Faafetaiaia le Lu‘i o le Alofa Faamaoni
Faafetaiaia le Luʻi o le Alofa Faamaoni
“Ia oofu i le tagata fou ua foafoaina e tusa ai o le finagalo o le Atua, i le amiotonu moni ma le alofa faamaoni.”—EFESO 4:24, NW.
1. Aisea ua tatou nofo aitalafu ai ia Ieova le Atua i le alofa faamaoni?
O LE faafetaiaia o le luʻi o le alofa faamaoni e tele ona tāfa. O le mea e sili ona tāua o le faafetaiaia lea o le luʻi o le alofa faamaoni ia Ieova le Atua. E moni, e tusa ai ma le tulaga o Ieova, ma mea ua ia faia mo i tatou, ma ona o lo tatou tuuina atu ia te ia, ua tatou nofo aitalafu ai ia te ia i le alofa faamaoni. E faapefea ona tatou faaalia atu le alofa faamaoni ia Ieova le Atua? O le auala sili lava o le alofa faamaoni lea i mataupu silisili amiotonu a Ieova.
2, 3. O le ā le faiā o loo iai i le va o le alofa faamaoni ma le amiotonu?
2 Ina ia faafetaiaia lea luʻi, e tatau ona tatou utagia upu o loo maua i le 1 Peteru 1:15, 16: “A e pei ona paia o ia na valaauina outou, ia faapea foi outou ona paia i a outou amio uma; auā ua tusia, Ia paia outou, auā o aʻu nei e paia lava aʻu.” O le alofa faamaoni ia Ieova le Atua o le a faapogaia ai lo tatou usiusitai ia te ia i taimi uma, i le ogatusa o o tatou mafaufauga, o a tatou upu, ma gaoioiga, ma lona finagalo paia. O lona uiga o le faatumauina o se loto fuatia ifo lelei, e pei ona poloaia ai i tatou i le 1 Timoteo 1:3-5 e faapea: “A o le iuga o lenei poloaiga [ia lē aʻoaʻo atu se talitonuga e ese mai po o le uaʻi atu i tala sese], o le alofa lea ai le loto mamā, ma le loto fuatia ifo ua lelei, ma le faatuatua faamaoni.” E moni, e leai se tasi o i tatou e lelei atoatoa, ae tatau ona tatou taumafai ina ia faia le mea sili tatou te mafaia, a ea?
3 O le alofa faamaoni ia Ieova o le a taofia ai i tatou mai le faagutugutulua i mataupu silisili amiotonu mo o tatou lava faanaunauga manatu faapito. O le mea moni, o le alofa faamaoni o le a taofia ai i tatou mai le avea o se isi tagata i totonu, ae o le isi foi tagata i fafo. O le alofa faamaoni sa mafaufau i ai le faisalamo ina ua pese o ia e faapea: “Ieova e, ia e faasino mai ia te au lou ala, ou te savali i le mea moni mai ia te oe; ia e faia ina ia tasi loʻu loto e mataʻu i lou suafa.” (Salamo 86:11) O le alofa faamaoni e manaomia ai le tulaga e pei ona faamatalaina o le “usiusitai i tulafono ma mataupu silisili e lē mafai ona faamalosia e tagata.”
4, 5. O le alofa faamaoni o le a taofia ai i tatou mai le faia o le ā le gaoioiga sese?
4 O le alofa faamaoni ia Ieova le Atua o le a taofia ai foi i tatou mai le faia o so o se mea o le a faalumaina ai lona suafa ma le Malo. Mo se faaaoaoga, na iai se faafitauli i le va o ni Kerisiano se toalua, ma oo ai ina la avatu ma le lē talafeagai le mataupu i le faamasinoga a le lalolagi. Na fesili mai le faamasino, ‘Po o oulua uma ea o ni Molimau a Ieova?’ E foliga mai sa lē malamalama le faamasino pe aisea ua ō atu ai nei [Kerisiano] i le faamasinoga. Pagā se faalumaina na iai! O le alofa faamaoni ia Ieova le Atua na semanū e faapogaia ai na uso e utagia le fautuaga a le aposetolo o Paulo: “O lenei, ua outou matuā sese lava, ina ua ia te outou finauga o le tasi i le tasi. Tou te le onosai ea i le agaleaga i se a? Tou te le onosai i se a pe a gaoia a outou mea?” (1 Korinito 6:7) E mautinoa, o le ala o le alofa faamaoni ia Ieova le Atua o le mafatia lea i le leiloa o ni meatotino nai lo le faalumaina o Ieova ma lana faalapotopotoga.
