Le Tala Lelei o i le Lumanai!

E LAGONA e i tatou uma le faanoanoa i so o se taimi lava e tatou te maua ai tala lē lelei e uiga i mea tatou te aafia totino ai. Ae i se isi itu, tatou te olioli pe a faalogo i tala lelei—sina tala lelei o le olioli mo i tatou lava po o ē pele ia i tatou. Ae pe a aafia nisi i tala lē lelei ae lē o i tatou, e masani lava ona iai le uiga fia iloa po o le isuisu; o nisi ua oo lava ina fiafia e iloa tala lē lelei e oo i isi. O lenei tulaga atonu e mafai ona faamatala mai ai le pogai ua alumia tele ai tala lē lelei!

A o faagasolo le vaega muamua o le Taua Lona Lua a le Lalolagi, sa iai se faataʻitaʻiga manino o le fia iloa lē tatau i mala e aafia ai isi. O se vaatau e tusa ma le 10,000 tone le mamafa, o le Graf Spee, sa faualuga ai le fuāvaatau a Siamani i le 1939. Mo le tele o vaiaso sa matuā faatupu faalavelave ai lenei vaatau i vaaoloa o Amerika ma Peretania i le vasa Atalani i Saute ma le vasa Initia. Mulimuli ane, e tolu vaa mai Peretania na latou tuliloaina ma osofaia le Graf Spee, lea sa maliliu ai ni tagata ma afaina ai le vaa Siamani ma afea faatopetope ai e le vaa le taulaga o Uruguay i Montevideo mo le toe faaleleia. Na faatonuina e le malo o Uruguay lea vaatau ina ia vave ona tuuvaa ese atu, a lē o lea o le a taofia loa faamalosi. O se matuā fetauaiga na foliga mai e ono manumalo ai Peretania.

Ina ua salalau lenei tala, na togipauina ai e se vaega o tagata mauoloa i le Iunaite Setete se vaalele, i se tau e tusa ma le $2,500 Amerika mo le tagata e toatasi e malaga ai i Uruguay e molimauina lenei fetauaiga faamasaa toto. Sa matuā lē fiafia i latou, ona sa lei faataunuuina le taua. Na poloaiina malosi e Adolf Hitler le faatamaʻiaina o le Graf Spee. E faitau afe tagata matamata na lolofi ane ma faatumulia ai le talafatai o Montevideo e faatalitali ai le molimauina o sea fetauaiga i le sami, ae nai lo lea sa latou matamata ma faalogoina se pa leotele na faapogaia ai le Graf Spee e magoto ifo, na faatamaʻiaina e lona lava auvaa. Na pule le kapeteni i lona lava ola ina ua ia fanaina lona ulu.

E ui o nisi tagata e fiafia e matamata i faaaliga matautia, ae o le toatele lava ua ioeina lo latou manaomia o tala lelei nai lo tala lē lelei. Pe lē o le lagona ea lena o loo ia te oe? Aisea la, ua faamaumau ai e talafaasolopito le tele o tala lē lelei ae itiiti tala lelei? Pe mafai ea ona toe suia lenei tulaga?

Pogai o Tala Lē Lelei Uma

Ua taʻu mai e le Tusi Paia le taimi sa na o tala lelei lava na faalogoina i le aso atoa. O tala lē lelei o se mea sa lei iloa muamua, sa lei faalogoina lava. Ina ua maeʻa galuega faalefoafoaga a Ieova le Atua, sa lava saunia le lalolagi paneta mo le tagata ma meaola e olioli ai. Ua taʻu mai e le Kenese ia i tatou le tala e faapea: “Ua silasila atu le Atua i mea uma ua na faia, faauta foi, ua matuā lelei lava.”—Kenese 1:31.

O le leai o ni tala lē lelei sa lei umi ae mou atu talu ona uma le foafoaina o le tagata. A o lei maua se tama a Atamu ma Eva, sa lipotia atu tala lē lelei e uiga i le tetee faasaga i le Atua ma lana faatulagaga maopoopo lelei. O se atalii agaga sa maualuga lona tulaga sa lē faamaoni i lona tulaga maufaatuatuaina ma sa taulau o ia i le tosoina mai o le uluai ulugalii ina ia aufaatasi ma ia i lana fouvalega, ma ona ala taufaaʻoleʻole.—Kenese 3:1-6.

O le tele o tala lē lelei na molimauina e tagata na amata mai i lena taimi. Aua neʻi faateʻia i ala taupulepule, taufaasese, pepelo, mea lē moni, ma ni nai mea e lē moni atoatoa ua avea ma se vaega tele o tala lē lelei ia ua faapea ona lofia ai le lalolagi talu mai lena taimi. Sa tuuaʻia e Iesu Keriso Satani le Tiapolo o sē na tupuga mai ai tala lē lelei, i lona  taʻu atu i taʻitaʻi lotu i ona aso e faapea: “O outou nai lo outou tamā le tiapolo, tou te fia faia foi mea e tuʻinanau i ai lo outou tamā. O le fasioti tagata ia talu le amataga, e le tu lava ia i le upu moni, auā e le o i totonu lava ia te ia le upu moni; a tautala ia i le tala pepelo, o lana lava lea e tautala aʻi, auā o le pepelo ia, ma le tamā o le pepelo.”—Ioane 8:44.

A o faateleina pea le faitau aofai o tagata, o le faateleina foi lea o tala lē lelei. E ui i lea, ua lē o uiga ai e faapea sa leai ni taimi e olioli ma fiafia ai, auā sa tele vala o le olaga sa faapogaia ai le olioli. Peitai, o le anoanoai o faafitauli ma faanoanoaga ua manino le iai a o faasolo mai tupulaga e oo mai i le taimi nei.

