Ua ia i Tatou Mafuaaga e Alalaga ai ma le Olioli

“Latou te maua le olioli ma le fiafia, a e sosola ese le faanoanoa ma le mapuitiga.”—ISAIA 35:10.

1. O ai i aso nei ua mauaina se mafuaaga patino mo le olioli?

E LĒ taumatea ua e mātauina e toaitiiti lava tagata o loo iai le olioli moni i aso nei. Ae i le avea o ni Kerisiano moni, ua maua ai e Molimau a Ieova le olioli. Ma o le avanoa mo le mauaina o lea olioli o loo avanoa mai pea i le faitau miliona o isi o ē e lei papatisoina, o ē talavou ma ē matutua, o ē o loo auaufaatasi ma Molimau. O lou faitauina o nei upu i lenei mekasini e faaalia ai ua e mauaina lenei olioli po o le foliga mai e mafai moni ona e mauaina.

2. Ua faapefea i le olioli o se Kerisiano ona faaeseese atu i le tulaga lautele o le toatele o tagata?

² O le toatele o tagata latou te lagona e iai se mea e lē o maua i o latou olaga. Ae faapefea oe? E moni, atonu e te lē o mauaina mea faitino uma e mafai ona e faaaogaina, ma e mautinoa lava e lē o mea uma ia e pei ona iai i tagata mauoa ma ē maualuluga i aso nei. Ma atonu o loo sili atu foi ona e manao e maua le soifua maloloina lelei ma le malosi. Peitai ane, e talafeagai ona faapea atu, pe a oo i le tulaga o le olioli, e sili atu ai la ona e mauoa ma e ola maloloina nai lo le toatele o le faitau piliona o tagata i le lalolagi. Ua moni faapefea lena mea?

3. O ā upu uigā e tatau ona tatou uaʻi atu i ai, ma aisea?

³ Seʻi manatua fetalaiga a Iesu: “Ua ou fai atu nei mea ia te outou, ina ia tumau ai loʻu olioli ia te outou, ia atoatoa foi lo outou olioli.” (Ioane 15:11) “Ia atoatoa foi lo outou olioli.” Maeu se faamatalaga! O se suesuega loloto o ala faa-Kerisiano o le olaga e faaalia ai le tele o mafuaaga mo le faaatoatoaina o lo tatou olioli. Ae i le taimi nei, seʻi mātau upu uigā o loo i le Isaia 35:10. Ua uigā nei upu ona e tele so latou fesootaiga ma i tatou i aso nei. Tatou te faitau i ai e faapea: “E foi mai e ua togiolaina e Ieova, latou te o mai foi i Siona ma le alaga ma le olioli e faavavau i luga i o latou ulu; latou te maua le olioli ma le fiafia, a e sosola ese le faanoanoa ma le mapuitiga.”

4. O le ā le ituaiga o olioli ua taʻua i le Isaia 35:10, ma aisea e tatau ai ona tatou uaʻi atu i ai?

⁴ “Le olioli e faavavau.” O le fuaitau “e faavavau” o nisi taimi ua faaliliuina i le faaupuga “e lē mailoa,” ae ua saʻo le faaaogaina e lenei fuaiupu o le upu “faavavau” e tusa ai i le gagana Eperu. E pei ona faaalia mai i isi mau, o le uiga moni i lenei fuaiupu o le “faavavau.” (Salamo 45:6; 90:2; Isaia 40:28) O le olioli la o le a lē gata mai, i tulaga o le a faatagaina ai—ioe, ma le mautinoa—e olioli e faavavau. Pe ua lē mālie ea lena mea i le faalogo? Ae atonu, ua faateʻia oe e lena fuaiupu e pei o se faamatalaga e faatatau i se tulaga e lē mafai ona faatinoina moni, e faapogaia ai ona e mafaufau faapea: ‘E lē o aofia moni ai aʻu i lena mea i le tulaga o loo oo atu i ai oʻu faafitauli ma oʻu popolega i aso taitasi.’ Peitai o le tulaga lena ua faamaonia e mea moni. O le folafolaga faavaloaga i le Isaia 35:10 e iai sona uiga mo oe i aso nei. Ina ia iloa pe faapefea, seʻi o tatou iloiloina lenei mataupu matagofie, le mataupu e 35 o le Isaia, ma ia mātau vaega taitasi i le aotelega atoa. Ia mautinoa o le a e olioli i mea o le a tatou mauaina.

