E te Manatua?

Pe ua e iloa ea le tāua ia te oe o lomiga talu ai nei o Le Olomatamata? Aisea la e lē tofotofo ai lou manatuaina o mea i fesili nei o loo sosoo mai:

□ O ā ni lesona ua tatou aʻoaʻoina mai le paʻū o sa Amonī? (Sefanaia 2:9, 10)

E lē manatu māmā Ieova i faiga sauā ia na tauia mai ai lona agalelei, ma i lana taimi tuupoina, o le a ia gaoioi ai e pei ona sa ia faia i aso anamua. (Faatusatusa i le Salamo 2:6-12.)—12/15, itulau 10.

□ I ā auala ua maua ai e Kerisiano le filemu?

Muamua, ua latou maua le “filemu ma le Atua ona o lo [latou] Alii o Iesu Keriso.” (Roma 5:1, NW) O lona lua, ua iai le filemu ia i latou lava e ala i le atiina aʻe “o le poto mai lugā,” lea e “muamua ona mamā, i le ua filemu.” (Iakopo 3:17)—1/1, itulau 11.

□ O ā nisi mea ua faatusa i ai le Afioga a le Atua, ma ua faapefea ona aogā lenei mea ia i tatou?

Ua faatusaina le Afioga a le Atua i le suasusu lelei, o meaʻai aano, o vai ua faamamāina ma e faafouina ai, o se faʻata, ma o se pelu maʻai. O le malamalama i mea o loo faatatau i ai nei faaupuga o le a fesoasoani ai i se faifeau e faaaogā ma le tomai le Tusi Paia.—1/1, itulau 29.

□ O le ā e tatau i aʻoaʻoga e paleni lelei ona fesoasoani ia i tatou e faia?

Ia lelei ai le faitau, ia manino ai le tusitusi, ia atiina aʻe ai faalemafaufau ma tau amio, ma ia maua ai toleniga i galuega fai e manaomia mo le olaga i aso taitasi ma ia taulau i le auaunaga paia.—2/1, itulau 10.

□ O le ā se lesona tāua e faatatau i aʻoaʻoga ua mafai ona tatou aʻoaʻoina mai ia Iesu?

E lē tatau ona faaaogā aʻoaʻoga ia viiviia ai i tatou lava, ae ia avatu ai le viiga i le Aʻoaʻo sili, o Ieova le Atua. (Ioane 7:18)—2/1, itulau 10.

□ O le ā le Malo o le Atua?

O le Malo o se pulega faalelagi na faavaeina e le Atua, lea e aumaia ai le finagalo o le Atua ina ia tafiesea aafiaga o le agasala ma le oti ae toe faafoisia tulaga amiotonu i luga o le lalolagi. (Tanielu 2:44; Faaaliga 11:15; 12:10)—2/1, itulau 16.

□ Ua faapefea ona saunia e le Tusi Paia le aʻoaʻoga manaomia mo le faaiuina e faavavau o faiga sauā?

E ala i lana Afioga, le Tusi Paia, ua aʻoaʻoina ai e Ieova tagata ina ia naunau i le filemu ma le amiotonu. (Isaia 48:17, 18) O loo iai le mana i le Afioga a le Atua e oo atu ai ma pāʻia le loto o se tagata, ma suia ai ona mafaufauga ma ana amioga. (Eperu 4:12)—2/15, itulau 6.

□ I le ā le auala e mafai ona faapea atu, ua maua ai e le valoaga i le Isaia mataupu e 35, ni ona faataunuuga se tolu?

Na faataunuuina muamua le valoaga a Isaia ina ua toe foi ane tagata Iutaia mai le faaaunuua i Papelonia i le 537 T.L.M. E iai sona faatatauga faaleagaga lea o loo faagasolo pea i aso nei talu ona faasaʻolotoina le Isaraelu faaleagaga mai le faaaunuuaina i Papelonia le Aai Tele. Ma o le a iai lona faataunuuga lona tolu ua fesootai atu ma le faamautinoaga faale-Tusi Paia i tulaga faaparataiso moni i luga o le lalolagi. (Salamo 37:10, 11; Faaaliga 21:4, 5)—2/15, itulau 17.

□ Na faapefea ona faaalia le naunau totino mai o le Atua i tagata e ala i vavega na faia e lona Alo, o Iesu?

Talu ai “e le mafai e le Atalii [Iesu] ona fai o se mea, na o ia lava; a o mea na te vaai atu i le Tamā o faia,” ua faailoa mai ai e lona alofa mutimutivale se manatu alofa o Ieova mo ana auauna taitoatasi. (Ioane 5:19)—3/1, itulau 5.

□ O le ā o aofia i le faaupuga a Iesu “fanuaoti e toe manatua mai ai” lea o loo faaaogā i le Ioane 5:28, 29?

O le upu Eleni mne·mei’on lea o loo faaaogaina mo le (fanuaoti e toe manatua mai ai) iinei, ua aumaia ai le manatu e faapea o le talaaga o le olaga o le tagata ua oti, e aofia ai ona uiga na ola mai ma ia, ma ona manatunatuga uma o loo manatuaina lelei e Ieova. O le faamaoniga maumaututū lenei o le naunau mai o le Atua i tagata taitoatasi!—3/1, itulau 6.

□ O le ā le feau lapatai o loo iai i le valoaga a Sefanaia e aogā tele mo i tatou?

E lē o se taimi lenei e faataga ai masalosaloga ina ia mauaa ifo i o tatou loto ma tolopoina ai i o tatou mafaufau le oo mai o le aso o Ieova. E tatau foi ona tatou teena aafiaga e faavaivaia ai, o uiga lē fiafia mai. (Sefanaia 1:12, 13; 3:8)—3/1, itulau 17.

□ Aisea ua avea ai le alofa faamaoni i le Atua ma tulaga ua tulai mai ai se luʻi?

Auā o le faamaoni ua feteenai ma faanaunauga manatu faapito lea ua tuufaasolo mai ia i tatou e o tatou mātua. (Kenese 8:21; Roma 7:19) Ae sili atu ona tāua, o loo maumauai Satani ma ana temoni e faapogaia i tatou ina ia lē alolofa faamaoni i le Atua. (Efeso 6:12; 1 Peteru 5:8)—3/15, itulau 10.

□ O ā vaega e fa e tatau ona tatou faafetaiaia ai le luʻi o le alofa faamaoni, ma o le ā o le a fesoasoani ia i tatou ina ia faia ai faapea?

O vaega e fa o le alofa faamaoni ia Ieova, i lana faalapotopotoga, i le faapotopotoga, ma i a tatou paaga faaipoipo. O se tasi o fesoasoani mo le faafetaiaia o nei luʻi o le talisapaia lea e faapea, o le luʻi o le alofa faamaoni e ō faatasi ma le faaeaina o le pule silisili ese a Ieova.—3/15, itulau 20.

□ O le ā le lesona e mafai ona tatou aʻoaʻoina mai le mea na tupu ia Tavita i lona taumafai e ave le atolaau o le feagaiga i Ierusalema? (2 Samuelu 6:2-7)

Na lē amanaia e Tavita faatonuga na tuuina atu e Ieova e tusa ai ma le tauaveina o le Atolaau, ma na malaia ai. O le lesona ia aua lava neʻi o tatou tuuaʻia Ieova mo faafitauli e oo mai ona o lo tatou lē amanaiaina o ana faatonuga manino. (Faataoto 19:3)—4/1, itulau 28, 29.