‘Galue, e Lē mo Meaʻai e Pala’

E PEI ONA FAAMATALAINA E DAVID LUNSTRUM

O i maʻua ma loʻu uso laitiiti o Elwood, sa ma i se mea maualuga e sili atu i le 30 futu [9 mita], i le valiina o se faailoilo fou i luma o le falegaosimea a le Olomatamata. Ua sili atu i le 40 tausaga ua mavae, ae o loo iai pea iina, o loo uunaia tagata e: “FAITAU LE AFIOGA A LE ATUA LE TUSI PAIA I ASO UMA.” I vaiaso taitasi, e faitau afe tagata latou te vaaia lenei faailoilo a o latou sopoia le auala laupapa taʻutaʻua o le Brooklyn Bridge.

O MEA o aso ua mavae o loo oʻu manatuaina e aofia ai le aso e fai ai le tagamea a le aiga. E ala Tinā i le ta o le 5:00 i le vaveao e fai le tagamea mo lo matou aiga toatele, ae sauni Tamā mo le galuega. E faia ai se tasi o a la finauga aasa, e finau atu Tamā na tupuga mai le tagata i manu mo le sili atu i le faitau miliona o tausaga, ae sii mai e Tinā le Tusi Paia e faamaonia ai o tagata o foafoaga tuusaʻo a le Atua.

E ui lava ina sa na o le fitu oʻu tausaga i lena taimi, ae sa ou iloa o le upu moni lea sa ia Tinā. Po o le ā lava le tele o loʻu alofa ia Tamā, ae sa mafai ona ou iloa e leai se faamoemoe mo le lumanai o iai i lona talitonuga. Maeu le fiafia atonu e ono oo ia Tinā pe ana faapea na te iloaina i le tele o tausaga mulimuli ane, na valiina ai e lana fanau tama e toalua le faailoilo ua faalaeiauina ai tagata ina ia faitau le Tusi Paia, o se tusi sa sili ona pele ia te ia!

Ae ua ou talaoso atu, ae lē o faasolosolo lelei atu laʻu faamatalaga. Na faapefea ona ou maua lenei galuega ua faaeaina ai aʻu? Ou te toe fia foi i tua i le tausaga e 1906, i le tolu tausaga a o oʻu lei fanau mai.

Le Faaaoaoga Faamaoni a Tinā

I le taimi lena, faatoʻā uma lava ona faaipoipo Tinā ma Tamā ma nonofo i se faleʻie i Arizona. Na alu atu ai se Tagata Aʻoga o le Tusi Paia e pei ona muai taʻua ai Molimau a Ieova, ma ofo atu ia Tinā se faasologa o ni tusi na tusia e Charles Taze Russell, na faaulutalaina, Studies in the Scriptures. Na ala o ia i le po atoa i le faitauina o nei tusi, ma e lei pine ae ia iloaina ai o le upu moni lenei na ia sailia. Sa lē manofo o ia i le faatalitali atu i le toe foi ane o Tamā mai lana suʻega galuega.

Sa lē faamalieina foi Tamā ia i mea na aʻoaʻoina e lotu, o lea na ia talia ai nei upu moni o le Tusi Paia mo sina taimi. Ae peitai, mulimuli ane, na fai lava lona loto ma taofi i lana lava lotu ma oo ai ina faafaigata mo Tinā. Ae peitai, e lei faavaivai ai o ia e tausia manaoga faaletino ma le faaleagaga o lana fanau.

E lē mafai ona galo ia te au le sau o Tinā mai i le fogafale i luga i le fale i lalo i po taitasi, pe a uma ona faia galuega mamafa i le aso, e faitau mai ia i matou se vaega o le Tusi Paia pe faamatala mai foi ia i matou ni oa tāua faaleagaga. O Tamā foi ia, o se tagata e faigaluega mamafa, ma a o oʻu tuputupu aʻe, sa ia aʻoaʻoina aʻu i le tomai tau vali fale. Ioe, na aʻoaʻoina aʻu e Tamā ina ia galue, ae na aʻoaʻoina aʻu e Tinā i mea e tatau ona ou galue i ai, e pei ona faatonu mai e Iesu, ‘o meaʻai e lē pala.’—Ioane 6:27.