 O Tagata o Ē na Mananao e Olioli

5. O le ā le faatulagaga faavaloaga ua māfua ai le valoaga lea o loo i le Isaia mataupu e 35?

⁵ Mo se fesoasoani, seʻi o tatou tagai atu i le faatulagaga, o mea na tutupu anamua, na māfua ai lenei valoaga mataina. Na tusia e le perofeta Eperu o Isaia le valoaga i le tusa ma le 732 T.L.M. O le vaitaimi o le faitau sefulu tausaga a o lei faatamaʻiaina Ierusalema e autau a Papelonia. E pei ona faaalia e le Isaia 34:1, 2, na valoia e le Atua e faapea o le a ia faaoo mai lana tauimasui i nuu, e pei o Etoma, lea e taʻua i le Isaia 34:6. E aliali mai sa ia faaaogā autau a Papelonia anamua e faia lea mea. Sa faapena foi ona faaaogā e le Atua autau a Papelonia e faatafunaina Iuta ona o le lē faamaoni o tagata Iutaia. O le ā na iu i ai? Na faaaunuua tagata o le Atua, ma faatafunaina lo latou nuu mo le 70 tausaga.—2 Nofoaiga a Tupu 36:15-21.

6. O le ā le eseesega sa iai i le va o le mea o le a oo i tagata Etoma ma le mea o le a oo atu i tagata Iutaia?

⁶ Peitai ane, e iai se eseesega mataina i le va o tagata Etoma ma tagata Iutaia. O le faasalaga mai le Atua i tagata Etoma sa faavavau; ma a o faagasolo taimi, na iu ina mou ese atoatoa atu ai nei tagata mai talafaasolopito. Ioe, e mafai lava ona e asiasi atu i toega o le faatafunaga i le vaipanoa sa nonofo ai tagata Etoma, e pei o toega o le aai lauiloa o Petra. Peitai i aso nei, e leai se malo po o ni tagata e mafai ona maitaulia e faapea o ‘tagata Etoma.’ Ae, pe sa tatau ea ona faavavau le faatafunaga o Papelonia ia sa Iutā, ma tuu ai e faavavau le nuu e aunoa ma se olioli?

7. Atonu na tali atu faapefea tagata Iutaia ia na faaaunuua i Papelonia i le mataupu e 35 o le Isaia?

⁷ O iinei la ua iai se uiga faaoso naunau o le valoaga ofoofogia i le Isaia mataupu e 35. Atonu e ono taʻua o le valoaga i le toe fuataʻiina, auā na faataunuuina muamua ina ua toe foi tagata Iutaia i lo latou nuu i le 537 T.L.M. O tagata Isaraelu o ē na faatagataotauaina i Papelonia sa toe tatala atu i ai le saʻolotoga e toe foi atu ai i lo latou nuu. (Esera 1:1-11) Peitai, a o lei tupu lena mea, o tagata Iutaia ia sa faaaunuua i Papelonia, o ē na mafaufau i lenei valoaga tauatua, atonu sa latou tau mānatu po o ā tulaga o mea o le a latou mauaina i tuā i lo latou nuu moni, o Iuta. Ma o le ā le tulaga o le a latou iai? O tali i nei fesili e taulai tonu lava i le pogai ua tatou maua moni ai se mafuaaga e alalaga atu ai ma le olioli. Seʻi o tatou tagai i ai.

