“Aua Neʻi Vaivai Ou Lima”

“Aua neʻi vaivai ou lima. O Ieova lou Atua i totonu ia te oe o lē malosi ia; na te faaolaina.”—SEFANAIA 3:16, 17.

1. O le ā na taʻua e se tagata sa ia aʻoaʻoina mataupu faale-Tusi Paia e faatatau i le valoaga a Sefanaia?

UA FAASALAFA atu le valoaga a Sefanaia e sili atu nai lo lona uluai faataunuuga i le lona fitu ma le lona ono o senituri T.L.M. I le faamatalaga a le polofesa o C. F. Keil e faatatau ia Sefanaia, na ia tusi ai e faapea: “O le valoaga a Sefanaia . . . e lē gata ina amata mai i le faasilasilaina o se faamasinoga aoao i le lalolagi atoa, lea ua mapuna aʻe ai le faamasinoga o le a faaoo atu ia Iuta ona o ana agasala, ma luga o le lalolagi o nuu ona o a latou faiga lē alolofa i tagata o Ieova; ae o loo talanoaina pea le aso tele ma le matautia o Ieova.”

2. O ā tulaga tutusa ua iai i aso o Sefanaia, ma le tulaga o loo iai i Kerisinetoma i aso nei?

² I aso nei, o le faaiuga faafaamasinoga a Ieova o le aoaoina lea o nuu mo le faaumatiaga i se tulaga e sili mamao atu ona telē nai lo o aso o Sefanaia. (Sefanaia 3:8) O na nuu o loo faapea mai o i latou o Kerisiano ua matuā nofosala lava i le silafaga a le Atua. E pei lava ona matuā faasalaina Ierusalema ona o lona lē faamaoni ia Ieova, e faapena foi ona tatau ia Kerisinetoma ona tali atu i le Atua mo ona ala soonafai. O faamasinoga tauatua ia na faasilasila atu ia Iuta ma Ierusalema i aso o Sefanaia, ua faatatauina i se uiga e sili atu ona malosi i lotu ma vaega faalotu a Kerisinetoma. Ua latou faapisipisia foi le tapuaiga mamā e ala i a latou talitonuga e lē o faamamaluina ai le Atua, o le tele o na talitonuga e faapaupau o latou amataga mai. Ua latou faataulagaina le faitau miliona o a latou fanau malolosi i fatafaitaulaga faaonaponei o taua. E lē gata i lea, o ē o loo ʻaināina Ierusalema faafaatusa ua latou palu faatasi le mea o loo latou taʻua o le Faa-Kerisiano, ma sailiiliga i fetu, o faiga faataulaitu, ma amioga lē mamā faaleituaiga, ua faapei lena o le tapuaiga ia Paala.—Sefanaia 1:4, 5.

3. O le ā e mafai ona fai atu ai e uiga i le toatele o taʻitaʻi o le lalolagi ma faiga malo faapolotiki i aso nei, ma o le ā na valoiaina e Sefanaia?

 ³ O le toatele o taʻitaʻi faapolotiki o Kerisinetoma e fiafia tele ina ia taualoa i latou i totonu o lotu. Ae i le faapei o “alii sili” o Iuta, o nisi o i latou ua pei o ni “leona fetagisi” ma “luko” feai i le faataugāina o tagata. (Sefanaia 3:1-3) O ē o loo lagolagoina faiga faapolotiki a na tagata ua latou ‘faatumu le fale o o latou alii i le sauā ma le pepelo.’ (Sefanaia 1:9) Ua matuā taatele faiga faatogafalea ma faiga faapiopio. Mo faiga malo faapolotiki i totonu ma fafo o Kerisinetoma, ua faateleina le aofai o i latou o ē o loo ‘matuā faamaualuluga’ lo latou tetee i tagata o Ieova o ʻau, o ana Molimau, i lo latou faia o faiga leaga i na tagata e peiseai o se “vaega faalotu” e inosia. (Sefanaia 2:8; Galuega 24:5, 14) I le faatatau atu i na taʻitaʻi uma faapolotiki ma ē o lagolagoina i latou, na vavalo ai Sefanaia e faapea: “E le mafai lava i o latou ario ma o latou auro ona laveai ia te i latou i le aso o le toasa o Ieova; a e faaumatia le nuu uma i le afi o lona fuā; auā e matuā faafuasei ona faaumatia e ia o i latou uma o e nonofo i le nuu.”—Sefanaia 1:18.

