Vaai i Talaatu Nai lo Mea o E Iloa Nei!

O LE lelei o le vaai faaletino o se faamanuiaga. O le mea moni, o le toatele o tagata o le a fai mai o nai mea o loo latou maua, e sili atu ona tāua. Ae peitai, mo Kerisiano, o loo iai se ituaiga o vaaiga na taʻua e le aposetolo o Paulo e sili atu ona tāua nai lo le lelei o le vaai faaletino. Na tusia e Paulo e faapea: “O loo matou le manatunatu i mea ua vaaia, a o mea e le vaaia.” (2 Korinito 4:18) E tatau ona avea lea o se ituaiga o vaaiga moni lava e sili ona faapitoa e mafai ai e se tasi ona vaai i mea e lē o mafai ona iloa atu! E mafai ona tatou taʻua lea o le vaaiga e 20/20, o se ituaiga vaaiga faaleagaga.

Aisea ua Manaomia Ai?

O Kerisiano o le uluai senituri na iai moni lava se manaoga ina ia iai lea ituaiga o vaai faaleagaga. Na faia la latou faiva faa-Kerisiano i lalo o le tele o tulaga faigata. Na faamatala mai e Paulo e faapea: “Ua puapuagatia i matou i mea uma, a e le faaatuatuvaleina; ua fememeai, a e le matuā fememeai; ua sauaina, a e le tuulafoaiina; ua lafotuina i lalo, a e le fano.”—2 Korinito 4:8, 9.

E ui lava i na tulaga, ae na tutumau pea le au soo faamaoni. O le faatuatua malosi i le Atua, na mafai ai ona latou faapea mai e pei ona sa taʻua e Paulo: “O le mea lea matou te le faavaivai ai; auā e ui lava ina tauāu ina uma lo matou tagata i fafo, ua faafouina lē i totonu i lea aso ma lea aso.” O le ā la, na maua ai lenei faafouga i lea aso ma lea aso? Na faaauau Paulo i le faapea mai: “Auā o lo matou puapuaga mamasagia ma le vave mavae, e saunia ai mo i matou le mamafa o le mamalu faavavau e matua silisili ese foi. O loo matou le manatunatu i mea ua vaaia, a o mea e le vaaia; auā o mea ua vaaia e gata mai ia, a o mea e le vaaia e faavavau ia.”—2 Korinito 4:16-18.

Sa faamalosia e Paulo ona uso faaleagaga ina ia aua le faatagaina faafitauli, o faigata, o sauāga—o tiga i so o se mea o le olaga—e faapuaoa ai la latou vaai i le taui matagofie ua tuu mai i o latou luma. E tatau ona latou vaai i talaatu o tulaga o loo latou i ai nei, ma taulai atu pea la latou vaai i le iuga fiafia o le ala faa-Kerisiano. Na fesoasoani lena mea ia i latou e faafouina ai i se tulaga faifai pea i aso taitasi la latou faaiuga ina ia faaauau ona tauivi malosi. Ua faapena foi Kerisiano i aso nei ona manaomia le iai o lea vaaiga lelei faaleagaga.

Vaai i Puapuaga o Iai Nei o se Mea Puupuu e Lē Tumau!

Pe tatou te mananao ai pe leai, ae tatou te vaai lava i mea tatou te lē fia vaai i ai i lea aso ma lea aso. O se tepa atu i le faʻata, e lē mafai  ona tatou alofiaina ai le mātauina o ni togitogi lē manaomia ma ni ila o le tino faaletino, o faailoaga o le lē lelei atoatoa o le tino. Pe a tatou tilotilo i le faʻata o le Afioga a le Atua, tatou te vaai ai i togitogi ma ila faaleagaga, o loo ia i tatou atoa foi ma isi. (Iakopo 1:22-25) Pe a tatou vaai foi i le nusipepa o aso taitasi po o le televise, o tala o le lē faamasinotonu, faiga sauā, ma mala o loo aumaia ai, e teʻi ai ua oo mai ia i tatou lagona o le faanoanoa.

