Ia Olioli Nei ma i le Faavavau
Ia Olioli Nei ma i le Faavavau
“Ia outou olioli ma fiafia e faavavau i le mea ou te faia; auā faauta, ou te faia Ierusalema ma faafiafia, ou te faia foi lona nuu ma faaolioli.”—ISAIA 65:18.
1. I le gasologa o senituri, o ā aafiaga ua oo i le toatele o tagata ona o le tapuaiga moni?
I LE gasologa o senituri, e lē mafaitaulia le aofai o i latou ua matuā olioli i le auauna atu ia Ieova, le Atua moni. O Tavita le tasi o lē na olioli i le tapuaiga moni. Ua faamatala mai e le Tusi Paia e faapea, ina ua auina atu le atolaau o le feagaiga i Ierusalema, “o Tavita ma le aiga uma o Isaraelu ua latou avae le atolaau a Ieova ma le alalaga ma le ili o le pu.” (2 Samuelu 6:15) O lena olioli i le auauna atu ia Ieova ua lē na o se mea na tupu i aso ua tuanai. E mafai ona faia ai sou sao. Ma e oo foi i vaega fou o le olioli ua lē o toe umi ona mafai foi lea ona e mauaina!
2. I tua atu o le uluai faataunuuga o le Isaia mataupu e 35 i tagata Iutaia ia na toe foi atu, o ai i aso nei ua aofia ai i le isi faataunuuga?
2 I le mataupu na faatoʻā mavae atu, sa tatou iloiloina ai le uluai faataunuuga o le valoaga faagaee loto o loo faamauina i le Isaia mataupu e 35. Ua mafai ona tatou taʻua ma le tonu, o le valoaga o le toefuataʻiina auā o le mea lena na oo i ai tagata Iutaia o aso anamua. E iai sona faataunuuga talitutusa i o tatou taimi. Ua faapefea? Ioe, i le amataga mai i aposetolo o Iesu ma isi i le Penetekoso e 33 T.A., ua feutagai ai Ieova ma tagata Isaraelu faaleagaga. O i latou nei o tagata na faauuina i le agaga paia o le Atua o ē ua avea ma vaega o le mea o loo taʻua e le aposetolo o Paulo e faapea o “le Isaraelu o le Atua.” (Kalatia 6:16; Roma 8:15-17) Seʻi mātau foi, i le 1 Peteru 2:9, ua taʻua ai nei Kerisiano o “le tupulaga ua filifilia . . . o tupu ma ositaulaga, o le nuu paia, ma le nuu na faatauina mai.” Ua faamatala atili mai e Peteru le tofiga ua tuuina atu i le Isaraelu faaleagaga: “Ina ia outou taʻutaʻu atu ana galuega lelei—o le na valaau ia te outou nai le pouliuli e oo i lona lava malamalama e matuā ofo ai.”
Se Faataunuuga i O Tatou Taimi
3, 4. O le ā le tulaga na iai ina ua iai se faataunuuga o le Isaia mataupu e 34 i ona po nei?
3 Sa iai se taimi i le amatamataga o lenei senituri sa lē faaauau ai pea ona mataalia le vaega totoe o le Isaraelu faaleagaga, i le faalauiloaina atu o lena feau. Sa latou lei matuā olioli i le malamalama e matuā ofo ai o le Atua. O le mea moni, sa iai i latou i se tulaga e pei ua faapogisaina. O anafea na tupu ai lena mea? Ma o le ā na faia i ai e Ieova le Atua?
