Ia Taulai atu i Ē Alolofa Faamaoni!

“Ieova e, o ai se lē mataʻu ma vivii atu i lou suafa auā ua na o oe e alofa faamaoni?”—FAAALIGA 15:4, NW.

1. O le ā le molimau na avatu e J. F. Rutherford e tusa ai o le alofa faamaoni o le peresitene na muamua atu ia te ia, o C. T. Russell?

O JOSEPH F. RUTHERFORD, o lē na sosoo ane ia C. T. Russell e avea ma peresitene o le Sosaiete o le Olo Matamata i le 1917, na amata ana saunoaga i le sauniga o le falelauasiga o Russell i lona faapea mai: “Sa alofa faamaoni Charles Taze Russell i le Atua, sa alofa faamaoni ia Keriso Iesu, sa alofa faamaoni i le fuafuaga o le malo faa-Mesia. Sa matuā alofa faamaoni lava o ia—ioe, na alofa faamaoni seia oo lava i lona maliu.” O le mea moni, o se saafiafiga matagofie lena ua faia i se auauna faamaoni a Ieova le Atua. E leai se saafiafiga e sili atu ona lelei e mafai ona tatou avatu i se tasi nai lo le faapea atu i ai, ua ia manumalo mai le luʻi o le alofa faamaoni, sa ia alofa faamaoni—sa matuā alofa faamaoni lava.

2, 3. (a) Aisea e aumaia ai e le alofa faamaoni se luʻi? (e) O ai o loo faasagatau mai foi i Kerisiano moni i a latou taumafaiga ina ia alolofa faamaoni?

² O le alofa faamaoni e aumaia ai se luʻi. Aisea? Auā e feteenai le alofa faamaoni ma le manatu faapito. O ē ua iloga i le lē alofa faamaoni i le Atua, o taʻitaʻi lotu ia o Kerisinetoma. Sa lei faapea muamua lava foi ona sili le salalau atu o le lē alofa faamaoni e pei ona ua iai i faiā faalefaaipoipoga i aso nei. Ua taatele le mulilua. Ua matuā sasao aʻe le lē alofa faamaoni i le lalolagi o faiga faapisinisi. E tusa ai o lenei mea, ua taʻu mai ai ia i tatou e faapea: “E toatele pule o galuega ma tagata faigaluega e iai o latou poto faapitoa . . . ua talitonu, e na o tagata e faaseegofie ma faavaleagofie o loo faamaoni i a latou galuega i aso nei.” O tagata o ē ua “soona faamaoni naʻuā,” ua manatu faatauvaa i ai isi. Ua faaupu mai e le peresitene o se tasi o kamupanī e latou te faia ni auaunaga o galuega faaofisa mo isi kamupanī e faapea: “E na o le pau lava le alofa faamaoni e tatau ona e faatāuaina, o lou alofa faamaoni lea ia te oe lava.” O le taʻua o le alofa faamaoni o le tagata ia te ia o lona uiga o le faaleagaina ai lea o le uiga o le upu. Ua faamanatu mai ai ia i tatou le mea ua taʻua i le Mika 7:2: “Ua fano le ua agalelei [“alofa faamaoni,” NW] nai le nuu.”

³ I se tulaga e sili atu ona iai sona uiga ia i tatou, ua faasagatau mai ai Satani ma ana temoni, i le maumauai e faapogaia i tatou ina ia lē alolofa faamaoni i le Atua. O le pogai lena ua taʻu atu ai i Kerisiano i le Efeso 6:12 e faapea: “Tatou te le tau ma tagata, a o alii sili, ma faipule, ma alii o le pouliuli o lenei lalolagi, atoa ma agaga leaga i mea o i le lagi.” Ioe, e manaomia ona tatou utagia le lapataiga: “Ia outou faautauta, ia outou mataala, ona o le ua fai outou mona fili, o le tiapolo lea, o loo fealualuai o ia e pei o se leona tagi, ua saili se tasi e ʻaina e ia.”—1 Peteru 5:8.