8. O ā tulaga na maua e tagata Iutaia ina ua toe foi ese mai Papelonia? (Faatusatusa i le Esekielu 19:3-6; Hosea 13:8.)

⁸ O le tulaga o mea e mautinoa lava e lē o tulaga lelei mai i tagata Iutaia e oo lava i le taimi ina ua latou faalogo o le a mafai ona latou toe foi atu i lo latou nuu. Ua 70 tausaga talu ona faatafunaina lo latou nuu, e tusa lea ma le umi o le soifuaga faaletagata. O le ā ua tupu i le nuu? E so o se laueleele, ni togāvine sa faatoʻaina, po o togāmati, na oo ina avea ma vaomatua. O togalaau ma laufanua sa faatafe solo  ai le vai na oo ina avea ma laueleele ua lē toe aogā po ua avea ma toafa. (Isaia 24:1, 4; 33:9; Esekielu 6:14) Seʻi mafaufau foi i manu feai atonu ua tumu ai iina. E ono aofia ai manu ʻaitagata, e pei o leona ma nameri. (1 Tupu 13:24-28; 2 Tupu 17:25, 26; Pese a Solomona 4:8) Sa lei galo foi ia i latou urosa, o manu e iai lo latou malosi e osofaia ai se tamaloa, se fafine, po o se tamaitiiti. (1 Samuelu 17:34-37; 2 Tupu 2:24; Faataoto 17:12) Ma e seāseā tatou fia taʻua gata feai ma isi gata uogo, po o akarava. (Kenese 49:17; Teuteronome 32:33; Iopu 20:16; Salamo 58:4; 140:3; Luka 10:19) Pe ana fai sa tou toe foi atu faatasi ma tagata Iutaia mai Papelonia i le 537 T.L.M., atonu o le a e musu e savali latalata atu i se vaipanoa faapena. Sa leai se parataiso ina ua latou taunuu.

9. Mo le ā le mafuaaga na maua ai e i latou na toe foi atu se faavae mo le faamoemoe ma le mautinoa?

⁹ Peitai, o Ieova lava ia lea na taʻitaʻiina atu ona tagata tapuai i lo latou nuu, ma e ia te ia le malosi e suia atoa ai se tulaga sa faatafunaina. Pe e te lē talitonu ea i lena manatu e faatatau i Lē na Foafoaina Mea? (Iopu 42:2; Ieremia 32:17, 21, 27, 37, 41) O lea la, o le ā o le a ia faia—o le ā na ia faia—mo tagata Iutaia o ē na toe foi atu, ma lo latou nuu? O le ā se aafiaga o lenei mea i tagata o le Atua i ona po nei ma i lou foi tulaga—i le taimi nei ma i le lumanai? Muamua, seʻi o tatou tilofaia po o ā mea na tutupu i tuā iina.

Olioli Ona o se Tulaga na Suia

10. O le ā le suiga na muai taʻu mai e le Isaia 35:1, 2?

¹⁰ O le ā o le a tupu pe a faataga atu e Kuresa tagata Iutaia e toe foi i lena laueleele ua leva ona tuufua? Seʻi faitau i le valoaga faagaee loto i le Isaia 35:1, 2: “E olioli ona o i latou le vao lafulafua, ma le nuu naumati; e fiafia le toafa, ma fua mai e pei o le aute. E fua tele mai lava ia, e fiafia foi ma le fiafia tele, ma le alaga; e avatu i ai le lalelei o Lepanona, ma le matagofie o Karamelu ma Sarona, latou te vaavaai i le pupula o Ieova, o le matagofie o lo tatou Atua.”