5 O le alofa faamaoni ia Ieova le Atua e aofia ai foi le lē lolo atu i le mataʻu i tagata. “O le fefe i tagata e tupu ai le mailei; a o lē faatuatua ia Ieova e faamamaluina o ia.” (Faataoto 29:25) O lea, tatou te lē lolo atu pe a fesagai ma sauāga, ae tatou te mulimuli atu i le faaaoaoga ua faataatia e Molimau a Ieova i atunuu sa muai avea ma Soviet Union, i Malawi, i Aitiope, ma le anoanoai o isi atunuu e tele.
6. O le alofa faamaoni o le a taofia ai i tatou mai le auaufaatasi ma ai?
6 Pe afai tatou te alolofa faamaoni ia Ieova le Atua, o le a tatou alofia ai le faauo atu ia i latou uma o ē o loo avea ma ona fili. O le mafuaaga lena na tusi mai ai le soo o Iakopo: “O outou tagata mulilulua e, tou te le iloa ea o le fefaauoai ma le lalolagi o le ita lea i le Atua? O lenei, o sē fia uo ma le lalolagi, ua avea o ia ma ita i le Atua.” (Iakopo 4:4) Tatou te mananao e maua le alofa faamaoni lea na manino mai i le tupu o Tavita ina ua ia faapea mai: “Ieova e, ou te le ʻinoʻino ea ia te i latou o e ʻinoʻino ia te oe? ma e o laga atu ia te oe, ou te le matuā ʻinoʻino ea i ai? Ou te ʻinoʻino lava ia te i latou ma le matuā ʻinoʻino tele; ua fai i latou moʻu fili.” (Salamo 139:21, 22) Tatou te lē mananao e miomiō faatasi ma ē agasala ma le loto i ai, auā e leai ni mea tatou te tutusa ai ma i latou. Pe ua lē avea ea le alofa faamaoni i le Atua e taofia ai i tatou mai le miomiō faatasi ma na fili o Ieova, e ala i le aufaatasi ma i latou pe ala mai foi i ata i le televise?
Ia Tulai atu e Faamaonia le Tonu o Ieova
7. O le alofa faamaoni o le a fesoasoani ia i tatou ina ia faia le ā e faatatau ia Ieova, ma na faapefea ona faia e Eliu lenei mea?
7 O le alofa faamaoni o le a uunaia ai i tatou e tulai atu e faamaonia le tonu o Ieova le Atua. Maeu se faaaoaoga lelei o lena mea ua tatou iloa ia Eliu! Ua taʻu mai ia i tatou e le Iopu 32:2, 3: “Ona tupu ai lea o le ita o Eliu . . . na tupu lona ita ia Iopu, ina ua taʻuamiotonuina e ia o ia, a e le o le Atua. Ua tupu foi lona ita i ana uo e toatolu, ina ua latou le mautali, a ua latou faasala pea [“i le Atua,” NW].” I le Iopu mataupu e 32 e oo atu i le 37, na tulai atu ai Eliu e faamaonia le tonu o Ieova. Mo se faaaoaoga, na ia faapea atu: “Ia e onosai mai pea teisi ia te au, ou te faaali atu ai ia te oe, auā ua totoe pea upu mo le Atua. . . . Ou te taʻuamiotonuina foi le na faia aʻu. . . . Na te le ʻalo ona fofoga i e ua amiotonu.”—Iopu 36:2-7.