Na iu ina faamautū lo matou aiga i se aai laitiiti o Ellensburg i le setete o Uosigitone, e tusa ma le 110 maila [180 kilomita] i sasaʻe o Seattle. Ina ua amata e i matou o le fanau ona auai i sauniga a Tagata Aʻoga o le Tusi Paia ma Tinā, sa matou feiloai i ni fale o aiga. Na ō ese uma lava tamaloloa mai la matou vaega o suesuega ina ua faamamafa mai le manaomia ona auai i le faiva mai lea fale i lea fale. Ae sa lē faavaivai ai Tinā. O lenei mea, na tāmau ai i loʻu mafaufau ina ia faalagolago i taimi  uma i le faatonutonuga a le faalapotopotoga a Ieova.

Mulimuli ane, na maua ai se fanau e toaiva a Tamā ma Tinā. Na ou fanau ia Oketopa 1, 1909, e lona tolu aʻu i le la fanau. E toaono le aofai o i matou uma lava na faataʻitaʻi i le faaaoaoga lelei a Tinā ma avea ai ma Molimau maelega a Ieova.

Tuuina Atu ma Papatisoina

Ina ua latalata i le 20 o oʻu tausaga, na ou tuuina atu ai ia Ieova, ma faailogaina lea i le papatisoga i le vai i le 1927. Na faia le papatisoga i Seattle i se fale tuai na avea muamua ma falesa o le Lotu Papatiso. Ua ou fiafia talu ai na latou aveesea le falelogo maualuga tuai mai le falesa. Na taʻitaʻiina atu i matou i le vaitaele i le pito i lalo o le fale, o iina na tuuina mai ai ia i matou ni ofu talaloa uli e ofu. Na foliga mai e pei o le a matou ō i se maliu.

I ni nai masina mulimuli ane, na ou toe alu ai i Seattle, ma o le taimi lea na ou uluai tofo ai i le molimau atu mai lea fale i lea fale. O lē na taʻimua, na ia faatonuina aʻu e faapea, “Alu atu i le itu lena e faataamilo i le poloka, ae o le a ou alu atu i le auala lea.” E ui lava i loʻu tete, ae sa ou tuua ni seti se lua o tamai tusi i se fafine e ese le lelei. Sa faaauau ona ou auai i le faiva mai lea fale i lea fale ina ua ou toe foi i Ellensburg, ma i le taimi nei, ua toetoe lava 70 tausaga ua mavae, ae o loo tumau pea ona avea lena auaunaga o se mea e sili ona ou olioli ai.

Auaunaga i le Ofisa Ulu

E lei umi lava se taimi mulimuli ane, na faalaeiauina ai aʻu e se tagata na auauna i le Peteli i Brooklyn, le ofisa ulu o le Sosaiete o le Olo Matamata, ina ia ou tauofo ou te auauna ai iina. I sina taimi puupuu lava talu ona mavae la ma talanoaga, ae aliali mai loa se faaaliga i le mekasini o Le Olomatamata e faailoa mai ai se manaoga mo ni fesoasoani i Peteli. O lea na ou talosaga ai loa. E lē mafai ona galo ia te au loʻu olioli ina ua maua le faaaliga ina ia ou lipoti atu mo le auaunaga i Peteli, i Brooklyn, Niu Ioka, ia Mati 10, 1930. I lea na amata ai laʻu galuega faataimi atoa o le galue mo ‘meaʻai e lē pala.’