11. O le ā le malamalamaga e uiga i le laueleele na faaaogā e Isaia e faamatala atu ai mea?

¹¹ I taimi anamua a o tusia le Tusi Paia, sa lauiloa ai Lepanona, o Karamelu, ma Sarona  ona o lo latou lauusiusi matagofie. (1 Nofoaiga a Tupu 5:16; 27:29; 2 Nofoaiga a Tupu 26:10; Pese a Solomona 2:1; 4:15; Hosea 14:5-7) Sa faaaogā e Isaia na faaaoaoga e faamatala ai foliga o le a iai le laueleele ua toe faafouina, ona o le fesoasoani a le Atua. Ae pe na o le palapala ea e aafia ai i lenei suiga? E mautinoa e leai!

12. Aisea e mafai ai ona tatou faapea atu o le valoaga i le Isaia mataupu e 35 o loo taulai atu i tagata?

¹² Ua tautala le Isaia 35:2 e uiga i le laueleele ua ‘fiafia i le fiafia tele, ma ua alaga mai ma le fiafia.’ Tatou te iloa e lē o faasino moni i le palapala ma laau e faapea sa ‘alalaga mai ma le fiafia.’ Peitai, o le toe faafouina e avea ma palapala lafulemū ma fuatele mai e mafai ona faapogaia ai i tagata na lagona. (Levitiko 23:37-40; Teuteronome 16:15; Salamo 126:5, 6; Isaia 16:10; Ieremia 25:30; 48:33) O suiga moni i le laueleele lava ia e fesootai atu i suiga i tagata, auā o tagata o loo taulai atu i ai lenei valoaga. O lea la, ua tatou maua ai mafuaaga e malamalama ai i upu a Isaia a o taulai autū atu i suiga i tagata Iutaia ia na toe foi i lo latou laueleele, ae maise lava i lo latou olioli.

13, 14. O ā suiga i tagata na muai taʻu mai e le Isaia 35:3, 4?

¹³ E faatatau i lena tulaga, seʻi o tatou iloiloina atili nisi mea e uiga i lenei valoaga faagaee loto ina ia iloa pe na faapefea ona faataunuuina ina ua mavae le saʻolotoga o Iutaia ma lo latou toe ō ese mai Papelonia. I fuaiupu e 3 ma le 4, ua tautala ai Isaia e uiga i isi suiga i na tagata na toe foi atu: “Ia outou faamalosi i lima ua gagase, ia outou faamalosi foi i tulivae ua vaivai. Fai atu ia i e ua loto vaivai, Ia outou faamalolosi, aua tou te fefefe; faauta, o lo outou Atua; o le a oo mai le taui ma sui, o le taui lava mai le Atua; e afio mai lava o ia ma faaola ia te outou.”

¹⁴ Pe ua lē o se faamalosiau ea le manatu e faapea o lo tatou Atua, o lē mafai ona ia suia le tulaga faatafunaina o le laueleele, e matuā naunau mai o ia i ona tagata tapuai? Sa lei finagalo o ia ina ia oo i tagata Iutaia ia na faaaunuua le loto vaivai, le faamaamulu, po o le popole naʻuā e uiga i le lumanai. (Eperu 12:12) Seʻi manatu i le tulaga o na tagata Iutaia na faaaunuua. Pe ana fai latou te see ese mai le faamoemoe lea sa latou maua mai valoaga a le Atua e faatatau i lo latou lumanai, semanū o le a faafaigata mo i latou ona maua se vaaiga saʻo i tulaga o mea. Na semanū e pei o loo latou iai i se ana pogisa ua faafalepuipui ai, e lē saʻoloto e feoai solo ma lē maelega ai e auauna atu ia Ieova. E matuā foliga atu lava ia i latou e peiseai e lē o susulu atu se malamalama i le ala o loo latou agaʻi atu i ai.—Faatusatusa i le Teuteronome 28:29; Isaia 59:10.

15, 16. (a) O le ā le faaiuga e mafai ona tatou faia e uiga i mea na faia e Ieova mo tagata na toe foi atu? (e) Aisea na lē manatu ai tagata na toe foi atu, e faatalitalia ni faamālōlōga faavavega faaletino, ae o le ā na faia e le Atua e tusa ai ma le Isaia 35:5, 6?

