Lipoti a Ē Faalauiloa le Malo

Galuega Lelei e Viia ai Ieova

I LANA Lauga i Luga o le Mauga, na fetalai ai Iesu i ona soo e faapea: “Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tamā o i le lagi.” (Mataio 5:16) Ua faapena ona auai Kerisiano moni i aso nei i le faia o ‘galuega lelei’ e viia ai Ieova.

O ā nei galuega lelei? Ua aofia ai le talaʻia o le tala lelei, ae o la tatou amio lelei e faaalia o se isi lena vaega tāua. E masani lava, o la tatou amio lelei e muai tosina mai ai tagata i le faapotopotoga Kerisiano. O tala i mea na tutupu o loo mulimuli mai ua faataʻitaʻia mai ai pe ua faapefea i Molimau a Ieova i Martinique ona ‘faasusulu atu lo latou malamalama i tagata.’

□ A o auai atu se tasi Molimau a Ieova i le galuega mai lea fale i lea fale, na ia asiasi atu ai i se fafine Katoliko. Na nonofo faapouliuli lenei fafine ma se tamaloa mo le 25 tausaga. Na masani o ia ma aʻoaʻoga a Molimau a Ieova, talu mai le fitu tausaga lea na ia mauaina ai le tusi E Mafai ona E Ola e Faavavau i Parataiso i Le Lalolagi. * Na faapea atu le fafine i le Molimau: “Ua tele naʻuā lotu. Ua ou lē iloa po o ai a ou talitonu i ai e tusa ai ma nei fenuminumiaiga.” Na faamatalaina e le Molimau ua na o le Tusi Paia e maua ai le upu moni, ae ina ia mauaina e tatau ona tinou i le suesueina o le Tusi Paia ma tatalo atu i le Atua mo lona agaga ma lana taʻitaʻiga.

E ui ina sa naunau mo le suesueina o le Tusi Paia, ae mo sina taimi, na teena ai e le fafine le valaauliaina o ia e auai i sauniga faa-Kerisiano i le Maota o le Malo o Molimau a Ieova. Aisea? Ona sa matamuli tele o ia. Ae peitai, ina ua ia taliaina le valaaulia ina ia faatasi atu i le Faamanatuga o le maliu o Keriso, na lei toe matamuli ae auai atu loa.

O le mea na ofo tele ai o ia i nei sauniga, o le siomaga mafana lea i le Maota o le Malo. Na te lei vaaia muamua lava sea ituaiga o faiā mafana i lana lotu! Ina ua maeʻa lea sauniga, na amata loa ona ia auai i sauniga uma na faia e Molimau i lena vaipanoa, ma sa lei umi ae faaipoipo atu loa i le tamaloa lea na la nonofo faapouliuli. Ua avea nei o ia ma se tagata papatiso o le faapotopotoga.

□ O galuega lelei a se isi foi tuafafine Molimau na fua mai ai ni iuga lelei. Sa maualuga sona tulaga i se ofisa. Ina ua faafaigaluegaina se tamaloa mai le motu o Réunion, na amata ona fai o ia ma ulaga a isi tagata faigaluega ona o lona puupuu. Na fai o ia ma mea ula. Ae i le eseesega, sa agalelei ma faaaloalo pea le Molimau i lenei tamaloa. E lei umi ae fesili loa i ai le tamaloa pe aisea ua ese mai ai o ia.

Na faamatala i ai e le Molimau o lana amio faaaloalo o iuga mai mataupu silisili o le Tusi Paia na ia aʻoaʻoina mai i Molimau a Ieova. Na ia faaali atu foi ia te ia manatu ua taʻu mai e le Tusi Paia e uiga i fuafuaga a le Atua ma le faamoemoe i le lalolagi fou. Na faia se suesuega faale-Tusi Paia a le tamaloa, ma amata ona auai i sauniga faa-Kerisiano, ma faaipoipo atu loa i le fafine lea na la nonofo faapouliuli.

Mulimuli ane, na toe foi atu o ia i Réunion. Sa iai ni tulaga faigata na oo ia te ia ma ona tauaiga i taimi ua tuanai, ae maise lava tauaiga o lona toalua. Ae o lea ua latou matuā ofo lava ona o lana amio lelei faa-Kerisiano. Na papatisoina le tamaloa ma ua avea nei o ia ma auauna o le faiva. O nisi o lona aiga, e aofia ai lana avā o ona afafine e toalua, ua avea nei ma tagata talaʻi o le tala lelei o le Malo o le Atua i le faapotopotoga Kerisiano.

[Faaopoopoga i lalo]