4. O ā faanaunauga ua matuā faafaigata ai ona alofa faamaoni?

⁴ O le isi mea e faafaigata ai ona alofa faamaoni, o faanaunauga manatu faapito ia ua tuufaasolo mai ia i tatou e o tatou mātua, e pei ona taʻua i le Kenese 8:21, ua “leaga o manatu o loto o tagata”—ma manatu faapito—“e afua mai ina o tama iti.” Ua ia i tatou uma lava le faafitauli lea na taʻutino e le aposetolo o Paulo e faapea sa ia te ia foi: “Ou te le faia o le mea lelei ou te loto i ai, a o le mea leaga ou te le loto i ai, o le mea lea ou te faia.”—Roma 7:19.

 O le Alofa Faamaoni o se Mea e Faapitoa

5, 6. O le ā e mafai ona fai atu ai e tusa ai ma le uiga o le alofa faamaoni, ma ua faapefea ona faamatalaina?

⁵ O le “alofa faamaoni” o se upu e matuā faapitoa lava. O lea, ua taʻua mai ai e le Insight on the Scriptures e faapea: “E foliga mai e leai ni upu faa-Peretania o faamatala saʻo maia le uiga atoa o le upu Eperu ma le upu Eleni, ae o le ‘alofa faamaoni,’ o loo aofia ai, le manatu o le tuutoina atu ma le faamaoni, pe a faaaogā i le fesootai atu i le Atua ma le auaunaga ia te ia, ua lava le upu faamaoni e avatu ai se uiga e tau lalata ane i ai.” * E tusa ai ma le “alofa faamaoni,” na taʻua i se tasi taimi e Le Olomatamata e faapea: “Faamaoni, tiute, alofa, avega tauave, tuutoina. O ā mea e tutusa ai nei upu? O ni tāfa eseese ia o le alofa faamaoni.” Ioe, o le tele o uiga lelei eseese, ua na o ni tāfa eseese na o le alofa faamaoni. Ua matuā onomea ai ona mātau le auala ua masani ona faafesootai ai e le Tusi Paia le alofa faamaoni ma le amiotonu.

⁶ E aogā foi faamatalaga nei o loo mulimuli mai: ‘E mafai e le alofa faamaoni ona faaalia maia se faamaoni ma se tuutoina e faaauau pea, ma maufaatuatuaina, e mausalī faasaga i le lē mautonu po o faaosoosoga.’ ‘O le alofa faamaoni e faaalia ai le faamaoni o se tasi i ana folafolaga po o se tuutoina faifai pea i le faatulagaga po o mataupu silisili o loo lagona e se tasi lona maumaututū i ai tau talitonuga; ua taʻu mai e le faaupuga e lē gata o le piiama atu i ai ae o le teena o le maileia ma le faatauanauina ina ia lē faia lena talitonuga.’ O lea, o tagata o ē faaauau ona faamaoni e ui lava i tofotofoga, o teteega, ma sauāga, ua tatau ona taʻua i latou o ē ‘alolofa faamaoni.’

7. O le ā le faaeseesega e mafai ona faia i le va o le alofa faamaoni (loyalty) ma le faamaoni (faithfulness)?

⁷ Peitai, e tusa ai o le alofa faamaoni, atonu e lelei ona faataʻitaʻia ai se faaeseesega lea e mafai ona faia i le va o le alofa faamaoni (loyalty) ma le faamaoni (faithfulness). I le vaega i sisifo o le Iunaite Setete, o loo iai se vaipuna o loo pupuna aʻe pe tusa o itula taitasi. Ona o le faifai pea o lena mea ua faaigoa ai o le Old Faithful [Faamaoni ua Autausagā]. Ua taʻua e le Tusi Paia na mea e leai ni ola e pei o le masina e faamaoni, auā e maufaatuatuaina. Ua tautala le Salamo 89:37 e faatatau i le masina o “le molimau i le lagi e faamaoni lava.” Ua taʻua afioga a le Atua e faamaoni. Ua faapea mai le Faaaliga 21:5: “Ua fetalai mai foi lē tietie i le nofoālii, ‘Faauta, ou te faia ia fou mea uma lava.’ Ua fetalai mai foi o ia ia te au, ‘Ia e tusi; auā o upu nei e moni ma le faamaoni ia.’” O nei faaaoaoga uma e faamaoni, e maufaatuatuaina, ae lē mafai ona latou maua se uiga mafana, po o uiga lelei, e pei o le alofa faamaoni.