Atonu o le a manatu se tasi faapea ona o loʻu poto masani i mea tau vali fale, o le a tofia ai aʻu e valiina se mea. Ae nai lo lea, o laʻu uluai galuega, sa ou galue i se masini e faapipii faatasi ai tusi i le falegaosimea. E ui ina o se galuega e matuā fiu ai lenei, ae sa ou fiafia i le galuega mo le sili atu i le ono tausaga. O le masini lomitusi lapoa e  faataavili na matou faaigoaina ma le alofa o le vaatau tuai (old battleship), na saunia ai tamai tusi ia sa aauina mai i lalo e ala i se fusipaʻu i le fogafale i lalo lea sa matou iai. Sa avea o se mea fiafia ia i matou le iloa ua mafai ona matou tuufaatasia tamai tusi i le vave matou te mafaia a o faasolo ona lomia mai e le vaatau tuai.

Mulimuli ane, sa ou galue ai i nisi o matagaluega, e aofia ai le matagaluega na faia ai fonokalafi po o laau tautala. Na matou faaaogaina nei masini e tā ai i faitotoa o fale o aiga feau faale-Tusi Paia na tapueina. Na fuafuaina se laau tautala tusaʻo, ma na saunia e tagata sa galulue tauofo i la matou matagaluega. O lenei laau tautala sa lē gata ina tāina ai feau na toe puʻeina, ae sa iai foi se vaega faapitoa mo le aveina ai o tamai tusi ma atonu foi o se sanuisi. Sa ou maua le faaeaga e faataʻitaʻia ai le faaaogaina o lenei mea faigaluega fou i se tauaofiaga i Detroit, Michigan, i le 1940.

Ae peitai, e sili atu ona tele mea na matou faia nai lo na masini ofoofogia. Sa mafai foi ona matou faia ni fetuutuunaiga tāua faaleagaga. Mo se faataʻitaʻiga, sa masani ona faapipiiina e Molimau a Ieova se pine e iai se koluse ma se pulou tupu. Ae na oo ina matou malamalama, na faasalaina Iesu i luga o se laau saʻo ae lē o se koluse. (Galuega 5:30) O lea, na taofia ai le toe faapipiiina o na pine. Sa avea o se faaeaga ia te au le aveesea o mea na pipii i pine. Mulimuli ane, na faamamāina ai le auro na faia ai ma faatauina atu.

E ui lava sa pisi tele la matou faasologa faalevaiaso e lima ma le ʻafa aso faigaluega, ae sa faia lava so matou sao i le faiva faa-Kerisiano i faaiuga o vaiaso. I le tasi aso, e toʻa 16 i matou na puʻea faapagota ma faafalepuipui i Brooklyn. Aisea? Ia, i na aso sa matou manatu i le upu lotu e faatatau i taimi uma i tapuaiga sese. O lea, sa matou tauaveina ai ni faailoilo sa tusia ai upu nei i le tasi itu, “O Lotu o le Mailei ma o se Pisinisi” ae i le isi itu sa tusia ai “Auauna i le Atua ma Keriso le Tupu.” I le tauaveina o nei faailoilo, na tuuina ai i matou i le falepuipui, ae na tatalaina i matou i tua e le loia a le Sosaiete o le Olo Matamata, o Hayden Covington. I lena taimi, e tele lava ni faamasinoga e aafia ai le saʻolotoga o tapuaiga na tauina i luma o le Faamasinoga Sili a le Iunaite Setete, ma o se mea na matuā faafiafiaina ai i loʻu iai i Peteli ma avea ai o le uluai tagata na faalogo i tala e uiga i o tatou manumalo.

