Ia Tuuina Atu Pea ia Ieova Ou Popolega

E TOATELE tagata i aso nei ua mafatia i popolega. O faafitauli tautupe, mafatia i faafitauli faaleaiga, faafitauli tau le soifua maloloina, o tiga ma mafatiaga ona o pulega lē tonu ma sauāga, ma le anoanoai o isi tiga faifai pea ua pei o amoga mamafa i o latou ua. E ese mai omiga mai fafo, e iai foi nisi ua faavaivaia ona o ni o latou lava lagona e faapea ua lē aogā ma ua latou lē taulau ona o o latou lava lē lelei atoatoa. E toatele ua faaosoosoina ina ia matuā lafoaia atoatoa le tauivi ma ia mea. E faapefea ona e manumalo pe a foliga mai ua lē mafai ona faafetaiaia popolega?

I se tasi taimi na manatu ai Tavita le tupu o Isaraelu e faapea o omiga ua toetoe lava lē mafai ona ia faafetaiaia. E tusa ai ma le Salamo 55, sa matuā fesouaina o ia e popolega ona o omiga ma le faatiga mai o ona fili. Na ia lagona le matuā loto tiga ma le fefe. Sa na o lona ōi ona o le loto nutimomoia. (Salamo 55:2, 5, 17) E ui i ona mafatiaga uma, ae na ia maua se ala e manumalo mai ai. E faapefea? Sa ia faatalitali atu i lona Atua mo se lagolagosua. O lana fautuaga ia i latou o ē atonu o iai foi lea lagona, e faapea: “Ia tuuina atu ia Ieova o mea e te popole vale ai.”—Salamo 55:22.

O le ā na ia uiga i ai i lona faapea mai “ia tuuina atu ia Ieova o mea e te popole vale ai”? Pe ua na o le talanoa lava ia Ieova e ala i le tatalo ma taʻu atu i ai o tatou popolega? Po o le mea e mafai ona faia e i tatou lava se mea e foia ai le faafitauli? Ae faapefea pe a ia i tatou le lagona o le matuā lē talafeagai ona tatou faalatalata atu ia Ieova? E mafai ona tatou sailia po o le ā sa uiga i ai Tavita i le tilofaia lea o nisi o mea tutupu na ia manatuaina lelei a o ia tusia na upu.

Faia Mea i le Malosi o Ieova

E te manatua na faapefea ona faatupuina e Koliata le fefe i loto o tagata tau o Isaraelu? O lenei tagata tino i sauai, e sili atu i le iva futu [e sili atu i le 2.7 mita] lona umī, sa faamataʻuina ai i latou. (1 Samuelu 17:4-11, 24) Ae sa lei fefe Tavita. Aisea? Ona sa lei taumafai o ia e faafetaiaia Koliata i sona lava malosi. Mai le taimi na faauuina ai o ia e avea ma tupu o Isaraelu i le lumanai, na ia faatagaina ai le agaga o le Atua e taʻitaʻia ma faamalosia o ia i mea uma na ia faia. (1 Samuelu 16:13) O lea na ia faapea atu ai ia Koliata: “O aʻu, ou te alu atu ia te oe i le suafa o Ieova o ʻau, o le Atua o le itu taua a Isaraelu ua e faifai i ai. O le aso nei e tuuina mai ai oe e Ieova i loʻu lima.” (1 Samuelu 17:45, 46) Na poto Tavita e faaaogā le maatā, ae tatou te mautinoa o le agaga paia o Ieova na faatonutonuina ma faasaoasaoaina atili ai le maa na ia sasauina atu ia Koliata.—1 Samuelu 17:48-51.

Na faafetaiaia e Tavita lenei luʻi tele ma manumalo ai ona o lona maumauai e faapea o le Atua e mafai ona lagolagoina ma faamalosia o ia. Sa ia atiina aʻe se faiā lelei, ma le maufaatuatuaina ma le Atua. E lē taumatea sa faamalosia lenei tulaga i le auala na muai laveaiina ai o ia e Ieova. (1 Samuelu  17:34-37) I le pei o Tavita, e mafai ona e faatumauina se faiā totino malosi ma Ieova ma maua se faatuatuaga atoatoa i lona malosi ma lona finagalo malie e faamalosia ma faatumauina oe i tulaga uma.—Salamo 34:7, 8.