4 Na tupu lena mea i le vaitaimi o le Taua Muamua a le Lalolagi, ina ua faatoʻā mavae ona faatuina le Malo Faa-Mesia o le Atua i le lagi i le 1914. Sa matuā feainai nuu, faatasi ai ma le lagolagosua a taʻitaʻi lotu o lotu i atunuu eseese. (Faaaliga 11:17, 18) O le mea moni, sa tetee le Atua i Kerisinetoma aposetate ma ona taʻitaʻi lotu fiasili e pei lava ona ia faia i le nuu faamaualuga o Etoma. O lea la, o Kerisinetoma, le Etoma faaonaponei, ua iai i se tulaga latou te lagonaina ai le faataunuuga faaonaponei o le Isaia mataupu e 34. O lenei faataunuuga e ala i le aveesea e faavavau ua matuā mautinoa lava e pei ona sa iai le uluai faataunuuga e faasaga ia Etoma anamua.—Faaaliga 18:4-8, 19-21.
5. O le ā le ituaiga o faataunuuga ua iai i le Isaia mataupu e 35 i o tatou taimi?
5 Ae faapefea le mataupu e 35 o le valoaga a Isaia, ma lona faamamafaina o le olioli? Ua iai foi le faataunuuga o lena mea i o tatou taimi. Ua iai faapefea? Ua faataunuuina i se toefuataʻiina o le Isaraelu faaleagaga mai se ituaiga o faaaunuua na iai. Seʻi o tatou iloiloina mea moni i talafaasolopito faatiokarate e lei leva atu, o loo tutupu nei i le vaitaimi o loo soifua ai pea le toatele o tagata.
6. Aisea e mafai ai ona faapea atu, na iai le vaega totoe o le Isaraelu faaleagaga i se tulaga faaaunuua?
6 Mo sina vaitaimi puupuu a o faagasolo le vaitaimi o le Taua Muamua a le Lalolagi, sa lei tausia ai pea e le vaega totoe o le Isaraelu faaleagaga le mamā atoatoa ma ogatusa ma le finagalo o le Atua. O nisi o i latou sa pisipisia i aʻoaʻoga sese faalotu ma sa faagutugutulua i lo latou lē tausia o se tulaga solitu aʻiaʻi mo Ieova a o omia ina ia lagolagoina atunuu o faiga taua. I le gasologa o na tausaga, na latou mafatia ai i ituaiga uma o sauāga, na oo foi ina faasaina a latou lomiga faale-Tusi Paia i le tele o atunuu. O le iuga na oo i ai, o nisi o uso sa sili ona lauiloa na molia ma faafalepuipuiina ona o ni moliaga sese. Pe a toe tepa i mea na tutupu i na taimi, e lē faigata ai ona iloa e faapea, o lona uiga, o tagata o le Atua, nai lo le saʻoloto, sa iai i latou i se tulaga faaaunuua. (Faatusatusa i le Ioane 8:31, 32.) Sa matuā lē maua e i latou se vaaiga faaleagaga. (Efeso 1:16-18) Sa pei na gūgū i latou e vivii atu i le Atua, ma o le iuga sa lē fua mai ai faaleagaga a latou galuega. (Isaia 32:3, 4; Roma 14:11; Filipi 2:11) Pe e te iloa la e faapefea ona faatutusa atu lenei mea i le tulaga o tagata Iutaia i le faaaunuuaina i Papelonia?
7, 8. O le ā le ituaiga o toefuataʻiina na oo i le vaega totoe o ona po nei?
7 Ae pe o le a tuua ai pea e le Atua ana auauna o ona po nei i lena tulaga? E leai, sa ia filifili ina ia toefuataʻiina i latou, ina ia ogatusa ma le mea na valoia mai e Isaia. Ua maua ai la e lenei lava valoaga i le mataupu e 35 se faataunuuga matilatila i o tatou taimi, faatasi ai ma le toefuataʻiina o le vaega totoe o le Isaraelu faaleagaga i se tulaga lauolaola ma mālōlōina i se parataiso faaleagaga. I le Eperu 12:12, na faatatauina ai e Paulo le Isaia 35:3 i se uiga faafaatusa, i le lagolagoina lea o le saʻo aʻiaʻi o lo tatou faia o se faatatauga faaleagaga o lenei vaega o le valoaga a Isaia.