E manao Satani e faaosofia ia i tatou le lē fiafia ona o mea tatou te vaai i ai po o le avea ma ē e faavaatuia ma amata ona tau faaluafesasi i le faatuatua. E faapefea ona tatou taofia le tupu o lenei mea? E tatau ona tatou mulimuli i le faaaoaoga na faataatia e Iesu Keriso, e pei ona faalaeiauina mai e le aposetolo o Peteru ina ua ia fai mai: “Auā na valaauina outou ona o lea lava mea; auā na tigaina Keriso lava mo outou, ua tuuina mai ai e ia le faaaʻoaʻo mo outou, ina ia outou mulimuli atu i ona tulagāaao.” (1 Peteru 2:21) I so o se vala lava o le olaga faa-Kerisiano, sa avea ai Iesu ma faataʻitaʻiga lelei atoatoa.

I le faasino atu ia Iesu e avea ma o tatou faaaʻoaʻo, na taʻua faapitoa ai e Peteru e faapea sa tigaina Iesu. O le mea moni lava, na matuā tigaina Iesu i le taimi na iai i luga o le lalolagi. Ona o ia o le “tufuga” a Ieova, sa iai i le foafoaina o le tagata, na ia silafia lelei ai le mea sa fuafua le Atua ia iai tagata. (Faataoto 8:30, 31) Ae o lea faatoʻā ia tagai lelei i le mea ua oo ia i latou ona o le agasala ma le lē lelei atoatoa. I aso taitasi na ia tagai ai ma faafeagai ma tulaga lē lelei atoatoa o tagata ma o latou vaivaiga. Na ono avea lena ma tofotofoga tele ia te ia.—Mataio 9:36; Mareko 6:34.

E ese ai mai i tiga o isi, na faafeagai foi Iesu ma ona lava tiga. (Eperu 5:7, 8) Ae o le vaaiga lelei atoatoa faaleagaga, na ia vaai ai i talaatu o na tiga ina ia iloa atu le taui o le faaeaina i le ola e lē toe oti mo lona ala amiotonu. Ona mulimuli ane ai lea i le avea o ia ma Tupu Faa-Mesia, o le a ia te ia ai le faaeaga o le toe faafoisiaina o tagata mai le tulaga maualalo o iai, i le toe mauaina o le lelei atoatoa e pei ona muai fuafuaina ai e Ieova. O le taulai atu pea o lana vaai i nei faamoemoega lē vaaia i le lumanai na fesoasoani lea ia te ia e tumau ai i le olioli i le auaunaga i le Atua e ui i tiga na fesagai ma ia i lea aso ma lea aso. Na tusia mulimuli ane e Paulo: “Na onosai i le satauro, na faatauvaa ia te ia le mā, ona o le olioli sa tuu i ona luma, ua nofo foi o ia i le itu taumatau o le nofoālii o le Atua.”—Eperu 12:2.

Sa lē taitai faatagaina e Iesu tulaga faigata ma tofotofoga e faaosofia ai lona lē fiafia, faavaatuia ai pe faaluafesasi ai i lona faatuatua. O le avea ma ona soo, e tatau ai ona tatou mulimulitui i lana faaaoaoga silisili.—Mataio 16:24.

Taulai atu i Mea e Lē Vaaia ae Faavavau!

I le talanoaina o mea na mafai ai ona onosai Iesu, na faasino mai ai foi e Paulo le ala mo i tatou ina ua ia tusi mai e faapea: “Ia tatou taufetuli ma le onosai i le ala tanu o i o tatou luma, ma ia vaavaai atu ia Iesu, o lē na te taʻitaʻiina ma lē na te faaatoatoaina le faatuatua.” (Eperu 12:1, 2) Ioe, ina ia taufetuli i le ala faa-Kerisiano ma le manuia ma le olioli, e tatau ona tatou vaai i talaatu o mea o loo i o tatou luma i le taimi nei. Ae e faapefea ona tatou matuā “vaavaai atu” ia Iesu, ma o le ā o le a faia e lea mea mo i tatou?

O se tasi o mea, i le 1914, na faanofotupuina ai Iesu o le Tupu o le Malo o le Atua, ma o loo pule o ia mai le lagi. O nei mea uma lava o le mea moni e lē vaaia e o tatou mata faaletino. Ae a tatou matuā “vaavaai atu” ia Iesu, o le a fesoasoani ia i tatou o tatou mata faaleagaga  ina ia iloaina ai o lea ua sauni nei o ia e gaoioi i le aumaia o le iuga i lenei faiga leaga o mea ma taofia Satani ma ana au o temoni i totonu o pa pupuni e lē toe gaoioi ai. O le vaavaai atili atu pea, o le a faaalia mai ai e la tatou vaaiga faaleagaga le lalolagi fou matagofie lea “e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 19:11-16; 20:1-3; 21:4.

