Le Iʻuga Tumau o Faiga Sauā—E Faapefea?

INA ia faaitiitia le faateleina o faiga sauā, ua faataʻitaʻia ai e le tele o aai i le Iunaite Setete se faiga fou—o se vaegatupe po o ni oloa e fesuiai ma fana e toe faafoi atu, e aunoa ma le fesiligiaina. O le iuga? I se tau e $341,000, mo se faataʻitaʻiga, na aoina ai e le aai o St. Louis, ia fana e 8,500. O se faiga lava lea e tasi i le aai o Niu Ioka, ua aoina ai le sili atu ma le afe auupega.

O le ā le aafiaga ua faia e lenei mea i soligatulafono? E faanoanoa lava, e itiiti lava se aafiaga. O tagata na fasiotia i fana i le tausaga na sosoo ane ai i St. Louis, na sili atu ona maualuga lona tumutumuga nai lo se isi lava taimi. I le aai o Niu Ioka, o loo iai pea se faatatauga pe ā ma le lua miliona fana o loo iai i tagata o le aai. I le Iunaite Setete, e tusa e 200 miliona fana o loo umia e tagata taitoatasi, e toeitiiti tofu le tamaloa, le fafine, ma le tamaitiiti, ma le fana. I nisi atunuu, o faiga sauā e faaaogā ai fana, ua faateteleina i se saoasaoa e faamataʻuina ai. I Peretania, fai mai le Economist, “i le va o le 1983 ma le 1993, o le aofai o moliaga na faamaumauina e leoleo e aafia ai le faaaogaina o fana, na toeitiiti faaluaina i le 14,000.” E ui ina maulalo le fasioti tagata pe a faatusatusa atu i ai, ae e tusa ma le miliona auupega e lē faatulafonoina o loo iai i lena atunuu.

Ma le mautinoa lava, o so o se faaitiitiga i na fuainumera matautia, o se laasaga lea mo le lelei. Ae peitai, o fua faatatau e pei o na e faamatalaina i luga, e faafaigata ona oo i le aa autū o le faapogaia o le sauā. O ā na mafuaaga? O le tele lava o vala ua taʻua mai, ae na o ni nai vala o na mea ua avea ma pogai autū. O le leai o se autasi tumau o le aiga ma ni faatonuga tatau tau amio, ua taʻitaʻia ai le toatele o talavou e aufaatasi atu i faigā kegi ina ia amanaia ai. O le faatosinaga o le tetele o tupe maua, ua maileia ai le toatele e sailia faiga sauā. Ua uunaia e le lē faimea tonu isi ina ia faasaʻoina mataupufai e ala i auala sauā. O le mimita i le atunuu, ituaiga, po o le tulaga i le olaga, ua faapogaia ai ona lē amanaia e tagata le tulaga pagatia o loo iai isi. O vala loloto nei ua māfua ai ona leai ni faaleleiga vave.

O le ā e Mafai ona Fai?

O le faateleina o leoleo, o faasalaga sili atu ona mamafa i falepuipui, o tulafono i ē tatau ona iai fana, o le faasalaga oti—ua uma ona talanoaina ma faia taumafaiga e avea ai ma auala e tau taofiofia ai soligatulafono ma faiga sauā. Ua iai ni taulau eseese ua aumaia ai, ae o le mea moni e faanoanoa ai ona o loo faateleina pea faiga sauā o loo iai i lo tatou soifuaga. Aisea? Ona o ia faiga ua na ona togafitia ai uiga o aliali mai.

I le isi itu, e toatele le au popoto ua faapea  mai o le ki i le faaiuina o faiga sauā, o aʻoaʻoga. A o logoleleia lea manatu, e tatau ona tatou manatua, o faiga sauā e lē na o atunuu o loo itiiti ai avanoa tau aʻoaʻoga o loo maua ai. O le mea moni lava, e foliga mai o nisi o atunuu e aupito sili ona sauā, o atunuu foi ia e sili ona maualuluga tulaga o aʻoaʻoga o loo iai. E lē faigata ona iloaina e faapea o le mea o loo manaomia e lē gata o aʻoaʻoga, ae faapea ia le ituaiga saʻo o aʻoaʻoga. O le ā lea ituaiga o aʻoaʻoga? Pe e iai se tasi e mafai ona ia aʻoaʻoina tagata ina ia avea ma ē e fiafia i le filemu ma le amiotonu?