8 I le vaitaimi ina ua mavae faiga taua, na toe faasaʻolotoina mai ai le vaega totoe o ē faauuina o le Isaraelu faaleagaga mai lo latou faaaunuuaina, e tusa ai o se gagana faafaatusa. Sa faaaogā e Ieova le Atua le Kuresa Sili, o Iesu Keriso, e faasaʻolotoina i latou. I lea, na mafai ai e lenei vaega totoe ona faia se galuega o le toe fausiaina, e faatusatusa atu i le galuega a le vaega totoe o Iutaia anamua, o ē na toe foi atu i lo latou laueleele ina ia toe fausia le malumalu moni lea sa iai i Ierusalema. E lē gata i lea, o nei Isaraelu faaleagaga i ona po nei sa mafai ona latou amataina le atiina aʻe ma fuaina mai se parataiso lauusiusi faaleagaga, se faatoaga faafaatusa o Etena.
9. Na faapefea i se mea e pei o lea o loo faamatalaina i le Isaia 35:1, 2, 5-7 ona tupu aʻe i o tatou taimi?
9 A o manatuaina manatu ua faatoʻā taʻua i luga, seʻi o tatou toe iloiloina le Isaia mataupu e 35, ma tagai muamua i le fuaiupu 1 ma le 2. O le mea na foliga mai o se nuu naumati, na amata moni lava ona totogo aʻe ma avea ma vaipanoa fuatele mai e pei o laufanua laugatasi anamua o Sarona. Ona tagai lea i le fuaiupu e 5 e oo i le 7. O le vaega totoe, o se vaega o i latou o loo soifua mai pea ma mataalia i le auaunaga a Ieova, sa faapupulaina o latou mata o le malamalama. Sa mafai ona faaleleia atili lo latou malamalama i mea sa tutupu i le 1914 ma faasolo mai ai. Ua iai foi se aafiaga o lena mea i le toatele o i tatou o ē o loo faia aʻe ai le “motu o tagata e toatele,” o loo auauna nei faatasi ma le vaega totoe.—Faaaliga 7:9.
Po o Oe ea o se Vaega o le Faataunuuga?
10, 11. (a) Ua faapefea ona aofia ai oe i le faataunuuina o le Isaia 35:5-7? (e) O le ā sou lava lagona e faatatau i nei suiga?
10 Seʻi fai oe ma faaaoaoga. A o e lei fesootai ma Molimau a Ieova, pe sa e faitauina e lē aunoa le Tusi Paia? Afai sa e faia, o le ā le tele o se malamalamaga na ia te oe? Mo se faataʻitaʻiga, o lea ua e iloaina nei, le upu moni e faatatau i le tulaga o ē ua maliliu. Atonu e mafai ona e faasino atu se tasi o loo fiafia i le mataupu i mau talafeagai i le Kenese mataupu e 2, Failauga mataupu e 9, ma le Esekielu mataupu e 18, faapea ma le tele o isi mau. Ioe, e foliga mai ua e malamalama i mea o loo aʻoaʻoina e le Tusi Paia i le tele o mataupu. Pe a faafaigofie le manatu, o lena ua uigā ia te oe le Tusi Paia, ma ua tele ni mea e mafai ona e faamatalaina ai i isi, e pei ona mautinoa sa e faia faapea.