Mulimuli ane, sa tofia ai aʻu i galuega na faaaogaina ai loʻu poto masani i le vali fale. I Staten Island, o se tasi o vaega o nofoaga e lima i le aai o Niu Ioka, na faatūina ai la matou faleuaealesi faasalalau le WBBR. O pou mo faasalalauga a le faleuaealesi, sa sili atu i le 200 futu (60 mita) le maualuluga, ma e tolu ni seti o laina o uaea na toso atu i ai. Sa ou nofo i luga o se fasi laupapa e tolu futu le umi, ae valu inisi le lautele a o sisi aʻu i luga e se tasi o tagata faigaluega. A o nofo i lena nofoa laitiiti i se mea matuā maualuga, sa ou valiina ai laina o uaea ma pou. Na fesili mai nisi ia te au pe lei tele ni a matou tatalo na fai a o faia lena galuega!

O se galuega na faia i le tau mafanafana e lē mafai ona galo ia te au, o le fufuluina lea o faamalama ma vali faavaa o faamalama o le falegaosimea. Na matou taʻua lena galuega o la matou mālōlōga o le tau mafanafana ona sa matou ō ai i fafo mai le fale. Na matou faapipiiina la matou fata laupapa maualuga, ma faaaogā se poloka e tosoina i matou i luga ma lalo o le fale fogafalevalu.

Se Aiga e Lagolagosua

I le 1932 na maliu ai loʻu tamā, ma sa ou tau mānatu ai po o le a ou toe foi i le aiga e fesoasoani i le tausiga o Tinā. O lea, i le tasi aso a o lei oo i le taimi o le taumafataga i le aoauli, na ou tuuina  ai se pepa na tusia ai se faaaliga i le laulau ulu sa nofo ai le uso o Rutherford, le peresitene o le Sosaiete. I lea faaaliga, na ou talosaga ai ou te fia talanoa ia te ia. Ina ua ia silafia e uiga i loʻu popolega ma ia iloa o loo iai pea isi oʻu uso ma tuafāfine o loo nonofo ai i le aiga, na ia fesili mai ia te au, “O e manao e te nofo i Peteli ma fai le galuega a le Alii?”

Sa ou tali atu: “Ioe, ou te manao i ai.”

O lea na ia fautua mai ai ou te tusi atu ia Tinā ina ia iloa pe o malie o ia i laʻu filifiliga ou te nofo pea i Peteli. O le mea lena na ou faia, ma na ia tusi mai e faaalia lona malie atoatoa i laʻu filifiliga. Na ou matuā talisapaia lava fautuaga ma le agalelei o le uso o Rutherford.

I le tele o tausaga na ou iai i Peteli, ou te tusi atu ai e lē aunoa i loʻu aiga ma faalaeiau ia i latou ina ia auauna ia Ieova, e pei lava ona faalaeiauina ai aʻu e Tinā. Na maliu Tinā ia Iulai 1937. Maeu se taaʻiga malosi na ia faia i lo matou aiga! E na o loʻu uso matua o Paul ma loʻu tuafafine matua o Esther, ma loʻu tuafafine laitiiti o Lois e lei avea o ni Molimau. Ae peitai, sa fiafia Paul i la matou galuega ma tuuina mai ai le fanua lea na fausia ai lo matou uluai Maota o le Malo.

I le 1936, na avea ai loʻu tuafafine o Eva ma paeonia po o se tagata talaʻi faataimi atoa. O le tausaga lava lena na ia faaipoipo atu ai ia Ralph Thomas, ma i le 1939 na tofia ai i laʻua i le galuega faimalaga e auauna i faapotopotoga o Molimau a Ieova. Mulimuli ane, na siitia atu i laʻua i Mekisikō, o iina na nonofo ai mo le 25 tausaga ma fesoasoani i le galuega o le Malo.

I le 1939, na ulu atu ai foi oʻu tuafāfine o Alice ma Frances i le auaunaga faapaeonia. Maeu le olioli i le vaai atu ia Alice i tua o se laulau i le tauaofiaga na faia i St. Louis i le 1941, o loo ia faataʻitaʻia mai le faaaogaina o se laau tautala na ou fesoasoani e fausiaina! E ui lava sa faalavelavea i nisi taimi le paeonia a Alice ona o tiute tauave i le aiga, ae e sili atu i le 40 tausaga na auai ai o ia i le faiva faataimi atoa. O Frances na oo atu e auai i le Aʻoga o le Olomatamata ma le Tusi Paia o Kiliata i le 1944 ma auauna ai mo se taimi e avea o se misionare i Puerto Rico.

