Ola ia Tusa ai ma Lau Tautoga i le Faaipoipoga!

O LE aso o le faaipoipoga o se aso e olioli ai. O se sauniga e mamalu tele. E faia e le faatoafaiavā ma le faatoanofotane se tautoga mamalu e aafia ai o la olaga atoa. O i latou o loo auai i le faaipoipoga o ni valaaulia, ua avea ma molimau i lenei tautoga mamalu, ae o Ieova le Atua lava ia, o le Molimau sili lea.

E lē o manaomia mai e le Tusi Paia ni taualumaga patino po o se ituaiga o sauniga faapitoa mo le faaipoipoga. Ae peitai, i le mātau atu i lona amataga mai e le Atua, ua faamautūina le mamalu o se faaipoipoga e ala i tautoga tau le faaipoipoga e faia a o faagasolo le sauniga o le faapaiaga. Mo le tele o tausaga, ua faaaogaina ai e Molimau a Ieova le tautoga o le faaipoipoga o loo taʻua i lalo: “O aʻu o —— ua ou filifilia oe —— e avea ma aʻu (avā/tane) faaipoipo, ou te faapelepele ma ou tausi lelei i ai (Faatoanofotane: ma ou te faaaloalo loloto i ai) e tusa ai ma le tulafono tauatua ua faatulagaina i totonu o le Tusi Paia mo (tane/avā) Kerisiano uma, e tusa lava po o le ā le umi ta te ola faatasi ai i luga o lenei lalolagi ina ia talafeagai ma le fuafuaga tau faaipoipoga a le Atua.” *

O se Mea e Mafaufau i Ai

Afai o e fuafua e faaipoipo, ua matuā tāua la lou mafaufau i le loloto ma le uiga o lenei tautoga a o lumanai le aso o le faaipoipoga. Na faapea mai Solomona: “Aua le faavave lou gutu, aua foi le faataalise lou loto e fai atu se upu i luma o le Atua.” (Failauga 5:2) Ae ā pe a faapea ua uma ona e faaipoipo? E te maua la aogā mai lou manatunatu loloto i le tāua o le tautoga mamalu lea sa e faia i luma o Ieova. Po o e ola aʻe ea e tusa ai ma lea tautoga? E faatāuaina e Kerisiano a latou tautoga. Na faaauau mai Solomona e faapea: “Ina e faia le mea  ua e tauto ai. E sili ona lelei ona e le tauto, i lou tauto a e le avatua. Aua neʻi e agasala i lou gutu; aua foi e te fai atu i luma o le agelu, O le mea sese lea.”—Failauga 5:4-6.

O le iloiloina o fuaiupu taitasi o le tautoga o le faaipoipoga e mautinoa e faatamaoaigaina ai lou malamalamaga i lenei folafolaga mamalu.

“O aʻu o —— ua ou filifilia oe”: O upu amata na o le tautoga. Ua faamamafa ai lou taliaina o tiute tauave totino o lau lava filifiliga e faaipoipo.

I le faatulagaga faa-Kerisiano, e leai se aiaiga faale-Tusi Paia ia faaipoipo tagata uma. O Iesu Keriso lava ia sa faaauau ona nofofua ma na ia fautuaina le nofofua mo i latou e “mafaia ona talia.” (Mataio 19:10-12) I le isi itu, o le toatele lava o aposetolo o Iesu, o tane faaipoipo. (Luka 4:38; 1 Korinito 9:5) Ua manino mai o le filifiliga ia faaipoipo o se mataupu totino a le tagata lava ia. E lē o i se tagata se pule faale-Tusi Paia e faamalosia ai se tasi ia faaipoipo.

O lea, o lau lava matafaioi le filifili e faaipoipo. E lē taumate foi, na e filifilia e oe lava ia lē ua e faaipoipo atu i ai. Pe a e taʻutino atu le tautoga o le faaipoipoga, faapea, ‘Ua ou filifilia oe ——,’ o lona uiga ua e filifilia pe ua e talia lena tagata e lē na o ona uiga lelei, ae faatasi ai foi ma ona masei.

