Lipoti a Ē Faalauiloa le Malo

ʻSusulu atu Faapei o Mea e Faamalamalama Ai le Lalolagi’

O MOLIMAU A IEOVA ua tumatilatila i le lē taliaina o tuigā toto ma ua masani ona tuuaʻia leaga ai e le lautele, ona o lea lava mafuaaga. Peitai, o lenei tulaga e faavae mausalī i le Tusi Paia. Ua faaalia ai e taʻusalaina e le Atua le faaaogaina sese o le toto, talu ai o le toto e tautele i lana silafaga. (Kenese 9:3, 4; Levitiko 17:14) O le iuga o a latou sailiiliga faale-Tusi Paia i lenei mataupu, na manatu ai Molimau a Ieova e faapea o le faatonuga a le Tusi Paia e ‘taumamao mai le toto’ o loo manino le aofia ai o faiga masani tau tuigā toto i aso nei.—Galuega 15:19, 20, 28, 29.

I tausaga e lei mamao atu, na lagolagoina ai e sui o le faalapotopotoga faafomaʻi faapea ma faamasinoga i nisi atunuu, ia Molimau a Ieova i lenei mataupu. O se faataʻitaʻiga, i Tenemaka na maliu ai se tinā talavou na masani ma le vaaiga faale-Tusi Paia e uiga i le toto i se faalavelave tau taavale. Ona o lona lē taliaina o se tuigā toto, na uunaia ai e ana fomaʻi ia ala tau faasalalauga e faasalalau ai mo le masina atoa tala sese e faasaga i Molimau a Ieova.

Na talosagaina e mātua o lenei fafine talavou se suesuega i lea mataupu, ma ia Aperila 1994, na fofogaina ai e le Komisi o Tagi Mai Gasegase i Tenemaka, se faaiuga. Na taʻua ai e faapea na maliu le maʻi, e lē ona o le teena o le toto, ae ona o le sese o togafitiga faafomaʻi. Na faavae mai lenei faaiuga i suesuega a le Komiti o Feutagaiga Faafomaʻi, le tulafono ma alii pule tau le soifua maloloina. I se tusi na tuuina atu i matagaluega uma o le soifua maloloina i Tenemaka, na taʻua ai e le Komiti Faafoe o le Soifua Maloloina a le Malo e faapea, ua iai i fomaʻi le tiute tauave e tuuina atu ai i Molimau a Ieova togafitiga e sili ona lelei e aunoa ma le faaaogaina o le toto, ma ia amanaia lo latou teena o le toto.

O se isi mea na tupu na aafia ai Dan, o se tama talavou Molimau e 15 ona tausaga na maliu ona o le lukimi. I lenei tulaga, na amanaiaina e fomaʻi le faaiuga lototele na teena ai e Dan le tuiina o le toto. Na iu lenei mea i se faasalalauga faalauaitele na tuuaʻia ai fomaʻi ona o le maliu o Dan. Ae peitai, e toatele e lē ioe i faamatalaga sese e uiga i lenei mea.

O se faataʻitaʻiga, na auai le pule o le aʻoga na iai Dan i le Maota o le Malo mo le lauga o lona maliu. Na ia faaalia le faateʻia o ia i faamatalaga lē fetaui e uiga i le maliu o Dan. Ina ua uma ona faalatalata atu ma fesiligia se Molimau la te faigaluega faatasi e uiga i Molimau a Ieova, ona ia taliaina lea o se kopi o le vitiō, Jehovah’s Witnesses—The Organization Behind the Name. Na faagaeetia o ia i ata o i le vitiō ma na ia fuafua ai e faamatamata uma i ai faiaʻoga o le aʻoga. Mulimuli ane, sa faaalia lenei vitiō i tamaiti aʻoga uma, ma na faasolosolo i vasega taitasi.

Na lē malie foi le minisita o le soifua maloloina i Tenemaka i tuuaʻiga faalauaitele na tuuaʻia ai fomaʻi na vaaia Dan. Na ia taʻua faapea e saʻo le gaoioiga a fomaʻi i le amanaiaina o le faaiuga faatagatamatua a Dan mo lona faatuatua ua faavaeina lelei.

E faitau miliona ē e faalauiloa le Malo o loo usiusitai i tulafono a le Atua. Talu ai lo latou usiusitai, ua tumatilatila ai i latou, ‘i le susulu atu faapei o mea e faamalamalama ai le lalolagi.’—Filipi 2:12, 15.