“O aʻu o Ieova, o lou Atua, o loo aʻoaʻo ia te oe i mea e aoga, o loo taʻitaʻiina oe i le ala e te ui ai. E! ana uai mai ou taliga i aʻu poloaiga, po ua tusa ma se vaitafe lou manuia; ma lau amiotonu, e tusa lea ma peau o le sami.” (Isaia 48:17, 18) E faapefea ona aʻoaʻoina tagata e Ieova le Atua ina ia fiafia i le filemu ma le amiotonu? O le auala autū lava, e ala mai lea i lana Afioga le Tusi Paia.

Le Mana o le Afioga a le Atua

O le Tusi Paia e mamao lava mai le na ona avea o se tuufaatasiga o ni fagogo faaanamua ma ni faamatalaga tuai ua lē toe aogā. Ua iai mataupu silisili ma manatu mai i Lē na Foafoaina le tagata, o lē, mai i lona tulaga silisili ona maualuga o loo iai, ua ia silafiaina lelei le natura o le tagata nai lo so o se isi lava tagata. “Auā e pei ona sili ona maualuga o le lagi i le lalolagi, ua faapea ona sili ona maualuga o oʻu ala i o outou ala, ma oʻu manatu e sili i o outou manatu,” ua fetalai mai ai Ieova le Atua.—Isaia 55:9.

O le mafuaaga lea na faailoa mai ai e le aposetolo o Paulo e faapea “o loo ola le afioga a le Atua, o loo matuā galue foi, o loo sili foi lona maai i pelu uma e faatau maai itu, o loo vaevae foi e oo lava i le vavaeeseina o le loto ma le agaga.” (Eperu 4:12) Ioe, o loo iai le mana i le Afioga a le Atua e oo atu ai ma pāʻia le loto o se tagata ma suia ona mafaufauga ma ana amio. Pe e lē o le mea ea lea o loo manaomia ina ia suia ai ala sauā o tagata i aso nei?

O Molimau a Ieova, lea ua tusa nei ma le lima miliona le aofai i atunuu e sili atu i le 230, o faamaoniga ola ia e iloa ai e moni lava o le Afioga a le Atua o loo iai le mana e liliuina ai olaga i le lelei. Ia i latou ia, o loo iai tagata mai atunuu eseese uma, o gagana, ma ituaiga uma. E ō mai foi i latou mai so o se vala lava o le olaga ma talaaga i mea na ola mai ai. O nisi o i latou na taʻitaʻia muamua e le sauā ma olaga e tumu i faalavelave. Ae nai lo le faatagaina o ia vala e faaosofia ai le felotoai, fetauvaai, feeseeseai, ma le ʻinoʻino i lo latou va, ua latou aʻoaʻoina auala e foia ai ia pa pupuni ma ua avea ai i latou ma tagata e fiafia i le filemu ma autasi i le lalolagi aoao. O le ā ua mafaia ai lenei mea?

Se Tauiviga e Faaiuina ai Faiga Sauā

Ua loto atoa Molimau a Ieova e fesoasoani i isi ina ia maua le poto saʻo o fuafuaga a le Atua e pei ona faaalia mai i lana Afioga, le Tusi Paia. I so o se itu o le lalolagi, o loo latou saili atu ai mo i latou o loo mananao e aʻoaʻoina ala o Ieova ma ia aʻoaʻoina e ia. O a latou taumafaiga o loo fua mai. O le iuga o lenei taumafaiga faapitoa faaleaʻoaʻoga, o le faataunuuga lea o se valoaga matagofie.

I le 2,700 tausaga ua mavae, na faagaeeina ai le perofeta o Isaia e tusia e faapea: “O aso e gata ai, e . . . o mai lava nuu e tele, ma latou faapea ane, O mai ia, tatou o ae ia i le mauga o Ieova, o le fale o le Atua o Iakopo; e aʻoaʻo mai foi o ia ia te i tatou i ona ala, ona tatou savavali ai lea i ona ala.”—Isaia 2:2, 3.

