51, 52; 28:19, 20.
11. Ina ua oo mai i le 1914, o ā mea tutupu sa fesootai atu i le faavaeina o le Malo?
11 E pei ona folafolaina, ua faaauau pea ona faatasi mai Iesu i ona soo moni i le faasolo mai o senituri seia oo mai lava i le asō. I nei aso e gata ai, ua auauaʻi ai pea ona ia aumaia ia i latou le malamalama, ma ua ia tuuina atu foi ia i latou le tiute tauave mo le faaaogaina o le malamalama o loo faateleina o le upu moni. (Luka 19:11-15, 26) I le 1914, na amata ai ona faailoa vave mai ma le mataina mea tutupu o le Malo. I lena tausaga, sa lē gata ina “fanau” mai ai le Malo ua leva ona faamoemoe atu i ai, ae na amata ai foi le [“vaitaimi faaiuiu o le faiga o mea,” NW]. (Faaaliga 11:15; 12:5, 10; Tanielu 7:13, 14, 27) I le iloaina e Kerisiano moni o le uiga o mea fou o loo tutupu, ua latou faatinoina ai le galuega ua silisili i talafaasolopito, o le talaʻia o le Malo ma le galuega tau aʻoaʻo atu. Na valoia e Iesu lenei mea i le faapea mai: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.”—Mataio 24:14.
12. (a) O le ā le iuga o le molimau tele i aso nei e faatatau i le Malo? (e) I lenei lalolagi o le lē mautonu, o le ā le lamatiaga o loo iai mo Kerisiano?
12 O lenei molimau tele o le Malo ua oo atu i le silia ma le 230 atunuu. Ua iai foi le silia i le lima miliona o ni soo moni, o loo auai i lenei galuega, ae o loo aoaoina mai pea isi. Peitai pe afai tatou te faatusatusa atu le numera o soo i le aofaiga o tagata o loo ʻaināina le lalolagi e tusa ma le 5.6 piliona, ua manino mai ai, e pei lava o ona po o Iesu, o le vaega e sili ona toatele o tagata latou te lē o ‘lagonaina le uiga moni o’ le Malo. E pei ona valoia, e toatele e faatauemu ma faapea mai: “Ofea nei le folafolaga o lona afio mai?” (2 Peteru 3:3, 4) O le lamatiaga mo i tatou o Kerisiano, talu ai o o latou uiga lē popole, lē mautonu, ma le matapeapea i meafaitino, e mafai ona faasolosolo lemū ona aafia ai le auala tatou te manatu ai i o tatou faaeaga o le Malo. Ona o le siosiomia e tagata o lenei lalolagi, e faigofie ai lava ona tatou apoina mai nisi o o latou uiga ma faiga. Maeu le matuā tāua o lo tatou ‘lagonaina o le uiga moni o’ le Malo o le Atua ma pipii mau atu i ai!
Iloiloina o i Tatou Lava i le Fesootai atu i le Malo
13. E tusa ai ma le poloaiga e talaʻia le tala lelei o le Malo, e mafai faapefea ona tatou tofotofoina pe o tatou faaauau pea ona ‘faalogo’ ma le faautauta?
13 Na fetalai Iesu e faatatau i le vaitaimi o le seleselega o loo tatou ola ai e faapea: “E aauina atu e le Atalii o le tagata ana agelu, latou te faapotopotoina nai lona malo mea uma e tausuai ai ma ē amio leaga. Ona pupula ai lea o e amiotonu e pei o le la i le malo o lo latou Tamā. O le ua i ai taliga, ina faalogo mai ia o ia.” (Mataio 13:41, 43) Po o faaauau ea ona e ‘faalogo’ atu ma le agaga talileleia e usitaia le poloaiga ina ia talaʻia le Malo ma faia soo? Ia manatua, “o le mea sa luluina i le eleele lelei” ‘na faalogo i le upu ma lagona le uiga moni’ ma fuaina mai ai fua lelei.—Mataio 13:23.
14. Pe a tuuina mai faatonuga, e faapefea ona tatou faaalia o loo tatou ‘lagonaina le uiga moni o’ le fautuaga o loo tuuina mai?