O Ieova, o Lē ua Matilatila i le Alofa Faamaoni

8. O le ā le faamaoniga faale-Tusi Paia e faamaonia ai le faaaoaoga e sili ona lelei o le alofa faamaoni?

⁸ E aunoa ma se masalosalo, ua avea Ieova le Atua ma faaaoaoga e sili ona lelei o le alofa faamaoni. Ua alofa faamaoni mai Ieova i tagata uma, ua oo lava i le foaiina mai o lona Alo ina ia mafai e tagata ona maua le ola e faavavau. (Ioane 3:16) I le Ieremia 3:12, tatou te faitau ai e faapea: “Isaraelu e, le ua liliu ese, ina foi mai ia, o loo fetalai mai ai Ieova, ou te le vaai ma le ita ia te outou; auā ou te alofa [“alofa faamaoni,” NW] lava aʻu.” O isi faamaoniga o le alofa faamaoni o Ieova o upu ia o loo faamauina i le Faaaliga 16:5 e faapea: “Ua amiotonu oe, . . . o  lē soifua, o lē na soifua, o le Paia [“alofa faamaoni,” NW].” Ona toe taʻu mai lea ia i tatou e le Salamo 145:17: “E amiotonu Ieova i ona ala uma; o loo alofa [“alofa faamaoni,” NW] ia i ana mea uma lava na faia.” O le mea moni, ua matuā matilatila Ieova i lona alofa faamaoni, o le mea lea ua faapea mai ai le Faaaliga 15:4: “Le Alii e, o ai se le mataʻu ma vivii atu i lou suafa? Auā ua na o oe e alofa [“alofa faamaoni,” NW]”? O Ieova le Atua e alofa faamaoni i se tulaga e sili ona maualuga.

9, 10. O le ā le faamaumauga o le alofa faamaoni na faia e Ieova i ana feutagaiga ma le nuu o Isaraelu?

⁹ O loo iai le anoanoai o faamaoniga o le alofa faamaoni o Ieova i ona tagata, ae maise lava i le talafaasolopito o le nuu o Isaraelu. I aso o Faamasino, na tele taimi na see ese ai Isaraelu mai le tapuaiga moni, ae na alofa mai pea i ai Ieova ma faasaoina i latou. (Faamasino 2:15-22) I le faagasologa o le lima o senituri lea na iai tupu i Isaraelu, na faaalia ai e Ieova lona alofa faamaoni i lena nuu.

¹⁰ O le alofa faamaoni o Ieova na faapogaia ai ona onosai o ia i ona tagata, e pei ona taʻua i le 2 Nofoaiga a Tupu 36:15, 16 e faapea: “Ua aauina mai ia te i latou e Ieova le Atua o latou tamā o e ave ana feau, ua ala aauina lava i latou; auā ua na alofa i lona nuu ma lona afioaga; a ua latou faatauemu i e na aauina mai e le Atua, ma ua ʻinoʻino i ana afioga, ma ua ula i ana perofeta, ua oo ina tupu le toasa o Ieova i lona nuu ua oo ina leai se fofo.”

