‘Pe e Tāua Aʻu i le Atua?’

“PE E tāua ea aʻu? Po o manatu mai le Atua?” O upu na o le ulutala o se mataupu o loo i le Christianity Today. “O le tele o taimi o laʻu galuega o se tusitala, ua fesootai i faalogona o le tiga,” ua fai mai ai Philip Yancey, le tusitala o le mataupu. “Ou te toe fesili ifo mai lea taimi i lea taimi i fesili lava ia, e pei o loo lote i taimi uma se manuʻa e lei pe lava. Ua ou maua tala mai tagata e faitau i aʻu tusi, ma o a latou tala e faailoa mai ai lo latou tiga ua faaalia ai e moni lava loʻu lē mautonu.”

Atonu o loo faapena foi ona e tau mānatu po o fiafia mai le Atua i lou olaga. Oi, atonu ua e iloa lelei foi le Ioane 3:16, lea ua faapea mai, “ua faapea lava ona alofa mai o le Atua i le lalolagi, ua ia au mai ai lona Atalii e toatasi.” Pe atonu foi ua e faitauina le Mataio 20:28, lea ua faapea mai na afio mai Iesu ina ia “foaiina atu lona ola e fai ma togiola e sui aʻi tagata e toatele.” Ae, atonu e te ono fesili pea, ‘Po o amanaia mai ea aʻu e le Atua? Po o ia manatu totino mai i lou nei lava tagata?’ O loo iai se mafuaaga lelei e talitonu ai e faapea o le tulaga lena o loo iai, e pei ona o le a tatou tagai nei i ai.