A o faagasolo le taimi, e foliga mai o le a e iloaina ai nisi uiga patino sa e lei iloaina o lau paaga. E iai taimi o le a e lagona ai le lē fiafia. Ua faapea mai le Tusi Paia “ua agasala tagata uma lava, ma ua le oo i le mamalu o le Atua.” (Roma 3:23) O lea e manaomia ai ona e faia ni fetuutuunaiga ina ia talafeagai ma lau paaga. Atonu e faigata lenei tulaga, ma atonu e iai nisi taimi e te lagona ai le fiu. Ae ia manatua, ua uma ona e taʻutino atu le tautoga o le faaipoipoga i luma o Ieova. E mafai ona ia fesoasoani ia te oe ina ia e taulau ma le manuia.

“E avea ma aʻu (avā/tane) faaipoipo”: I le uluai faaipoipoga lava, ina ua foaiina atu Eva ia Atamu e ala i le faaipoipoina, na fetalai ai Ieova le Atua e faapea: “Ona avea ai lea o i laua ma tino e tasi.” (Kenese 2:24; Mataio 19:4-6) O le faatasiga la o le faaipoipoga o se faiā e pito i vavalalata lea o loo iai i le va o ni tagata se toalua. E faaooina atu e le faaipoipoga se faiā fou ia te oe. Ua e talia se tasi e avea ma au “avā faaipoipo” po o sau “tane faaipoipo.” Ua matuā ese mai i so o se isi lava faiā. O ni gaoioiga e ono oo ai ni leaga laiti i nisi faiā atonu e oo ai tiga loloto i totonu o le faatulagaga tau faaipoipoga.

Seʻi fai ma faataʻitaʻiga, le fautuaga faale-Tusi Paia o loo maua i le Efeso 4:26. O iina o loo fai mai ai le Tusi Paia faapea: “A outou ita, aua le agasala ai; aua neʻi goto le la o ita pea outou.” Atonu e lē o sau masani le foia vave o ou faafitauli ma ou tauaiga ma au uo i le vave e tatau ai. Ae o lau paaga e aupito sili ona lalata atu ia te oe nai lo se isi lava o ou tauaiga, po o au uo. O le lē taulau ona foia vave o faafitauli ma lau paaga atonu e lamatia ai le faiā faapitoa i le va o oulua.

Pe e te faatagaina ea se feeseeseaiga i le va o oe ma lau paaga e avea ma pogai faifai pea o le faasoesa po o le loto tiga? Pe e tumau pea ona iai ni lē femalamalamaiga ma ni tulaga e tiga ai mo ni nai aso? Ina ia ola e tusa ma lau tautoga, pe a tulai mai faafitauli, aua neʻi uma atu se aso ae e te lei faatupuina se filemu ma lau paaga. O lona uiga ia faamagalo ma faagalo e aofia ai foi ma lou taʻuina atu o ou lava sese ma masei.—Salamo 51:5; Luka 17:3, 4.

“Ou te faapelepele”: O lē o le a avea ma tane e tauto e “faapelepele ma tausi lelei” i le faatoanofotane. O lenei alofa e aofia ai le alofa fetosinaai faaleituaiga lea ua tuufaatasia ai i laua. Ae ua lē lava na o le alofa fetosinaai. O le alofa lea e tauto ai le Kerisiano mo lana paaga e sili atu lona loloto ma e lautele atu.

Ua faapea mai le Efeso 5:25: “O outou tane, ia outou alolofa atu i a outou lava avā, faapei o Keriso foi ona alofa mai i le ekalesia.” O le alofa o Iesu mo le ekalesia sa lē o le ituaiga lea e iai le alofa fetosinaai i le va o tane ma avā. O le faaupuga “alolofa atu” ma le “alofa mai”  lea o loo faaaogā i lenei mau, e maua mai le upu a·gaʹpe, ua faasino atu i le alofa lea e taʻitaʻia e mataupu silisili. Ua faatonuina iinei e le Tusi Paia tane ia faaali atu le alofa lē femoumouai, lē maluelue, ma tumau mo a latou avā.

E lē o se ituaiga o lagona lea e faapea “ou te alofa ia te oe auā o loo e alofa mai foi ia te au.” E sailia faamuamua e le tane mea e lelei ai lana avā nai lo ia, ma e alofa atu foi le avā i lana tane i le auala lava lea e tasi. (Filipi 2:4) O le atiina aʻe o le alofa loloto mo lau paaga o le a fesoasoani lea ia te oe e te ola aʻe ai ia tusa ma lau tautoga o le faaipoipoga.