8. Aisea ua manaomia ai ona tatou tulai atu e faamaonia le tonu o Ieova?
8 Aisea ua manaomia ai ona tulai atu e faamaonia le tonu o Ieova? I aso nei, e tele vala ua upuleagaina ai lo tatou Atua o Ieova. Ua taʻua e faapea e lē o soifua o ia, o ia o se vaega o le Tasitolu, na te faapuapuagatiaina e faavavau tagata i le afi i seoli, e itiiti lava sana taumafaiga e faaleleia le lalolagi, e lē o manatu mamafa mai o ia i tagata, ma isi lava mea. Tatou te faaalia atu lo tatou alofa faamaoni ia te ia e ala i lo tatou tulai atu e faamaonia lona tonu ma faamaonia o loo soifua Ieova; o ia o le Atua e atamai, e faamasinotonu, o lē ona le malosi uma lava, ma e alofa; e iai ana taimi mo mea uma; ma pe a oo mai lana taimi atofaina, o le a ia faaiuina loa mea leaga uma ma faaparataisoina le lalolagi atoa. (Failauga 3:1) O lenei mea e manaomia ai ona tatou faaaogā avanoa uma e molimau atu ai i le suafa o Ieova ma lona Malo.
Le Alofa Faamaoni i le Faalapotopotoga a Ieova
9. O ā mataupu ua faaalia ai e nisi le leai o so latou alofa faamaoni?
9 Ua tatou oo mai nei i le mataupu o le alofa faamaoni i le faalapotopotoga vaaia a Ieova. E mautinoa, o loo tatou nofo aitalafu atu i ai i le alofa faamaoni, e aofia ai “le auauna faamaoni ma le mafaufau,” lea o loo ala mai ai le fafagaina faaleagaga o le faapotopotoga Kerisiano. (Mataio 24:45-47) Seʻi faapea ua aliaʻi mai se mea i lomiga a le Olo Matamata e tatou te lē o malamalama i ai pe lē o ioeina foi i lena taimi. O le ā o le a tatou faia? Pe ita ea ma tuua le faalapotopotoga? O le mea lena na faia e nisi i le tele o tausaga ua mavae, ina ua faatatauina e Le Olo Matamata le feagaiga fou i tagata o ē o le a ola i le lalolagi i le vaitaimi o le Meleniuma. O isi na feita i se mea na taʻua i se tasi taimi e Le Olomatamata e faatatau i le mataupu o le solitu. Pe ana fai o na tagata sa faatausuai na latou alolofa faamaoni i le faalapotopotoga ma i o latou uso, semanū latou te faatalitali pea ia Ieova e na te faamaninoina mai nei mataupu, lea na ia faia i lana taimi atofaina. O lea, o le alofa faamaoni e aofia ai le faatalitali atu ma le onosai seia oo ina lomiaina mai faamalamalamaga atili mai le auauna faamaoni ma le mafaufau.
10. O le alofa faamaoni o le a taofia ai i tatou mai le naunau e fia iloa le ā?
10 O le alofa faamaoni i le faalapotopotoga vaaia a Ieova e uiga foi i le matuā teena o aposetate. O Kerisiano e alolofa faamaoni o le a latou lē naunau e fia iloa po o ā mea o fai mai ai na tagata. E moni, o ē ua faaaogā e Ieova le Atua e taʻitaʻia lana galuega i le lalolagi e lē lelei atoatoa i latou. Ae o le ā ua taʻu mai e le Afioga a le Atua ia i tatou e fai? Ia tuua ea le faalapotopotoga a le Atua? E leai. O le alofa faaleuso e ao ona tausia ai lo tatou alofa faamaoni atu i ai, ma e tatau ona tatou faaauau ai ona ‘matuā fealofani mai le loto naunau.’—1 Peteru 1:22.
Le Alofa Faamaoni i Toeaina o Ē e Alolofa Faamaoni
11. O le alofa faamaoni o le a fesoasoani ia i tatou ina ia leoleo faasaga i ā mafaufauga sese?
11 Pe a taʻua pe faia se mea i le faapotopotoga e faigata ona tatou malamalama i ai, o le alofa faamaoni o le a taofia ai le ia i tatou o ni lagona faamasinosino ae o le a fesoasoani ina ia tatou maua le vaaiga e faapea, atonu o se mataupu tau faamasinoga. Pe ua lē sili atu ea ona lelei le mātauina o uiga lelei o toeaina tofia ma isi uso talitonu, nai lo le mātauina o o latou vaivaiga? Ioe, tatou te mananao e leoleo faasaga i na mafaufauga sese uma, auā e sootaga atu i le lē alofa faamaoni! O le alofa faamaoni o le a fesoasoani foi ia i tatou e usitaia ai le faatonuga a Paulo ina ia “aua neʻi upu leaga i se tasi.”—Tito 3:1, 2.