11 Ae lelei mo i tatou taitoatasi ona fesili ifo, ‘Na faapefea ona ou iloaina mea uma ua ou iloa e uiga i upu moni o le Tusi Paia? A o oʻu lei suesue ma tagata o Ieova, pe sa ou iloaina ea nei mau uma ua faatoʻā taʻua? Pe sa ou malamalama ea i o latou uiga ma ou faia ni faaiuga saʻo e tusa ai ma o latou tāua?’ O le tali tuusaʻo i nei fesili atonu o le leai. E leai se tasi e tatau ona gaulēmalie i lena faamatalaga, ae mafai ona faapea atu o le mea moni lava, o lena sa e tauaso e tusa ai o nei mau ma o latou uiga. Pe e lē o le mea ea lena? Sa iai lava iina i le Tusi Paia, ae na lei mafai ona e malamalama i ai pe maua o latou faauigaga. Ae na faapefea la ona faapupulaina ou mata faaleagaga? Na ala mai i le mea ua faia e Ieova i le faataunuuina o le Isaia 35:5 i le vaega totoe faauuina. O le iuga, ua faapupulaina foi ou mata. Ua e lē o toe iai nei la i le pogisa faaleagaga. Ua mafai nei ona e malamalama.—Faatusatusa i le Faaaliga 3:17, 18.
12. (a) Aisea e mafai ai ona tatou faapea atu e lē o se vaitaimi lenei mo ni vavega o faamālōlōga faaletino? (e) Na faapefea i le tulaga o le uso o F. W. Franz ona faataʻitaʻia ai le auala ua faataunuuina ai le Isaia 35:5 i o tatou taimi?
12 O tagata aʻoga mataalia o le Tusi Paia ma ē na feutagai ma le Atua i senituri ua mavae ua latou iloa, e lē o le vaitaimi lenei i talafaasolopito mo ni vavega o faamālōlōga faaletino. (1 Korinito 13:8-10) Tatou te lē faatalitalia la Iesu Keriso ina ia ona faapupulaina mata o ē tauaso e faamaonia ai o ia o le Mesia, le Perofeta a le Atua. (Ioane 9:1-7, 30-33) E na te lē o faaleleia foi le faalogo a ē uma o loo tutuli. A o latalata atu Frederick W. Franz, o se tasi o le au faauuina ma o ia o le peresitene o le Sosaiete o le Olo Matamata i lena taimi, i le 100 tausaga o lona soifuaga, sa toetoe lava po atoa lana silasila, ma sa ia faaaogā ai se mea e fesoasoani i lana faalogo. Mo ni tausaga sa lē toe mafai e lana vaai ona faitauina se mea; peitai, o ai e manatu ua tauaso pe logonoa o ia, pe a mafaufau atu i le uiga o le Isaia 35:5? O le maai o lana silasila faaleagaga sa o se faamanuiaga lea i tagata o le Atua i le lalolagi aoao.
13. O le ā le suiga po o le toefuataʻiina na oo i tagata o le Atua i ona po nei?
13 Ae faapefea lou laulaufaiva? Atonu sa gūgū le au faauuina a le Atua i le taimi o lo latou faaaunuua faaleagaga. Peitai o le taimi lava na suia ai e le Atua lena tulaga, na amata ai ona toe alalaga mai o latou laulaufaiva i le fiafia ona o mea ua latou iloa e uiga i le Malo ua faavaeina o le Atua ma ana folafolaga mo le lumanai. Atonu ua latou fesoasoani foi ia te oe ina ia toe tatalaina lou laulaufaiva. O le ā le tele sa e tautala ai e uiga i le upu moni o le Tusi Paia i isi tagata i taimi ua teʻa? Atonu sa iai se taimi na e manatu ai, ‘Ou te fiafia e suesue, ae o le a lē taitai ona ou alu ma talaʻi atu i nisi ou te lē masani ai.’ Ae peitai, pe ua lē moni ea o lenei ua ‘alaga i le fiafia’ “le laulaufaiva o le gūgū”?—Isaia 35:6.
14, 15. Ua faapefea ona savavali le toatele o tagata i ‘le Ala Sa’ i o tatou taimi?
14 O tagata Iutaia anamua o ē na saʻoloto mai Papelonia sa umi le latou faigamalaga i le toe foi atu i lo latou nuu. O le ā le fesootaiga mai o lena mea i o tatou taimi? Seʻi tagai la i le Isaia 35:8: “E i ai foi le ala tanu, ma le ala, e taʻua foi o le ala sa; e le ui atu ai se ua leaga.”
