“Ia Outou Vivii Atu ia Ioa”
“Ia Outou Vivii Atu ia Ioa”
“Ia vivii atu ia Ioa o mea uma lava e mānava.”—SALAMO 150:6.
1, 2. (a) O le ā le tele na olaola aʻe ai le Faa-Kerisiano moni i le uluai senituri? (e) O le ā le lapataiga na uluai avatua e le au aposetolo? (i) Na faapefea ona tupu aʻe le faaaposetasi?
NA FAAMAOPOOPOINA e Iesu ona soo i le faapotopotoga Kerisiano, lea na olaola i le uluai senituri. E ui i teteega matuitui faalelotu, ae ‘sa talaʻiina atu pea le tala lelei i tagata uma lava i le lalolagi.’ (Kolose 1:23) Ae ina ua maliliu aposetolo o Iesu Keriso, ona faatupuina faatogafiti loa lea e Satani le faaaposetasi.
2 Na muai lapataia e le au aposetolo le oo mai o lenei mea. O se faaaoaoga, na fai atu Paulo i toeaina mai Efeso e faapea: “Ina tausi ia outou ia te outou, atoa ma le lafu mamoe uma lava ua tofia ai outou e le Agaga Paia e fai ma leoleo, ia leoleo atu i le ekalesia a le Atua, ua faatauina e ia mona i lona lava toto. Auā o aʻu nei, ua ou iloa lenei mea, pe a mavae ona ou alu, e oo mai ia te outou luko saua o e le faasaoina le lafu mamoe. E tupu mai foi ia te outou lava tagata e tautala mai i mea faapiopio, e fetoso ese ai le au soo ia mulimuli ia i latou.” (Galuega 20:28-30; tagai foi i le 2 Peteru 2:1-3; 1 Ioane 2:18, 19.) O lea, i le senituri lona fa, na amata ai e le Faa-Kerisiano faaaposetate ona auaufaatasi ma le Emepaea o Roma. I ni nai senituri mulimuli ane, na pulea ai loa e le Emepaea o Roma Paia, faatasi ai ma le lagolagosua a le pope o Roma, se vaega tele o tagata. I se tasi taimi, na fouvale atu ai le Lotu Porotesano Toefuataʻiina ona o le matapeapea amioleaga o le Lotu Katoliko, ae sa lē mafaia ona ia toe faafoisia mai le Faa-Kerisiano moni.
3. (a) O anafea ma na faapefea ona talaʻia le tala lelei i foafoaga uma? (e) O ā mea na faatalitalia e faavae i le Tusi Paia na faataunuuina i le 1914?
3 E ui i lea, a o latalata i le iuga o le 19 senituri, sa toe maelega ai se vaega faamaoni o tagata aʻoga o le Tusi Paia i le talaʻiina ma le faalauiloaina atu i ‘foafoaga uma o loo i le lalolagi le faamoemoe o le tala lelei.’ E faavae aʻe i la latou suesuega o valoaga o le Tusi Paia, na faasino atu ai lenei vaega i se taimi e silia i le 30 tausaga i le lumanai, i le tausaga e 1914, e fai ma faailoga o le iuga o “tausaga o nuu ese,” o se vaitaimi o ‘taimi e fitu,’ po o le 2,520 tausaga, lea na amata i le faaumatiaga o Ierusalema i le 607 T.L.M. (Luka 21:24; Tanielu 4:16) I le faataunuuga o mea na faatalitalia, na faamaonia ai le avea o le 1914 ma taililiu i mataupufai a tagata i le lalolagi. Na iai foi mea mataina na tutupu i le lagi. O le taimi lena na faanofoina ai e le Tupu o le vavau lana Tupu lagolago o Iesu Keriso i le nofoalii faalelagi, e sauniuni ai e tafiesea mea leaga uma mai lenei lalolagi, ma toe faavaeina le Parataiso.—Salamo 2:6, 8, 9; 110:1, 2, 5.
Ia Viia le Tupu Faa-Mesia!
