E Manatu mai le Atua ia te Oe

NA MATUĀ pagatia Maria, o se fafine Kerisiano ua silia ma le 40 tausaga o lona olaga. O le mulilua a lana tane, na tatalaina ai le la faaipoipoga ua silia nei ma le sefulu tausaga ua tuanai. E talu mai lena taimi, na taumafai ai Maria e faataunuuina lona tiute o se matua e nofo toatasi i lana fanau e toafā. Ae o loo nofo toatasi pea o ia, ma e iai taimi e foliga mai e lē mafai ai ona ia tatalia lagona o le tuuatoatasi. Na tau mānatu Maria e faapea, ‘Po o le uiga o lenei mea e lē o manatu mai le Atua ia te au po o laʻu fanau ua leai se tamā?’

Po o oo ia te oe se tulaga faapena pe leai, ae mautinoa lava lou ootia ai i faalogona o Maria. Ua onosaia e i tatou uma lava tulaga faigata, ma atonu ua tatou tau mānatu ai po o afea ma pe faapefea ona gaoioi mai Ieova mo i tatou. O nisi o nei mea tutupu ua māfua ona oo mai ona o lo tatou gauai atu i tulafono a le Atua. (Mataio 10:16-18; Galuega 5:29) O isi e māfua ona o āuga o lo tatou ola ai o ni tagata lē lelei atoatoa i se lalolagi ua pulea e Satani. (1 Ioane 5:19) Na tusia e le aposetolo o Paulo e faapea: “Ua oi faatasi, ma oono faatasi mea uma lava na faia.”—Roma 8:22.

E ui i lea, afai o loo e fesagai moni ma se tofotofoga tugā, e lē faapea ai la ua tuulafoaiina oe e Ieova pe faapea ua lē o naunau mai mo lou lelei. E mafai faapefea ona e mautinoaina lenei mea? O le ā e faaalia ai e manatu mai le Atua ia te oe?

Se Faaaoaoga Anamua

Ua aumai i le Tusi Paia se faamaoniga manino o le manatu mai o Ieova i tagata i o latou tulaga taitoatasi. Seʻi manatu ia Tavita. Na naunau totino Ieova i lenei leoleo mamoe talavou, i le faamaonia lea o ia o “se tagata . . . e tatau ma lona finagalo.” (1 Samuelu 13:14) Mulimuli ane ina ua pule Tavita o se tupu, na folafola atu e Ieova ia te ia: “O le a ou iai ma oe i mea uma e te alu i ai.”—2 Samuelu 7:9, NW.

Po o le uiga ea o lenei mea sa ola Tavita i se olaga “solosolo lelei,” e saʻoloto mai so o se faigata? E leai, na feagai Tavita ma tofotofoga matuia a o lei oo i lana nofoaiga, ma a o faagasolo lana nofoaiga. Mo ni nai tausaga a o lei avea ma tupu, na matuā tulituliloaina ai o ia e le tupu fasioti tagata o Saulo. I lea vaitaimi o lona soifuaga, na tusi ai Tavita e faapea: “Ua i le va o leona lava aʻu . . . o le fanau a tagata i latou, o latou nifo o tao ma u fanafana ia.”—Salamo 57:4.

Ae e ui i ia mau faigata, na mautinoa lelei e Tavita le tausiga a Ieova ia te ia. “Ua e faitauina lava loʻu fesolasolatai,” na ia taʻua i sana tatalo ia Ieova. Ioe, ia Tavita, sa pei lava na tusi faamaumauina e Ieova le mea atoa na tupu. Ona toe faapea atu lea o Tavita: “Ia e utu oʻu loimata i lau fagu; e le o i ai ea i lāu tusi?” * (Salamo 56:8) I lenei faataʻitaʻiga, na faaalia ai e Tavita le mautinoa e faapea sa malamalama lelei Ieova e lē gata i lona tulaga, ae faapea foi faalogona na aafia ai.