15 Talu ona tatalaina i latou mai lo latou faaaunuua faaleagaga, ua ō ese atu ai le vaega totoe faauuina, lea ua aufaatasi atu i ai ma le faitau miliona o isi mamoe, mai Papelonia le Aai Tele ma agaʻi atu i se ala tanu faafaatusa, o se ala mamā o le paia lea e taʻitaʻia atu ai se tasi i le parataiso faaleagaga. O loo tatou faia taumafaiga uma ina ia agavaa ai mo lena ala ma tumau ai i lenei Ala Sa. Seʻi mafaufau ia te oe lava. Pe ua lē o sili atu ea ona maualuluga au tapulaa ma mataupu silisili tau amio tatau na ua e utagiaina i le taimi nei, nai lo le mea sa iai a o e i le lalolagi? Pe ua e lē o faia ea ni taumafaiga e sili atu ina ia ogatusa ai ou mafaufauga ma amioga, ma faatulagaga a le Atua?—Roma 8:12, 13; Efeso 4:22-24.
16. O ā tulaga e mafai ona tatou olioli ai a o tatou savavali i le Ala Sa?
16 A o faaauau ona e savali i lenei Ala Sa, o le mea moni ua e saʻoloto ai mai le popole i tagata pei ni manufeai. O le mea moni, i le lalolagi, e ao ai ona e mataala ina ia lē ʻaina oe i se uiga faafaatusa, e tagata matapeapea ma le lotoa. Ua toatele tagata ua matuā matapeapea i a latou feutagaiga ma isi tagata. Maeu se eseesega i le va o tagata o le Atua! O iina e te ola ai i se siosiomaga malupuipuia. O le mea moni, e lē lelei atoatoa ou uso Kerisiano; e iai taimi e faia ai e se tasi se mea sese pe faapogaia se mea e te lē fiafia ai. Peitai ua e iloa e lei fuafuaina e ou uso ina ia faatiga pe faaleagaina oe. (Salamo 57:4; Esekielu 22:25; Luka 20:45-47; Galuega 20:29; 2 Korinito 11:19, 20; Kalatia 5:15) Nai lo lena, latou te faaalia se naunau mai ia te oe; sa latou fesoasoani ia te oe; latou te mananao e auauna faatasi ma oe.
17, 18. I le ā le uiga e faapea atu ai, o loo iai nei se parataiso, ma o le ā le faalogona ua ia i tatou ona o lenei mea?
17 E mafai la ona tatou vaai atu i le Isaia mataupu e 35, a o mafaufau i le faataunuuga i le taimi nei o le fuaiupu 1 e oo i le 8. Pe ua lē o manino ea ua tatou maua nei le mea ua tonu ona taʻua o le parataiso faaleagaga? E lē o se parataiso ua lelei atoatoa—e lei oo foi i ai. Peitai ua avea moni lava o se parataiso, auā o iinei ua mafai ai, e pei ona taʻua i le fuaiupu e 2, ona tatou “vaavaai i le pupula o Ieova, o le matagofie o lo tatou Atua.” Ma o le ā le iuga? Ua faapea mai le fuaiupu e 10: “E foi mai e ua togiolaina e Ieova, latou te o mai foi i Siona ma le alaga ma le olioli e faavavau i luga i o latou ulu; latou te maua le olioli ma le fiafia, a e sosola ese le faanoanoa ma le mapuitiga.” O le mea moni, o lo tatou ō ese mai lotu sese ma lo tatou tuliloaina o le tapuaiga moni e tusa ai ma le finagalo malie o le Atua o se matuā faagaeeina i le olioli.