12, 13. O ā luʻi patino e ao ona fesagai ma toeaina?
12 O le alofa faamaoni e aumaia ai ni luʻi patino i toeaina. O se tasi o nei luʻi o le tulaga i mataupu faalilolilo. Atonu e sulu atu se tasi o le faapotopotoga i se toeaina i sona faafitauli. O le alofa faamaoni i lena tagata o le a taofia ai le toeaina mai lona solia o le mataupu silisili o le taofia o upu faalilolilo. O le a ia utagiaina le fautuaga i le Faataoto 25:9 e faapea: “Aua le faaali atu le upu faalilo a le tasi tagata.” O lona uiga, ia lē faaali atu e oo lava i lana avā!
13 Ua fetaiai foi toeaina ma isi luʻi o le alofa faamaoni. Pe o le a avea ea i latou ma ē faafiafia i tagata, pe o le a latou loto tetele ma agamalu i le fesoasoani atu ia i latou o ē manaomia ona faasaʻoina, e tusa lava po o ni o latou tauaiga po o ni uo vavalalata? O le alofa faamaoni i le faalapotopotoga a Ieova o le a faapogaia ai nisi o i tatou ua avea ma toeaina e taumafai ina ia fesoasoani atu i so o se isi o loo manaomia le fesoasoani faaleagaga. (Kalatia 6:1, 2) E ui o le a tatou agalelei, ae o le alofa faamaoni o le a tatou tautala saʻo ai i le isi o tatou uso toeaina, e pei lava ona tautala saʻo atu Paulo i le aposetolo o Peteru. (Kalatia 2:11-14) I le isi itu, e mananao ovasia ina ia faaeteete, ina ia lē avea lo latou gaoioi ma le lē atamai po o le faaalia o le faaituʻau, po ua iai ni auala ua faaaogā sese ai la latou pule, ma itu latou te faafaigata ai mo ē o loo i lalo o la latou tausiga ona faaalia le alofa faamaoni i le faalapotopotoga a le Atua.—Filipi 4:5.
14, 15. O ā vala e ono tofotofoina ai le alofa faamaoni o tagata o le faapotopotoga?
14 E iai isi vala o le mataupu o le faafetaiaia o le luʻi o le alofa faamaoni i le faapotopotoga ma ona toeaina. Pe afai e iai ni mea e foliga mai o ni faafitauli i le faapotopotoga, o iina tatou te maua ai le avanoa e faaalia ai le alofa faamaoni ia Ieova ma ē o loo suitulaga ia te ia. (Tagai i Le Olomatamata, Aperila 1, 1988, itulau 15-17.) Pe a iai se faateʻaina, o le alofa faamaoni e manaomia ai lo tatou lagolagosua i le autoeaina, i le lē taumafai e toe vaʻili pe na lava ni mafuaaga mo lea gaoioiga ua fai.
15 O le alofa faamaoni i le faapotopotoga e manaomia ai foi lo tatou lagolagoina o sauniga e lima faalevaiaso i le tele tatou te mafaia i o tatou tulaga ma o tatou tomai. O le alofa faamaoni e manaomia ai e lē gata ina tatou auai atu i ai e lē aunoa ae ia sauniuni foi i ai ma faia ni faaopoopoga faalaeiau pe a maua le avanoa.—Eperu 10:24, 25.
Le Alofa Faamaoni i le Faaipoipoga
16, 17. O ā luʻi o le alofa faamaoni e ao ona fesagai ma Kerisiano ua faaipoipo?
16 O ai isi o loo tatou nofo aitalafu ai i le alofa faamaoni? Pe afai ua tatou faaipoipo, e tusa ai la ma a tatou tautoga i le faaipoipoga, e tatau ai ona tatou faafetaiaia le luʻi o le alofa faamaoni i a tatou paaga faaipoipo. O le alofa faamaoni i a tatou paaga o le a taofia ai i tatou mai le faia o le measese o le tosina atu i isi fafine po o isi tamaloloa nai lo i a tatou lava avā po o tane. O le alofa faamaoni i a tatou paaga e manaomia ai foi lo tatou lē faaali atu i isi tagata vaivaiga po o ni masei o a tatou paaga. E faigofie lava ona faitio atu i isi nai lo le taumafai malosi e tatalaina pea laina o fesootaiga ma a tatou paaga, lea e tatau ona tatou faia ina ia ogatusa ma le Tulafono Faa-Auro. (Mataio 7:12) O le mea moni lava, o le tulaga tau faaipoipoga e aumaia ai se luʻi moni i lo tatou alofa faamaoni faa-Kerisiano.