¹⁵ Peitai, e maeu se suiga ina ua faaosofia e Ieova le loto o Kuresa e faasaʻoloto i latou ina ia toe foi atu i lo latou nuu! E leai se faamaoniga faale-Tusi Paia e faapea na faapupulaina faavavega iina e le Atua so o se tauaso mai tagata Iutaia na toe foi atu, pe na ia toe faaleleia le faalogo a ē na logonoa, pe faamālōlō so o se tasi na pipili ma mumutu o latou vae. Ae peitai, na ia faia moni lava se isi mea e sili atu ona mataina. Na ia toe faafoisia i latou i le malamalama ma le saʻolotoga i lo latou laueleele e pele ia i latou.

¹⁶ E leai se faamaoniga faapea na manatu ē na toe foi atu e faatalitalia Ieova ina ia faatino na faamālōlōga faavavega faaletino. Atonu sa latou iloa e lei faia faapena e le Atua ia Isaako, ia Samasoni, po o Eli. (Kenese 27:1; Faamasino 16:21, 26-30; 1 Samuelu 3:2-8; 4:15) Peitai pe afai sa latou faatalitalia se suiga mai le Atua mo lo latou tulaga i se uiga faafaatusa, o le mea moni na latou maua lava se iuga e fiafia ai. O le mea moni i se uiga faafaatusa, ua taʻua ai i fuaiupu e 5 ma le 6 se faataunuuga moni. Na valoia ma le saʻo e Isaia: “Ona faapupulaina ai lea mata o e tauaso, e faalogoa foi taliga o e tutuli; ona osooso ai lea o le pipili e pei o le aila, e pese foi le laulaufaiva o le gūgū.”

 Faia le Laueleele ia Pei o se Parataiso

17. O ā suiga faaletino na manino le aumaia e Ieova?

¹⁷ O na tagata na toe foi atu e mautinoa lava le iai o se mafuaaga latou te alalaga ai ma le fiafia ona o tulaga e pei ona faamatala atili mai e Isaia: “Auā e oso mai le vai i le vao lafulafua, ma vaitafe i le toafa; e avea foi le serapi ma vailepa, e avea foi le nuu naumati ma vaipuna; o le mea e nonofo ai luko, e taooto ai i latou, e fai lea ma mea e tutupu ai u ma kome.” (Isaia 35:6e, 7) E ui lava atonu ua lē mafai ona tatou toe vaaia lena laufanua atoa i aso nei, ae ua taʻua e faamaoniga e faapea o le vaipanoa lea sa taʻua muamua o Iuta sa avea o “se parataiso mo lafu manu.” *

18. E foliga mai na faapeī le tali atu a tagata Iutaia ia na toe foi, i faamanuiaga a le Atua?

¹⁸ E tusa ai o pogai mo le olioli, seʻi manatu i ni lagona atonu na oo i le vaega totoe o tagata Iutaia ina ua toe faafoisia atu i le Nuu Folafolaina! Sa ia i latou le avanoa e toe maua ai le laueleele na faatafunaina, na ʻaināina e luko ma isi manu vaefa, ma toe faafouina. Pe e te lē olioli ai ea la i le faia o na galuega o le toe faafouina, ae maise lava pe afai e te iloa o loo faamanuia e le Atua au taumafaiga?

