Ia Faamanatu ma le Tatau le Faamanatuga

O LE po o Nisani 14, 33 T.A., na faavaeina ai e Iesu le Faamanatuga. * Na seʻi faatoʻā uma lava ona ia faia le faamanatuga o le Paseka ma ona aposetolo e toʻa 12, o lea, ua mafai ai ona tatou mautinoa le aso. Ina ua uma ona faateʻaeseina le faalata, o Iuta, o Iesu lava na “tago . . . i le areto, ua faafetai, ona tofitofi lea, ma avatu ai ia te i latou, ua faapea atu, Ina tago ia, o loʻu tino lenei. Ua tago foi o ia i le ipu, ua faafetai, ma avatu ai ia te i latou, ua latou inu uma i ai. Na fetalai atu foi o ia ia te i latou, O loʻu toto lenei, o le toto o le feagaiga, ua faamaligiina mo tagata e toatele.”—Mareko 14:22-24, LF.

Na poloaiina e Iesu ona soo ina ia faamanatuina lona maliu, ona e tāua. (Luka 22:19; 1 Korinito 11:23-26) O lona maliu, sa na o lea le taulaga na mafai ona togiolaina ai tagata mai le faasalaga o le agasala ma le oti tuufaasolo. (Roma 5:12; 6:23) O le areto ma le uaina na ia faaaogaina, sa avea ma faatusa o lona tino ma lona toto lelei atoatoa. O le iloaina o le aso tonu na amata ai, ua mafai ai foi la ona tatou faamanatuina le sauniga i le aso e talafeagai ma lena aso i tausaga taitasi, e pei lava ona faia ai le Paseka faa-Iutaia. Ae e tatau ona tatou faia ma le tatau. Aisea?

Na faapea mai le aposetolo o Paulo, o i latou e taumafaina le areto ma le uaina o le a latou “faailoa atu ai le maliu o le Alii seia afio mai o ia.” (1 Korinito 11:26) O le autū o le faamanatuga e taulai atu lea i le maliu o Iesu ma lona uiga mo tagata. O le a tāua tele lea taimi, o se taimi e manatunatu ai i le lelei o le Atua, ma le talisapaia e ao ona tatou faaalia mo Ieova ma lona Alo. (Roma 5:8; Tito 2:14; 1 Ioane 4:9, 10) O le mea lea, na lapatai mai ai Paulo: “O lenei, ai sē ʻai i lenei areto, pe inu i le ipu a le Alii ma le faaletatau, e nofo sala o ia i le tino ma le toto o le Alii.”—1 Korinito 11:27, LT.

Tatau—Faapefea?

E manino lava, o le a lē fiafia le Atua pe afai tatou te manatu māmā i le paia o le sauniga i lo tatou auai i faiga e lē talafeagai po o le faia o tu faapaupau. (Iakopo 1:27; 4:3, 4) O le a taofia ai i lenei mea faiga masani i le taimi o le Eseta. I le mulimuli atu i le faatonuga a Iesu ina ia “faia le mea nei e fai ma faamanatuga ia te [ia],” tatou te mananao ai e faamanatuina le Faamanatuga i le auala tonu lava lea na ia faavaeina ai. (Luka 22:19; 1 Korinito 11:24, 25) O le a taofia ai i lenei mea faiga faalialia na faaopoopoina atu i le faamanatuga e lotu a Kerisinetoma. Ua ioeina e le New Catholic Encyclopedia e faapea, “o le Misasā i aso nei, e matuā eseese mamao lava mai le faamanatuga faigofie na mulimuli ai Keriso ma Ona Aposetolo.” Ma e ala i le faamanatuina pea o le Misasā, e oo lava i aso fai soo, ua sese ese ai Kerisinetoma mai le mea na fuafuaina e Iesu ma faia ina ia avea o se mea taatele.

Na tusi atu Paulo i Kerisiano i Korinito e uiga i le ʻai ma le faaletatau ona o se faafitauli na mapuna aʻe i le faapotopotoga e faatatau i le Talisuaga Afiafi a le Alii. Sa lei faaaloalogia e nisi le paia o lea talisuaga. Na latou ō mai ma aumai a latou meaʻai ma aai ai a o lei faia po o i le taimi foi a o faia le sauniga. Sa masani ona latou soona aai ma inu tele. Na oo ai  ina latou tautulemomoe ma lē mataala. Ona o le lē mataala faaletino ma le faaleagaga, ua lē mafai ai ona latou “faautauta . . . i le tino” ma oo ai ina “nofo sala i le tino ma le toto o le Alii.” I lea taimi, o i latou e lei aai, sa fia aai ma oo ai ina lē faalogologo lelei. I lea, na leai ai se tasi o i latou na iai i se tulaga na mafai ai ona taumafaina ma le talisapaia le areto ma le uaina ma iloa lelei ai e uiga i le tāua o le sauniga—e faapea o le faamanatuga, na faia ina ia faamanatuina ai le maliu o le Alii. Na iu lenei mea i le faasalaina ai o i latou, ona o lo latou lē faaaloalo, ma oo ina ʻinoʻino i ai.—1 Korinito 11:27-34.