“E Lilo ai . . . i le Aso o le Toasa o Ieova”

4. O le ā e faaalia ai o le a iai ē faasaoina mai le aso tele o Ieova, ae o le ā e ao ona latou fai?

⁴ E lē o tagata uma sa ʻaināina Iuta na faaumatia i le senituri lona fitu T.L.M. O le a faapena foi ona iai i latou o ē faasaoina mai le aso tele o Ieova. Ia i latou na, na fetalai ai Ieova e ala mai i lana perofeta o Sefanaia e faapea: “Manū o lei fanau mai le pule; o loo mavae atu le aso pei o aputi o saito; manū o lei oo mai le toasa tele o Ieova ia te outou; manū o lei oo mai ia te outou le aso o le toasa o Ieova. Ia outou saili ia Ieova, outou uma ua agamalu i le nuu, o e ua faia lana faamasinoga; ia outou saili le amiotonu, ia outou saili le agamalu, atonu e lilo ai outou i le aso o le toasa o Ieova.”—Sefanaia 2:2, 3.

5. I lenei taimi o le iuga, o ai ē muamua na latou utagia le lapataiga a Sefanaia, ma ua faapefea ona faaaogaina i latou e Ieova?

⁵ I le vaitaimi faaiuiu o lenei lalolagi, sa muai taliaina ai le valaaulia faavaloaga e le vaega totoe o Isaraelu faaleagaga, o Kerisiano faauuina. (Roma 2:28, 29; 9:6; Kalatia 6:16) Ona o le sailia o le amiotonu ma le agamalu ma faaalia le faaaloalo mo faaiuga faafaamasinoga a Ieova, na faasaoina ai i latou mai ia Papelonia le Aai Tele, o le emepaea i le lalolagi o lotu sese, ma sa toe fuataʻiina ai le finagalo malie i le 1919. Talu mai lena taimi, ae maise lava talu mai le 1922, o loo folafola atu ai ma le lē fefefe e lenei vaega totoe faamaoni faamasinoga a Ieova faasaga i lotu ma vaega faalotu a Kerisinetoma ma e faasaga i malo faapolotiki.

6. (a) O le ā na vavalo ai Sefanaia e faatatau i le vaega totoe faamaoni? (e) Ua faapefea ona faataunuuina lenei valoaga?

⁶ Na vavalo Sefanaia e faatatau i lenei vaega totoe faamaoni e faapea: “Ou te faatotoe i totonu ia te oe o le nuu agamalu ma le mativa, latou te faatuatua foi i le suafa o Ieova. O e totoe o Isaraelu latou te le faia amioletonu, latou te le tala pepelo foi; e le iloa foi i o latou gutu le laulaufaiva faaʻoleʻole; a e latou te aai, ma taooto, e leai foi se faamatau mai.” (Sefanaia 3:12, 13) Ua faasilisilia pea e nei Kerisiano faauuina le suafa o Ieova, ae maise lava talu mai le 1931, ina ua latou tauaveina le igoa o Molimau a Ieova. (Isaia 43:10-12) E ala i le faamatilatilaina o le mataupu i le silisili ese o Ieova, ua latou faamamaluina ai le suafa o le Atua, ma ua faamaonia le avea o lenei mea o se lafitaga ia i latou. (Faataoto 18:10) Ua fafagaina i latou e Ieova i le anoanoai o meaʻai faaleagaga, ma ua latou nonofo ai e aunoa ma se mataʻu i le parataiso faaleagaga.—Sefanaia 3:16, 17.

