Le Pogai o le a Faamuta ai Lotu a le Lalolagi

“Loʻu nuu e, ia outou o ese ia te ia, ina neʻi faatasia outou i ana agasala, ina neʻi tofusia foi outou i ona mala.”—FAAALIGA 18:4.

1. (a) I le ā le auala ua paʻū ai Papelonia le Aai Tele? (e) Ua faapefea ona aafia ai Molimau a Ieova i lenei mea?

“UA PAʻŪ Papelonia le aai tele!” Ioe, i le silasila a Ieova ua paʻū le emepaea o lotu sese i le lalolagi. O le mea moni lava lena ua iai talu mai le 1919, ina ua ō ese uso o Keriso mai aafiaga a Kerisinetoma, le vaega autū o Papelonia ma ana aʻoaʻoga sese. O le iuga la, ua latou saʻoloto ai e taʻusalaina i le lautele ia lotu sese, ma faalauiloa le pulega amiotonu a le Atua e ala i le Malo faa-Mesia. I le gasologa o lenei senituri, ua faaalialia ai e Molimau faamaoni a Ieova ia faiga lotu aoao faatagāfai a Satani, lea o loo ia pulea ma le atamai ina ia faasese ai “i le lalolagi uma.”—Faaaliga 12:9; 14:8; 18:2.

Ua Faapefea Ona Paʻū Papelonia le Aai Tele?

2. O le ā le tulaga o iai lotu a le lalolagi i le taimi nei?

² Peitai, e ono fesili mai se tasi, ‘E faapefea ona outou fai mai ua paʻū Papelonia, ae o lea e foliga mai o loo lauolaola lotu i le tele o atunuu?’ Ua taʻu mai e le faa-Katoliko ma le faa-Isalama e sili atu i le taʻi piliona a la tagata lotu. O loo olaola pea le faa-Porotesano i Amerika i mātū ma saute, lea o loo fauina ai pea le tele o falesa ma malumalu fou. E faitau selau o miliona o loo mulimuli atu i faiga faalotu a le Lotu Puta ma le Lotu Hinitu. E ui i lea, o le ā le tele ua uunaia ai e nei lotu ni aafiaga lelei i amio a lenei faitau piliona o tagata? Pe ua taofia ai ea tagata Katoliko ma Porotesano mai le fasioti e le tasi o le isi i Aialani i Mātū? Pe ua aumaia ai le filemu moni i tagata Siū ma Musalimi i Sasaʻe Tutotonu? Pe ua taʻitaʻia atu ai ea i se filemu autasi i le va o tagata Hinitu ma Musalimi i Initia? Ma, talu ai nei lava, pe ua mafai ea ona taofia tagata Orthodox i Serbia, Katoliko i Croatia, ma Musalimi i Bosnia mai le “faaumatia e isi ituaiga o isi ituaiga,” le ave faamalosia o mea totino, toso teine, ma le fefasiotiaʻi? Ua masani ona avea lotu ua na o se taʻu, e pei o se ufiufi manifinifi e taʻegofie i sina oomi laitiiti.—Kalatia 5:19-21; faatusatusa i le Iakopo 2:10, 11.

3. Aisea ua faamasinoina ai e le Atua lotu uma?

³ E tusa ai ma le finagalo o le Atua, o le lagolagosua faalelotu a le anoano o tagata o le a lē suia ai se tasi o mea moni lē mafaafitia—ua faamasinoina lotu uma e le Atua. E pei ona manino mai i lona talaaga, ua talafeagai ia Papelonia le Aai Tele, se faasalaga mamafa auā “ua paʻi atu ana agasala i le lagi, ua manatua foi e le Atua ana amioleaga.” (Faaaliga 18:5) I se gagana faavaloaga na tusia e Hosea e faapea: “Na latou luluina le matagi, o le mea lea latou te selesele mai ai le afā.” O le a faaumatia lotu sese uma a Satani i le lalolagi aoao ona o lo latou faalataina o le Atua, lona alofa, lona suafa, ma lona Alo.—Hosea 8:7; Kalatia 6:7; 1 Ioane 2:22, 23.