I le agaʻi atu i le mutaaga o lona soifuaga, na mafai ai e Tavita ona tusi e fua i mea na oo totino ia te ia e faapea: “E mau ia Ieova le savali o le tagata; e fiafia foi o ia i lona ala. Afai  e paū ia, e le taatia pea ia i lalo; auā e taofia lona lima e Ieova.” (Salamo 37:23, 24) E mafai foi ona ia te oe le mautinoa e faapea, e tusa lava pe o tumau ou tofotofoga ma faaauau pea, ae o loo mātau mai e Ieova ma faatāuaina lou tumau. Na tusi Paulo e faapea: “E le amioletonu le Atua, na te le faagalogaloina la outou galuega ma le alofa ua outou faaali mai ai i lona suafa, auā na outou auauna i le au paia, i le o loo outou auauna i ai.”—Eperu 6:10.

E lē gata i lea, e mafai ona gaoioi Ieova mo oe i le aumaia ia te oe o le malosi e te tumau ai i so o se toatuga lava e faasalavei ane i lou ala. “E tele lava mea leaga e oo i le ua amiotonu,” na tusi ai Tavita, “a e laveaiina o ia e Ieova ai ia mea uma.” (Salamo 34:19) O le mea moni, ua taʻu mai e le Tusi Paia ia i tatou e faapea o fofoga o Ieova “e fetaufetuliai i le lalolagi uma, na te fesoasoani ia te i latou o e ua sao o latou loto ia te ia.”—2 Nofoaiga a Tupu 16:9.

Ua Tosina mai Oe e Ieova

O faamaoniga faaopoopo o le manatu totino mai o Ieova e mafai ona maua i upu a Iesu. “E le mafai se tasi ona sau ia te au,” na ia fetalai ai, “pe a le tosina mai e le Tamā ua auina mai aʻu.” (Ioane 6:44) Ioe, e fesoasoani mai Ieova i tagata taitoatasi ina ia faatāuaina aogā o le taulaga a Keriso. E faapefea? O le auala sili lava, e ala mai lea i le galuega talaʻi o le Malo. E moni, o lenei galuega ua avea o se “molimau i nuu uma,” ae ua oo atu i tagata taitoatasi. O lou faalogo ma tali moni atu i le feau o le tala lelei, o le faamaoniga lea o le naunau totino mai o Ieova mo oe.—Mataio 24:14.

E ala i le agaga paia ua tosina ai e Ieova tagata taitoatasi i lona Alo ma le faamoemoe o le ola e faavavau. Ua mafai ai i lenei mea ona mauaina ma faatinoina e tagata taitoatasi ia upu moni e ui i so o se tapulaa ma tulaga lē lelei atoatoa tuufaasolo mai o tatou uluai mātua. O le mea moni lava, e lē mafai e se tasi ona malamalama i fuafuaga a le Atua e aunoa ma le fesoasoani mai i ai o le agaga o le Atua. (1 Korinito 2:11, 12) E pei ona sa tusi atu ai Paulo i tagata Tesalonia, “e le o i tagata uma le faatuatua.” (2 Tesalonia 3:2) E na o i latou e faaalia se agaga naunau ia tosina e Ieova i latou, e foai atu i ai e ia lona agaga.

E tosina e Ieova tagata ona e alofa ia i latou taitoatasi ma e manao ia latou mauaina le faaolataga. Maeu se faamaoniga maumaututū o le manatu totino mai o Ieova! Na fetalai Iesu: “E lē faapea ona finagalo loʻu Tamā i le lagi ia fano se tasi o i latou nei e faatauvaa.” (Mataio 18:14) Ioe, i fofoga o le Atua, e tāua tagata uma i o latou tulaga taitoatasi. O le mafuaaga lena na mafai ai ona tusi Paulo e faapea: “Na te tuuina atu le taui taitasi i tagata e tusa ma a latou galuega.” (Roma 2:6) Ma na faapea mai le aposetolo o Peteru: “E le faailogaina tagata e le Atua; a e peitai o le [tagata e] mataʻu ia te ia i nuu uma lava, ma fai le amiotonu, ua talia e ia.—Galuega 10:34, 35.

O Vavega a Iesu

O le naunau totino o le Atua i tagata sa faailoa mai i se agaga faamomoi loto i vavega na faia e lona Alo o Iesu. Na faia ia faamalologa faatasi ma lagona loloto o le alofa. (Mareko 1:40, 41) Ona “e le mafai e [Iesu] ona fai o se mea, na o ia lava; a o mea na te vaai atu i le Tamā o faia,” ua faailoa mai ai e lona alofa mutimutivale se naunau alofa o Ieova mo ana auauna taitoatasi.—Ioane 5:19.

