Fesili Mai le Au Faitau

Na fetalai Iesu e faapea: “O i latou uma lava tou te faamagaloina ai a latou agasala, e faamagaloina ia ia i latou; o i latou uma lava tou te tuu pea i ai a latou agasala, e tuu pea lava ia.” Pe o le uiga ea o nei upu e mafai e Kerisiano ona faamagaloina agasala?

E leai se faavae faale-Tusi Paia e ono fai mai ai o Kerisiano uma, po o toeaina tofia o faapotopotoga, ua iai le pule mai le Atua e faamagalo ai agasala. Ae peitai, o fetalaiga a Iesu i ona soo i le Ioane 20:23, lea o loo taʻua i luga, ua faamaonia ai na tuuina atu e le Atua i aposetolo se mana faapitoa e tusa ai ma lenei tulaga. Ma o fetalaiga a Iesu iina atonu ua fesootai atu i ana upu o loo i le Mataio 18:18 e faatatau i filifiliga faalelagi.

E mafai ona faamagalo e Kerisiano ni sese patino, lea ua ogatusa ma le fautuaga a le aposetolo o Paulo o loo faamauina i le Efeso 4:32 e faapea: “A ia outou feagaleleiai, ia femutimutivaleai lo outou alofa, ia fefaamagaloai outou, faapei ona faamagaloina outou e le Atua ia Keriso.” Na tautala Paulo iinei e faatatau i faafitauli patino i va o Kerisiano, e pei o le soona tautala. E tatau ona latou taumafai e faaleleia nei tulaga, i le fefaamagaloai. Seʻi toe manatunatu foi i fetalaiga a Iesu: “Pe afai foi e te avatu lau taulaga i le fata faitaulaga, ona e manatua ai lea ua i lou uso se mea e tiga ai o ia ia te oe, ina tuu ia i lea mea o lau taulaga i luma o le fata faitaulaga, a e alu oe ia muai faalelei i lou uso, i le e sau ai, ma avatu lau taulaga.”—Mataio 5:23, 24; 1 Peteru 4:8.

Ae peitai, o fuaiupu o loo siomia ai le Ioane 20:23 ua taʻu mai ai o loo tele ina faasino atu e Iesu i agasala matuia, e pei ona faamaonia atili mai i ana fetalaiga faapitoa i ē na faalogologo ane. Seʻi o tatou iloiloina le mafuaaga.

I le aso na faatūina ai o ia, na faaali atu ai Iesu i soo i se potu na loka i Ierusalema. Ua faapea mai le tala: “Ona toe fetalai atu lea o Iesu ia te i latou, ‘Ia outou manuia. Faapei ona auina mai o aʻu e le Tamā, e faapea foi ona ou aauina atu outou.’ Ua ia fetalai atu lea mea, ona mānava atu lea o ia ia te i latou ma faapea atu, ‘Ia outou talia le Agaga Paia. O i latou uma lava tou te faamagaloina ai a latou agasala, e faamagaloina ia ia i latou; o i latou uma lava tou te tuu pea i ai a latou agasala, e tuu pea lava ia.’ ”—Ioane 20:21-23.

O lea la, o soo ia na taʻua e mautinoa o aposetolo faamaoni. (Faatusatusa i le Ioane 20 fuaiupu e 24.) E ala i le mānavaina atu ia i latou ma faapea atu, “Ia outou talia le Agaga Paia,” na avatu ai e Iesu ia i latou se faaaliga faafaatusa e faapea ua toeitiiti ona liligiina ifo lea o le agaga paia i o latou luga. Na fetalai atili atu Iesu o le a latou maua le pule e faamagaloina ai agasala. E foliga mai la, e iai se fesootaiga i ana faamatalaga e lua, ua fesootai atu le tasi i le isi.