O Joel ma Elwood, o le toalua aupito laiti lea o le aiga, na avea foi ma paeonia i Montana i tausaga amata mai le 1940. Sa tumau ona avea Joel ma Molimau faamaoni ma ua galue nei o se auauna o le faiva. Sa aufaatasi mai Elwood ia te au i le auaunaga i Peteli i le 1944, ua matuā olioli tele ai loʻu loto. Na ou tuua le aiga ae lei atoa se lima tausaga lona matua. E pei ona taʻua muamua, sa ma galulue faatasi i le valiina o lena faailoilo i luma o le falegaosimea e faapea, “Faitau le Afioga a le Atua le Tusi Paia i Aso Uma.” E masani ona ou tau mānatu pe toafia ni tagata na vāai i lena faailoilo mo le tele o tausaga ua faalaeiauina e faitau le Tusi Paia.

 Na auauna Elwood i Peteli seia oo i le 1956 ina ua ia faaipoipo ia Emma Flyte. Mo le tele o tausaga na galulue faatasi ai Elwood ma Emma i le faiva faataimi atoa, na auauna mo sina taimi i Kenya, i Aferika, faapea ma Sepania. Na maua Elwood i le kanesa ma maliu ai i Sepania i le 1978. O loo iai pea Emma i le galuega paeonia i Sepania e oo mai i le asō.

Faaipoipo ma Fai se Aiga

Ia Setema 1953, na ou tuua ai le auaunaga i Peteli ina ua ou faaipoipo atu ia Alice Rivera, o se paeonia i le faapotopotoga o Brooklyn Center lea sa ou auai atu i ai. Na ou faailoa atu ia Alice e faapea o loo ia te au le faamoemoe faalelagi, ae sa manao pea o ia e faaipoipo ia te au.—Filipi 3:14.

Ina ua mavae le 23 tausaga o le olaga i Peteli, sa o se matuā suiga tele le faia o se galuega totogi i le avea o se vali fale ina ia tausia ai i maʻua ma Alice i le galuega paeonia. E lagolagosua pea Alice, na oo lava ina taofia lana auaunaga peonia ona o ni mafuaaga tau i le soifua maloloina. I le 1954, na ma faatalitalia ai la ma tamaitiiti muamua. E ui lava sa lei lelei lona fanauga, ae o loo manuia la ma tama tama o John. Na tele le palapala o Alice na alu ina ua faia se taotoga i le taimi o le fanauga, ma sa manatu fomaʻi ailoga a ola. I se tasi taimi, sa lē mafai ona latou maua se uaua ola. Ae peitai, na ia aulia atu le ao ma ina ua mavae sina taimi, na toe malosi atoatoa ai.

I ni nai tausaga mulimuli ane, ina ua maliu le tamā o Alice, na matou siitia atu ai i Long Island ina ia nonofo faatasi ma lona tinā. Ona sa leai sa matou taavale, o lea sa ou savali ai pe alu foi i le pasi pe faaaogā foi nofoaafi e faimalaga i lalo o le eleele. O le mea lena na mafai ai ona ou faaauau i le galuega paeonia ma tausia loʻu aiga. Ua matuā sili atu ona tele le olioli na maua i le auaunaga faataimi atoa nai lo o nisi lava faataulagaina na faia. O le fesoasoani atu i tagata, e pei o Joe Natale, o lē na lafoaia lana galuega o se tagata taalo i le pesipolo (baseball) ina ia avea ma Molimau, ua avea o se tasi o le tele o oʻu faamanuiaga.