 “Le Igoa ma le Viiga i Nuu Uma o le Lalolagi”

7, 8. (a) O le ā le isi valoaga ua faataunuuina i le vaega totoe o le Isaraelu faaleagaga? (e) O le ā ua oo ina iloatino e le faitau miliona o tagata, ma o ā ni o oe lava lagona e faatatau i lenei itu?

⁷ O le piimau atu o le vaega totoe i le suafa o Ieova ma mataupu silisili amiotonu o lana Afioga ua lē o faaleamanaiaina. Ua iloa e tagata loto faamaoni le eseesega i le va o amio a le vaega totoe ma amio faapiopio ma le faaʻoleʻole i pulega faapolotiki ma faalotu a le lalolagi. Ua faamanuia e Ieova o “e totoe o Isaraelu” faaleagaga. Ua ia faamamaluina i latou i le faaeaga o le faaigoaina i lona suafa, ma ua ia faapogaia i latou ina ia iai so latou talaaga lelei i tagata o le lalolagi. Ua tutusa lena ma le mea na valoia e Sefanaia e faapea: “O ona po ia ou te au mai ai outou, o ona po foi lava ou te faapotopotoina ai outou; ou te avatu ai lava ia te outou le igoa ma le viiga i nuu uma o le lalolagi, pe a ou faafoisia la outou tafeaga, o outou o vaai i ai, o loo fetalai mai ai Ieova.”—Sefanaia 3:20.

⁸ Talu mai le 1935, e faitau miliona tagata o ē ua latou iloatino le faamanuiaina e Ieova o le vaega totoe. Ua latou fiafia e mulimuli atu i nei tagata sa Iutā faaleagaga, po o tagata Isaraelu, i le faapea atu: “Tatou te o ma outou; auā ua matou faalogo, o loo ia te outou le Atua.” (Sakaria 8:23) Ua iloa e i latou nei o “isi mamoe” e faapea, o le vaega totoe faauuina ua faia aʻe ai “le auauna faamaoni ma le mafaufau” lea, ua tofia e Keriso “e pule i ana auauna [faalelalolagi].” Latou te faaaogaina ma le loto faafetai meaʻai faaleagaga ua saunia mai e le vasega o le auauna “i ona itu aso.”—Ioane 10:16; Mataio 24:45-47.

9. O le ā le “gagana” ua aʻoaʻoina e le faitau miliona o tagata e tautatala ai, ma o le ā le galuega tele o loo auauna ma le “loto gatasi” ai isi mamoe ma le vaega totoe faauuina?

⁹ I le felagolagomai ma le vaega totoe, o loo aʻoaʻoina ai e lenei faitau miliona o isi mamoe ina ia latou ola ma tautatala e ogatusa ma le “gagana mamā.” * Na valoia e Ieova e ala mai ia Sefanaia e faapea: “O ona po ia ou te liliu atu ai i nuu o le gagana  mamā, ina ia latou valaau uma lava i le suafa o Ieova, ina ia auauna ia te ia ma le loto gatasi.” (Sefanaia 3:9, NW) Ioe, ua auauna autasi “ma le loto gatasi” isi mamoe ia Ieova faatasi ai ma ē faauuina o le “lafu mamoe itiiti” i le galuega faanatinati o le talaʻia o “lenei tala lelei o le malo . . . e fai ma molimau i nuu uma.”—Luka 12:32; Mataio 24:14.

ʻO le a Oo mai le Aso o Ieova’

10. O le ā ua talitonu mautinoa pea i ai le vaega totoe faauuina, ma i le avea o i latou o se vaega, o le ā o le a latou ola pea ina ia vaai atu i ai?