4. Na faapefea ona ola Iesu e tusa ai i le uiga o lona igoa o Mekaeli?
4 I le 1914, na faatinoina ai loa gaoioiga a lenei Tupu Faa-Mesia, o Iesu. I le Tusi Paia o loo faaigoa ai foi o Mekaeli, o lona uiga “O ai Sē Pei o le Atua?,” auā ua faanaunau atu o ia i le faamaoniaina o le tonu o le pule silisili ese a Ieova. E pei ona faamauina i le Faaaliga 12:7-12, na faamatalaina ai e le aposetolo o Ioane se faaaliga o le mea e tupu: “Ua tau foi le taua i le lagi; o Mekaeli ma ana agelu ua latou tau ma le tarako, ua ʻau foi le tarako ma ana agelu e tau ai le taua, a ua latou le manumalo, e le toe maua foi i le lagi se mea latou te nonofo ai. Ua lafo foi le tarako tele, o le gata tuai lea, ua igoa i le tiapolo, i le ma Satani, o lē faasese i le lalolagi uma; ua lafo ifo i le lalolagi, ua lafo foi ana agelu faatasi ma ia.” O se matuā toilalo lava!
5, 6. (a) Mulimuli mai ai i le 1914, o ā faalauiloaga fiafia na faia ai mai le lagi? (e) Ua faapefea ona fesootai le Mataio 24:3-13 ma lenei mea?
5 Ona folafola mai lea e se leotele mai le lagi e faapea: “O ona po nei ua oo mai ai le faaolataga, ma le mana, ma le malo o lo tatou Atua, ma le pule a lona Keriso; auā ua lafo i lalo le na molia o tatou uso, o le na molia i latou i luma o lo tatou Atua i le ao ma le po. A ua latou [Kerisiano faamaoni] manumalo ia te ia ona o le toto o le Tamai Mamoe [Iesu Keriso], ma le upu a la latou mau, ua latou le faapelepeleina foi lo latou ola ua oo i le oti.” O le uiga o lenei mea o le faaolaina lea mo ē tausia le faamaoni, o ē na faaalia le faatuatua i le taulaga togiola tāua a Iesu.—Faataoto 10:2; 2 Peteru 2:9.
6 Na faaauau pea ona faalauiloa e le leotele mai le lagi e faapea: “O le mea lea ia outou olioli ai, le lagi e atoa ma e ua nonofo ai! Oi talofa ia te oulua le fanua ma le sami, auā ua alu ifo ia te oulua le tiapolo ua lotoa tele, auā ua na iloa ua saasaa ona po.” O le “oi talofa” na valoia mai mo lenei lalolagi ua faamaonia mai lea i taua a le lalolagi, o oge, o faamaʻi, o mafuie, ma soligatulafono ua malaia ai le lalolagi i lenei senituri. E pei ona toe taʻua e le Mataio 24:3-13, na valoia e Iesu e faapea o nei mea o le a avea ma vaega o ‘le faailoga o le taufaaiuiuga o le faiga o mea.’ E moni lava e tusa ai i le valoaga, talu mai le 1914 ua oo ai i tagata le mafatia i le lalolagi, e matuā lē tutusa lava ma le tulaga sa iai muamua le talafaasolopito o le tagata.
7. Aisea ua talaʻi ai ma le faanatinati ia Molimau a Ieova?
7 I lenei vaitaimi o le oi i faiga faasatani, pe mafai ea e tagata ona maua le faamoemoe mo le lumanai? O le mea moni lava e mafai auā ua faapea mai le Mataio 12:21 e uiga ia Iesu: “O lona igoa foi e faamoemoe i ai nuu ese”! O tulaga matautia ua iai i nuu ua faailogaina ai e lē gata o ‘le faailoga o le taufaaiuiuga o le faiga o mea’ ae o ‘le faailoga o le faatasi mai o Iesu’ i le avea ma Tupu faalelagi o le Malo Faa-Mesia. E tusa ai o lena Malo, ua fetalai atili mai Iesu e faapea: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:14) O ai tagata i aso nei ua na o i latou o loo latou talaʻiina le faamoemoe sili o le pulega o le Malo o le Atua? O Molimau a Ieova! Ua latou folafola atu ma le faanatinati i le lautele ma mai lea fale i lea fale e faapea, ua toeitiiti ona pule loa lea o le Malo o le amiotonu ma le filemu o le Atua, i mataupufai a le lalolagi. Po o faia ai ea sou sao i lenei faiva? E leai se isi faaeaga e sili atu nai lo lenei!—2 Timoteo 4:2, 5.