18 O loo faateleina pea le olioli lea e fesootai atu ma le tapuaiga moni, a ea? Ua e vaaia ē fou loto fiafia ua faia ni suiga ma ua oo ina mausalī i upu moni o le Tusi Paia. Ua e mātauina le au talavou ua tutupu aʻe ma faia ni agaigai i luma faaleagaga i totonu o le faapotopotoga. Ua faia papatisoga, lea ua e vaaia ai ē fou e te masani ai ua papatisoina i latou. Pe ua lē o ni mafuaaga ea na mo le olioli, mo le tele o le olioli, i aso nei? Ioe, maeu se olioli i le mauaina mai o isi ina ia auai faatasi ma i tatou i lo tatou saʻolotoga faaleagaga ma i tulaga faaparataisoina!
Se Faataunuuga o loo Fotuai mai i le Lumanai!
19. Faatasi ai ma le ā le faatalitaliga mautinoa ua faatumulia ai i tatou e le Isaia mataupu e 35?
19 O lea ua uma ona tatou talanoaina le mataupu e 35 o le Isaia i le uluai faataunuuga i le toe foi atu o tagata Iutaia ma le faataunuuga faaleagaga lea o loo faagasolo i aso nei. Ae ua lē o le iuga lena. E tele nisi mea o loo iai. Ua fesootai atu ma le faamautinoaga faale-Tusi Paia i se toefuataʻiina o loo fotuai mai i tulaga faaparataiso moni i luga o le lalolagi.—Salamo 37:10, 11; Faaaliga 21:4, 5.
20, 21. Aisea ua fetaui ai ma faale-Tusi Paia le talitonu e faapea, o le a iai pea se isi faataunuuga o le Isaia mataupu e 35?
20 O le a lē o se uiga maumauai mo Ieova lona saunia o ni faamatalaga manino e faatatau i se parataiso, ona toe taofi lea o faataunuuga mai tulaga faaleagaga. O le mea moni, ua lē o faapea atu e lē o iloga mai ni faataunuuga faaleagaga. E tusa lava pe afai sa faavaeina se parataiso moni, ae o le a lē faamalieina i tatou pe afai ua iai se vaaiga matagofie ma manu ua fifilemu, ae o loo siosiomia ai i tatou e tagata faapiopio i le itu faaleagaga, o tagata o loo gaoioi e pei o ni manufeai. (Faatusatusa i le Tito 1:12.) Ioe, e ao ona oo mai muamua le itu faaleagaga, auā o le mea lea e sili ona tāua.
21 Ae ui i lea, o le Parataiso o loo fotuai mai e lē muta mai i vala faaleagaga ia o loo tatou olioli ai nei ma o le a oo ina olioli atili ai i le lumanai. Ua ia i tatou mafuaaga lelei e faatalitalia ai se faataunuuga moni o valoaga e pei o le Isaia mataupu e 35. Aisea? I le mataupu e 65, na valoia ai e Isaia le “lagi fou ma le lalolagi fou.” Na faatatauina e le aposetolo o Peteru lena mau ina ua faamatalaina mea e sosoo mai pe a mavae le aso o Ieova. (Isaia 65:17, 18; 2 Peteru 3:10-13) Sa faaalia mai e Peteru e faapea, o vala ia na faamatalaina e Isaia o le a tutupu moni lava pe a oo ina tino moni mai le “lalolagi fou.” E aofia ai i lena mea faamatalaga atonu ua e masani ai—le fauina o fale ma nonofo ai; le totoina o tovine ma aai i o latou fua; le olioli faaumiumi o se tasi i galuega a ona lava lima; le nonofo faatasi o le luko ma le tamai mamoe; ma le leai o ni mea leaga e tutupu i le lalolagi aoao. I se isi faaupuga, o se olaga faaumiumi, o fale saogalemu, o le anoanoai o meaʻai, o galuega faamalie loto, ma le filemu i le va o manu ma i le va o manu ma tagata.
22, 23. O le ā le faavae mo le olioli o le a iai i le faataunuuga i le lumanai o le Isaia mataupu e 35?