Seʻi manatu i le tala i vavega na faatinoina e Iesu, o loo faamauina i le Mareko 7:31-37. Na faamaloloina ai e Iesu iinei se tamaloa tutuli ma oolo le leo. Ua taʻua mai e le Tusi Paia, na ia ‘taʻitaʻi ese [le tamaloa] mai le motu o tagata.’ Ma na “silasila ae o ia i le lagi, ua oi, ona ia fetalai atu ia te ia, ‘Efata,’ o lona uiga, ‘ia avanoa.’”

 Aisea na ō ese ai Iesu ma lenei tamaloa mai le motu o tagata? Ia, e foliga mai o se tagata tutuli e tau lē mafai foi ona tautala, e na te lagonaina le mā i luma o tagata. Atonu na mātauina e Iesu le lē toafilemu o faalogona o lenei tamaloa, ma o le mafuaaga lena na ia filifili ai e faamālōlōina o ia i se nofoaga tuufua. Ua fai mai le manatu o se tasi tagata poto o le Tusi Paia: “O le tala atoa, ua matuaʻi faaalia manino mai ai ia i tatou e faapea sa lei na ona manatu Iesu i le tulaga maʻi o le tamaloa; na ia manatunatu ia te ia i lona tulaga o se tagata totino. Na iai se manaoga faapitoa o le tamaloa ma sona faafitauli faapitoa, ma i le naunautaiga silisili ma le alofa, na feagai ai Iesu ma ia i se auala na mafanafana ai ona faalogona ma i se auala na mafai ai ona ia malamalama.”

Ua faaalia mai e lenei tala e faapea sa ia Iesu se naunau totino mo tagata. E mafai foi ona e mautinoa, e faapena foi lona naunau ia te oe. O le mea moni, o lona maliu faataulagaina o se faailoaga lea o lona alofa mo le lalolagi o tagata togiolaina. Ae, e mafai ona e faatāuaina totino lena gaoioiga, e pei ona sa faia e Paulo, o lē na tusi e faapea: “O le Alo o le Atua . . . na alofa mai ia te au ma foaiina mai o ia e ia mo aʻu.” (Kalatia 2:20, NW) Ma talu ai na taʻua e Iesu e faapea “o le ua vaai mai ia te au, ua vaai o ia i le Tamā,” e mafai ai la ona tatou mautinoa e faapena foi ona ia Ieova lea lava naunau i ana auauna taitoatasi.—Ioane 14:9.

Ua Avea Ieova ma Lē Tauia Mai

O lo tatou mauaina o le poto e uiga i le Atua e aofia ai le iloaina o vala uma taitasi o ona uiga  totino e pei ona faailoaina mai i le Tusi Paia. O le suafa lava ia o Ieova o lona uiga “O Ia ua Māfua ai ona Iai,” o lona uiga e mafai ona faatatau atu Ieova i so o se tulaga na te filifilia ina ia faataunuuina ai lona finagalo. I le talafaasolopito atoa, ua gaoioi ai o ia i ona tulaga eseese, e aofia ai Lē na Foafoaina Mea, Tamā, le Alii Silisili Ese, Leoleo Mamoe, o Ieova o ʻau, le Faafofoga tatalo, Faamasino, Aʻoaʻo Sili, ma o Lē na Faatauina. *

Ina ia talisapaia le uiga atoatoa o le suafa o le Atua, e tatau ai foi ona tatou iloaina Ieova i le avea o ia o Lē Tauia Mai. Na tusi Paulo e faapea: “A leai foi se faatuatua e le mafai ona fiafia mai o ia; auā e tatau i lē alu atu i le Atua ona talitonu o loo soifua o ia, o ia foi na te tauia mai o e matuā saili ia te ia.”—Eperu 11:6.

Ua folafola mai e Ieova le ola e faavavau i luga o se lalolagi parataiso ia i latou o ē ua filifili e auauna ia te ia ma le loto atoa i aso nei. E lē o se manatu faapito le vaavaai atu i luma i le faataunuuga o lena folafolaga matagofie, pe o se sosopo le vaai faalemafaufau atu o se tasi lava ia i le ola ai iina. O Mose “sa faanaunau o ia i le taui.” (Eperu 11:26) Na faapena foi ona faatalitalia ma le naunau e Paulo le faataunuuga o le folafolaga a le Atua mo Kerisiano faamaoni faauuina. Na ia tusi e faapea: “Ou te tausisi atu i le faailoga, ia maua ai le taui na valaauina ai aʻu mai lugā e le Atua ia Keriso Iesu.”—Filipi 3:14.