¹⁰ Ua manatua pea e le vaega totoe faauuina le faamatalaga faagaeeina a le aposetolo o Peteru e faapea: “E le faatuai mai le Alii [Ieova] i le mea na folafolaina mai, faapei o le manatu a isi tagata i le faatuai; a e peitai ua onosai mai lava o ia ia te outou, ona ua le finagalo ia fano se tasi, a ia oo uma lava i le salamo. A e sau le aso o le Alii [Ieova] e pei o se gaoi.” (2 Peteru 3:9, 10) E lē taitai ona iai ni masalosaloga o le vasega o le auauna faamaoni e tusa ai o le oo mai o le aso o Ieova i o tatou taimi. O le a amata lena aso tele i le faaooina mai o sala faafaamasinoga a le Atua ia Kerisinetoma, le Ierusalema faafaatusa, ma le isi vaega o totoe o Papelonia le Aai Tele.—Sefanaia 1:2-4; Faaaliga 17:1, 5; 19:1, 2.

11, 12. (a) O le ā le isi vaega o le valoaga a Sefanaia ua faataunuuina i le vaega totoe? (e) Ua faapefea ona utagiaina e le vaega totoe faauuina le valaau, “Aua neʻi vaivai ou lima”?

¹¹ E olioli le vaega totoe faamaoni ina ua faasaoina i le 1919 mai le faaaunuua faaleagaga i Papelonia le Aai Tele, le emepaea a le lalolagi o lotu sese. Ua latou tofo i le faataunuuga o le valoaga a Sefanaia e faapea: “Le tama fafine a Siona e, ia e pese. Isaraelu e, ia e alaga; le tama fafine a Ierusalema e, ia e fiafia, ma olioli lava ma le loto atoa. Ua faaolaina e Ieova au sala, ua na aveeseina le na fai oe ma ona fili; o le Tupu o Isaraelu, o Ieova, o loo i ai o ia i totonu ia te oe, e te le toe iloa ai se malaia. O lea aso o le a faapea atu ai i Ierusalema, Aua e te fefe; Siona e, aua neʻi vaivai ou lima. O Ieova lou Atua i totonu ia oe o lē malosi ia; na te faaolaina.”—Sefanaia 3:14-17.

¹² Ona o le talitonu mautinoa ma le anoanoai o faamaoniga e faapea o loo lagolagoina i latou e Ieova, ua agaʻi atu ai ma le lē matataʻu le vaega totoe faauuina i le faataunuuina o lo latou tofiga mai le Atua. Ua latou talaʻia le tala lelei o le Malo ma faailoa atu faamasinoga a Ieova ia Kerisinetoma, le vaega o loo totoe o Papelonia le Aai Tele, ma le faiga aoao o mea amioleaga a Satani. E ui lava i faigata, ae ua silia i le faitau sefulu tausaga talu mai le 1919, ua latou usitaia ai pea le poloaiga mai le Atua e faapea: “Aua e te fefe; Siona e, aua neʻi vaivai ou lima.” Ua latou matuā maelega i le tufatufaina atu o le faitau piliona o sāvali, o mekasini, o tusi, ma tamai tusi o loo faasilasilaina ai le Malo o Ieova. Ua avea i latou o se faaaoaoga e faagaeeina ai le faatuatua i isi mamoe, o ē ua lolofi atu i la latou itu, talu mai le 1935.

“Aua Neʻi Vaivai Ou Lima”

13, 14. (a) Aisea na toe faamaamulu ai nisi tagata Iutaia mai le auauna atu ia Ieova, ma na faapefea ona faailoa mai lenei mea? (e) O le ā o le a lē atamai mo i tatou ona fai, ma i le ā le galuega e lē tatau ona faavaivai ai o tatou lima?

¹³ A o ‘tatou faatalitali atu pea’ i le aso tele o Ieova, e mafai faapefea ona tatou maua se fesoasoani aogā mai le valoaga a Sefanaia? Muamua lava, e tatau ona tatou faaeteete ina neʻi o tatou pei o tagata Iutaia i le vaitaimi o Sefanaia, o ē na toe faamaamulu mai le mulimuli atu ia Ieova talu ai sa latou masalosalo i le latalata mai o le aso o Ieova. Sa lei tau faaalia atu faalauaitele e na tagata Iutaia o latou masalosaloga, ae o a latou gaoioiga na faaalia atu ai latou te lei talitonu moni i le lalata mai  o le aso tele o Ieova. Sa latou uaʻi atu i le faaputuina o le tamaoaiga nai lo lo latou faatalitali atu pea ia Ieova.—Sefanaia 1:12, 13; 3:8.