E Manaomia le Faautauta

Ua taumafaina e nisi le areto ma le uaina o le Faamanatuga, e ui ina faatoʻā latou iloa mulimuli ane, sa lē tatau ona latou faia faapea. O i latou e tatau ona taumafaina ma le tonu le areto ma le uaina, ua uma ona filifilia e le Atua ma ua faamaonia e le agaga o le Atua e tusa ai ma lena tulaga. (Roma 8:15-17; 2 Korinito 1:21, 22) E lē o sa latou lava filifiliga totino po o se faaiuga maumauai ua taʻuaogaina ai i latou. Ua faatapulaaina e le Atua le fuainumera o i latou o ē o le a pule faatasi ma Keriso i le lagi, i le 144,000, o se fuainumera e matuā laitiiti lava pe a faatusatusa atu ia i latou uma o loo maua aogā mai le togiola a Keriso. (Faaaliga 14:1, 3) Na amata le filifiliga i aso o Iesu, o lea seia oo mai i aso nei, e toaitiiti lava o loo taumafaina le areto ma le uaina o le Faamanatuga. Ma pe a oo le oti i nisi o i latou, e ao ona faaitiitia lena fuainumera.

Aisea e ono taumafaina ai ma le faaletatau e se tasi le areto ma le uaina? E mafai ona o ni manatu faalotu sa iai muamua—e faapea, e ō tagata faamaoni uma i le lagi. Pe atonu ona o le fiasili po o le manatu faapito—i le iai o le lagona e faapea e sili atu ona tatau mo ia nai lo o isi—atoa ma le iai o se faanaunauga o le fia lauiloa. Atonu ona o le mapuna aʻe o  faalogona malolosi mai faafitauli matuia po o se mala ua lē fiafia ai se tasi i le olaga i le lalolagi. E mafai foi ona iai lea lagona ona atonu o se faauooga vavalalata ma se tasi ua maua le valaau faalelagi. E manaomia ona manatua e i tatou uma lava, o le filifiliga e fitoi tonu lava i le Atua, ae lē o i tatou. (Roma 9:16) O lea, pe a uma ona “suesue ifo” se tagata ia te ia lava ma iloa ai e lē tatau moni ona ia taumafaina le areto ma le uaina, e tatau nei loa ona ia taofia.—1 Korinito 11:28.

O le faamoemoe ua ofoina atu e le Atua mo le toatele o tagata, o le ola lea e faavavau i se lalolagi parataiso. O se faamanuiaga sili lena e vaavaai atu i ai i le lumanai, ma o se faamoemoe lea e mafai ona tatou fiafia ai. (Kenese 1:28; Salamo 37:9, 11) O iinei lava i le lalolagi o le a toe aufaatasi ai ē faamaoni ma ē pele ia i latou o le a toe faatutūina mai, ma o le a feiloai ai ma ē amiotonu o aso anamua, e pei o Aperaamo, Sara, Mose, Raava, Tavita, ma Ioane le Papatiso—o i latou uma lava na maliliu a o lei tatalaina e Iesu le auala i le ola faalelagi.—Mataio 11:11; faatusatusa i le 1 Korinito 15:20-23.

O i latou e iai le faamoemoe faalelalolagi, latou te faamanatuina le Talisuaga Afiafi a le Alii ma le tatau, e ala i lo latou auai ma uaʻi atu ma le faaaloalo, e tusa lava pe latou te lē taumafaina le areto ma le uaina. Latou te maua foi aogā e ala i le taulaga a Keriso, lea ua mafai ai ona latou maua se tulaga taʻuleleia i luma o le Atua. (Faaaliga 7:14, 15) A o latou faalogologo i le lauga o fofogaina mai, e faamalosia ai lo latou talisapaia mo mea paia, ma faatupuina ai lo latou naunau e tumau i le autasi ma tagata o le Atua i so o se mea.

I lenei tausaga, pe a mavae le goto o le la i le Aso Lua, Aperila 2, o le a faamanatuina ai le Faamanatuga i faapotopotoga uma lava e sili atu i le 78,000 o Molimau a Ieova i le lalolagi aoao. Po o le a e auai atu ea i ai?

[Faaopoopoga i lalo]

[Ata i le itulau 8]

E faatasi i le tausaga ona faamanatu e Molimau a Ieova le Faamanatuga