O Ieova—O Lē Alofa i le Amiotonu ma le Faamasinoga Tonu

NA FESILI ifo se teine talavou i Sarajevo ia te ia lava i le pogai ua onosaia ai pea e tamaiti o lona nuu puapuaga. “E leai sa matou mea na faia. E mamā i matou,” o lana faamatalaga lena. Na ō atu ni tinā loto mafatia mai Anitenitina i se fetaulaiga o ala e fai ai fonotaga i Buenos Aires mo le 15 tausaga e faaali atu lo latou lē malilie i le leiloloa o a latou fanau tama ona o faiga sauā a pule o vaegaau. Na faamatala mai e se tagata Aferika e igoa ia Emanuelu, o lē na fasiotia lona tinā ma ona tuafāfine e toatolu i ni sauāga na pasae aʻe i le va o ituaiga o tagata o lea lava nuu, e faapea: “E tatau ona maua e tagata uma lona taui e tusa ai . . . Matou te mananao i le faamasinoga tonu.”

O le faamasino tonu o se tasi o uiga tumatilatila o Ieova le Atua. “E tonu ona ala uma,” o le faamatalaga lena a le Tusi Paia. E moni o Ieova, “e fiafia o ia i le amiotonu ma le faamasinoga.” (Teuteronome 32:4; Salamo 33:5) O le iloa lelei o le Atua, e tatau ona tatou malamalama i lona tomai o le faamasino tonu ma aʻoaʻo e faataʻitaʻi i ai.—Hosea 2:19, 20; Efeso 5:1.

Atonu ua taaʻina la tatou vaaiga i le faamasinoga tonu i le auala o loo vaai ai tagata i lenei uiga. I nisi vaega o le lalolagi, o le faamasinoga tonu e masani ona faaāta mai i se fafine o loo fusifusia ona mata a o ia uuina se pelu ma se fuafaatautau. O le faamasinoga tonu faaletagata e tatau ona lē faaituau, o lona uiga, e lē faatauasoina e le tamaoaiga po o ni faatosinaga. E tatau ona fua lelei i le fuafaatautau le nofosala po o le lē nofosala foi o lē ua molia. Ma i lana pelu, o le faamasinoga tonu e tatau ona puipuia ai le tagata lē nofosala ma faasalaina ai ē faimea sese.

Na faamatala mai e le tusi Right and Reason—Ethics in Theory and Practice e faapea, “o le faamasinoga tonu e fesootai ma tulafono, matafaioi, aiā tatau, tiute tauave, ma fua atu lona taui ia talafeagai ma le tulaga o le tagata po o mea e tatau mo ia.” Ae o le faamasinoga tonu a Ieova e sili atu lona mamao nai lo lena. Ua tatou iloa lenei e ala i lo tatou iloiloina o galuega ma uiga o Iesu Keriso, o lē ua talitutusa lelei ma lona Tamā faalelagi.—Eperu 1:3.

O loo faasino atu e le tusitala o le evagelia a Mataio upu o loo i le Isaia 42:3 ia Iesu e faapea: “E le gagau e ia le u gapēpē, e le tinei foi e ia le vavae ua mu itiiti, seia faamanumalo e ia le faamasinoga.” Na folafola atu e Iesu se feau faamafanafana loto i tagata o ē na pei o ni u gapēpē ua gaui ma iu lava ina solia i lalo. Ua pei i latou o ni vavae mū itiiti, ma ua pei ai ua pulapula la goto lo latou olaga. Nai lo le gausia o u gapēpē i se vaaiga faafaatusa ma tineia le vavae ua mu itiiti, na mutimutivale le alofa o Iesu i ē mafatia, na ia aʻoaʻo ma faamālōlō i latou, ma faamanino ia i latou le faamasinoga tonu a Ieova le Atua. (Mataio 12:10-21) E pei ona valoia e le valoaga a Isaia, o le ituaiga o faamasinoga tonu lena ua aumaia ai se faamoemoe.

Alofa Mutimutivale ma le Faamasinoga Tonu a Ieova

O le alofa mutimutivale o se tasi o vaega mataina o le faamasinoga tonu a le Atua. Na manino lenei tulaga a o iai Iesu i le lalolagi. Na ia faataʻitaʻia ma le saʻo faamasinoga tonu ma le amiotonu a le Atua. Ae peitai, na sailia e le au tusiupu Iutaia ma le au Faresaio la latou lava amiotonu e ala i le mulimuli atu i tulafono lē masuia—o le tele lava na faatūina e i latou. E masani lava o a latou faamasinoga faaletulafono ua tuuesea ai le alofa mutimutivale. O le tele lava o finauga i le va o Iesu ma le au Faresaio sa faaautū i lenei mataupu: O le ā moni le faamasinoga tonu ma le amiotonu?—Mataio 9:10-13; Mareko 3:1-5; Luka 7:36-47.

