Na Latou Faia le Finagalo o Ieova

I le Utagiaina o Upu Faamavae a Iesu

I LE po o Nisani 14, 33 T.A., na taooto faataamilomilo ai Iesu Keriso ma ona aposetolo e toʻa 11 i le laulau i se potu pito i luga i Ierusalema. I le silafia ua latalata i lona maliu, na ia fetalai atu ai ia te i latou e faapea: “E toe itiiti nai aso ou te i ai ia te outou.” (Ioane 13:33) O le mea moni, i lea taimi ua alu ese atu ai Iuta le Sekara e taupulepule ma tagata amio leaga o ē sa mananao ia fasiotia Iesu.

E leai lava se tasi na iai i lena potu i luga na sili atu ona lagonaina le faanatinati o lea tulaga nai lo o Iesu. Na ia silafia lelei ua lata mai le taimi o ona puapuaga. Na silafia foi e Iesu o le a tuulafoaiina o ia e ona aposetolo i lena lava po. (Mataio 26:31; Sakaria 13:7) Talu ai o le avanoa mulimuli lenei o Iesu e talanoa atu ai i ona aposetolo a o lei maliu, e mafai la ona tatou mautinoa, o ana upu faamavae, sa taulai atu i mea e sili ona tāua.

“Tou te Faia le Mea Nei e Fai ma Faamanatuga ia te Au”

E faatasi ai ma ona aposetolo faamaoni, na faavae ai e Iesu se faamanatuga fou lea o le a suitulaga i le Paseka faa-Iutaia. Na taʻua e le aposetolo o Paulo lea faamanatuga o le ‘talisuaga afiafi a le Alii.’ (1 Korinito 11:20) Ua tago Iesu i le areto e lē faafefeteina ma ia fai se tatalo. Ona ia tofitofi lea o le areto ma avatu i ona aposetolo. Na ia fetalai atu: “Ina tago ia, ina aai; o loʻu tino lenei.” Ona ia tago foi lea i le ipu uaina, ua fai le tatalo faafetai ma avatu i ona aposetolo ma faapea atu: “Ina inu ia outou uma i ai; auā o loʻu toto lenei, o le toto o le feagaiga ua faamaligiina mo tagata e toatele e faamagalo aʻi agasala.”—Mataio 26:26-28.

O le ā le uiga tāua o lenei mea? E pei ona taʻua e Iesu, o le areto, ua fai ma sui o lona tino e leai se agasala. (Eperu 7:26; 1 Peteru 2:22, 24) O le uaina, ua faaatagia ai le toto o Iesu na faamaligiina, lea ua mafai ai ona faamagaloina agasala. O lona toto faataulagaina o le a mafai ai foi ona aogā le feagaiga fou i le va o Ieova le Atua ma tagata e 144,000, o ē o le a mulimuli ane pule faatasi ma Iesu i le lagi. (Eperu 9:14; 12:22-24; Faaaliga 14:1) E ala i le valaauliaina o ona aposetolo ina ia aai i lenei talisuaga, ua faaalia ai e Iesu, o le a latou auai faatasi ma ia i le Malo faalelagi.

E tusa ai ma le faamanatuina o lenei talisuaga, na poloai ai Iesu e faapea: “Tou te faia le mea nei e fai ma faamanatuga ia te au.” (Luka 22:19) Ioe, o le Talisuaga Afiafi a le Alii, o le a faia pea i tausaga uma, e pei lava ona faia ai o le Paseka. A o faamanatuina e le Paseka le faasaoina o tagata Isaraelu mai le nofo pologa i Aikupito, o le a taulai atu ai le Talisuaga Afiafi a le Alii i se faasaoina e sili atu—le faasaoina o tagata ua mafai ona togiolaina mai le faapologaina i le agasala ma le oti. (1 Korinito 5:7; Efeso 1:7) E lē gata i lea, o i latou e tagofia le areto ma le uaina faafaatusa, o le a faamanatu atu ai ia te i latou e uiga i o latou faaeaga i le lumanai e avea ma tupu ma ositaulaga i le Malo faalelagi o le Atua.—Faaaliga 20:6.