19. I le ā le uiga na faia ai ni tapulaa i le toe foi ese mai le faaaunuua i Papelonia?

¹⁹ Ae peitai, e lē faapea o so o se tasi po o tagata Iutaia uma na faaaunuua i Papelonia sa mafai ma na toe foi uma atu e mauaina lena toe faafouina fiafia. Na faataatia e le Atua ni tapulaa. E leai se tasi na auai i faiga faapaupau faalotu a Papelonia na iai se aiā e toe foi atu ai. (Tanielu 5:1, 4, 22, 23; Isaia 52:11) Sa lē mafai foi ona toe foi atu se tasi o lē na faia ma le valea se gaoioiga lē atamai. O na tagata uma sa lei agavaa i latou. Ae i le isi itu, o i latou o ē na ausia tapulaa a le Atua, o ē na ia silasila i ai ua faapaiaina i se uiga talafeagai, na mafai ona toe foi atu i Iuta. Sa mafai ona latou faimalaga atu e peiseai o loo ō atu i le Ala Sa. Na faamanino mai e Isaia lena mea i le fuaiupu e 8 e faapea: “E i ai foi le ala tanu, ma le ala, e taʻua foi o le ala sa; e le ui atu ai se ua leaga, a e faia mo i latou lava; e ui ina valea se malaga e le sese ai lava.”

20. O ā mea na lē manaomia ona matataʻu ai tagata Iutaia a o latou toe foi atu, ma iu ai i le ā?

²⁰ O tagata Iutaia na toe foi atu sa lē manaomia ona latou matataʻu i so o se osofaiga mai tagata pei ni manu feai po o tagata faomea. Aisea? Auā sa lē faatagaina e Ieova na mea e tutupu i le Ala o loo ō atu ai ona tagata ua togiolaina. O lea sa mafai ai ona latou faimalaga atu ma se vaaiga olioli ma le mautinoa i mea o i luma, ma ni faamoemoega fiafia. Seʻi mātau le auala na faamatala ai e Isaia lena mea i le faaiuina o lenei valoaga: “E le i ai se leona, e le alu ae ai foi se manu feai; e le i ai lava, a e savavali ai e ua togiolaina. E foi mai e ua togiolaina e Ieova, latou te o mai foi i Siona ma le alaga ma le olioli e faavavau i luga i o latou ulu; latou te maua le olioli ma le fiafia, a e sosola ese le faanoanoa ma le mapuitiga.”—Isaia 35:9, 10.

21. E tatau faapefea ia i tatou i aso nei ona vaai atu i le faataunuuga o le Isaia mataupu e 35 lea ua uma ona faataunuuina?

²¹ Maeu se ata faavaloaga ua tatou maua  iinei! Peitai e lē tatau ona tatou manatu i lenei mea e faapea ua na o se talafaasolopito o aso ua tuanai, e peiseai ua na o se tala manaia e itiiti sona aogā i o tatou tulaga po o lo tatou lumanai. O le mea moni, o lenei valoaga ua maua ai se faataunuuga ofoofogia i aso nei i tagata o le Atua, ua pāʻia moni ai la i tatou taitoatasi. Ua saunia ai mo i tatou se mafuaaga aogā tatou te alalaga atu ai ma le olioli. O nei vala e aofia ai lou ola i le taimi nei ma le lumanai o loo talanoaina i le mataupu o loo sosoo mai.

[Faaopoopoga i lalo]

Pe e E te Manatua?

□ O anafea na tupu ai le uluai faataunuuga o le Isaia mataupu e 35?

□ O ā aafiaga po o iuga na tutupu mai i le uluai faataunuuga o le valoaga?

□ Na faataunuuina faapefea e Ieova le Isaia 35:5, 6?

□ O ā suiga i le laueleele ma i o latou tulaga na tofo i ai tagata Iutaia ia na toe foi?

[Fesili mo le Suʻesuʻega]

[Ata i le itulau 9]

O toega o le faatafunaga o Petra, i le vaipanoa lea sa muai nonofo ai tagata Etoma

[Ē Ana le Ata]

Garo Nalbandian

[Ata i le itulau 10]

A o faaaunuua tagata Iutaia, o le tele lava o le laueleele o sa Iutā na oo ina avea e pei o se vaomatua, ua nofoia uma e manu feai e pei o urosa ma leona

[Ē Ana le Ata]

Garo Nalbandian

Urosa ma Leona: Safari-Zoo of Ramat-Gan, Tel Aviv