E Ao Ona E Filifili

4, 5. (a) O ā mea ua tutupu i aso nei o loo tatou ola aʻe ai? (e) O ā fesili e ao ona tatou taliina?

⁴ O loo tatou ola aʻe nei i le faaiuiuga o “aso e gata ai,” ma i le avea ma Kerisiano moni o loo tatou tauivi ia sao mai i nei “aso faigata.” (2 Timoteo 3:1-5) O Kerisiano moni o tagata e lē nofo mau i le lalolagi a Satani, lea o loo matuā atagia lelei mai ai ona uiga matagā o le fasioti tagata, o le pepelo, ma o le taufaaleaga. (Ioane 8:44; 1 Peteru 2:11, 12;  Faaaliga 12:10) O loo siomia i tatou e faiga sauā, tulaga taufaasese, gaoioiga taufaavalea, faiga faapiopio, ma le matuia o amioga lē mamā. Ua matuā aunoa lava ma se manatu mamafa i mataupu silisili. Ua fai lava le mea e fiafia i ai le tagata ia ma le leai o se mafaufau i isi. Ma i le tele o tulaga ua lē afaina i taʻitaʻi lotu le palasi maulalo o tulaga tau amio mamā i lo latou lē taʻuina atu o le taʻusalaina manino a le Tusi Paia o le tauatane, faitaaga, ma le mulilua. O le fesili la e faapea, Pe e te lagolagoina ma taʻusaʻoina lotu sese, pe o e auai ma le maelega i le tapuaiga moni?—Levitiko 18:22; 20:13; Roma 1:26, 27; 1 Korinito 6:9-11.

⁵ O le taimi lenei o le vaevaeina. O le mea moni, e iai isi mafuaaga e manaomia ai ona faia se faaeseesega i le va o lotu sese ma le lotu moni. O ā nisi mea ua faia e lotu a Kerisinetoma ua atili ai ona taʻusalaina i latou?—Malaki 3:18; Ioane 4:23, 24.

Ua Tuuaʻia Lotu Sese

6. O faapefea ona faalataina e Kerisinetoma le Malo o le Atua?

⁶ E ui lava e faaaogaina e lē aunoa e le faitau miliona o i Kerisinetoma le Tatalo a le Alii, lea latou te tatalo ai mo le Malo o le Atua ia oo mai, ae latou te lagolagoina ma le loto i ai so o se ituaiga faiga faapolotiki, lea e matuā lē amanaia ai lena pulega faatiokarate. I senituri ua mavae atu o “perenise” a le Lotu Katoliko, e pei o Katinale Richelieu, o Katinale Mazarin, ma Katinale Wolsey, sa avea foi ma faipule, o minisita o le malo.

7. Na faapefea ona faaalialia i le lautele e Molimau a Ieova taʻitaʻi lotu Kerisinetoma i le sili atu i le 50 tausaga talu ai?

⁷ Ua sili atu i le 50 tausaga talu ai, i le tamai tusi e taʻu o le Religion Reaps the Whirlwind, na faaalialia ai i le lautele e Molimau a Ieova le aafia o Kerisinetoma i faiga faapolotiki. * O le mea na taʻua ai iina e matuā fetaui lelei foi i aso nei lea e faapea mai: “O se suesuega ma le faamaoni o amioga a taʻitaʻi lotu o lotu uma lava o le a faaalia ai e faapea o taʻitaʻi lotu uma o ‘Kerisinetoma’ o loo auai ma le naunau fiafia i faiga faapolotiki a ‘lenei lalolagi leaga’ ma o loo matuā aafia ai i ana upufai faalelalolagi.” I tuā iina na matuā faitioina malosi ai e Molimau ia Pope Pius XII ona o lona faifai mea faatasi ma Nazi Hitler (1933) ma Fascist Franco (1941), e faapena foi ma le faafesuiaʻia e le pope o o la sui aloaia ma le malo sa faasagatau mai o Iapani ia Mati 1942, i le na o ni nai masina lava talu ona uma le osofaiga matautia i Pearl Harbor. Sa lē taulau i le pope ona utagia le lapataiga a Iakopo: “O outou tagata mulilulua e, tou te le iloa ea o le fefaauoai ma le lalolagi o le ita lea i le Atua? O lenei, o sē fia uo ma le lalolagi, ua avea o ia ma ita i le Atua.”—Iakopo 4:4.