“Ou te tausi lelei i ai”: E tusa ai ma se tasi lomifefiloi, “o le tausi lelei,” o lona uiga ‘ia faapelepeleina, ia faatino pe faaupu atu faalogona alofa.’ E tatau ona e faaali atu lou alofa e ala i upu ma galuega! E manaomia faapitoa lava e le avā ona ia mauaina faaaliga o le alofa faifai pea a lana tane. Atonu e tausi lelei o ia e lana tane i manaoga faaletino, ae ua lē lava ai iina. E iai avā ua lava ma totoe mea e aai ai ma fale lelei e nonofo ai, ae ua matuā leai se fiafia ona ua tuulafoaia po ua lē āno ane i ai a latou paaga faaipoipo.

I le isi itu, o le avā e na te iloa o loo faapelepeleina ma tausia lelei, ua ia te ia mafuaaga uma e fiafia ai. Ioe, e faapena foi i le tane. E faamalosia fusi o le alofa moni i faaupuga agalelei ma le alofa. I le Pese a Solomona, na faapea atu le tama leoleo mamoe alofa: “Loʻu tuafafine e, laʻu ava e, ua silisili ese lou alofa mai; e sili ona lelei o lou alofa mai i le uaina; o le nanamu foi o ou suauu e sili i mea manogi uma.”—Le Pese a Solomona 4:10.

“Ma ou te faaaloalo loloto i ai”: I le faagasologa o senituri, ua iai tane o ē latou te faataugāina ma vaai maualalo i fafine. E oo lava i aso nei, e tusa ai ma le mekasini o le World Health ua faapea mai, “o le sauāina o fafine ua tupu i so o se atunuu ma i so o se vaega o tagata lautele ma tamaoaiga. I le tele o aganuu, o le fasi avā ua vaai i ai o se aiā tatau a le tamaloa.” O le toatele o tamaloloa atonu e lē faasalaina e le tulafono ona o na amioga. Ae o loo foliga mai lava o le toatele o tamaloloa ua lē taulau i le faaalia o le naunau moni i lenei mataupu e faatatau i fafine. O le iuga, ua faatupuina aʻe ai uiga lē mautinoa o fafine agaʻi i tamaloloa. O nisi o avā ua oo lava ina faapea mai, “Ou te alofa i laʻu tane, ae e faigata ona ou faaaloalo ia te ia!”

Ae peitai ua faatāuaina e Ieova le Atua, le fafine o loo faia taumafaiga ia faaaloalo i lana tane—e ui lava i le lē taulau o le tane i mea sa ono faatalitalia mai ia te ia mai lea taimi i lea taimi. Ua ia iloaina ua i le tane se avega tauave po o se tofiga mai le Atua. (1 Korinito 11:3; Efeso 5:23) O le faaaloalo loloto mo lana tane e mautinoa o se tasi lea vaega o lana tapuaiga ma le usiusitai atu ia Ieova. E lē faagaloina e le Atua le usiusitai o fafine faaleatua.—Efeso 5:33; 1 Peteru 3:1-6; faatusatusa i le Eperu 6:10.

O le faaaloalo i totonu o le liʻo o se faaipoipoga e tatau ona fefaaaliai, ma e tatau ona la galulue ina ia maua, nai lo le faatalitalia pe faatonuina. Mo se faataʻitaʻiga, o faamatalaga osovale pe faatautee e lē tatau ona iai i le faatulagaga tau faaipoipoga. E lē se faiga alofa pe faaaloalo foi lou faia o ni faamatalaga faifai e uiga i lau tane po o lau avā. E leai se lelei e maua mai le folasia atu o masei o lau paaga i isi, po o le talanoa atu ai foi i luma o le lautele. E oo lava foi i tausuaga, e mafai ona faaalia ai e se tasi le matuā leai o se faaaloalo i lenei tulaga. O upu o loo i le Efeso 4:29, 32, ua faatatau atu i le tane ma le avā. O iina ua faapea mai ai le Tusi Paia: “Aua neʻi alu atu se upu leaga ai o outou gutu, na o le upu lelei e ati ae ai i mea e aoga, . . . A ia outou feagaleleiai, ia femutimutivaleai lo outou alofa.”

