Se Iuga Manuia i le Tauiviga o Tala o le Malo

“AISEA ua Tumu ai le Olaga i Faafitauli?—Pe e Mafai ona Iai se Parataiso e Aunoa ma ni Faalavelave?” O le ulutala lena o le Tala o le Malo Nu. 34, o se sāvali e fa ona itulau na tufatufaina i le lalolagi aoao i gagana e 139, i le faagasologa o Aperila ma Me o le tausaga na teʻa nei. “O se tasi o gaoioiga autū o le tausaga” o le auala lea na faamatala ai e Molimau i Iamaika lenei tauiviga faapitoa faaleauaunaga. “O se puna sili o le olioli mo le auuso,” o le tala lena a Molimau i Peleseuma e faatatau i ai. I Czech Republic, o le taimi muamua lea ua maua ai e Molimau a Ieova le avanoa e fai ai se sao i le tufatufaina atu o le Tala o le Malo. Ua lipotia mai e le lālā e faapea: “Na fafagu e lenei tauiviga faapitoa se agaga aasa ma le maelega.” O manatu lava ia na maua mai i le tele o isi atunuu

Sa iai i le Tala o le Malo Nu. 34 se feau faapitoa mo i latou o ē mapuitiga ma feoi ona o mea inosia ua faia e lotu. (Esekielu 9:4) Ua faamafanafanaina ai i latou o ē ua faapologaina o latou olaga ona “o ona aso e gata ai e oo mai ai aso faigata,” ma ua lē mafai ai ona pulea i latou. (2 Timoteo 3:1) I le faasino atu i le Tusi Paia, ua faaalia ai e le sāvali e faapea, o faafitauli o le olaga, ua toeitiiti ona foia lea. O se parataiso e aunoa ma faafitauli e mautinoa lava. (Luka 23:43) O le toatele o tagata na faitau i le Tala o le Malo na uunaia i latou i le feau o loo iai. Na faapea atu se tamaloa i Togo i se Molimau: “E lē ma toe fesiligiaina mea ua e fai mai ai.”

O le mea lava ia e lē faafitia, na faatupuina e le tufatufaina atu o lenei Tala o le Malo se uaʻi mai e lē masani ai. Na tali atu se tasi tagata i Tenemaka i se Molimau na ofoina atu le sāvali: “O lea faatoʻā ou taliu mai lava i le Iunaite Setete. Ae ou te lei tuua i iina, na ofoina mai ai e se tagata la outou sāvali ia te au. A o lenei faatoʻā ou taunuu mai, a o lea foi ua toe tuu mai le sāvali lava lea e tasi i le gagana Tenemaka!”

Lagolagosua Aasa mo le Tauiviga Faapitoa

Na auai ma le aasa Molimau a Ieova i le lalolagi atoa i lenei galuega o le tufatufaina o le sāvali. O El Salvador, Osetaria, Niu Kaletonia, Haiti, Hagakeri, ua na o ni vaega o le tele o atunuu na lipotia mai ai tumutumuga fou o tagata talaʻi i le faagasologa o masina na tufaina ai le Tala o le Malo.

I Zambia, na toleniina ai e se ovasia matagaluega lona afafine o Tepora e tolu tausaga le matua, i le ofoina o lomiga mai lea fale i lea fale. A o faagasolo le tauiviga faapitoa o le Tala o le Malo Nu. 34, e sili atu i le 45 kopi o lenei sāvali na tufaina atu e Tepora. Na amata e lona tina ni suesuega faale-Tusi Paia ma nisi o i latou ia na taliaina le Tala o le Malo mai ia Tepora.

I Aferika i Saute, na ofoina ai e se teine talavou se sāvali i sē la te aʻoʻoga e igoa ia Cashia. Na faitauina e Cashia le sāvali ma na ia faapea mai: “E maeu le ofoofogia o lenei mea— o le ola e faavavau i luga o se lalolagi parataiso! Aisea na lē taʻuina mai ai lenei mea ia te au i taimi ua mavae?” Na amataina loa se suesuega faale-Tusi Paia. I le vaiaso na sosoo ai na toe maua ai e Cashia isi sāvali. O le sāvali lona lua na lafo mai i lana uo Katoliko la te fetusiai, e aumau i Kuperu. Na faamatala atu e lana uo lea ia le pogai ua sese ai aʻoaʻoga a le Lotu Katoliko Roma ma na ia taʻu ane e faapea ua  ia mafaufau e suesue le Tusi Paia ma Molimau a Ieova. O le mea moni na atili faamausalīina e lena mea le faaiuga a Cashia e faaauau lana suesuega.