Faia le Mea E te Mafaia e Foia ai le Faafitauli

Peitai, e lē o le uiga o lenei mea, e faapea o le a leai lava ni taimi e oo ai i faalogona e sili ona tiga, le popole, ma oo lava ina mataʻu ai, e pei ona faaalia manino i le Salamo 55. O se faataʻitaʻiga, i tausaga mulimuli ane ai ina ua mavae lenei faailoaga lototoa ma le maumauai ia Ieova, na matuā mataʻu ai Tavita i ona fili. Sa lē fiafia le tupu o Saulo ia te ia ona ia sola ai lea mo le faasaoina o lona ola. Taumafai e vaai faalemafaufau i le lē mautonu na ono faapogaia e lenei mea ia Tavita, atonu na oo ifo ni fesili i lona mafaufau e uiga i le galueaiina o le fuafuaga a Ieova. O lea ua uma ona faauuina o ia o le a avea ma tupu o Isaraelu i le lumanai, ae o lea ua ia taumafai e sao mai e ala i le lafilafi solo i le vaomatua, a o sailia solo o ia e pei o se manu aivao. Ina ua ia taumafai e saili sona lafitaga i le aai o Kata, le laumua lea sa nofo ai Koliata, na iloa o ia e tagata. Faatasi ai ma ā iuga? Ua faapea mai faamaumauga, ‘ua matuā fefe lava o ia.’—1 Samuelu 21:10-12.

Ae na te lei faatagaina lona mataʻu ma le matuā popole e taofia o ia mai le faatalitali atu ia Ieova mo se fesoasoani. E tusa ai ma le Salamo 34 (na tusia ona o lenei mea na tupu), na faapea mai Tavita: “Na ou saili atu ia Ieova, ona tali mai ai lea o ia ia te au, ma na laveaiina aʻu ai mea uma na ou fefe ai. Na valaau atu lenei tagata ua tigaina, ona faafofoga mai ai lea o Ieova, ma na faaola ia te ia i ona puapuaga uma lava.”—Salamo 34:4, 6.

Na lagolagoina moni o ia e Ieova. Peitai ia mātau faapea sa lē na o le nofonofo o Tavita ma faatalitali ia Ieova e laveaiina o ia. Na ia iloaina e manaomia ona ia faia mea uma na te mafaia i lalo o tulaga e alofia ai mea faigata. Na ia iloaina o loo i aao o Ieova lona laveaiina, ae na ia faia foi gaoioiga, na faafoliga ua valea lona mafaufau lea na lei fasiotia ai o ia e le tupu o Kata. (1 Samuelu 21:14–22:1) E manaomia foi ona tatou faia mea uma tatou te mafaia ina ia faafetaiaia ai popolega, nai lo le na o le faatalitali ia Ieova e laveaiina i tatou.—Iakopo 1:5, 6; 2:26.

Aua E te Faaopoopo Atili i Ou Popolega

I ni taimi mulimuli ane o lona olaga, na aʻoaʻoina ai e Tavita se isi lesona, o se lesona tiga. O le ā lea lesona? E faapea o nisi taimi tatou te faaopoopo atili atu ai i o tatou lava popolega. Ina ua mavae lona manumalo mai ia Filisitia, na sese ai Tavita ina ua ia filifili e ave le atolaau o le feagaiga i Ierusalema. Ua taʻu mai ia i tatou e faamaumauga o talafaasolopito: “Ona tulai lea o Tavita, ua alu o ia ma le nuu uma sa ia te ia mai Paala-Iuta, ina ia avae ai le atolaau a le Atua, . . . Ua latou faaee le atolaau a le Atua i le fata faataavalevale fou, . . . a o Usa ma Aio, o atalii o Apinatapa, ua la taʻitaʻia le fata faataavalevale fou.”—2 Samuelu 6:2, 3.

O le faaaogaina o se fata faataavalevale e tauave ai le Atolaau na solia ai faatonuga uma na tuuina atu e Ieova e tusa ai ma lenei mea. Sa manino lelei ona taʻua, e na o le pau  ē ua iai le aiā e tauaveina le Atolaau, o le fanauga a Koato o sa Levī, e faaaogā ai amo e tui i mama faapitoa ua tautau i le Atolaau. (Esoto 25:13, 14; Numera 4:15, 19; 7:7-9) O le lē amanaiaina o nei faatonuga na aumaia ai mala. A o toso atu e povi le fata faataavalevale na toetoe a paʻū le Atolaau, ona aapa atu lea o Usa, atonu o ia o se tasi o le au sa Levī ae mautinoa e lē o se ositaulaga ina ia tau faasagatonu le Atolaau, ae taia o ia e Ieova ma oti ai ona o lona lē faaaloalo.—2 Samuelu 6:6, 7.