 Na faataʻitaʻia e Iesu pe faapefea ona feagai ma isi i se auala saʻo ma le tonu. Na fesili se tamaloa na tausia le tulafono ia Iesu po o le ā e manaomia ina ia maua ai le ola e faavavau. I le tali atu na fesiligia o ia e Iesu i se fesili ma sa faamālō atu i lana tali mai e faapea e lua tulafono pito sili ona tāua, o le alofa o se tasi i le Atua ma le loto atoa, tino, mafaufau, ma le malosi, ma ia alofa i tuaoi e pei o ia lava ia te ia. Ona fesili lea o le tamaloa: “O ai foi le tagata ma te tuaoi?” Na tali Iesu e ala i le faamatalaina o le faataoto i le Samaria agalelei.—Luka 10:25-37.

Ua faataʻitaʻia mai i le faataoto a Iesu i le Samaria, le amiotonu ma faamasinoga tonu ma le alofa mutimutivale a Ieova. E ala i le fesoasoani ma le lē manatu faapito i se tamaloa na manuʻa la te lē masani, na faia e le Samaria se gaoioiga saʻo, tonu, ma le alofa mutimutivale. Na faaalia e Iesu lava ia le agaga lea e tasi, a o iai i le lalolagi. Na saʻo ma tonu o ia. Ae sili atu i lena, na tuuina atu lona ola mo tagata o loo puapuagatia, mo ē agasala ma tagata lē lelei atoatoa o loo poia i mafatiaga, faamaʻi, ma le oti. Na faafesootai e le aposetolo o Paulo le amiotonu ma le taulaga togiola. Na ia tusi: “O lenei foi, faapei ona faasalaina o tagata uma lava i le agasala e tasi, e faapea foi ona taʻuamiotonuina o tagata uma lava i le amiotonu e tasi, [po o, “se gaoioiga amiotonu e tasi,” e tusa ai ma le faamatalaga faaopoopo i le pito i lalo o le lomiga o le NW] latou te ola ai.” (Roma 5:18) O lenei “gaoioiga amiotonu e tasi” o se auala a le Atua mo le faasaoina o tagata usiusitai mai tulaga mafatia ona o le agasala a Atamu, lea sa lē aafia tuusaʻo ai i latou.

O le faamasinoga tonu a le Atua ua aumaia ai se mapusaga mo tagata agasala ma ua faaeaina ai mataupu silisili tonu i le taimi lava e tasi. O le lē amanaiaina o le agasala o se tulaga lē tonu ma le lē alofa, auā atonu o le a faamalosia ai le solitulafono. I le isi itu, ana faapea o le faamasinoga tonu a le Atua e faatapulaaina i le avatua a lē o le taui, o le faasalaga, e masalo o le a matuā leai se faamoemoe mo tagata. E tusa ai ma le Tusi Paia, “auā o le oti, o le totogi lea o le agasala,” ma e “leai sē amiotonu, e leai lava se tasi.” (Roma 3:10; 6:23) Sa matuā telē se mea na faia e Ieova lava ia ma lona Alo pele ina ia saunia mai ai le togiola mo a tatou agasala.—1 Ioane 2:1, 2.

Ua faaalia mai e le togiola, o le faamasinoga tonu mai le Atua ua filia faatasi ma le alofa lea e pulea e mataupu silisili (faa-Eleni, a·gaʹpe). E moni lava, o faamasinoga tonu a le Atua o se faailoaga lea o ana mataupu silisili tonu—o se ata o lona finagalo mo amioga tatau. O le mea lea, pe a faataʻitaʻia e le Atua, ua faavae aʻe ai le faamasinoga tonu a le Atua i le alofa o le a·gaʹpe. (Mataio 5:43-48) Afai ua tatou malamalama i le aano moni o faamasinoga tonu a Ieova, o le a tatou faatuatua atoatoa la i ana faaiuga faafaamasinoga. I le avea ma “Faamasino i le lalolagi aoao,” ua ia faaauau ai ona faia le mea ua tonu.—Kenese 18:25, NW; Salamo 119:75.

Faaaʻoaʻo i le Faamasinoga Tonu a Ieova

Ua uunaia i tatou e le Tusi Paia ia “faaaʻoaʻo outou i le Atua.” (Efeso 5:1) O lona uiga ia faaaʻoaʻo i lana faamasinoga tonu, faapea foi ma lona alofa. Talu ai tatou te lē lelei atoatoa, o lea la, ua lē tonu aʻiaʻi ai o tatou ala e pei o Ieova le Atua. (Isaia 55:8, 9; Esekielu 18:25) E faapefea la ona tatou faamaonia atu o i tatou o ē alolofa i le amiotonu ma le faamasinoga tonu? E ala i le “oofu outou i le tagata fou ua faia e foliga i le Atua, i le amiotonu ma le amio lelei e faamaoni.” (Efeso 4:24) Ona tatou alolofa ai lea i mea e alofa i ai le Atua, ma inoino i mea e inosia e ia. E alofia e le “amiotonu e faamaoni” le sauā, faiga lē mamā faaleituaiga, amioga lē mamā, ma le faaaposetasi, auā o nei amioga e solia ai mea ua paia. (Salamo 11:5; Efeso 5:3-5; 2 Timoteo 2:16, 17) O le faamasinoga tonu a le Atua e uunaia ai foi i tatou e faaalia le agalelei mo isi.—Salamo 37:21; Roma 15:1-3.