¹⁴ E lē o se taimi lenei e faataga ai masalosaloga ina ia mauaa ifo i o tatou loto. O se matuā lē atamai le tolopoina i o tatou mafaufau ma loto o le oo mai o le aso o Ieova. (2 Peteru 3:1-4, 10) E tatau ona tatou alofia le faamaamulu mai le mulimuli atu ia Ieova po o le ‘faavaivai o o tatou lima’ i lana auaunaga. E aofia ai i lenei mea le lē “galue ma le lima vaivai” i la tatou talaʻiga o “le tala lelei.”—Faataoto 10:4; Mareko 13:10.

Le Feagai ai ma Uiga Lē Fiafia Mai

15. O le ā e mafai ona faapogaia ai i tatou e faavaivai o tatou lima i le auaunaga a Ieova, ma na faapefea ona valoia mai lenei faafitauli i le valoaga a Sefanaia?

¹⁵ Lona lua, e tatau ona tatou mataala e teena aafiaga e faavaivaia ai, o uiga lē fiafia mai. I le tele o atunuu i Sisifo, o le lē popole i mataupu faaleagaga e mafai ona avea ma pogai mo le lotovaivai i nisi o tagata talaʻi o le tala lelei. O lena uiga lē fiafia mai sa iai i le vaitaimi o Sefanaia. Na fetalai Ieova e ala i lana perofeta: “Ona ou taui atu lea i tagata o e . . . o loo faapea i o latou loto, E le faia e Ieova se mea lelei, na te le faia foi se mea leaga.” (Sefanaia 1:12) I le tusiaina o se faamatalaga e faatatau i lenei fuaitau i le tusi Cambridge Bible for Schools and Colleges, na taʻua ai e A. B. Davidson e faapea, o loo faasino atu i tagata o ē ua “matuā lofia i uiga lē fiafia mai o le lē manatu mamafa, po o le oo lava ina lē talitonu e iai se faauilavea mai a se mana e sili ona maualuga i mataupufai a tagata.”

16. O le ā le ituaiga o mafaufau o loo iai i le toatele o tagata lotu i Kerisinetoma, ae o le ā le faamalosiauga ua aumaia e Ieova ia i tatou?

¹⁶ O uiga lē fiafia mai o se uiga ua matuā taatele i aso nei i le tele o vaega o le lalolagi, ae maise lava i atunuu e mauoa i meafaitino. E oo lava i tagata o lotu Kerisinetoma ua latou lē talitonu o le a faalaa mai Ieova le Atua i mataupufai a tagata i o tatou aso. Ua latou teena a tatou taumafaiga ina ia faaoo atu ia i latou le tala lelei o le Malo, a lē i le tau o sina ʻataʻata lē talitonu pe i le na o sina tali puupuu mai “Ou te lē fiafia!” I nei la tulaga, e mafai ai ona avea le maumauai i le galuega o le molimau atu o se matuā luʻi lava. E tofotofoina ai lo tatou tumau. Ae ala mai le valoaga a Sefanaia, ua faamalosia ai pea e Ieova ona tagata faamaoni i le fetalai mai: “Aua neʻi vaivai ou lima. O Ieova lou Atua i totonu ia te oe o lē malosi ia; na te faaolaina; e olioli o ia ia te oe ma le fiafia; o lona alofa e le fetalai ai o ia; e olioli lava o ia ia te oe ma le ofo fiafia.”—Sefanaia 3:16, 17.