Na auai se tama e sefulu tausaga le matua faatasi ma lona tinā i le tufatufaina atu o le sāvali. Na tuulima atu e le tama se kopi i se tamaitai talavou ma faalaeiau ia te ia e faitau faalelei i ai. Na fesili atu le tamaitai talavou i le tama pe e talitonu moni i le ata o loo faaataina mai i le faavaa—o le ola e lē uma i luga o le lalolagi. O le ā le tali a le tama? “Oi, ioe, ou te matuā talitonu i ai.” Ona faailoa atu loa lea e le tamaitai e faapea o loo ia saili mo le faatuatuaga moni auā ua tele naʻuā feteenaiga i lana lotu. Ina ua toe asiasi atu, na amataina loa se suesuega faale-Tusi Paia.

Vave ona Tali Mai

I nisi taimi na faapogaia e le Tala o le Malo le tali vave mai a ē na faitauina. Ina ua uma ona faitau i le sāvali, na faailoa atu i se Molimau e se teine e sefulutasi tausaga le matua i Peleseuma, o ia sa masani ona gaoia faleoloa. Na manao le tina o le teine e natia le mataupu, peitai na galue le loto fuatia ifo o le teine i mea na ia faitauina, ma o lea na ia maumauai ai e alu e vaai le pule o le nofoaga faapitoa mo faleoloa. Na iu lava ina malie le tina e ō lana tama ma le Molimau e vaai le pule o le nofoaga faapitoa mo faleoloa. Na faateʻia le pule i lana taʻutinoga. Ina ua iloa e le pule e faapea o le Tala o le Malo na uunaia le teine e faia lenei gaoioiga, na aveina loa e le tamaloa se kopi mo ia lava seʻi vaai po o le ā le malosi o le feau o aumaia ai. O loo agaigai i luma le suesuega faale-Tusi Paia a le teine i le taimi nei.

O se Molimau i Cameroon na ia tuua se kopi o le Tala o le Malo i se tamaloa ma ua ia taʻua e faapea: “Ina ua ma toe foi atu, ua uma ona vasevase e le tamaloa le sāvali ma ua iai foi le tele o ana fesili. Ina ua ia maua tali faamalieloto, na ia faailoa mai: ‘E matuā moni lava ua faia se sao o lotu i le lē fiafia o iai i tagata. O la outou sāvali ua fesoasoani ia ou malamalama ai, ae ou te fiailoa atili.’” Ua faia nei lana suesuega faale-Tusi Paia e lē aunoa.

Na asiasi atu se Molimau mai lea fale i lea fale i Uruguay ma na ia tuua se sāvali i se tamaloa. Sa faaauau pea le galuega talaʻi a le Molimau mai lea fale i lea fale ma galue faataamilo i le vaipanoa lea seia oo ina toe taunuu i le faitotoa i tua o le fale o le tamaloa na muai tau i ai. Na faateʻia o ia ina ua tau atu o faatali mai le tamaloa ia te ia, o uu mai le sāvali. Ua maeʻa ona ia faitauina ma ua manao i nisi faamatalaga auiliili. Na amataina ai loa lava iina se suesuega faale-Tusi Paia.

Fesoasoani le Lautele i le Tufatufaina Atu

I Iapani, na faalatalata atu ai se Molimau talavou i se tamaloa e tusa ma le 50 tausaga le matua ma faailoa atu le sāvali ia te ia. Na fesili atu le tamaloa: “O le ā lau mea e fai i lena pepa pe a e feiloai i tagata tauaso?” Na taʻu atu e le Molimau e na te lē iloa. Na faapea ane le tamaloa e faatali mo se minute, ona toe ulu atu lea o ia i lona fale. Na ia foi mai ma se kopi o le Tala o le Malo ma faapea mai: “Ua ou mauaina lena pepa. Ua ou manatu o loo iai faamatalaga e aogā ma tāua, o lea la ua ou lomia ai i le gagana a tauaso. Faamolemole ia faaaogā lenei mea mo tagata tauaso.” Na faaaluina e lenei tamaloa le tele o itula e toe tusi ai le Tala o le Malo i le gagana a tauaso ina ia maua e tagata tauaso ona aogā.