E Faapefea Ona Oo Mai “le Iuga”?
8, 9. (a) Na faapefea ona amata le faamasinoga “i le aiga o le Atua”? (e) Ua faapefea ona solia e Kerisinetoma le Afioga a le Atua?
8 Ua ulu atu tagata i se vaitaimi o le faamasinoga. Ua taʻu mai ia i tatou i le 1 Peteru 4:17 e faapea, o le faamasinoga na amata mai i “le aiga o le Atua”—o le faamasinoga o faalapotopotoga o i latou ua faapea mai o Kerisiano, ia na aliali mai talu mai “aso e gata ai” ia na amata lava i fasiotigā tagata o le Taua Muamua a le Lalolagi i le faagasologa o le 1914-1918. O le ā le tulaga ua iai Kerisinetoma i lenei faamasinoga? Ia, seʻi manatu i le tulaga o lotu i le lagolagoina o taua talu mai le 1914. Pe ua lē o pisia ea le aufailotu i “le toto o le ola o e matitiva e le sala” na latou auina atu i nofoaga o taua?—Ieremia 2:34.
9 E tusa ai i le Mataio 26:52, na fetalai ai Iesu: “O i latou uma o e tago i le pelu, e oti i latou i le pelu.” Maeu le faamaonia o lenei mea i taua o lenei senituri! Ua faaaogā e le aufailotu le Tusi Paia e faamalosia ai tane talavou ina ia auai atu i taua, ma ua fasiotia ai e nei talavou isi tane talavou o le latou lotu lava e tasi—o loo fefasiotiai ai Katoliko ma fefasiotiai ai Porotesano. Ua sili atu ona latou faatāuaina le lotonuu nai lo le Atua ma Keriso. Talu ai nei lava i nisi atunuu o Aferika, ua faamuamua ai sootaga vavalalata o ituaiga o tagata, nai lo mataupu silisili o le Tusi Paia. I Rwanda, i nofoaga o loo toatele tagata Katoliko o loo nonofo ai, e lē itiiti ifo ma le ʻafa miliona le aofaiga o tagata na fasiotia i faiga sauā i va o ituaiga. Na taʻutino mai e le pope i le nusipepa a le Vatikana o le L’Osservatore Romano e faapea: “O se matuā faatamaʻiaga aʻiaʻi lenei i le va o ituaiga o tagata, lea e faanoanoa ona o loo faia ai foi se vaega a tagata Katoliko.”—Faatusatusa i le Isaia 59:2, 3; Mika 4:3, 5.
10. O le ā le faamasinoga o le a faia e Ieova i lotu sese?
10 O le ā le silafaga a le Tupu o le vavau e uiga i lotu o loo latou uunaia tane ina ia fefasiotiai pe na ona tutū foi a o fefasiotiai sui o a latou lafu? E faatatau atu ia Papelonia le Aai Tele, le faiga aoao o mea a lotu sese, ua taʻu mai e le Faaaliga 18:21, 24 ia i tatou e faapea: “Ua siitia foi e le tasi agelu malosi o le maa e pei o se maaolo tele, ma lafo i le sami, ua faapea atu, ‘E faapea ona lafotuina o Papelonia le aai tele, e le toe iloa lava. Ua iloa foi ia te oe le toto o perofeta ma le au paia, ma i latou uma ua fasiotia i le lalolagi.’”
