Lipoti a Ē Faalauiloa le Malo

O Ē na Uluai Avea ma Fili ua Autasi i le Auaunaga ia Ieova

UA FAAMATALA mai e Branko * e faapea: “O le uluai taimi lava na ou faalogo ai e uiga i Molimau a Ieova, o le taimi lena a o oʻu galue o se leoleo faaauupegaina i Bosnia.”

O Branko sa tiute o se leoleo i se falemaʻi sa togafitia ai tagata manunua. O se tasi o fomaʻi sa suesueina le Tusi Paia ma Molimau, sa ia faamatala ia Branko le tele o mea na ia aʻoaʻoina e uiga i le Tusi Paia i le taimi na la galulue ai i le sifi po.

Sa matuā faagaeetia lava Branko i mea na ia faalogo ai i lena po, o lea na ia lafoai ai loa ana auupega. Sa ia faafesootaia Molimau, ona o le manao e fia aʻoaʻo atili. I se taimi mulimuli ane ina ua siitia atu i se isi atunuu o Europa, na saili ai e Branko se Maota o le Malo ma auai i se sauniga a le faapotopotoga o Molimau a Ieova e tāutala i le gagana Iukosalavia. O iina na feiloai ai Branko ma Slobodan.

O Slobodan na sau foi mai Bosnia ma sa auauna o se tagata tauofo i lena lava taua e pei o Branko—ae i le isi itu taua. O Slobodan na tau mo tagata Serbia faasaga i tagata Croatia. I le taimi na feiloai ai le toalua lea, ua uma ona avea Slobodan ma Molimau papatisoina a Ieova. Na ia ofo atu e faia se suesuega faale-Tusi Paia ma Branko, o lē na avea muamua ma ona fili. A o faagasolo le suesuega, sa tele ni mea na aʻoaʻoina e Branko e uiga ia Ieova, ma na tupu ai lona alofa mo le Atua. O le mea lenei na uunaia ai Branko e tuuina atu lona ola i Lē na Foafoaina Mea. Ia Oketopa 1993, na faatinoina ai lona tuuina atu i le papatisoga i le vai.

Na faapefea ona avea Slobodan ma se tasi o Molimau a Ieova? I se taimi muamua atu, na ia tuua ai le tafā o le taua i Bosnia. Sa ia faitauina nisi o lomiga a Molimau, ae na faatoʻā tupu lona naunau i le Afioga a le Atua ina ua asiasi atu ni Molimau se toalua i lona fale i le amataga lava o le 1992. O ai na asiasi atu ia Slobodan, ma ofo atu i ai se suesuega faale-Tusi Paia? O Mujo, o lē na sau foi o ia mai Bosnia, ae na tausia aʻe o ia o se tagata lotu Musalimi. A o faagasolo le suesuega faale-Tusi Paia, sa faaalu faatasi ai i aso uma e Mujo ma Slobodan, o ē sa feitagai muamua se taimi e faamalosia ai e le tasi le faatuatua o le isi.

O le taua i le atunuu na avea muamua o se vaega o Iukosalavia, na fasiotia ai le faitau selauafe o tagata. Ae o Branko, Slobodan, ma Mujo, ua auauna nei i latou uma o ni ē talaʻi faataimi atoa o le tala lelei i le faapotopotoga lava e tasi o Molimau a Ieova. Ua latou manumalo i fetauaiga a le atunuu ma le va o lanu, ma ua latou sailia nei le filemu a o gauai atu i Lē na Foafoaina Mea, o Ieova.

Ae o le ā le mea na mafai ai ona faia o na suiga? O lo latou alofa mo Ieova, lo latou faaaloalo i le Tusi Paia, ma lo latou filigā e faatatauina upu moni o le Tusi Paia i o latou olaga. E pei ona fai mai le Tusi Paia, “auā o loo ola le afioga a le Atua, o loo matuā galue foi, . . . o loo faamasino foi i manatu ma filifiliga o le loto.”—Eperu 4:12.

[Faaopoopoga i lalo]