14 Pe a faia suesuega totino ma auai i sauniga faa-Kerisiano, e tatau ona ‘faasaga atu o tatou loto i le faautauta.’ (Faataoto 2:1-4) Pe a tuuina mai fautuaga e faatatau i amio, i lavalava, i musika, ma faafiafiaga, e tatau ona tatou faatagaina e goto ifo i o tatou loto ma uunaia ai i tatou ina ia faia so o se fetuunaiga manaomia. Aua lava neʻi faifai manatu, fai faamolemolega, po o le musu e talilelei atu. Pe afai e moni le Malo i o tatou olaga, o le a tatou ola ai e tusa ma ana tapulaa ma folafola atu ma le maelega i isi. Na fetalai Iesu: “E le sao atu i le malo o le lagi i latou uma o e fai mai ia te au, Le Alii e, le Alii e; na o le na te faia le finagalo o loʻu Tamā o i le lagi.”—Mataio 7:21-23.
15. Aisea e tāua ai le ‘muai sailia o le malo ma le amiotonu a le Atua’?
15 O le faanaunauga faaletagata o le popole lea i mea e manaomia e pei o meaʻai, o lavalava, ma fale manaomia, peitai na fetalai Iesu: “A ia outou muai saili lona malo [le malo o le Atua] ma lana amiotonu; ona faaopoopoina atu lea o ia mea uma ia te outou.” (Mataio 6:33, 34) I le faatulagaina o mea e faamuamua, ia faamuamua le Malo i lou olaga. Ia faafaigofie lou olaga, ia faamalieina i mea e manaomia moni. O se mea valea le sailia ma faatumu o tatou olaga i gaoioiga o mea e lē o manaomia, atonu i le iai o se manatu e faapea o le faia o lenei mea e lē leaga, auā o nei mea atonu e lē o ni mea foi e leaga. E ui atonu e moni lena, ae o le ā o le a faia e le mauaina ma le faaaogaina o na mea e lē o matuā manaomia, i le faatulagaina o a tatou suesuega totino, le auai i sauniga faa-Kerisiano, ma le auai i le galuega talaʻi? Na fetalai Iesu e faapea, o le Malo e pei o se tagata faatauoa o lē na ia iloa se “penina tau tele, ona alu ai lea o ia, ua faatau atu ana mea uma, i le faatau aʻi mai.” (Mataio 13:45, 46) O le auala lenei e tatau ona tatou lagona ai e faatatau i le Malo o le Atua. E tatau ona tatou faataʻitaʻi ia Paulo, ae lē o Tema o lē na ia tuulafoaiina le faiva “ina ua manao [o] ia i lenei olaga.”—2 Timoteo 4:10, 18; Mataio 19:23, 24; Filipi 3:7, 8, 13, 14; 1 Timoteo 6:9, 10, 17-19.
“O Ē Amio Leaga e Le Fai mo Latou Tofi le Malo o le Atua”
16. O le a faapefea e le ‘lagonaina o le uiga moni o’ le Malo o le Atua ona fesoasoani ia i tatou e alofia amioga sese?
16 A o tupu tele pea amioga lē tatau i le faapotopotoga i Korinito, na tautala saʻo atu i ai Paulo: “Tou te le iloa ea, o e amio leaga e le fai mo latou tofi le malo o le Atua? Aua neʻi faaseseina outou; o e faitaaga, ma e ifo i tupua, ma e mulilulua, ma e tauātane, ma e faasotoma, ma e gaoi, ma e matapeapea, ma e onā, ma e agatele, ma e fao mea, e le fai mo latou tofi le malo o le Atua.” (1 Korinito 6:9, 10) Pe afai tatou te ‘lagonaina le uiga moni o’ le Malo o le Atua, o le a tatou lē faaseseina ai i tatou lava i le manatu faapea o le a faapalepale mai Ieova i nisi ituaiga o amioga lē tatau, pe afai lava e silasila mai o ia o loo tele pea a tatou mea e faia i le auaunaga faa-Kerisiano. O amioga lē mamā e lē tatau lava ona taʻua ia i tatou. (Efeso 5:3-5) Po o e tau iloa ea ua amata ona faasolosolo mālie ane i lou olaga nisi o mafaufauga po o faiga lē mamā a lenei lalolagi? Ia vave ona tafiesea mai i lou olaga! E matuā tautele le Malo, ua lē tatau ai ona lafoaia ona o nei mea.—Mareko 9:47.