11. O le ā le faamautinoaga po o le faamafanafanaga ua aumaia e le alofa faamaoni o Ieova ia i tatou?

¹¹ Talu ai le sili o le alofa faamaoni o Ieova, na mafai ai e le aposetolo o Paulo ona tusi mai, e pei ona faamauina i le Roma 8:38, 39: “Ua ou mautinoa, e le mafaia e le oti, po o le ola, po o agelu, po o alii, po o e malolosi, po o mea i nei ona po, po o mea atali, po o le maualuga, po o le loloto, po o se tasi mea na faia, e le mafaia e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii.” Ioe, ua faamautinoa mai e Ieova i tatou: “Ou te le tuuna lava oe, ou te le tuulafoai lava ia te oe.” (Eperu 13:5) E moni, o se faamafanafanaga le iloa e faapea, e alofa faamaoni pea lava Ieova le Atua!

Iesu Keriso, o le Alo e Alofa Faamaoni

12, 13. O le ā le faamaoniga ua tatou iloaina o le alofa faamaoni o le Alo o le Atua?

¹² Sa avea ma o loo avea pea Iesu Keriso o lē na matuā faataʻitaʻi atoatoa ia Ieova i le faafetaiaia o luʻi o le alofa faamaoni. Ua talafeagai le sii mai e le aposetolo o Peteru o le Salamo 16:10 ma faatatauina ia Iesu Keriso i le Galuega 2:27 e faapea: “E te le tuua aʻu i le tuugamau; e te le tuu atu foi lou tagata paia ia oo i ai le pala.” Ua tatau ma onomea ona tofia Iesu Keriso e avea ma ‘lē e alofa faamaoni.’ I so o se vala, ua alofa faamaoni ai o ia i lona Tamā ma le Malo folafolaina o le Atua. Na taumafai muamua Satani e taofia le faamaoni o Iesu e ala i le faaaogaina o faaosoosoga, i faatosinaga i faanaunauga manatu faapito. Ina ua lē taulau le Tiapolo i lena mea, ona ia toe saili atu lea i sauāga, ma iu ai i le maliu o Iesu i le laau faaoosala. Ae sa lē taitai ona maluelue ai le alofa faamaoni o Iesu i lona Tamā faalelagi, o Ieova le Atua.—Mataio 4:1-11.

¹³ Ua alofa faamaoni Iesu Keriso i ona soo i le tausisia lea o le folafolaga ua faamauina i le Mataio 28:20 e faapea: “Faauta foi, ou te ia te outou i aso uma lava, e oo lava i le gataaga o le lalolagi.” I le faataunuuina o lena folafolaga, ua ia faatinoina ai ma le alofa faamaoni le taʻitaʻiga o lana faapotopotoga mai le Penetekoso 33 T.A. seia oo mai i le taimi nei.

 O Tagata Lē Lelei Atoatoa o Ē na Alolofa Faamaoni

14. O le ā le faaaoaoga o le alofa faamaoni na faataatia e Iopu?

¹⁴ Ae faapefea la tagata lē lelei atoatoa? Pe mafai ea ona latou alolofa faamaoni i le Atua? Ua tatou iloaina le tulaga mataina o Iopu. Sa matuā faamaʻoti mai e Satani le luʻi i le tulaga o Iopu. Pe na alofa faamaoni ea Iopu ia Ieova le Atua, pe na pau le mafuaaga na auauna atu ai ia te ia ona o faanaunauga manatu faapito? Na mitaʻi mai e Satani e mafai ona ia faaliliueseina Iopu mai ia Ieova e ala i le faapogaia o faalavelave mo Iopu. Ina ua aveesea uma meafaitino a Iopu, o lana fanau uma, e oo lava i lona soifua maloloina, na tauanau atu lana avā ia te ia: “Ina faifai ia e oe o le Atua, ma e oti ai.” Ae na alofa faamaoni Iopu, auā na ia faapea atu i lana avā: “Ua e tautala mai, e pei ona tautala mai o se tasi o le vao fafine vālea; ua tatou talia mea lelei mai le Atua, a e tatou te le talia ea ma mea leaga? Ua le agasala Iopu i nei mea uma i ona laugutu.” (Iopu 2:9, 10) O le mea moni, na taʻu atu e Iopu i ana uo ia na faafoliga atu o ni ē faamafanafana: “E ui lava ina fasioti o ia [le Atua] ia te au, ou te faamoemoe pea ia te ia.” (Iopu 13:15) E letioa ona finagalo malie Ieova ia Iopu! O lea, na tulei atu ai Ieova ia Elifasa le Timanu: “Ua tupu loʻu ita ia te oe, ma au uo e toalua; ina ua outou le tautalatala ma le tonu ia te au, e faapei o laʻu auauna o Iopu.”—Iopu 42:7, 10-16; Iakopo 5:11.