O le maliu o Iesu Keriso, sa avea o se mea moni e sili ona tāua i le talafaasolopito o le tagata. O i latou e talisapaia le mea na faia e Iesu, e usiusitai i lana poloaiga e faatatau i le Talisuaga Afiafi a le Alii: “Tou te faia le mea nei e fai ma faamanatuga ia te au.” E faamanatuina e Molimau a Ieova le maliu o Iesu i tausaga taitasi, i le aso e talafeagai ma Nisani 14. I le 1996, e paʻū ai le aso lenei ia Aperila 2, pe a goto le la. E valaaulia ma le fiafia oe ina ia e auai i le Maota o le Malo i lou lava vaipanoa.

 ʻUa Ou Tuu atu le Poloaiga Fou ia te Outou’

E ese ai mai le faavaeina o le Talisuaga Afiafi a le Alii, na fai atu e Iesu ni fautuaga faamavae i ona aposetolo. E ui lava i le lelei o le toleniina o i latou, ae e tele mea sa tatau ona aʻoaʻoina e nei tane. Latou te lei iloa atoatoa le fuafuaga a le Atua mo Iesu, mo i latou, pe mo le lumanai foi. Ae sa lei taumafai Iesu e faamanino nei mea uma i lena taimi. (Ioane 14:26; 16:12, 13) Nai lo o lea, sa ia fetalai e uiga i se mea e sili atu ona tāua. Na ia fetalai atu: “O le poloaiga fou ou te tuu atu ai ia te outou, ia outou fealofani; faapei ona ou alofa atu ia te outou, ia fealofani foi outou.” Ona faaopoopo atu lea o Iesu: “O le mea lea e iloa ai e tagata uma lava o oʻu soo outou, pe afai ua outou fealofani.”—Ioane 13:34, 35.

I le ā le auala na avea ai “o le poloaiga fou” lenei poloaiga? Ia, na poloai mai le Tulafono a Mose: “E te alofa atu i lē lua te tuaoi ia pei o oe lava ia te oe.” (Levitiko 19:18) Ae peitai, sa fetalai atu Iesu i ona soo ina ia faaalia le alofa faataulagaina e oo lava i le tulaga e tuuina atu ai le ola o se tasi e sui ai ona uso Kerisiano. O le mea moni, o le ‘tulafono o le alofa’ e mafai foi ona faatatau i tulaga e lē faigata naua. I tulaga uma lava, o se soo o Iesu Keriso e tausolomua ona ia faaalia le alofa e ala i le tuuina atu o le fesoasoani faaleagaga i isi ma isi mea faapena.—Kalatia 6:10.

O lena po mulimuli o le soifuaga faalelalolagi o Iesu, o le alofa na uunaia ai o ia e tatalo ia Ieova le Atua mo ona soo. I se vaega, na ia tatalo ai e faapea: “E i le lalolagi lava i latou; ou te alu atu foi ia te oe. Le Tamā paia e, ia e tausi ia i latou i lou suafa o e na e foai mai ia te au, ina ia tasi o i latou, faapei o i taua.” (Ioane 17:11) E aogā ona matauina e faapea, i lenei talosaga i lona Tamā, na tatalo ai Iesu mo le fealofani ma le autasi o ona soo. (Ioane 17:20-23) E manaomia ona ‘alofa le tasi i le isi e pei lava ona alofa Iesu ia i latou.’—Ioane 15:12.

Na utagia e aposetolo faamaoni upu faamavae a Iesu. E tatau foi la ia i tatou ona gauai atu i ana poloaiga. I nei aso faigata e “gata ai,” ua sili atu ai ona tāua le alofa ma le autasi i tagata tapuai moni nai lo o se isi lava taimi. (2 Timoteo 3:1) E moni, o Kerisiano moni e usiusitai i le poloaiga a Iesu ma faaalia le alofa faaleuso. E aofia ai i lenei mea le usiusitai i lana poloaiga ina ia faamanatuina le Talisuaga Afiafi a le Alii.