E iai foi se isi pogai mo lenei tulaga faanoanoa. O o tatou faanaunauga tuufaasolo mo mea sese ma le pagatia. Ua faasino mai e Ieova lava ia lenei pogai lē maalofia o tala lē lelei ina ua fetalai e faapea: “E . . . leaga o manatu o loto o tagata e afua mai ina o tama iti.”—Kenese 8:21.

Aisea ua Faateleina ai Tala Lē Lelei?

Peitai, o loo iai se mafuaaga ua faatuputeleina ai tala lē lelei i lenei 20 senituri. O lenei mafuaaga ua manino ona faamatalaina e le Tusi Paia, lea na valoia mai e faapea o tagata o lenei 20 senituri o le a ulu atu i se vaitaimi tutasi ua taʻua o “aso e gata ai” po o “ona po o le iuga.” (2 Timoteo 3:1; Tanielu 12:4) O valoaga ma mea tutupu faale-Tusi Paia ua faailoa ai lenei “vaitaimi o le iuga” na amataina i le 1914. Mo le auiliiliga faale-Tusi Paia e faamaonia ai lenei mea, faamolemole tagai i le mataupu e 11 o le tusi Le Poto e Taʻitaʻia ai i le Ola e Faavavau, ua lomia ma faasalalauina e le Watchtower Bible and Tract Society of New York, Inc.

O aso e gata ai sa tatau ona amata i se faalavelave na faapea ona faapogaia ai le salalau atu o tala lē lelei i le lalolagi. O le ā lena faalavelave? O le lafoina ifo lea o Satani le Tiapolo ma ana ʻau o temoni mai le lagi. E mafai ona e faitau i lenei faamatalaga manino i le lē maalofia o le faateleina o tala lē lelei o loo i le Faaaliga 12:9, 12 e faapea: “Ua lafo foi le tarako tele, o le gata tuai lea, ua igoa i le tiapolo, i le ma Satani, o lē faasese i le lalolagi uma; ua lafo ifo i le lalolagi, ua lafo foi ana agelu faatasi ma ia. . . . Oi talofa ia te oulua le fanua ma le sami, auā ua alu ifo ia te oulua le tiapolo ua lotoa tele, auā ua na iloa ua saasaa ona po.”

O lea la, po o le ā lava le taimi o totoe seia oo atu i le faaiuga o aso o le iuga, e tatou te faatalitalia lava tala lē lelei e faaauau ma atili faateleina i sona tulaga matautia.

O Lenei Tulaga o le a Lē Faaauau ai Pea

O se fiafiaga mo i latou o loo aināina le lalolagi, auā o le tulaga faanoanoa ua mafua ai ona sosolo tala lē lelei o le a lē faaauau pea ona iai. O le mea moni, e mafai ona tatou fai atu ma le mautinoa e faapea o aso mo le faaauauina o tala lē lelei ua faaitiitia. O lea tulaga e iai le faamoemoe, e tusa lava pe e lē o foliga mai faapena. Ua i faitotoa le iuga o tala lē lelei uma ma o le a faaiuina moni lava e le Atua i lana taimi atofaina.

E mafai ona tatou mautinoa lenei mea auā o aso e gata ai o loo valoia lona tumutumuga pe a faaiuina e le Atua ma aveesea ai so o se mea e faapogaia ai tala lē lelei. O le a ia aveesea tagata o loo faatupuina amioleaga po o fevaevaeaiga sauā, o ē lē fia suia ma lē fia liliu ese mai o latou ala sese. O lenei tumutumuga o le taua i le aso tele o le Atua Silisili Ese, ua lauiloa o le taua o Amaketo. (Faaaliga 16:16) A maeʻa lea, ona saisaitia lea o Satani le Tiapolo ma ana ʻau o temoni. Ua faamatala e le Faaaliga 20:1-3 le fusifusia o Satani, le tupuaga o tala lē lelei uma lava e faapea: “Na aʻu iloa foi le agelu ua alu ifo i le lagi, ua ia te ia le ki o le to e le gata, ua i lona lima foi le maea uamea tele. Ua pue foi e ia le tarako, o le gata tuai, o le tiapolo lea ma Satani, ua ia fusifusi foi ia te ia i tausaga e afe. Ua ia lafo foi ia te ia i le to e le gata, ua pupuni foi ia te ia, ma tuuina atu le faamaufaailoga i  ona luga, ina ia le toe faaseseina e ia o nuu.”

A mavae nei mea mataina o le a sosoo ai se taimi e lei iai muamua o tala lelei mo le lalolagi ma ē o loo nonofo ai. O ē nonofo ai e aofia ai le faitau miliona o ē faasaoina mai i le taua faaiu o Amaketo ma le faitau piliona o ē o le a faatutūina mai tuugamau na momoe ai i le oti. O le tala e silisili i tala lelei uma o loo faamatalaina i le tusi mulimuli o le Tusi Paia e faapea: “Ua i ai le afioaga o le Atua faatasi ma tagata, e mau foi o ia ma i latou; e fai foi i latou mona nuu, e ia te i latou le Atua lava. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 21:3, 4.

Pe e mafai ona faaāta i lou mafaufau lena taimi fiafia? O le mea moni o se lumanai matagofie le lē toe iai o ni tala lē lelei. Ioe, o tala lē lelei uma lava o le a faaiuina ma o le a lē toe lagonaina lava. O le a na o tala lelei o le a iai, ma o le a faateleina pea e faavavau.