17. I ā auala o le a mafai ai e le talisapaia o le Malo o le Atua, ona uunaia atili le lotomaulalo ma aveesea ai mafuaaga mo le faatausuai?
17 Na fesili soo o Iesu: “O ai ea e sili i le malo o le lagi?” Na tali atu Iesu e ala i le faatulai atu i o latou luma o se tamaitiiti ma fetalai atu: “E moni, ou te fai atu ia te outou, a le liua outou, ma avea ia pei o tamaiti, tou te le sao lava i le malo o le lagi. O lenei, o sē faamaulalo o ia ia te ia e pei o le tamaitiiti nei, e sili lea i le malo o le lagi.” (Mataio 18:1-6) O le faamaualuga, le pulepuletutū, le lē manatu mamafa, ma le solitulafono, o le a lē faia i totonu o le Malo o le Atua, o le a lē avea foi i latou ma tagatānuu o le Malo. Po o avea ea lou alofa mo ou uso, lou lotomaulalo, lou mataʻu amio Atua, e uunaia ai oe ina ia alofia le faatausuaiina o isi ona o lau amio? Pe e te tausisi lava oe i au “aiā tatau” e tusa lava po o le ā le aafiaga e ono aafia ai isi ona o lenei uiga ma le amio?—Roma 14:13, 17.
18. O le ā o le a iu i ai mo tagata usiusitai pe a faapogaia e le Malo o le Atua, Lona finagalo ina ia faataunuu “i le lalolagi e pei ona faia i le lagi”?
18 Ua lē o toe mamao, ona tali atoatoa mai lea o lo tatou Tamā faalelagi, o Ieova, i le tatalo faatauanau: “Ia oo mai lou malo, Ia faia lou finagalo, I le lalolagi e pei ona faia i le lagi.” Ua toeitiiti nei, ona afio mai lea o le Tupu o loo nofotupu nei, o Iesu Keriso, o lona uiga, o le tietie i lona nofoalii faamasino, ina ia tuueseese “mamoe” mai “ʻoti.” Pe a oo i lena taimi atofaina, “ona fai atu ai lea o le Tupu i e o i lona itu taumatau, O mai ia, o outou ua faamanuiaina e loʻu Tamā, ia fai mo outou tofi le malo ua saunia mo outou talu ona faavaeina le lalolagi.” O ʻoti o le a “o atu . . . nā i le sala e faavavau; a o e amiotonu e o atu i le ola faavavau.” (Mataio 6:10; 25:31-34, 46) O le a faamamāeseina e “le puapuaga tele” le faiga tuai o mea ma ē uma e mumusu e ‘lagonaina le uiga moni o’ le Malo. Ae o le faitau miliona o ē faasaoolaina mai le “puapuaga tele” ma le faitau piliona o ē o le a toe faatutūina aʻe, o le a fai ma o latou tofi faamanuiaga o le Malo e faavavau, i le Parataiso faalelalolagi ua toe faafoisia. (Faaaliga 7:14) O le Malo o le pulega fou o le lalolagi, e pule mai le lagi. O le a faaauau atu ai le atoaga o fuafuaga a Ieova mo le lalolagi ma tagata, o nei mea uma e mo le faapaiaina o lona suafa e silisili ona paia. Pe ua lē o le tofi ea lena e sili atu ona matuā aogā le galue i ai, faataulagaina ai, ma faatalitali i ai? O le mea lenei e tatau ona uiga i ai le ‘lagonaina o le uiga moni o’ le Malo ia i tatou!
O le a Faapefea ona E Tali?
□ O le ā le Malo o le Atua?
□ Aisea o le toatele ai o ē na faalogologo ia Iesu sa latou lei ‘lagonaina le uiga moni o’ le Malo?
□ Ua faapefea i le ‘lagonaina o le uiga moni o’ le Malo ona aumaia ai faamanuiaga ma tiute tauave?
□ E tusa ai o le talaʻiga, o le ā e faamaonia ai pe faamata o tatou ‘lagonaina le uiga moni o’ le Malo?
□ E faapefea ona tatou faaalia mai i a tatou amio o loo tatou ‘lagonaina le uiga moni o’ le fautuaga o loo tuuina mai?
[Fesili mo le Suʻesuʻega]
[Ata i le itulau 17]
O soo o Iesu na latou ‘lagonaina le uiga moni’ o le Malo ma fuaina mai fua lelei