 Ona sa matuā fiafia se tasi tamaloa i Slovakia i le sāvali, na ia faia ai kopi e 20, e lē lanu ma tufaina atu e ia lava. Na tuua e se tagata talaʻi i Suisilani se Tala o le Malo i se aiga ma faaauau pea ona galueaiina le fogāfale i luga o le fale lea e nonofo ai le aiga lea. Ina ua toe agaʻi ifo i lalo, na faafeiloaia o ia e se tamaitiiti mai le aiga muamua, o lē na talosaga atu mo nisi kopi e 19 o le sāvali. I le aʻoga a lenei tama, na tofia ai ni tamaiti e tusia tala e uiga i faafitauli ma le saili atu mo vaifofo. Sa manao o ia i se kopi o le Tala o le Malo mo ana uo i lana vasega.

Sa Lei Misia se Tasi

O i latou na auai i lenei tauiviga sa taumafai malosi e faamautinoa e lē o misia se tasi. I Niu Kaletonia, sa faimalaga atu ai ni Molimau se toalua i se oganuu maotua ina ia tufaina atu i ai le Tala o le Malo. A o agaʻi atu iina, sa la iloa ai se alasopo e foliga mai ua lē o toe uia, e ui lava i lea, na la fia faamautinoaina po o iai se isi e nofo i le mea e gata mai ai le auala. Ina ua la tuua le taavale, na la taumafai e ui atu i le ala lea, na asa atu i vaitafe seia oo lava ina taunuu atu i se fale. O se ulugalii e lei faalogo lava e uiga i Molimau a Ieova e nonofo iina, na la talia se kopi o le Tala o le Malo. Mulimuli ane na toe asiasi atu tagata talaʻi ma na faateiʻa i laua i le iloaina ua teu le auala ma faaleleia ni nai auala laupapa laiti ina ia mafai ai e Molimau ona ave atu le la taavale i le fale. Na amataina loa se suesuega faale-Tusi Paia e lē aunoa.

I Polani, na pasia ai e se Molimau se vaipanoa na fauina ai se fale ina ia ofoina atu se kopi o le Tala o le Malo i se tasi aiga. Na autilo ane le aufaigaluega a o toe foi mai o ia. Na iu lava ina valaau ane se tasi o le aufaigaluega, ma faamanatu ane ia aua neʻi galo i latou. Ina ua ia faalatalata atu ia i latou, na latou mālōlō mo sina taimi ma faalogologo ma le lē gase a o ofoina atu le sāvali. Na latou talia kopi o le Tala o le Malo faapea foi ma mekasini ma mulimuli ane, ina ua toe asia, na latou talia tusi.

E faitau selau miliona Tala o le Malo Nu. 34 na tufaina atu i le tele o gagana. Ua iai taaʻiga malolosi i le feau o loo iai. E toatele ua latou aʻoaʻoina e faapea e mafai ona iai se parataiso e aunoa ma faafitauli. Matou te tatalo ia faaauau pea e ē e tonu o latou loto ona tali atu, ma mulimuli ane avea ma nisi o “e agamalu” o ē o le a “fai mo latou le nuu [“lalolagi,” NW]; e faafiafia foi i latou ia te i latou ona o le manuia e tele.”—Salamo 37:11.

[Pusa i le itulau 31]

Ia Faaauau Ona Tufaina Atu Mekasini!

Ia Aperila ma Me o le 1995 na iloa ai le matuā taulau manuia o le tauiviga faapitoa o le tufaina atu o le Tala o le Malo Nu. 34. I le faagasologa o na masina e lua, sa matilatila foi le tufaina atu ai o mekasini o Le Olomatamata ma le Ala Mai! O se faataʻitaʻiga, i Czech Republic, ua lipotia mai ai e se uso lona tufaina atu o sāvali e 250 ma mekasini e 750 ia Aperila. I Guadelope, na filifilia ai le Aso Toonai, Aperila 15, ma aso faapitoa o le mekasini. Toeitiiti lava o tagata talaʻi uma o le atunuu na auai i le galuega i le fanua i lena aso! Na iai se tumutumuga fou o le tufaina o mekasini i Slovakia ia Aperila. E tāli faapena foi lipoti mai isi atunuu.

O lea la, aisea e lē avea ai Aperila ma Me o le 1996 ma masina e faamatilatila ai le tufaina atu o mekasini? E mafai e faapotopotoga ona fuafua aso faapitoa o mekasini. E mafai e nisi tagata ona avea ma paeonia lagolago. I lenei auala ma isi foi auala, e faalaeiauina ai i le tufaina atu o mekasini, ma o le a faaauau ai pea le faasalalauina o le feau tāua e pei ona iai i le Tala o le Malo Nu. 34. Ona pei ai lava lea o le mea na tupu i le tausaga na teʻa nei, e mautinoa o le a faamanuia e Ieova le agaga maelega ua tatou faaalia.—2 Timoteo 4:22.