17. O le ā le faaaoaoga lelei e tatau i ē fou o isi mamoe ona latou mulimuli ai, ma e faapefea?

¹⁷ O le mea moni i le talafaasolopito i ona po nei o tagata o Ieova e faapea, o le vaega totoe, ma ē matutua o isi mamoe, ua latou faataulauina se galuega tele o le aoaoina i nei aso e gata ai. O nei Kerisiano faamaoni uma ua latou faaalia le tutumau mo le silia  i le faitau sefulu o tausaga. Ua latou lē faatagaina uiga lē fiafia mai o le vaega tele o Kerisinetoma e faalotovaivaia ai i latou. O lea, tau ina ia lē faatagaina e ē fou o isi mamoe i latou, ina ia faalotovaivaia i uiga lē fiafia e faaali mai i mataupu faaleagaga lea ua matuā taatele i aso nei i le tele o atunuu. Tau ina ia latou lē faatagaina o latou ‘lima e faavaivai,’ pe faapalapala. Tau ina ia latou faaaogā avanoa uma e tufa atu ai Le Olomatamata, le Ala Mai!, ma isi lomiga matagofie ua fuafuaina e fesoasoani atu ai i tagata o ē pei ni mamoe ina ia latou aʻoaʻoina le upu moni e faatatau i le aso o Ieova ma faamanuiaga o loo sosoo mai.

Ia Agaʻi i Luma a o Faatalitalia le Aso Tele!

18, 19. (a) O ā faalaeiauga ina ia tutumau o loo tatou mauaina i le Mataio 24:13 ma le Isaia 35:3, 4? (e) O le a faapefea ona faamanuiaina i tatou pe afai tatou te agaʻi ma le autasi i luma i le auaunaga a Ieova?

¹⁸ Na fetalai Iesu: “O lē tumau seia oo i le gataaga, e faaolaina lea.” (Mataio 24:13) O lea la, e lē manaomia ni “lima ua gagase” po o ni “tulivae ua vaivai” a o tatou faatalitalia le aso tele o Ieova! (Isaia 35:3, 4) Ua faamautinoa mai e le valoaga a Sefanaia e faatatau ia Ieova e faapea: “O lē malosi ia, na te faaolaina.” (Sefanaia 3:17) Ioe, o le a faasaoina e Ieova le “motu o tagata e toatele” mai le vaega faaiu o “le puapuaga tele,” pe a ia faatonuina lona Alo ina ia nutililiia malo faapolotiki o ē ‘o loo matuā faamaualuluga’ i lo latou tetee i ona tagata.—Faaaliga 7:9, 14; Sefanaia 2:10, 11; Salamo 2:7-9.

¹⁹ A o faaloloʻi mai le aso tele o Ieova, tau ina ia tatou agaʻi i luma ma le maelega, i le auauna atu ia te ia “ma le loto gatasi”! (Sefanaia 3:9) O le faia faapea, o le a mafai ai e i tatou ma le lē mafaitaulia o isi ona iai i se tulaga e ‘lilo ai i le aso o le toasa o Ieova’ ma molimauina le faapaiaina o lona suafa mamalu.

[Faaopoopoga i lalo]

I le Autaluga

□ I ā vala ua tutusa ai le tulaga faalotu o loo iai i Kerisinetoma, ma le tulaga i aso o Sefanaia?

□ Ua faapefea ona faaatagia mai e le toatele o taʻitaʻi faapolotiki i aso nei, ia “alii sili” o le lalolagi i le vaitaimi o Sefanaia?

□ O ā folafolaga o loo i le Sefanaia ua faataunuuina i le vaega totoe?

□ O le ā ua iloatino e le faitau miliona o tagata?

□ Aisea e lē tatau ai ona faavaivai o tatou lima i le auaunaga a Ieova?

[Fesili mo le Suʻesuʻega]

[Ata i le itulau 15]

I le pei o Sefanaia, ua folafola atu ai ma le lē matataʻu e le vaega totoe faamaoni o Kerisiano faauuina faamasinoga a Ieova

[Ata i le itulau 18]

Ua lē faatagaina e “isi mamoe” uiga lē fiafia mai o tagata latou te lotovaivai ai