E te ono mafai foi ona vaavaai atu i luma i le taui ua folafola mai e Ieova ia i latou e tutumau. O le faatalitali ma le naunau atu i lena taui, o se vaega tāua lea o lou poto e uiga i le Atua ma lou tumau i lana auaunaga. O lea, ia e manatunatu loloto i aso uma i faamanuiaga ua saunia e Ieova mo oe. O Maria lea na taʻua i le amataga, ua ia faia se taumafaiga faapitoa i le faia o lenei mea. Ua fai mai o ia: “O le taimi muamua lea i loʻu olaga ua faatoʻā ou talia ai le manatu e faapea o loo faatatau ia te au le taulaga togiola a Iesu. O lea ua amata ona ou lagona o loo manatu totino mai Ieova ia te au. Ua 20 tausaga o avea aʻu ma Kerisiano, ae o lea faatoʻā amata moni lava ona ou talitonu i ai.”

E ala i le suesue ma manatunatu loloto i le Tusi Paia, ua amata iloaina ai e Maria faatasi ma le faitau miliona o isi faapea o loo manatu mai Ieova i ona tagata e lē gata ia i latou o se vaega, ae faapea foi ia i latou taitoatasi. Na matuā mautinoa lelei e le aposetolo o Peteru lenei mea, lea na ia tusi ai e faapea: “Ia tuuina atu [i le Atua] mea uma tou te popole ai, auā o loo manatu mai o ia ia te outou.” (1 Peteru 5:7) Ioe, e manatu mai le Atua ia te oe!

[Faaopoopoga i lalo]

[Pusa i le itulau 6]

Le Toetu—Le Faamaoniga e Iloa ai e Manatu mai le Atua

O LE faamaoniga maumaututū o le naunau mai o le Atua i tagata taitoatasi, ua maua lea i le Tusi Paia i le Ioane 5:28, 29, NW e faapea: “E oo mai le aso e faalogo ai i lona leo [leo o Iesu] i latou uma ua i fanuaoti e toe manatua mai ai, ma latou o mai ai.”

E mataina le faaaogaina iinei o le upu Eleni o le mne·meiʹon (fanuaoti e toe manatua mai ai) nai lo le taʹphos (tuugamau). O le upu taʹphos o loo ona aumaia ai na o le manatu i se tanuga. Ae o le mne·meiʹon ua aumaia ai le manatu e faapea o le talaaga o le olaga o le tagata ua oti, o loo manatuaina.

I lenei tulaga, seʻi manatu e uiga i le mea o le a manaomia e le toetu mai ia Ieova le Atua. Ina ia toe aumaia se tasi i le ola, e tatau ona ia iloaina mea uma e uiga i lena tagata—e aofia ai ona uiga totino ma ona manatunatuga uma. Ona faatoʻā mafai ai lea ona toe faafoisia mai lena tagata ma ona uiga muamua.

O le mea moni, i manatu faaletagata, e lē mafai ona faia lea tulaga, ae “e mafaia mea uma e le Atua.” (Mareko 10:27) E mafai foi ona ia mautinoaina le mea o loo i le loto o se tagata. E tusa lava pe ua maliu se tagata mo le tele o senituri, e manatuaina lava o ia e le Atua; e lē mafai ona mou atu. (Iopu 14:13-15) O le mafuaaga lea, ina ua taʻua Aperaamo, Isaako, ma Iakopo, na mafai ona faapea mai Iesu i le tele o senituri talu ona latou maliliu e faapea o Ieova “e le o le Atua ia o e ua oti, a o e ola; auā ua ola uma i latou ia te ia.”—Luka 20:38, NW.

O lea la, o le faitau piliona o i latou ua maliliu, o loo manatuaina pea e Ieova i o latou auiliiliga atoatoa. Maeu se faamaoniga maoaʻe e iloa ai o loo manatu mai le Atua i tagata i o latou tulaga totino!

[Ata i le itulau 7]

Na naunau totino Iesu ia i latou na ia faamālōlōina