17 Ina ia faafetaiaia lenei luʻi o le alofa faamaoni, e lē gata ai ina tatou alofia lagona nofosala i ni amioga lē tatau matuia, ae ao ai foi ona tatou leoleomalu i o tatou lava mafaufauga ma faalogona. (Salamo 19:14) Mo se faataʻitaʻiga, pe afai e tuʻinanau atu o tatou loto faaʻoleʻole mo fiafiaga ma le faamalieina, e faigofie ai lava ona tatou oo atu ma le manatu faapito, ua lē na ona mataina i le vaai ae ua tuʻinanau atu i ai. I le uunaia o le faamaoni i le faaipoipoga, ua fautuaina ai e le tupu o Solomona i se uiga faafaatusa tane ina ia latou ‘inu vai mai o latou lava vaieli.’ (Faataoto 5:15) Ma na fetalai Iesu: “Ai se vaai atu i le fafine ina ia manao i ai, ua uma ona mulilua ma ia i lona loto.” (Mataio 5:28) O tane o ē tuinanau atu i mea o loo faaalia ai faiga lē mamā faaleituaiga, ua iai i latou i le lamatiaga o le taʻitaʻia atu i le faia o le mulilua, ma latou ooleina ai a latou avā ma lē alolofa faamaoni ai ia i latou. I lena lava mafuaaga, e ono maileia ai se avā i le matamata tele i ata o amioga lē mamā (soap opera) o loo iai vaaiga o faiga mulilua e mafai ona tofotofoina ai o ia ina ia lē alofa faamaoni i lana tane. Ae peitai, o le matuā alofa faamaoni i a tatou paaga, tatou te faamalosia ai le fusi o le faaipoipoga, ma tatou fesoasoani ai le tasi i le isi i a tatou taumafaiga ina ia faafiafia le finagalo o Ieova le Atua.
O Fesoasoani ina ia Tumau Pea i le Alofa Faamaoni
18. O le talisapaia o le ā o le a fesoasoani ia i tatou ina ia alolofa faamaoni ai?
18 O le ā o le a fesoasoani ia i tatou e faafetaiaia ai le luʻi o le alofa faamaoni i nei vala e fa: le alofa faamaoni ia Ieova, i lana faalapotopotoga, i le faapotopotoga, ma i a tatou paaga faaipoipo? O se tasi o fesoasoani o le iai lea o le agaga talisapaia e faapea, o le faafetaiaia o le luʻi o le alofa faamaoni e fesootai vavalalata ma le faaeaina o le pule silisili ese a Ieova. Ioe, o le tutumau i le alofa faamaoni tatou te faaalia atu ai lo tatou amanaia o Ieova o ia o le Pule Silisili Ese Aoao. Ona mafai ai foi lea ona tatou faaaloalogia i tatou lava ma maua le faamoemoe o le ola e faavavau i le lalolagi fou a Ieova. E mafai ona tatou fesoasoani ia i tatou lava ina ia tumau i le alofa faamaoni, e ala i le iloiloina o faaaoaoga o le alofa faamaoni, mai lava ia Ieova seia oo mai ia i latou o ē o loo taʻua i le Tusi Paia ma i a tatou lomiga a le Olo Matamata, e aofia ai tala o loo i le Yearbook.
19. O le ā le matafaioi ua faia e le faatuatua i lo tatou alofa faamaoni?
19 O le faatuatua malosi ia Ieova le Atua ma le mataʻu ina ia lē faatiga i lona finagalo o le a fesoasoani lea ia i tatou e faafetaiaia ai le luʻi o le alofa faamaoni. Tatou te faamalosia lo tatou faatuatua ma le mataʻu ia Ieova e ala i le suesue ma le filigā i le Afioga a le Atua ma auai i le faiva faa-Kerisiano. O le a fesoasoani lenei ia i tatou e gaoioi ai ia ogatusa ma le fautuaga a Paulo lea o loo faamauina i le Efeso 4:23, 24: “Ia toe fuataiina manao o o outou loto, ma ia oofu outou i le tagata fou ua faia e foliga i le Atua, i le amiotonu ma le amio lelei e faamaoni [“alofa faamaoni,” NW].”