8. Ua faapefea ona aafia le Lotu Katoliko Roma i le faapolotiki i aso nei?

⁸ O le ā le tulaga ua iai i aso nei? O loo tumau pea le aafia ai o pope i faiga faapolotiki, e lē gata i ona taʻitaʻi ae faapena foi ma tagata lotu. Na avatu e pope talu ai nei a latou faamaoniga i Malo Aufaatasi e ala i lo latou taʻua o lenei faiga faatagāfai faaletagata e ala mai ai le filemu o le lalolagi. I se lomiga talu ai nei i le nusipepa aloaia a le Vatikana o le L’Osservatore Romano, na faasilasila mai ai e tusa e toafitu sui aloaia fou mai atunuu e fitu po o “amapasa agaʻi i le Pule a le Pope,” sa tuuina atu o latou tusi faamaonia i le “Tamā Paia.” Pe tatou te ono mafaufauina le ono aafia ai o Iesu ma Peteru i ni feofoofoaiga faapenei faavaomalo? Na teena e Iesu le avea ma tupu o tagata Iutaia ma faapea mai e lē mai i le lalolagi nei lona Malo.—Ioane 6:15; 18:36.

9. Aisea e mafai ai ona tatou faapea atu e leai se mea e sili ai le lotu Porotesano nai lo o a latou aumea Katoliko?

⁹ Pe e lelei atu ai taʻitaʻi Porotesano nai lo a latou aumea Katoliko? I le Iunaite Setete, o le tele o lotu faavae Porotesano, faapena foi ma le Mamona, ua mātauliaina faatasi ma faiga faapolotiki. O le Christian Coalition o loo telē sona aafiaga i faiga faapolotiki a le Iunaite Setete. O isi taʻitaʻi lotu Porotesano o loo manino  mai le mātauliaina faatasi o i latou ma nisi faiga faapolotiki. E galo i nisi taimi ae i le Iunaite Setete lava ia, o sui faapolotiki e pei o Pat Robertson ma Jesse Jackson sa avea pe o loo avea pea ma “Faifeau,” faapena foi le sui o le Palemene a Peretania o Ian Paisley mai Aialani i Mātū. E faapefea ona latou taʻutonuina o latou tulaga?—Galuega 10:34, 35; Kalatia 2:6.

10. O le ā le faamatalaga manino na faia i le 1944?

¹⁰ E pei ona sa fesili ai i le 1944 le tamai tusi o le Religion Reaps the Whirlwind, tatou te fesili foi tatou i le taimi nei e faapea: “Pe e mafai ea e so o se faalapotopotoga o ulu atu i ni feagaiga ma malo faalelalolagi ma taumafai ma le faamalosi i upufai faapolotiki a le lalolagi, o loo saili atu se tulaga lelei ma se puipuiga mai lenei lalolagi . . . ona avea ma lotu a le Atua po o le fai ma sui o Keriso Iesu i le lalolagi? . . . Ma le manino lava, o tagata lotu uma e sini faatasi ma malo o le lalolagi e lē mafai ona avea i latou ma sui o le malo o le Atua e ala ia Keriso Iesu.”