O le aʻoaʻoina e Ieova ma savavali i ona ala e mafai ona aumaia ai ni suiga mataina tele i olaga o tagata. O se tasi o suiga ua folafolaina mai i le valoaga lava lea e faapea: “Ona latou tuʻi ai lea i a latou pelu e fai ma uamea o suotosina, o latou tao foi e fai ma polo e teu aʻi vine; e le sii atu le pelu e le tasi nuu i le tasi nuu, latou te le toe aʻoaʻo foi i taua.” (Isaia 2:4) E toatele tagata ua faitau i lenei mau. O le mea moni, ua tusia lenei mau i pa o se Faletele o Malo Aufaatasi i le aai o Niu  Ioka. Ua avea lea ma faamanatuga o le mafuaaga na ala ai ona fai le Malo Aufaatasi ae ua lē taulau ona ia faataunuuina. O le taofia o taua ma le sauā e lē mafaia e so o se faalapotopotoga lava faapolotiki a tagata. E na o Ieova le Atua lava e mafai ona ia faia lea mea. O le a faapefea ona ia faia o lea?

E foliga mai e lē o tagata uma o le a tali atu i le valaau ina ia “o ae i le mauga o Ieova” ma ‘aʻoaʻoina ai i ona ala’ ma “savavali ai i ona ala”; e lē o tagata uma foi o le a naunau e “tuʻi i a latou pelu e fai ma uamea o suotosina ma o latou tao e fai ma polo e teu aʻi vine.” O le ā le mea o le a faia e Ieova ia i latou na? O le a lē faavavau ona ia tatalaina atu le avanoa pe faatalitali ia i latou ina ia suia. Ina ia faaiuina faiga sauā, o le a aumaia ai foi e Ieova le iuga ia i latou o ē e tausisi atu pea i o latou ala sauā.

Se Lesona Tāua

O le mea sa faia e le Atua i aso o Noa ua aumaia ai se lesona lapatai mo i tatou i aso nei. Ua faaalia mai i faamaumauga a le Tusi Paia le ituaiga o lalolagi na iai i lena taimi: “Ua leaga lava le lalolagi i luma o le Atua, ma ua tumu le lalolagi i le saua.” I lenei tulaga, na faailoa atu ai e le Atua ia Noa e faapea: “Ua oo mai i oʻu luma le iuga o tagata uma; auā ua tumu le lalolagi i le saua ona o i latou; faauta foi, o aʻu lava, ou te faaumatia i latou atoa ma le lalolagi.”—Kenese 6:11, 13.

E tatau ona tatou mātauina se manatu tāua e tasi. Ina ua aumaia le Lolo i luga o lena tupulaga, na faasaoina e le Atua Noa ma lona aiga. Aisea? Ua tali mai le Tusi Paia e faapea: “O Noa o le tagata amiotonu ia ma le sao i e tupulaga ma ia; sa la feooai o le Atua ma Noa.” (Kenese 6:9; 7:1) A o lei avea moni ai tagata uma na ola i lena taimi ma ni tagata sauā tele, ae sa na o Noa ma lona aiga ‘sa feoai ma le Atua moni.’ Ona o lena mea, sa faasaoina ai i latou ina ua faaiuina lena lalolagi sauā.

A o tatou vaaia foi la le lalolagi ua “tumu i le saua,” e tatou te mautinoa lava e lē faapea e lē o amanaia mai e le Atua lea tulaga. E pei lava ona sa ia faia i aso o Noa, o le a faapea foi ona lē o toe mamao ae ia gaoioi mai e faaiuina faiga sauā—e lē toe iai lava. Ae o le a ia saunia foi se auala i le saogalemu mo i latou o loo aʻoaʻoina nei e ‘savavali ma le Atua moni,’ i latou ia o loo tali atu i lana taumafaiga sili faapitoa faaleaʻoaʻoga mo le filemu.

E ala mai i le faisalamo, ua aumaia ai e Ieova lenei faamautinoaga: “E toe itiiti, ona leai lea o le tagata amio leaga; e te mafaufau foi i le mea sa i ai o ia, a e leai lava. A o e agamalu, e fai mo latou le nuu; e faafiafia foi i latou ia te i latou ona o le manuia e tele.”—Salamo 37:10, 11.

O le a fiafia Molimau a Ieova e suesue le Tusi Paia faatasi ma oe ina ia mafai ai ona e aufaatasi atu ia i latou o ē fai mai: “O mai ia, tatou o ae ia i le mauga o Ieova, o le fale o le Atua o Iakopo; e aʻoaʻo mai foi o ia ia te i tatou i ona ala, ona tatou savavali ai lea i ona ala.” (Isaia 2:3) I le faia faapea, e mafai ai ona e iai ia i latou ia o le a vaai i le iuga o mea leaga uma ma faiga sauā. E mafai ona e mauaina ai le “tele o le fiafia i le tele o le filemu.”

[Ē Ana le Ata i le itulau 5]

Reuters/Bettmann