22 Pe ua lē faatumulia ea oe i le olioli ona o lena faamoemoe? E tatau, auā o le tulaga lena na foafoaina e le Atua i tatou ina ia tatou ola ai. (Kenese 2:7-9) O le ā la le uiga e tusa ai ma le valoaga i le Isaia mataupu e 35 lea o loo tatou talanoaina? O lona uiga ua ia i tatou se mafuaaga faaopoopo e alalaga ai i le olioli. O toafa moni ma laufanua naumati, o le a totogo aʻe, e faapogaia ai lo tatou olioli. O tagata e mata lanu moana, pe lanu eena, po o nisi lava lanu matagofie, o ē o loo tauaso i le taimi nei, o le a mafai ona toe pupula. O o tatou uso Kerisiano o ē o loo logonoa, pe oo foi i nisi o i tatou o ē o loo faafaigata ona lagonaina mea, o le a mafai ona toe manino le faalogo. Maeu se olioli e faaaogā lena tomai e faalogo atu ai a o faitau ma faamalamalamaina mai le Afioga a le Atua, faapea foi ma le faalogo atu i leo o le savili mai o laau, le ʻata mai a se tamaitiiti, se pesega a se manulele!
23 O le a uiga foi e faapea, o ē vaepiʻo, e aofia ai i latou o loo aafia i le maʻi gugu i le taimi nei, o le a toe feofeoai solo e aunoa ma ni tiga. Maeu se mapusaga! Ona tatafe malosi atu lea o tāfega o vai i le toafa. O le a lē gata ina tatou vaaia le tatafe mai o vai ae o le a tatou faalogoina foi le pupuna aʻe. O le a mafai ona tatou savavali atu iina ma paʻi atu i le mutia lanulauʻava ma laau o kome. O le a matuā avea moni lava ma Parataiso ua toefuataʻiina. Ae faapefea le olioli i le iai i autafa o se leona po o isi manufeai faapena e aunoa ma se mataʻu? Tatou te lē tau manaomia ona amata faamatala na mea, auā ua uma lava ona tatou faaataina lena vaaiga i o tatou mafaufau ma tatou olioli ai.
24. Aisea e mafai ai ona e ioe i le faamatalaga o loo taʻua i le Isaia 35:10?
24 Ua faamautinoa mai e Isaia i a i tatou e faapea: “E foi mai e ua togiolaina e Ieova, latou te o mai foi i Siona ma le alaga ma le olioli e faavavau i luga i o latou ulu.” E mafai la ona tatou ioe e faapea, ua ia i tatou mafuaaga tatou te alalaga ai ma le olioli. Ia olioli i mea ua uma ona faia e Ieova mo ona tagata i lo tatou parataiso faaleagaga, ma ia olioli i mea e mafai ona tatou faatalitalia i le Parataiso moni lea ua latalata mai. E faatatau i ē olioli—e faatatau ia i tatou—ua tusi ai Isaia e faapea: “Latou te maua le olioli ma le fiafia, a e sosola ese le faanoanoa ma le mapuitiga.”—Isaia 35:10.
Pe na E Mātauina?
□ O le ā le faataunuuga lona lua na iai i le Isaia mataupu e 35?
□ O le ā ua fesootai atu faaleagaga i suiga faavavega ia na valoia e Isaia?
□ Ua faapefea ona e auai i se faataunuuga o lenei valoaga?
□ Aisea e mafai ai ona tatou faapea atu o le Isaia mataupu e 35 ua faatumulia ai i tatou i faamoemoega mo le lumanai?
[Fesili mo le Suʻesuʻega]
[Ata i le itulau 15]
Le falepuipui i Raymond Street i Brooklyn, New York, o iina na faasalaina ai ia Iuni 1918, uso e toafitu sa lauiloa i na taimi
[Ata i le itulau 16]
E ui lava sa toetoe po atoa le silasila a le uso o Franz, ae sa tumau pea le maai o lana silasila faaleagaga
[Ata i le itulau 17]
O le tuputupu aʻe ma le agaigai i luma faaleagaga o mafuaaga na mo le olioli