Le Agaga o Kaino i Lotu Sese

11. Na faapefea ona mulimuli atu lotu sese i le faataʻitaʻiga a Kaino?

¹¹ I le faagasologa mai o le talafaasolopito, ua faaalia ai e lotu sese le agaga sauā o Kaino, o lē na fasioti i lona uso o Apelu. “O le mea lea ua iloa ai le fanau a le Atua ma le fanau a le tiapolo. O i latou uma o e le fai le amiotonu, e le mai le Atua i latou, atoa ma ē le alolofa i o latou uso. Auā o le poloaiga lenei ua outou faalogologo i ai talu le amataga, ia tatou fealofani. E le pei o Kaino na i lē o loo leaga, na fasioti foi i lona lava uso; se a foi le mea na ia fasioti ai ia te ia? Ona o lana amio ina leaga, a o le amio a lona uso ua tonu.” Ona o le tapuaiga a lona uso sa mamā ma sa taliaina e le Atua, na faaoolima ai loa i ai Kaino—o le gaoioiga lava lena e iu i ai tagata e lē malamalama.—1 Ioane 3:10-12.

12. O ā faamaoniga o le aafia ai o lotu i taua atoa ma misa?

¹² Pe faamaonia e mea moni lenei tuuaʻiga o lotu sese? I le tusi Preachers Present Arms, na faapea mai le tusitala: “I le talafaasolopito o tagata . . . e lua lava malosiaga o loo faaauau pea ona faifai mea faatasi ma avea o se ʻau toalua. O lotu ma taua. Ae, i lotu iloga uma lava a le lalolagi, . . . e leai se isi e sili ona tuutoina atu i [taua] nai lo [Kerisinetoma].” I ni nai tausaga ua mavae atu, na taʻua ai e le nusipepa a Vancouver i Kanata, o le Sun e faapea: “Atonu o se vaivaiga o lotu autū uma lava o le mulimuli atu lea i le lotonuu . . . E iai ea se taua ua tauina e aunoa ma le faapea mai sa iai le Atua i itu uma taitasi?” Atonu ua e vaaia faamaoniga o lenei mea i lotu i lou vaipanoa. Ua avea ma tulaga e masani ai, e teuteu le laulau e faaaogā mo le tapuaiga i le falesa i fuʻa a atunuu. E te manatu o lē fea fuʻa e savali ai Iesu o se fitafita? O ana afioga o loo lagonaina pea i le faagasologa mai o senituri: “E le mai le lalolagi nei loʻu malo.”—Ioane 18:36.

13. (a) Ua faapefea ona lē taulau lotu sese i Aferika? (e) O le ā le faailoga e mātaulia ai le Faa-Kerisiano na taʻu mai e Iesu?

¹³ E lē o aʻoaʻoina e lotu a Kerisinetoma a latou lafu e faatatau i le upu moni e uiga i le alofa moni faaleuso. Nai lo lena, o loo faataga pea feeseeseaiga faaleatunuu, i vaega, ma ituaiga eseese e vaevaeina ai o latou tagata lotu. Ua faaalia i lipoti e faapea sa iai se vaega a taʻitaʻi lotu Katoliko ma le lotu Egelani i  fevaevaeaiga ia na iu ai i le matuā fasiotia o ituaiga o tagata i Rwanda. Na lipotia mai e le New York Times e faapea: “O le fasiotigā tagata faamoʻamoʻa lea sa faia i Rwanda na faapogaia ai le toatele o Katoliko Roma e manatu ua faalataina i latou e le lotu. Sa masani pea ona vaevaeina le lotu ona o eseesega i le va o ituaiga a tagata Hutu ma tagata Tutsi.” Na taʻua e le nusipepa lava lea se faamatalaga a se patele mai Maryknoll (o se vaega Katoliko) e faapea: “Na matuā lē taulau leaga lava le lotu i Rwanda i le 1994. O le toatele o tagata Rwanda ua tuua le lotu. Ua aunoa ma se faamoemoe e toe tuu atu i ai.” Pagā le feteenai ma afioga a Iesu ua faapea mai: “O le mea lea e iloa ai e tagata uma lava o oʻu soo outou, pe afai ua outou fealofani.”—Ioane 13:35.