20. Ae o le sili i na mea uma, o le ā le uiga o le a fesoasoani ia i tatou ina ia alofa faamaoni ai ia Ieova ma isi uma o ē o loo tatou nofo aitalafu i ai i le alofa faamaoni?
20 O le talisapaiaina o uiga o Ieova e fesoasoani lea ia i tatou ina ia alolofa faamaoni ai. Ae o le sili i na mea uma, o le alofa lē manatu faapito mo lo tatou Tamā faalelagi ma le loto faafetai mo mea uma ua ia faia mo i tatou, i le alofa atu ia te ia ma o tatou loto atoa, ma agaga atoa, ma mafaufau atoa, ma le malosi atoa, o le a fesoasoani lea ia i tatou ina ia alolofa faamaoni ai ia te ia. E lē gata i lea, o le iai o le alofa lea na fetalai Iesu e mātaulia ai ona soo, o le a fesoasoani ia i tatou ina ia alolofa faamaoni ai i Kerisiano uma i le faapotopotoga ma i o tatou aiga. I se isi faaupuga, o se mataupu moni lava o le, pe manatu faapito, po o le lē manatu faapito foi. O le lē alofa faamaoni o lona uiga e manatu faapito. O le alofa faamaoni o lona uiga e lē manatu faapito.—Mareko 12:30, 31; Ioane 13:34, 35.
21. E mafai faapefea ona aotele le mataupu o le faafetaiaia o le luʻi o le alofa faamaoni?
21 I se aotelega la: O le alofa faamaoni, o le uiga e sili ona mataina lea ua faaalia mai e Ieova le Atua, e Iesu Keriso, ma auauna moni uma a Ieova. Ina ia iai se faiā lelei ma Ieova le Atua, e ao ona tatou faafetaiaia le luʻi o le alofa faamaoni ia te ia e ala i le ola e tusa ai o tulaga amiotonu o loo ia faafinagaloina, e ala i le leai o se fesootaiga ma ona fili, ma e ala i le tulai atu e faamaonia le tonu o Ieova i le molimau atu i se tulaga fuafuaina ma lē fuafuaina. E ao foi ona tatou faafetaiaia le luʻi o le alofa faamaoni i le faalapotopotoga vaaia a Ieova. E ao ona tatou alolofa faamaoni i a tatou faapotopotoga ma alolofa faamaoni i a tatou paaga faaipoipo. O le faafetaiaia ma le manuia o le luʻi o le alofa faamaoni, o le a tatou saosaolaumea ai i le faaeaina o le pule silisili ese a Ieova, ma tatou lagolagoina ai lana itu o le finauga. O le faia faapea o le a finagalo malie mai ai o ia ia i tatou ma mauaina ai le taui o le ola e faavavau. O le mea na taʻua e le aposetolo o Paulo e uiga i le tuutoina faaleatua e mafai foi ona faatatauina atu i lo tatou faafetaiaia o le luʻi o le alofa faamaoni. E aogā lea e lē gata mo le ola i le taimi nei, ae mo le ola atalī.—Salamo 18:25; 1 Timoteo 4:8.
O le a Faapefea ona E Tali?
□ I ā auala e mafai ona tatou faafetaiaia ai le luʻi o le alofa faamaoni i le Atua?
□ O le ā e manaomia e le alofa faamaoni i le faalapotopotoga a Ieova, mai ia i tatou?
□ E mafai faapefea e toeaina ona faafetaiaia le luʻi o le alofa faamaoni?
□ O le ā le luʻi o loo aofia ai i le alofa faamaoni, e ao i Kerisiano ua faaipoipo ona latou faafetaiaia?
□ O ā uiga o le a fesoasoani ia i tatou e faafetaiaia ai le luʻi o le alofa faamaoni?
[Fesili mo le Suʻesuʻega]
[Ata i le itulau 17]
O le alofa faamaoni i tagata o le faapotopotoga o le a taofia ai toeaina mai le faaali atu o mataupu faalilolilo
[Ata i le itulau 18]
O le alofa faamaoni o se tasi i lana paaga e faamalosia ai le fusi o le faaipoipoga