15. O le ā le faamaoniga faale-Tusi Paia ua tatou iloaina e tusa ai o le alofa faamaoni o le toatele o auauna a Ieova le Atua?

¹⁵ O tane uma ma fafine faatuatua o loo faamatalaina i le Eperu mataupu e 11, e mafai ona faapea atu i ai o ni ē alolofa faamaoni. Sa lē gata ina latou faamaoni ae na latou alolofa faamaoni foi a o fesagai ma omiga. O lea, ua tatou faitau ai ia i latou na o “i le faatuatua . . . ua pupuni ai gutu o leona, na tinei ai le malosi o le afi, na sao ai i le mata o le pelu . . . na tofotofoina isi i tauemuga, ma sasaina, atoa ma noanoataga, ma tuuina i fale puipui; na fetogia i latou i maa, na vaevaeina i ʻili, na oti i latou na fasia i le pelu; na feoai solo ma oofu i paʻu mamoe ma paʻu ʻoti; o mativa i latou, ma puapuagatia, ma faasaunoaina.”—Eperu 11:33-37.

16. O le ā le faaaoaoga o le alofa faamaoni na aumaia e le aposetolo o Paulo?

¹⁶ Ua taʻua foi i Tusitusiga Kerisiano Eleni le faaaoaoga mataina a le aposetolo o Paulo. Na talafeagai ona ia faapea atu i Kerisiano i Tesalonia e tusa ai o lana faiva: “Ua iloa e outou atoa ma le Atua, sa matou amio Atua [“alofa faamaoni,” NW], ma amiotonu, ma le le mataʻuleagaina, ina o matou i ai ia te outou o e faatuatua.” (1 Tesalonia 2:10) Ua ia i tatou foi ni faamaoniga atili o le alofa faamaoni o Paulo i ana upu o loo taʻua i le 2 Korinito 6:4, 5, lea tatou te faitau i ai e faapea: “O mea uma lava ua faailoa ai i matou, o auauna a le Atua i matou, i le onosai tele, i puapuaga, i malaia, i atuatuvale, i le matelaina, i tuuina i fale puipui, i faaletaupulea, i galuega, i mataala, i anapopogi.” O nei mea uma ua faamaonia ai le fiafia o le aposetolo o Paulo ia te ia lava, ona o lona alofa faamaoni.

O Ē Alolofa Faamaoni i Ona Po Nei

17. O ā upu a J. F. Rutherford na faaalia ai lana filifiliga maumaututū ina ia alofa faamaoni?

¹⁷ I le oo mai i ona po nei, ua ia i tatou le faaaoaoga matagofie lea na talanoaina i le amataga mai o lenei mataupu. Seʻi mātau le mea ua taʻua i le tusi Worldwide Security Under the “Prince of Peace,” i le itulau e 146 i lalo  o le tamai ulutala “Loyalty During Time of Imprisonment” [Alofa Faamaoni i Taimi o le Faafalepuipuiina]. Ua faapea mai ai: “I le faaalia o le alofa faamaoni i le faalapotopotoga a Ieova i taimi o lona faafalepuipuiina, na tusi ai e le peresitene a le Sosaiete o le Olo Matamata, o Joseph F. Rutherford, ia Tesema 25, 1918, upu nei: ‘Talu ai loʻu musu e lolo atu ia Papelonia le Aai Tele, ae ou taumafai ma le faamaoni e auauna atu i loʻu Alii, ua faafalepuipuiina ai aʻu, lea ua ou loto faafetai ai. . . . E sili mamao atu ia te au loʻu mauaina o Lona finagalo malie ma ou falepuipui ai, nai lo loʻu lolo atu pe toilalo i le Manu Feai ma saʻoloto ai ma maua le faamaoniga a le lalolagi uma.’” *

18, 19. O ā faaaoaoga mataina o le alofa faamaoni ua tatou iloaina i ona po nei?