11. O ā mea matautia ua tutupu i Kerisinetoma?
11 I le faataunuuga o valoaga o le Tusi Paia, e matautia mea ua tutupu i Kerisinetoma. (Faatusatusa i le Ieremia 5:30, 31; 23:14.) Ae maise lava talu ai faiga faatuufau a le aufailotu, ua matuā taatele ai amioga lē mamā i a latou lafu. I le Iunaite Setete, le malo o loo faapea mai e Kerisiano, e tusa ma le ʻafa o faaipoipoga uma lava ua iu i talagā faaipoipoga. Ua lē taofiofia le faatuputeleina o maʻitō i talavou ma faiga faasotoma a tagata o lotu. Ua faaleagaina i faiga faaleituaiga e faifeau ia tamaiti ma teineiti—ma ua tupu i le tele o taimi. O iuga faafaamasinoga i moliaga i nei faiga ua fuafuaina e iu i le totogia ai e le Lotu Katoliko i le Iunaite Setete o le piliona tālā i totonu o le sefulu tausaga. Ua lē amanaiaina e Kerisinetoma le lapataiga a le aposetolo o Paulo o loo i le 1 Korinito 6:9, 10 e faapea: “Tou te le iloa ea, o e amio leaga e le fai mo latou tofi le malo o le Atua? Aua neʻi faaseseina outou; o e faitaaga, ma e ifo i tupua, ma e mulilulua, ma e tauātane, ma e faasotoma, ma e gaoi, ma e matapeapea, ma e onā, ma e agatele, ma e fao mea, e le fai mo latou tofi le malo o le Atua.”
12. (a) O le a faapefea ona gaoioi le Tupu o le vavau faasaga ia Papelonia le Aai Tele? (e) I le eseesega ma Kerisinetoma, mo ā mafuaaga o le a usuina ai e tagata o le Atua pesega o le “Aleluia”?
12 Ua lē o toe mamao, ona gaoioi loa lea o le Tupu o le vavau o Ieova e ala i lana Taʻitaʻiʻau Sili o ʻau a le lagi o Keriso Iesu, e faaoo mai le puapuaga tele. O le a muamua ona puapuagatia Kerisinetoma ma isi vaega uma a Papelonia le Aai Tele i le faasalaga faafaamasinoga a Ieova. (Faaaliga 17:16, 17) Ua latou faaalia mai i latou lava ua lē agavaa mo le faaolataga lea ua saunia e Ieova e ala mai i le taulaga togiola a Iesu. Ua latou faalumaina le suafa paia o le Atua. (Faatusatusa i le Esekielu 39:7.) Pagā se faaulaula o lo latou pepese mai i pesega o le “Aleluia” i totonu o o latou falesa tetele! Ua latou aveeseina le suafa tāua o Ieova mai a latou faaliliuga o le Tusi Paia, ae foliga mai ua latou lē amanaia le mea moni e faapea, o le “Aleluia” o lona uiga “Ia Vivii atu ia Ioa”—o “Ioa” o le faapuupuu lea o le suafa o “Ieova.” Ua talafeagai lelei lava la ona faamauina e le Faaaliga 19:1-6 ia pesega o “Aleluia” e lē o toe mamao ae peseina, e faamanatu ai le faaooina atu e le Atua o lana faasalaga faafaamasinoga i luga o Papelonia le Aai Tele.
13, 14. (a) O ā mea mataina e tutupu e sosoo mai ai? (e) O le ā le iuga fiafia mo tagata e matataʻu i le Atua?