I le avea o Tavita ma tupu sa tatau ona ia faia se vaega mo lenei mea. O lana gaoioiga ua faaalia ai e faapea e oo lava ia i latou o ē e lelei la latou faiā ma Ieova e mafai ona lē lelei la latou tali atu i nisi tulaga faigata. Muamua lava na toatamaʻi Tavita. Ona oso aʻe lea o lona fefe. (2 Samuelu 6:8, 9) Na matuā tofotofoina le la faiā maufaatuatuaina ma Ieova. O lenei mea na aliali mai ai lona lē taulau i le tuuina atu ia Ieova o ona popolega, ina ua ia lē mulimuli i ana poloaiga. Pe lē o le tulaga foi lea ia i tatou i nisi taimi? Pe o tatou tuuaʻia ea Ieova mo faafitauli e oo mai ona o lo tatou lava lē amanaiaina o ana faatonuga?—Faataoto 19:3.

Manumalo Mai le Popolega o le Lagona Nofosala

Mulimuli ane, na faateleina e Tavita ona popolega i ona lagona nofosala e ala i lona matuā agasala faasaga i tapulaa i amio tatau a Ieova. Na tupu lenei mea ina ua lafoaia e Tavita lana tiute tauave o le taʻitaʻia o ona tagata tau i le taua. Sa nofo o ia i Ierusalema a o ō atu i latou e tau. O lenei mea na taʻitaʻiina ai i se faalavelave matuia.—2 Samuelu 11:1.

Na iloa atu e le tupu o Tavita le fafine lalelei o Patisepa o loo taele. Na faia e i laua amioga lē mamā, ma na to ai o ia. (2 Samuelu 11:2-5) Sa taumafai Tavita e natia lenei mea sese, i lona avatua o le faatonuga e toe faafoi ane le tane a le fafine, o Uria, i Ierusalema mai le nofoaga o le taua. Na teena e Uria le faia o ni feusuaiga ma lana avā a o iai tagata Isaraelu i le taua. (2 Samuelu 11:6-11) Ona sailia lea e Tavita se auala leaga ma le faaʻoleʻole e ufiufi ai lana agasala. Na ia faatonuina soātau a Uria e tuu Uria i se tulaga o loo tetele ai le taua ina ia mafai ona fasiotia ai o ia. O se agasala e matuā inosia ma pagatia ai!—2 Samuelu 11:12-17.

O le iuga, ioe, na tuliloaina Tavita e lana agasala, ma sa faaalialia o ia. (2 Samuelu 12:7-12) Seʻi taumafai e vaai faalemafaufau i le mamafatu o faanoanoaga ma lagona nofosala sa tatau ona oo ia Tavita ina ua ia faia lenei mea talu ai ua faatauasoina o ia i ona tuinanauga faaleituaiga. Atonu sa ono lofituina o ia e ona lava lagona lē taulau, ae maise o ia o se tagata e foliga mai e vaivai ona faalogona ma maaleale. Sa ono manatu o ia ua matuā lē aogā lava o ia!

Ae peitai, na vave ona ioeina e Tavita lona sese, ma taʻutino atu i le perofeta o Natano: “Ua ou agasala lava ia Ieova.” (2 Samuelu 12:13) Ua taʻu mai e le Salamo 51 ona lagona ma le auala na faamaulalo ai Tavita ia Ieova le Atua ina ia faamamā ia te ia ma faamagalo o ia. Na ia tatalo atu: “Ia e matuā fufulu mai ia te au i laʻu amio leaga, ma ia e faamamā mai ia te au i laʻu agasala. Auā ua ou iloa e aʻu loʻu solitulafono; e le aunoa foi ona i ai i oʻu luma o laʻu agasala.” (Salamo 51:2, 3) Talu ai sa salamō moni o ia, na mafai ai ona ia toe atiina aʻe se faiā vavalalata ma Ieova. E lei taofiofia e Tavita ia te ia ni faalogona faanoanoa ma ni mafaufauga faapea ua lē o toe aogā. Na ia tuuina atu ia Ieova ona popolega ma faailoa atu ma le lotomaulalo ona lagona nofosala, i le faatinoina o lona salamō moni, ma tatalo faatauanau ia Ieova mo le faamagaloga. Na ia toe maua le finagalo malie o le Atua.—Salamo 51:7-12, 15-19.

Manumalo Mai Lagona ua Faalataina

Ua tatou oo nei i se mea na tupu na uunaia ai Tavita e tusia le Salamo 55. Sa matuā utia  o ia i faalogona tiga. “Ua sapotuvale loʻu lava loto i totonu ia te au;” na ia tusi ai, “ua oo mai foi ia te au le mataʻu i le oti.” (Salamo 55:4) O le ā na māfua ai lenei tiga? O Apisaloma, le atalii o Tavita, na ia faufau e faoa le tulaga tautupu mai ia Tavita. (2 Samuelu 15:1-6) Sa matuā faigata ona onosaia lagona ua faalataina e lona lava atalii, ae o le mea sa sili ona leaga, o le faufautua sili ma le maufaatuatuaina a Tavita, o le tagata e igoa ia Aitofele, sa aufaatasi atu o ia e faasagatau ia Tavita. O Aitofele lea o loo faamatalaina e Tavita i le Salamo 55:12-14. O le iuga o lena fouvale ma le faalata, na sola ese ai Tavita mai Ierusalema. (2 Samuelu 15:13, 14) Pagā ni lagona ita atonu na oo ia te ia!