E lē gata i lea, afai tatou te talisapaia uiga alofa o faamasinoga tonu a le Atua, tatou te lē mananao ai la e faamasinoina o tatou uso ma tuafāfine faaleagaga. O le a faapefea ona mafai ona tatou malamalama ia i latou e pei o Ieova? Pe o le a tatou lē faamasino ea i latou e faavae aʻe i mea tatou te vaaia? O lea, na lapatai mai  ai Iesu: “Aua tou te faamasino atu, ina neʻi faamasinoina outou; Auā o le faamasinoga tou te faamasinoina atu ai, e faamasinoina ai outou; o le fua foi tou te fuaina atu ai, e toe fuaina mai ai ia te outou. Se a le mea e te vaai atu ai i si fāsi laau i le mata o lou uso, a e te le iloa e oe le utupoto i lou lava mata? Pe faapefea foi ona e fai atu i lou uso, Tuu mai ia, soʻu eu ese le fāsi laau i lou mata; faauta foi, o i lou lava mata le utupoto? O oe na le tagata faafiaamiotonu, ia e muai tiai le utupoto i lou lava mata, ona e iloa lelei ai lea e eueseina atu le fāsi laau i le mata o lou uso.” (Mataio 7:1-5) O le iloiloina ma le faamaoni o o tatou lava lē lelei atoatoa, o le a taofia mai ai i tatou mai le faia o faamasinoga atonu e vaai i ai Ieova e lē amiotonu.

O toeaina tofia o le faapotopotoga, ua iai le matafaioi mo le faia o faamasinoga o solitulafono matuia. (1 Korinito 5:12, 13) Pe a faia faapea, ua latou manatua ai e sailia e le faamasinoga tonu a le Atua le faasalafa atu o lona alofa mutimutivale pe a tatau ai. Pe afai e leai se faavae e manaomia ai—e pei i le tulaga o le tagata ua faimea sese ae lē salamō—e lē mafai la ona faasalafa atu lena alofa mutimutivale. Ae peitai, e lē tuuesea e le au toeaina lena tagata faimea sese mai le faapotopotoga ona ia tauimasui atu ai. O lo latou faamoemoega o le gaoioiga o le faateʻaeseina e toe faasaʻoina ai o ia. (Faatusatusa i le Esekielu 18:23.) I lalo o le tulaga ulu o Keriso, ua auauna ai le au toeaina mo le faamasinoga tonu, ma e aofia ai le “pei o se lafitaga i le matagi.” (Isaia 32:1, 2) O lea e tatau ai ona faaalia le lē faaituau ma le magafagafa.—Teuteronome 1:16, 17.

Lūlū Fatu o le Amiotonu

A o tatou faatalitalia le lalolagi fou amiotonu a le Atua, e tatau ona tatou “saili le amiotonu” ina ia olioli ai i le finagalo malie o le Atua. (Sefanaia 2:3; 2 Peteru 3:13) Ua faamatala ma le manino mai nei manatu i upu o loo maua i le Hosea 10:12 e faapea: “Ia outou lulu saito mo outou ma le amiotonu, ia outou selesele mai ma le amio lelei; ia outou suatia lo outou fanua vaoa; auā ua oo i ona po e saili atu ai ia Ieova, seia afio mai o ia, ma faatotō ifo le amiotonu i luga ia te outou.”

I o tatou olaga i aso taitasi, e tele avanoa tatou te ‘lulu ai saito o le amiotonu,’ e pei lava ona sa faataʻitaʻia mai e Iesu i lana faataoto i le Samaria agalelei. O le a faamautinoa mai e Ieova tatou te “selesele mai ma le amio lelei.” Pe afai tatou te savavali pea i ‘ala o le faamasino tonu,’ o le a faaauau ona tatou maua faatonuga o le amiotonu i lalo o le pulega a le Malo. (Isaia 40:14) A o faagasolo le taimi, e mautinoa o le a tatou talisapaia atoatoa, o Ieova o lē naunau i le amiotonu ma le faamasinoga tonu.—Salamo 33:4, 5.

[Ata i le itulau 23]

O le Samaria agalelei ua faataʻitaʻia mai ai faamasinoga tonu a Ieova

[Ata i le itulau 23]

Na mutimutivale le alofa o Iesu i tagata mafatia, o ē na pei o u gapēpē