I le limasefulu aso talu ona faatūina o ia, na liligiina ifo ai e Iesu le agaga paia i le aso Penetekoso. O le ā na faataunuu ai iina? O se tasi o faataunuuga ua iloa ai o i latou na mauaina le agaga na toe fanaufouina e avea ma atalii agaga o le Atua ma le faamoemoe e pule faatasi ma Keriso i le lagi. (Ioane 3:3-5; Roma 8:15-17; 2 Korinito 1:22) Ae o lena liligiina ifo o le agaga sa iai sona faataunuuga e sili atu. O nisi na liligiina ifo i ai le agaga na latou mauaina le mana e fai ai vavega. Ona o lena na mafai ai e nisi ona tautatala i gagana eseese latou te lē malamalama i ai. O nisi sa mafai ona vavalo. Ae o nisi foi sa mafai ona faamālōlō i maʻi pe faatutū i ē na feoti.—1 Korinito 12:4-11.

Talu ai o fetalaiga a Iesu i le Ioane 20:22 sa faasino atu i le liligiina ifo o le agaga paia i soo, o ana fetalaiga la e faatatau i le faamagaloina o agasala e foliga na uiga faapea na saunia mo aposetolo le pule tutasi mai le Atua e faamagalo ai agasala po o le lē faamagaloina foi, e ala lea i gaoioiga a le agaga paia.—Tagai i le Watchtower, Mati 1, 1949, itulau e 78.

E lē o aumaia e le Tusi Paia ia i tatou ni faamaumauga atoa o taimi uma sa faaaogā ai e aposetolo lenei pule, po o ni faamaumauga foi o tulaga uma na latou faaaogā i ai le meaalofa faavavega e tautatala ai i gagana eseese, e vavalo, po o le faia foi o faamālōlōga.—2 Korinito 12:12; Kalatia 3:5; Eperu 2:4.

O se tasi tulaga na faaaogaina ai le pule a aposetolo e faamagalo po o le lē faamagaloina foi o agasala o le tulaga e faatatau ia Anania ma Safaira, ina ua talapepelo i le agaga. Na faaalialia atu Anania ma Safaira e Peteru o lē na faalogo a o fetalai  Iesu i upu ia na tatou faitau i ai i le Ioane 20:22, 23. Na muamua faasagasaga atu Peteru ia Anania, lea na oti faafuasei ai i lea lava taimi. Mulimuli ane ina ua alu ifo Safaira ma faaauau ona molimau pepelo, na faalauiloa atu e Peteru lona iuga faafaamasinoga. Sa lei faamagaloina e Peteru lana agasala ae na ia fai atu faapea: “Faauta, o tutū mai i le faitotoa i latou e na tanu lau tane, latou te ave foi ia te oe i fafo.” Na oti foi o ia i lea lava taimi.—Galuega 5:1-11.

I lenei faataʻitaʻiga na faaaogā ai e le aposetolo o Peteru le pule faapitoa e faaali atu ai le leai o se faamagaloga o le agasala, o le poto faavavega e iloa ai e lē faamagaloina e le Atua le agasala a Anania ma Safaira. Na foliga mai foi sa i aposetolo le malamalamaga sili atu nai lo lea e i tagata e faamautinoa ai agasala ua faamagaloina e faavae aʻe i le taulaga a Keriso. O lea la, sa mafai e na aposetolo o ē ua tuuina i ai e le agaga le pule, ona latou faalauiloa atu pe ua faamagaloina po o le leai foi o se faamagaloga. *

E lē faapea ai la o toeaina uma ua faauuina e le agaga sa i tuā iina na iai lena pule faavavega. Ua tatou iloa lena i upu a le aposetolo o Paulo na fai faatatau i le tamaloa lea na faateʻa ese mai le faapotopotoga i Korinito. Sa lei fai atu Paulo, ‘Ua ou faamagaloina agasala a lena tamaloa,’ po o le, ‘Ua ou iloa ua uma ona faamagalo o ia i le lagi, o lea ia outou talia o ia.’ Nai lo lena, na faamalosi atu Paulo i le faapotopotoga atoa ina ia faamagalo i lenei Kerisiano ua toe faaaʻe ma faaali atu i ai le alofa. Na faaopoopo atu Paulo e faapea: “O le ua outou faamagalo atu i ai se mea, o aʻu foi lea.”—2 Korinito 2:5-11.