E ui i lea, sa ia lei faatagaina ona faalogona mafatia ma le faavauvau e faavaivaia ai lona faatuatua ma lona mautinoa ia Ieova. Na ia tatalo ia Ieova e faaleaogaina uma faufauga a ē fouvale. (2 Samuelu 15:30, 31) O lea foi ua tatou toe iloaina nei sa lei tau ina faatalitali Tavita ia Ieova e faia galuega uma. O le taimi lava na maua ai le avanoa, sa ia faia loa le mea na te mafaia e tetee atu ai i le fouvalega sa fai mai ia te ia. Na ia auina atu Usai, o se tasi o ana faufautua i Ierusalema, e faafoliga e na te lagolagoina le fouvalega, e ui lava, o le mea moni, na alu faalilolilo e faaleaogaina. (2 Samuelu 15:32-34) Faatasi ai ma le lagolagosua a Ieova, na taulau lenei taumafaiga. Na lava le taimi na maua e Usai mo Tavita e toe faapotopoto ai ma fuafua lelei se au e puipuia o ia.—2 Samuelu 17:14.

Maeu le talisapaia e Tavita o le tausiga ma le puipuiga a Ieova ia te ia i lona olaga atoa, faapea foi ma le onosai ma le finagalo malie o Ieova e faamagaloina o ia! (Salamo 34:18, 19; 51:17) O lenei talaaga ua faalaeiauina ai ma le mautinoa e Tavita i tatou i o tatou taimi o mafatiaga, ina ia liliu atu ia Ieova mo le fesoasoani, i le ‘tuuina atu ia Ieova o mea tatou te popole ai.’—Faatusatusa i le 1 Peteru 5:6, 7.

Ia Atiaʻe ma Faatumauina se Faiā Malosi, ma Maufaatuatuaina ma Ieova

E faapefea ona tatou maua le ituaiga o faiā lea na iai ia Ieova ma Tavita, se faiā na faatumauina ai o ia i taimi o tofotofoga sili ma puapuaga? Tatou te atiina aʻe sea faiā e ala i le avea ma tagata aʻoga maelega o le Afioga a le Atua, le Tusi Paia. Ia tatou faatagaina o ia e faatonu mai i tatou i ana tulafono, mataupu silisili, ma ona uiga totino. (Salamo 19:7-11) A o tatou mafaufau loloto i le Afioga a le Atua, tatou te matuā vavalalata atu ai ia te ia ma aʻoaʻoina le faalagolago atoatoa atu ia te ia. (Salamo 143:1-5) E faalolotoina ma faamalosia lena faiā a o tatou auaufaatasi ma o tatou uso tapuai ina ia aʻoaʻoina atili i tatou e Ieova. (Salamo 122:1-4) E faalolotoina atili la tatou faiā ma Ieova e ala i le tatalo mai le loto.—Salamo 55:1.

O le mea moni, sa faapei Tavita o i tatou, na iai ona mafatiaga ina ua lē malosi le la faiā ma Ieova i le tulaga sa tatau ona iai. O uiga sauā e mafai ona “faavalea ai” i tatou. (Failauga 7:7) Peitai e silafia e Ieova mea o loo tutupu, ma na te silafia mea o loo i o tatou loto. (Failauga 4:1; 5:8) E manaomia ona tatou galulue mamafa ina ia faatumauina le malosi o la tatou faiā ma Ieova. Ona tusa lava lea po o ā popolega e tatau ona tatou tauaveina, ae mafai ona tatou faalagolago ia Ieova ma maua ai se mapusaga mai omiga, po o le tuuina mai foi ia i tatou o le malosi ina ia tatou manumalo ai mai o tatou tulaga. (Filipi 4:6, 7, 13) E tāua lo tatou faalatalata atu ia Ieova. Ina ua faia faapea e Tavita, sa matuā malupuipuia o ia.

O lea la, po o ā lava tulaga e oo ia te oe, ua faapea mai Tavita, ia faaauau ona tuuina atu ia Ieova ou popolega. Ona tatou tofo ai lea i le moni o le folafolaga: “O ia lava na te tausia oe; na te le tuuna e faavavau le amiotonu ia faagaeetia.”—Salamo 55:22.