13 E sosoo atu ai i lea faasologa, le ‘sau’ o Iesu e tauaaoina ma faaooina le faamasinoga i luga o nuu ma tagata. Na valoia mai e ia lava e faapea: “Pe a sau le Atalii o le tagata [Keriso Iesu] i lona mamalu, ma le au agelu paia uma faatasi ma ia, ona tietie ai lea o ia i lona nofoālii [o le faamasinoga] mamalu; e faapotopotoina foi i ona luma o nuu uma lava [i luga o le lalolagi]; ona tuueseeseina lea o i latou e ia, e pei o le leoleo mamoe ona tuueseeseina o mamoe ma ʻoti; ona tuu ai lea e ia o mamoe i lona itu taumatau, a o ʻoti i lona itu tauagavale. Ona fai atu ai lea o le Tupu i e o i lona itu taumatau, O mai ia, o outou ua faamanuiaina e loʻu Tamā, ia fai mo outou tofi le malo ua saunia mo outou talu ona faavaeina le lalolagi.” (Mataio 25:31-34) Ua faaauau ona faamatala mai e le fuaiupu e 46 e faapea o ʻoti o le a “o atu . . . i le sala [e] faavavau; a o e amiotonu e o atu i le ola [e] faavavau.”
14 Ua faamatala mai e le tusi o le Tusi Paia o le Faaaliga le auala o le a tietie atu ai “le Tupu o tupu, ma le Alii o alii,” lo tatou Alii faalelagi o Iesu Keriso, i lena taimi i le taua ia Amaketo, e faaumatiaina faiga uma faapolotiki ma faiga faapisinisi o le faiga o mea a Satani. Ona sasaa mai ai lea e Keriso “le toasa mamafa o le Atua e ona le malosi uma lava” i le pulega aoao faalelalolagi a Satani. A o ‘mavae atu mea muamua’ ia, ae ulufale atu loa tagata e matataʻu i le Atua i le lalolagi fou matagofie lea ‘o le a sōloiesea ai loimata uma mai o latou mata’ e le Atua.—Faaaliga 19:11-16; 21:3-5.
O le Taimi e Viia ai Ioa
15, 16. (a) Aisea e tāua ai lo tatou utagiaina o afioga faavaloaga a Ieova? (e) O le ā ua faailoa mai e perofeta ma aposetolo e tatau ona tatou faia ina ia maua le faaolataga, ma o le ā e mafai ona uiga i ai lenei mea mo le toatele i aso nei?
15 Ua lata mai lava lena aso o le faasalaga faafaamasinoga! O le mea lea, e lelei ai pe a tatou utagia upu faavaloaga a le Tupu o le vavau. Ia i latou o ē o loo saisaitia pea i aʻoaʻoga ma tu masani a lotu sese, ua faalauiloa mai se leo faalelagi e faapea: “Loʻu nuu e, ia outou o ese ia te ia, ina neʻi faatasia outou i ana agasala, ina neʻi tofusia foi outou i ona mala.” Ae o fea la e tatau ona ō atu i ai i latou ua sosola ese mai? E na o le tasi lava le upu moni e tatau ona iai, e tatau foi la ona na o le tasi le lotu moni. (Faaaliga 18:4; Ioane 8:31, 32; 14:6; 17:3) O lo tatou ola e faavavau e faalagolago atu i le mauaina o lea lotu moni ma usiusitai atu i lona Atua. Ua faasino atu e le Tusi Paia i tatou ia te ia, i le Salamo 83:18, lea ua faitauina e faapea: “O oe, e ou le suafa o IEOVA, na o oe lava o le Silisili ese i le lalolagi uma.”
16 Ae peitai, e manaomia ona tatou faia nisi mea e sili atu nai lo le tau ina iloa le suafa o le Tupu o le vavau. E manaomia ona tatou suesueina le Tusi Paia ma aʻoaʻo e uiga i ona uiga silisili ma ana fuafuaga. Ona manaomia ai lea ona tatou faia lona finagalo i lenei lava taimi, e pei ona taʻua mai i le Roma 10:9-13. Na sii mai e le aposetolo o Paulo perofeta faagaeeina ma faaiu mai ai e faapea: “E faaolaina i latou uma o e valaau i le suafa o le Alii [Ieova].” (Ioelu 2:32; Sefanaia 3:9) Faaolaina? Ioe, mo le toatele o tagata i aso nei o loo faaalia le faatuatua i le sauniuniga a Ieova o le togiola e ala ia Keriso, o le a laveaiina mai le puapuaga tele o loo sau, pe a faaooina mai le faasalaga faafaamasinoga i le lalolagi iuvale a Satani.—Faaaliga 7:9, 10, 14.