“E tusa ai ma le tulafono tauatua ua faatulagaina i totonu o le Tusi Paia”: E finagalo le Atua ia tatou olioli i le saʻolotoga o le faia o filifiliga ma gaoioiga. E na te lē o faatietie maia se avega mamafa ia i tatou e ala i ni tusi tulafono se tele mo le puleaina o olaga faaipoipo. Ae, mo lo tatou lava lelei ua ia faataatia mai ni taʻiala.

 I aso nei, e anoanoai lomiga eseese ua lolomia mo faaipoipoga, ma e toatele tagata ua iai o latou lava filosofia. Ae ia faaeteete! O le tele lava o faamatalaga o loo salalau e uiga i faaipoipoga, ua feteenai ma le Tusi Paia.

Ua mātaulia ai foi ua eseese tulaga o ulugalii taitasi. I se isi itu, o ulugalii faaipoipo ua pei o le kiona o loo touluulu ifo; atonu e tutusa i latou i lau vaai atu mai se mea mamao, ae o le mea moni lava, e iai itu e eseese ai le isi ulugalii mai le isi. O le tuufaatasiga o ou uiga totino ma lau paaga e lē tutusa ma se isi lava ulugalii faaipoipo o i le lalolagi. O lea aua e te faavavevave i le taliaina o ni manatu patino mai i isi. E leai ni metotia faaletagata e aogā mo faaipoipoga uma!

I sona eseesega, o faatonuga uma a le Tusi Paia e moni ma e talafeagai lelei. Na tusi le aposetolo o Paulo faapea: “O Tusi Paia uma lava e mai le Agaga o le Atua ia, e aoga foi ia e aʻoaʻo ai, e aoai ai, e faatonu ai.” (2 Timoteo 3:16; Salamo 119:151) Afai e te faitauina le Tusi Paia ma talia ana aʻoaʻoga e avea o se taʻiala i lou olaga i aso uma, o le a mafai la ona e ola aʻe e tusa ai ma lau tautoga i le faaipoipoga.—Salamo 119:105.

“E tusa lava po o le a le umi ta te ola faatasi ai i luga o lenei lalolagi”: Ua faasino lenei i le umi ua faatasia ai. Na faatonu mai le Atua e faapea: “E tuua . . . e le tane lona tamā ma lona tinā, a e faatasi ma lana avā.” (Kenese 2:24) E finagalo Ieova ia lua faatasia pea. Ia auauna faatasi i le Atua. Ia suesue faatasi lana Afioga. Ia faaalu se taimi e savalivali faatasi ai, nonofo faatasi, ma aai faatasi. Ia olioli faatasi i le ola!

E fai e nisi ulugalii se taumafaiga e faataatia ese se taimi i aso taitasi ina ia talanoa atu ai le tasi i le isi. E tusa lava pe ua mavae le tele o tausaga o le faaipoipoga, o lenei faatasiga e matuā tāua i le fiafiaga tau faaipoipoga.

“Ina ia talafeagai ma le fuafuaga tau faaipoipoga a le Atua”: O le faaipoipoga o se meaalofa mai ia Ieova le Atua, o lē na faavaeina le faatulagaga tau faaipoipoga. (Faataoto 19:14) O le lē taulau ona mulimuli i lana fuafuaga e lē gata o le a faamataʻuina ai lou fiafiaga i le faaipoipoga, ae faapea foi ma lau faiā ma Lē na Foafoaina Mea. I le isi itu, pe a atiina aʻe e le tane ma le avā se faiā lelei ma Ieova, e faaalia lea e ala i le usiusitai atu i lana fuafuaga, o le a la mauaina ai se faiā filemu ma isi, e aofia ai ma lo laua lava va.—Faataoto 16:7.

Aua neʻi galo ua avea Ieova ma Molimau sili i lau tautoga i le faaipoipoga. O le faaauau ona e ola ia tusa ma lenei tautoga mamalu, o le a avea ai lau faaipoipoga ma puna o le viiviia ma le faamanūina ai o Ieova le Atua!

[Faaopoopoga i lalo]

[Faamatalaga faaopoopo i le itulau 22]

I se isi itu, o ulugalii faaipoipo ua pei o le kiona o loo touluulu ifo. Atonu e tutusa uma i latou i lau vaai atu mai se mea mamao, ae o le mea moni lava, e iai itu e eseese ai le isi ulugalii mai le isi

[Ē Ana le Ata]

Snow Crystals/Dover