14. O le ā se talafaasolopito tau amio ua faia e lotu iloga o ē e lē o ni Kerisiano?

¹⁴ E lē o faia foi e isi lotu iloga a Papelonia le Aai Tele se faataʻitaʻiga lelei. O le fasiotigā tagata faamoʻamoʻa lea na faia i le 1947, ina ua vaevaeina le malo o Initia, na faaalia ai e lei atiina aʻe e lotu iloga iina le faapalepale. O le faaauau pea o vesiga i le va o tagata i Initia e iloa mai ai o le toatele o tagata e lei suia lava. E letioa ona fai le faaiuga a le mekasini o le India Today e faapea: “O lotu ua na o se taʻu ae o loo faatinoina ai i totonu solitulafono e sili ona matuia. Ua ia faapogaia ia sauā matautia ma o se malosi e faaumatia ai.”

“Se Mea e Lē Talafeagai”

15. O le ā le tulaga o lotu i atunuu i sisifo?

¹⁵ E oo lava i ē tusitala i mataupu faalelalolagi o loo mātauina le lē taulau o lotu e faatalitonu, ma aʻoaʻo uiga lelei, ma ia teteeina faiga faalelalolagi. I lana tusi Out of Control na tusia ai e lē na avea muamua ma faufautua o le saogalemu o le malo a le Iunaite Setete, o Zbigniew Brzezinski e faapea: “O se mea e lē talafeagai ona o le manatu ‘ua maliu le Atua’ o loo sili ona lauiloa e lē i atunuu e Pulea i le faa-Komunisi . . . peitai e tupu mai i sosaiete saʻoloto faatemokalasi i Sisifo, lea ua latou lē tausia se tulaga mamā tau amio. O le mea moni i atunuu i Sisifo ua lē o toe avea lotu ma malosi e uunaia olaga o tagata.” Na faapea mai atili le tusitala: “Ua matuā faaitiitia lava le malosi o lotu i aganuu a tagata Europa, ma i aso nei i Europa—e sili atu i lo Amerika—o se sosaiete e faamuamua mea faalelalolagi.”

16, 17. (a) O le ā le aoaiga na aumai e Iesu e faatatau i taʻitaʻi lotu i ona aso? (e) O le ā se mataupu silisili lelei na faamatala e Iesu e faatatau i fua?

¹⁶ O le ā na fetalai ai Iesu e faatatau i taʻitaʻi lotu Iutaia o ona aso? “Ua tietie le au tusiupu ma le au faresaio i le nofoa o Mose [e aʻoaʻo atu le Torah, le Tulafono]. O lea ia outou anaana ai ma ia outou faia mea uma latou te fai atu ai ia te outou e anaana i ai; a e aua tou te faaaʻoaʻo i a latou amio; auā ua latou fai atu, a e latou te le faia.” Ioe, e lē o se mea fou le pepelo faalotu.—Mataio 23:2, 3.

¹⁷ Ua taʻusalaina lotu sese i ona fua. Ua matuā fetaui lava le manatu na faataatia mai e Iesu e faapea: “E faapea foi laau lelei taitasi ma fua mai i fua lelei; a o le laau leaga e fua mai i fua leaga. E le mafai i le laau lelei ona fua mai i fua leaga, e le mafai foi i le laau leaga ona fua mai i fua lelei. O laau uma e le fua mai i fua lelei, e taia ia ma lafoina i le afi. O lea foi tou te iloa ai i latou i o latou fua.”—Mataio 7:17-20.

18. Sa ono tausia faapefea e Kerisinetoma le mamā o ana aulotu?

 ¹⁸ Pe ana faapea e manatu mamafa lotu a Kerisinetoma i le faatatauina o le aoaiga faa-Kerisiano o le faateʻaina, po o le vavae ese mai, mo solitulafono uma o loo faia e i latou o loo faapea mai o ona tagata, o le ā e tupu? O le ā e tupu i ē talapepelo uma e aunoa ma se salamō, o ē faitaaga, o ē mulilulua, o ē tauatane, o ē maua mea i auala faapiopio, o ē solitulafono, o ē faaaogā ma faatau fualaau faasaina, ma ē o avea ma sui o se kegi solitulafono? E aunoa ma se fesiligia, o fua pala a Kerisinetoma ua talafeagai ai lava o ia mo le faaumatiaga mai le Atua.—1 Korinito 5:9-13; 2 Ioane 10, 11.