17. O le ā le faamoemoe matagofie e tatau ona uunaia ai i tatou ina ia aufaatasi atu nei i le usuina o le pese a Mose ma le Tamai Mamoe?
17 O le ā le finagalo o le Atua mo i latou o loo faamoemoe e faasaoina? O lona finagalo ia tatou auai faatasi atu i le taimi nei lava i le usuina o le pese a Mose ma le Tamai Mamoe, e viiviia ai le Tupu o le vavau a o faatalitali atu mo lona manumalo. E tatou te faia lenei mea e ala i le taʻu atu i isi e uiga i ana fuafuaga mamalu. A o agaigai i luma lo tatou malamalama i le Tusi Paia, ona tuuina atu lea o o tatou ola i le Tupu o le vavau. O le a iu atu ai lena i lo tatou ola e faavavau i lalo o faatulagaga ua faamatala mai e lenei Tupu malosi, e pei ona taʻua i le Isaia 65:17, 18: “Auā faauta mai, ou te faia le lagi fou [le Malo Faa-Mesia o Iesu] ma le lalolagi fou [se sosaiete fou amiotonu o tagata]; e le toe manatua mea na muamua, e le alu ae foi i le loto. A e peitai ia outou olioli ma fiafia e faavavau i le mea ou te faia.”
18, 19. (a) O le ā e ao i upu a Tavita i le Salamo 145 ona uunaia ai i tatou e faia? (e) O le ā e mafai ona tatou faatalitalia ma le mautinoa i le aao o Ieova?
18 Ua faamatalaina e le faisalamo o Tavita le Tupu o le vavau i upu nei: “E silisili lava Ieova, e tusa ona matuā viia o ia; e le mafai ona suesueina lona silisili ese.” (Salamo 145:3) Ioe, e lē masuesueina lona silisili ese e pei ona lē gata mai le vateatea ma le faavavau! (Roma 11:33) A o tatou faaauau ona aʻoaʻoina le poto e uiga i Lē na Foafoaina i tatou ma lana sauniuniga o le togiola e ala mai i lona Alo o Keriso Iesu, o le a tatou mananao ai e vivii atili atu pea i lo tatou Tupu o le vavau. O le a tatou mananao e faia e pei ona otooto mai e le Salamo 145:11-13 e faapea: “E tautalatala atu i latou i le mamalu o lou malo, ma taʻutaʻu atu i lou mana; ina ia faailoa atu i le fanau a tagata ana mea mamana, ma le mamalu matagofie o lona malo. O lou malo o le malo lea e faavavau lava; ma lau pule e āu tupulaga lava lea.”
19 E mafai ona tatou faatalitalia ma le mautinoa, o le a faamaoni lo tatou Atua i le taʻutinoga e faapea: “O loo e faamafola lou aao, ma faamaoona le manao o mea ola uma lava.” O le a taʻitaʻiina atu ma le agalelei i tatou e le Tupu o le vavau e agaʻi atu lava i le iuga o nei aso e gata ai, auā ua faamautinoa mai i tatou e Tavita e faapea: “E tausi Ieova i e alolofa atu ia te ia uma lava; a e fano ia te ia o e amio leaga atoa uma.”—Salamo 145:16, 20.