O le taimi lava na toe faaaʻe ai le tamaloa i totonu o le faapotopotoga, sa tatau i uso ma tuafāfine Kerisiano uma lava ona faamagalo atu i sona uiga faapea ua lē o toe manatua mea na ia faia. E muamua lava, sa tatau ona ia salamō ina ia faaaʻeina ai. E faapefea ona tupu lena tulaga?

E iai agasala matuia e taulimaina e toeaina, e pei o le gaoi, pepelo, po o amioga lē tatau e inosia. E latou te taumafai e faasaʻo ma aoaia lena tagata faimea sese, ina ia uunaia ai o ia e salamō. Ae afai o se tasi na faia se agasala matuia ae lē salamō, ona faatatauina loa lea e toeaina taʻitaʻiga mai le Atua i le faateʻa ese lea o lē ua faimea sese. (1 Korinito 5:1-5, 11-13) O fetalaiga a Iesu o loo i le Ioane 20:23 e lē o faatatauina i tulaga faapena. E lē o iai i toeaina meaalofa faavavega o le agaga, e pei o le agavaa i le faamālōlōina o maʻi o le tino po o le faatutūina foi o ē ua feoti; sa faataunuuina le fuafuaga o na meaalofa i le na o le uluai senituri ma na gata ai foi iina. (1 Korinito 13:8-10) E faaopoopo atili atu i ai, e lē o iai i toeaina i aso nei le pule mai le Atua e faamagalo ai agasala matuia i lona uiga faapea ua taʻumamāina se tasi na faia se agasala matuia i luma o le silafaga a Ieova. O le ituaiga o faamagaloga lena e tatau ona faavae aʻe i le taulaga togiola, ma e na o Ieova e mafai ona ia faamagalo atu e tusa ai ma lena tulaga.—Salamo 32:5; Mataio 6:9, 12; 1 Ioane 1:9.

Ae tusa ai ma le tulaga o le tamaloa i Korinito anamua, pe afai e musu lē na faia le agasala matuia e salamō, ua tatau loa ona faateʻa ese. Pe afai e mulimuli ane salamō ma faaalia galuega e tusa ai ma le salamō, ua tatau loa iina le faamagaloga mai le Atua. (Galuega 26:20) I tulaga faapena, ua avatu ai e le Tusi Paia i toeaina ni mafuaaga e talitonu ai ua faamagaloina e Ieova lē ua faimea sese. Pe a toe faaaʻe le tagata, e mafai e toeaina ona avatu ia te ia le fesoasoani faaleagaga ina ia mauaa ai i le faatuatua. E mafai e isi o le faapotopotoga ona faamagalo atu i le auala lava lea e tasi na faamagaloina ai e Kerisiano i Korinito le tamaloa lea na faateʻaeseina ae na toe faaaʻeina.

O le taulimaina o mataupu i le auala lenei, ua lē faia ai e toeaina ni a latou lava faatulagaga faafaamasinoga. Ua latou faatatauina mataupu silisili faale-Tusi Paia ma mulimulitui atu i faatulagaga faale-Tusi Paia ua saunia e Ieova. O lea la, pe faamagaloina po o le leai foi o se faamagaloga e faia i le vaega a toeaina ua mafai ona uiga atu i upu a Iesu i le Mataio 18:18 e faapea: “E moni, ou te fai atu ia te outou, O mea uma tou te fusifusia i le lalolagi, e fusifusia ia i le lagi; o mea uma foi tou te tālā i le lalolagi, e tatalaina ia i le lagi.” O a latou gaoioiga uma e faaatagia ai le silafaga a Ieova i mataupu o loo folasia mai i le Tusi Paia.

O lea la, o upu na fetalai i ai Iesu o loo faamauina i le Ioane 20:23, e lē feteenai ma isi vaega uma o le Tusi Paia, ae ua faaali mai ai sa tuu atu i aposetolo le pule faapitoa e faamagalo ai, e tusa ai ma a latou avega tauave faapitoa i le tauamatamataga o le faapotopotoga Kerisiano.

[Faaopoopoga i lalo]