I le 1967, a o faateleina le leaga o le tulaga o mea i le aai o Niu Ioka, na ou filifili ai e toe ave Alice ma John i loʻu nuu moni o Ellensburg matou te nonofo ai. O lea ua ou iloa nei e maeu se taui i le vaai atu i le matuā toatele o fanau, ma fanau a fanau a loʻu tinā o faia ni sao i le faiva faataimi atoa. O nisi ua oo ina auauna i Peteli. O John faatasi ma lana avā ma le fanau o loo auauna faamaoni foi ia Ieova.

E faanoanoa lava, ona na toesea si aʻu avā pele o Alice, ina ua maliu i le 1989. O le tumau pea ona tele mea e fai i le faiva faataimi atoa ua fesoasoani ia te au e onosaia ai le maliu o laʻu avā. O loo olioli nei i maʻua ma loʻu tuafafine o Alice ona o loo ma paeonia faatasi. Maeu le lelei o le toe ola faatasi i totonu o le fale e tasi ma tele ai mea e fai i o ma olaga i lenei galuega e sili ona tāua!

I le tau e totogo ai mea o le 1994, na ou toe asiasi atu ai i Peteli mo le uluai taimi talu mai le 25 tausaga. Maeu se olioli na iai i le toe vaai atu i le toatele o i latou na matou galulue faatasi e sili atu i le 40 tausaga ua mavae! I le taimi na ou alu ai i Peteli i le 1930, sa na o le 250 na iai i le aiga, ae i aso nei, ua sili atu i le 3,500 le aofai o le aiga Peteli i Brooklyn!

Fafagaina i Meaʻai Faaleagaga

I le tele lava o taeao, ou te alapo ai ou te savali agaʻi i le isi itu o le Yakima River e latalata i lo matou aiga. Sa mafai ona ou vaaia mai ai iina le malualii o le mauga o le Mount Rainier lea o loo faamalumalu mai i le maualuga e tusa ma le 14,000 futu (4,300 mita) ua ufitia i le kiona. E matuā tele lava manu o le vao e tataa ai. O nisi taimi ou te vaaia ai se ʻaila, ma e faatasi ona ou vaai i se ʻaila e sili ona lapoa.

O nei taimi toafilemu ou te savalivali ai na o aʻu, ua mafai ai ona ou manatunatu loloto i sauniuniga ofoofogia a Ieova. Ou te tatalo mo le malosi e faaauau ai ona auauna ma le faamaoni i lo tatou Atua o Ieova. Ou te fiafia foi ou te pesepese a o oʻu savalivali, ae maise lava le pese “Faamalieina le Finagalo o Ieova,” ua faapea mai ona upu: “Ieova e, le Atua Sili, ua matou tauto atu nei, e faia lau galuega. Ia fiafia lou finagalo.”

Ou te fiafia ona ua ou filifilia le faia o se galuega e faafiafia ai le finagalo o Ieova. Ou te tatalo ina ia mafai ona ou faaauau pea i le faia o lenei galuega seia ou maua le taui faalelagi lea na folafolaina mai. O loʻu manaoga, e tau ina ia avea lenei faamatalaga ma mea e uunaia ai foi isi e faaaogā o latou olaga e ‘galulue ai mo meaʻai e lē pala.’—Ioane 6:27.

[Ata i le itulau 23]

O Elwood o loo valiina le faailoilo “FAITAU LE AFIOGA A LE ATUA LE TUSI PAIA I ASO UMA”

[Ata i le itulau 24]

Faatasi ma Grant Suiter ma John Kurzen, i le faataʻitaʻia o le laau tautala fou i le tauaofiaga i le 1940

[Ata i le itulau 25]

I le 1944, o i matou na o ē na iai i le upu moni, sa auai i le faiva faataimi atoa: David, Alice, Joel, Eva, Elwood, ma Frances

[Ata i le itulau 25]

O fanau o loo ola mai pea: Alice, Eva, Joel, David, ma Frances