¹⁸ Ua ia i tatou ni faaaoaoga e sili ona lelei o le alofa faamaoni i le toatele o isi Kerisiano o ē ua onosaia sauāga. O nisi o na tagata alolofa faamaoni, o Molimau a Ieova i Siamani i le vaitaimi o pulega faa-Nasi, e pei ona faaali mai i le vitiō o le Purple Triangles, lea ua tufatufaina atu i le lalolagi aoao i le gagana faa-Peretania. E lelei foi ona mātauina le toatele o Molimau a Ieova i Aferika o ē alolofa faamaoni, e pei o i latou i Malawi. Sa iai se leoleo o le falepuipui iina na ia molimau i le alofa faamaoni o Molimau, i lona faapea mai: “O le a lē taitai ona latou lolo atu. E na ona faatoateleina o i latou.”

¹⁹ E leai se tasi e mafai ona ia faitauina Yearbooks of Jehovah’s Witnesses talu ai nei, e lē maofa i le alofa faamaoni sa faaalia e Kerisiano moni, e pei o i latou o loo i Eleni, Mozambique, ma Polani. O le toatele o i latou sa puapuagatia i faiga faataugā matuitui; o isi na fasiotia. Ua faaalia i le itulau e 177 o le 1992 Yearbook ata o tane Kerisiano e toaiva i Aitiope, o ē na fesagai ma le luʻi o le alofa faamaoni, seia oo atu i le tulaga o le fasiotia. I le avea o i tatou o ni Molimau a Ieova, pe tatou te lē fiafia ea i le iai o le tele o faaaoaoga lelei e toe faamalosia atili ai i tatou i le manumalo i le luʻi o le alofa faamaoni?

20. O le ā le taunuuga pe a tatou tutumau i le alofa faamaoni?

²⁰ O le teena ma le alofa faamaoni o faaosoosoga ma omiga, tatou te atiina aʻe ai lo tatou loto fiafia ia i tatou lava. O lea la, o le itu a ai tatou te mananao ina ia maua i ai i tatou e tusa ai o le mataupu i le alofa faamaoni? O le manumalo i le luʻi o le alofa faamaoni, tatou te lagolagoina ai le itu a Ieova le Atua i le finauga, ma faamaonia atu ai le avea o Satani le Tiapolo ma pepelo e sili ona leaga! Ona tatou maua ai lea o le finagalo malie o Lē na Faia i tatou, o Ieova le Atua, ma le taui o le ola e faavavau i le fiafia. (Salamo 37:29; 144:15e) O le a sosoo mai ai le talanoaina o mea e manaomia ina ia manumalo ai i le luʻi o le alofa faamaoni.

[Faaopoopoga i lalo]

O le a Faapefea ona E Tali?

□ Aisea e aumaia ai e le alofa faamaoni se luʻi?

□ Aisea e mafai ai ona faapea atu, o le “alofa faamaoni” o se upu e matuā faapitoa lava?

□ O ā faaaoaoga faale-Tusi Paia ua tatou iloaina o tagata lē lelei atoatoa o ē na alolofa faamaoni?

□ O ā faaaoaoga matagofie i ona po nei o le alofa faamaoni ua tatou iloaina?

[Fesili mo le Suʻesuʻega]

[Ata i le itulau 11]

O Charles Taze Russell

[Ata i le itulau 12]

Sa avea moni Iesu ma ‘lē e alofa faamaoni’ a Ieova

[Ata i le itulau 13]

E ui ina lē lelei atoatoa Iopu, ae na faamaonia lona alofa faamaoni i le Atua

[Ata i le itulau 14]

Na faataatia e Paulo se faaaoaoga matagofie o le alofa faamaoni ia Ieova