20. E faapefea ona e tali atu i le valaaulia a le Tupu o le vavau o loo faaleoina mai i salamo mulimuli e lima?
20 O salamo faaiu uma lava e lima o loo i le Tusi Paia, e amata ma faaiu i le valaaulia “vivii atu ia Ioa.” O lea, ua valaaulia mai ai i tatou e le Salamo e 146 e faapea: “Ia outou vivii atu ia Ioa. Loʻu agaga e, ia e vivii atu ia Ieova. Ou te vivii atu ia Ieova a o ou ola; ou te fai pesega i loʻu Atua a o ou tumau i le ola nei.” Po o le a e tali atu ea i lena valaau? O le mea moni, e tatau ona e manao e vivii atu ia te ia! Tau ina ia e iai faatasi ma i latou o ē o loo faamatalaina i le Salamo 148:12, 13: “O taulelea atoa ma teine, o toeaina atoa ma tama; ia latou vivii atu i le suafa o Ieova; auā ua na o lona suafa e mamalu; o lona viiga ua sili lea i le lalolagi atoa ma le lagi.” Tau ina ia tatou tali atu ma le loto atoa i le valaaulia: “Ia outou vivii atu ia Ioa.” Seʻi o tatou vivii autasi atu loa i le Tupu o le vavau!
O le ā Lau Tali?
□ E faatatau i le ā na uluai lapatai atu ai aposetolo o Iesu?
□ O ā gaoioiga maumaututū ua faia na amata i le 1914?
□ O ā faamasinoga ua sauni Ieova e faaooina mai?
□ Aisea o le taimi sili ona tāua ai lenei e viviiina ai le Tupu o le vavau?
[Fesili mo le Suʻesuʻega]
[Pusa i le itulau 19]
LENEI VAITAIMI MALAIA O FEVESIAIGA
Ua ioeina e le toatele le mea moni e faapea o le vaitaimi lena o le tele o fevesiaiga lea na amataina mai i le amatamataga o le lona 20 senituri. Mo se faaaoaoga, i upu o loo tomua mai ai le tusi Pandaemonium, a le sui o le Senate o le Iunaite Setete o Daniel Patrick Moynihan, na lomia i le 1993, ua faitauina ai faapenei se faamatalaga e faatatau i “le mala matautia o le 1914”: “Na oo mai taua ma suia ai le lalolagi—i se tulaga atoatoa. I aso nei, ua na o le valu setete o i le lalolagi sa lē gata ina iai i le 1914, ae lē o suia foi a latou faiga malo ona o faiga sauā talu mai lena taimi. . . . Ae o isi uma setete e tusa ma le 170 e lei leva ona amataina, o nisi e matuā fou lava, latou te lei iloa le tele o fevesiaiga lata mai nei.” E moni lava, o le vaitaimi talu mai le 1914 ua molimauina ai le faalausosoo mai o mala!
Na lomia foi i le tausaga e 1993 le tusi Out of Control—Global Turmoil on the Eve of the Twenty-First Century. O le tusitala o lena tusi, o Zbigniew Brzezinski, o lē na avea muamua ma faauluuluga o le Matagaluega o le Puipuiga Saogalemu Faalemalo a le Iunaite Setete (U.S. National Security Council). Ua ia tusi mai: “O le amataga o le senituri lona luasefulu sa faamatilatila mai i le tele o faamatalaga e faapea o le amataga moni lea o le Vaitaimi Amata o le Iloiloina o le Lelei ma le Leaga (Age of Reason). . . . I le eseese ma mea na folafolaina, na oo ina avea le senituri lona luasefulu ma senituri e sili ona masaa ai le toto ma tele ai le feitagai, o se senituri o le mau faiga piopio faapolotiki ma fasiotiga matautia. Sa iai faiga sauā i se tulaga e sili ona leaga, le tele o fasiotiga tagata. O le eseesega i le va o fuafuaga faasaienitisi mo le lelei, ma faiga leaga faapolotiki lea na matuā faaalialia, ua matuā faateʻia ai. E lei faapea muamua lava i le talafaasolopito ona iai ni fasiotigā tagata i le lalolagi aoao, e lei faapea muamua lava le maimau ai o le tele naunau o ni ola, e lei faapea muamua foi ona avea faatamaʻiaga o tagata ma pogai e faaauau ai pea ona uaʻi atu i taumafaiga maumauai e faavae mai i ni sini faamaualuluga ma faauliulito.” Pagā le moni o lena mea!
[Ata i le itulau 17]
Na lafoina mai e Mekaeli ia Satani ma ana au i le lalolagi ina ua maeʻa ona faavaeina le Malo i le 1914