19. O ā ni taʻutinoga ua faia e faatatau i le taʻitaʻiga o lotu?

¹⁹ Na taʻutino mai e le fono aoao mo le Lotu Perepereane i le Iunaite Setete e faapea: “Ua matou fesagai ma se faalavelave matuia i sona tulaga tele ma aafiaga. . . . E i le va o le 10 i le 23 pasene o taʻitaʻi lotu i le atunuu atoa ua aafia i gaoioiga e faia ai amioga lē mamā faaleituaiga, po o le faia o feusuaiga ma tagata o le lotu, tagata o loo i lalo o la latou tausiga, tagata e faigaluega ia i latou, ma isi.” Sa manino ona tāaofai mai e se tagata faipisinisi i le Iunaite Setete lena manatu e faapea: “Ua lē taulau i faapotopotoga faalotu ona avatu tulaga mamā tau amio, ma i le tele o tulaga, ua avea i latou ma vaega o le faafitauli.”

20, 21. (a) Na faapefea ona taʻusalaina e Iesu ma Paulo le pepelo faafiaamiotonu? (e) O ā fesili o loo iai e ao ona taliina?

²⁰ O le taʻusalaina e Iesu o le pepelo faafiaamiotonu o taʻitaʻi lotu o loo tumau le moni i aso nei e pei ona sa iai i ona aso ina ua ia faapea mai: “O outou tagata faafiaamiotonu e tatau lava ia te outou le valoaga a Isaia, ua faapea mai, Ua ava mai ia te au lenei nuu i o latou laugutu, a o latou loto ua taumamao ia te au. E tapuai fua mai i latou ia te au i lo latou fai ma mataupu o poloaiga a tagata.” (Mataio 15:7-9) O loo faamatalaina foi lo tatou tulaga i aso nei i upu a Paulo ia Tito e faapea: “Ua latou taʻu ane ua latou iloa le Atua, a e faafiti ia te ia i a latou galuega, o inosia i latou ma faalogogata, latou te le faamaoni foi i se galuega lelei e tasi.”—Tito 1:16.

²¹ Na fetalai Iesu afai e taʻitaʻiina le tauaso e le tauaso, e paʻūū uma le toalua i le lua. (Mataio 15:14) Pe e te manao ea e faauma faatasi oe ma Papelonia le Aai Tele? Pe te manao ea e savali i le auala saʻo ma ou mata o loo pupula atu ma le olioli i faamanuiaga mai ia Ieova. O fesili ua fesagai nei ma i tatou: O lē fea tapuaiga, pe afai e iai, o fuaina mai fua faaleatua? E faapefea ona tatou mātauliaina le tapuaiga moni e talia e le Atua?—Salamo 119:105.

[Faaopoopoga i lalo]

Pe E te Manatua?

□ O le ā le tulaga o Papelonia le Aai Tele i le taimi nei i luma o le Atua?

□ O le ā le faavae ua faasalaina ai lotu sese?

□ Ua faapefea ona faaalia e lotu sese le agaga o Kaino?

□ O le ā le mataupu silisili na faamatala e Iesu e faamasino ai so o se lotu?

[Fesili mo le Suʻesuʻega]

[Ata i le itulau 13]

I le gasologa mai o le talafaasolopito ua aafia ai taʻitaʻi lotu i faiga faapolotiki

[Ata i le itulau 15]

O taʻitaʻi lotu nei sa avea foi ma tagata maualuluga o le malo

Katinale Mazarin

Katinale Richelieu

Katinale Wolsey

[Ē Ana le Ata]

O Katinale Mazarin ma Katinale Richelieu: Mai le tusi Ridpath’s History of the World (Tusi VI ma le Tusi V). Katinale Wolsey: Mai le tusi The History of Protestantism (Tusi I).