O lea la, nai lo le faaavega mamafa o ia tiga lē tumau atonu tatou te faafesagai i aso taitasi, aisea e lē taulai atu ai la tatou vaai i mea e faavavau? I mata o le faatuatua, aisea e lē vaai ai i talaatu o maʻi ma le manao tele i lenei lalolagi leaga, ia iloa atu ai se parataiso ua faatumulia i le soifua mālōlōina, fiafia, ma tagata e manatu le tasi i le isi? Aisea e lē vaai ai i talaatu o ila, i le itu faaletino ma le faaleagaga, ma iloa atu ai i tatou o loo saʻoloto mai ia mea e faavavau e ala i le tāua o le taulaga togiola a Keriso? Aisea e lē vaai ai i talaatu o tino o ē maliliu i taua, solitulafono ma faiga sauā ma iloa atu ai ē fou ua toe faatutūina mai ua aʻoaʻoina i le filemu ma le amiotonu a Ieova?

E lē gata i lea, o le matuā “vaavaai atu” ia Iesu e aofia ai foi le taulai atu o la tatou vaai faaleagaga i mea ua faataunuuina e le Malo, e ui ina lē vaaia lea Malo, i tagata o le Atua i luga o le lalolagi: e iai le autasi, filemu, alofa, alofa faaleuso, ma le tamaoaiga faaleagaga. Na tusia e se tasi fafine Kerisiano i Siamani ina ua uma ona matamata i le vitiō United by Divine Teaching: “O le a fesoasoani atili mai le vitiō ia te au ina ia teu ai pea i loʻu mafaufau le toatele naʻuā o uso ma tuafāfine Kerisiano i le lalolagi aoao o loo auauna ma le faamaoni i le taimi lava lenei ia Ieova—e faia faapea e ui lava i teteega mai le lautele. Maeu le tāua tele o lo tatou autasi faaleuso a o iai i se lalolagi sauā ma le feainai!”

Pe o e “iloaina” foi o Ieova, o Iesu, o le au agelu faamaoni, ma le faitau miliona o uso Kerisiano o loo ʻau atu i lou itu? Afai o lea, o le a e lē soona popole vale la i “mea a lenei lalolagi” e ono faavaivaia ai oe ma faapogaia ai ona e “lē fua mai” i le auaunaga faa-Kerisiano. (Mataio 13:22) O lea, ia matuā “vaavaai atu” ia Iesu e ala i le taulai atu o ou mata faaleagaga i le Malo ua faavaeina o le Atua ma ana faamanuiaga, i le taimi nei ma le lumanai.

Ia Ola e Vaai Atu i Mea e Lē o Mafai ona Vaaia i le Taimi Nei!

O le vaai atu i le matuā eseese o le lalolagi fou e faavavau a le Atua ma le lalolagi tuai ua malepelepe o loo iai nei, e tatau ai ona uunaia i tatou ina ia amioaʻi i le auala e mafai ai ona tatou ola pea e vaai tino atu i mea ia e na o o tatou mata o le faatuatua o loo mafai ona vaai i ai i aso nei. O le anoanoai o ē toe faatutūina mai o le a fai si o latou teteʻi i le feala mai ma vaai atu i se lalolagi parataiso amiotonu e matuā ese lava mai le lalolagi na latou vaai i ai a o lei maliliu. Seʻi tau ina mafaufau i lo tatou olioli i le soifua pea e faafeiloaia i latou ma faamatala atu ia i latou mea ua faia e le Atua!—Faatusatusa i le Ioelu 2:21-27.

Ioe, e maeu le tāua o le lelei o le vaai faaleagaga, ma e maeu le aogā o le faaauau ona faamanino pea lea vaaiga! E mafai ona tatou faia lea e ala i le faia e lē aunoa o suesuega totino faale-Tusi Paia, auai i sauniga faa-Kerisiano, talanoa atu i isi e uiga i lo tatou faamoemoe e faavae i le Tusi Paia, ma e sili ai i na mea uma, ia tatalo mo le taʻitaʻiga a le Atua. O le a mafai e lea mea ona faatumauina ai le maʻatiʻati ma le manino o la tatou vaaiga faaleagaga ma mafai ai ona tatou vaai i talaatu o mea o tatou vaai nei i ai!