Se Faatelega Faatasi ma le Faamanuiaga a Ieova

O SE polokalame o le faapaiaina na faia i le po o Setema 18, 1995, na faamatilatila ai e faapea, ua faamanuiaina moni lava e Ieova le Atua le faatelega o ana Molimau i le nofoaga o lo latou ofisa ulu i le lalolagi, i Brooklyn, i Niu Ioka.

E sili atu i le 6,000 i latou na faalogologo i le polokalame o le faapaiaina. Na faapotopoto i latou i Brooklyn, o iina na faafoe atu ai le polokalame, faapea foi ma isi nofoaga, e aofia ai fale tetele o Molimau a Ieova e latalata i Patterson ma Wallkill, i Niu Ioka, ma lo latou lālā e latalata i Toronto, i Kanata. O i latou na iai i isi nofoaga e ese mai i Brooklyn, na faalogologo i taualumaga o le polokalame e ala i laina o telefoni na faafesootai i ai.

Se Polokalame Faamafanafana Loto

O tagata Peteli, e pei ona taʻua ai le aufaigaluega tauofo, na faalogologo i le polokalame, ua faia aʻe ai se vaega tele o le aiga Peteli i le lalolagi aoao, e sili atu i le 16,400 tagata. O na tagata o loo auauna i le tusa ma le selau atunuu, o iina latou te lomia ai lomiga faale-Tusi Paia ma saunia ai auaunaga lagolagosua mo le sili atu i le 78,600 faapotopotoga o Molimau a Ieova i le lalolagi.

Na matuā aloalo uma atu tagata ina ua amata le polokalame i le 6:30 i le afiafi i se pese, ona sosoo ai lea ma le tatalo na faia e Karl Klein. Na faafeiloaia ma le mafana e le taʻitaʻifono o le polokalame, o Lloyd Barry, tagata uma i ni nai upu puupuu e faatatau i le uiga o le aso. Na autaluina e Albert Schroeder le lesona o Le Olomatamata mo le vaiaso, ona sosoo ai lea ma le talanoaina e Daniel Sydlik o le matua e faapea: “La Tatou Auaunaga Paia i Peteli.” O i latou na muai amataina le polokalame, o ni sui uma o le Vaega Pule o Molimau a Ieova.

O isi vaega e lua o le polokalame na sosoo ai e faapea—“Faafetaiaia lo Tatou Manaoga mo le Faateleina o Fale e Nonofo Ai, 1974-1995,” ma “O Mea Tāua o le Toe Faafouga o Peteli ma Faugafale i Brooklyn”—na faatomuaina ai mea tāua e faatatau i le fausiaina, le faatauina mai ma le toe faafouina o fale na faapaiaina. O faamatalaga, sa taulai atu ai manatu i le fale e nonofo ai lea na seʻi faatoʻā uma ona fausia, lea ua nonofo ai nei le tusa ma le afe tagata Peteli. O lenei fale e 378 futu [po o le 115 mita] le maualuga, i le 90 Sands Street, e sosoo ma le fale lomitusi.

O le polokalame na faatomuaina ai le lauga o le faapaiaga na faia e Milton Henschel, le peresitene o le Watch Tower Bible and Tract Society. Na ia faamatalaina ni faaaoaoga faale-Tusi Paia o ni fale na faapaiaina muamua mo le faaaogaina i le auaunaga ia Ieova. Ina ua uma se pese, ona faaiuina ai lea o taualumaga i se tatalo na faia e Carey Barber, o se tasi foi o le Vaega Pule. Ae o ā nisi o mea tāua o le polokalame?

O Fale na Faapaiaina

Na faamatalaina e le ovasia o le Aiga Peteli, o George Couch, e faapea, e 17 fale e nonofo ai tagata ua faaopoopoina talu mai le faapaiaga mulimuli o se fale na nonofo ai le aiga Peteli i Brooklyn, ia Me 2, 1969. * O nei fale, a lē o ni fale fou faatoʻā uma ona fausia, po o ni fale na faatau mai ma toe faafouina. O lenei la faapaiaga, sa patino lava i fale nei e 17 mai nai tamai fale e lua—ia na faatauina talu mai tausaga o le 1940, ae na toe faafouina e avea ma fale e nonofo ai le aufaigaluega i Peteli—faapea ma le falegaosimea ma fale mo ofisa ia na fausia pe na faatauina talu mai le taimi na faapaiaina ai fale o loo avea nei ma ofisa ulu o Molimau a Ieova ia Mati 15, 1982. *

O le fale aupito telē o fale na faapaiaina, lea e i le 360 Furman Street. Na uluai fausia i le 1928, na faatauina mai e Molimau a Ieova ia Mati 15, 1983, ma toe faafouina atoatoa ai. O  le telē o le fola, e miliona futu faatafafa [po o le 93,000 mita faatafafa], pe e toeitiiti lava atoa le 23 eka [po o le 9 hekatea]. O isi fale na aofia ai i le faapaiaga, o le falegaosimea i le 175 Pearl Street, faapea ma faletaavale tetele na fausia i tausaga na seʻi faatoʻā mavae atu.

Le Pogai e Manaomia ai Nisi Fale

I le 1969, ina ua faapaiaina le fale mulimuli o fale e nonofo ai le aiga Peteli i Brooklyn, sa iai se tumutumuga e 1,336,112 Molimau na talaʻiina le tala lelei o le Malo o le Atua i le lalolagi aoao. Ae i le 1995 na iai le 5,199,895 o loo faia faapea, e tolu ma le ʻafa taimi ua sili atu ai ona toatele! I lea, ina ia ogatasi ma le manaoga ua faatuputeleina mo lomiga faale-Tusi Paia, na faateleina ai le aofai o le aiga Peteli i Brooklyn mai le 1,042 tagata sa iai i le 1969 i le sili atu i le 3,360 ē o loo nonofo nei i fale na e 22!

 Na talanoaina e George Couch le auala na faafetaiaia ai le manaoga mo nisi fale faaopoopo mai le 1974 e oo i le 1995. I le amataga lava o tausaga o le 1970, na lisiina ai e Molimau a Ieova nisi o fogafale o le faletalimalo na latalata ane, o le Towers Hotel, e nonofo ai nisi o le aiga Peteli ua faatoateleina. Ia Tesema 1973, na tusi atu ai Nathan Knorr, o lē na avea ma peresitene o le Sosaiete i lena taimi i le Ofisa o Peteli ma le pule o le Towers e faapea, ua fuafuaina e le Sosaiete o le a ‘siitia ese mai i le Towers Hotel ia Oketopa 1, 1974.’

Fai mai le uso o Couch, na matuā faateʻia lava o ia ona sa leai se isi mea e mafai ona nonofo ai tagata Peteli ia o loo nonofo i le Towers. Na faateʻia foi le pule o le Towers ia, talu ai sa latou faalagolago i tupe totogi a le Sosaiete e faaolaola ai lo latou faletalimalo. O le iuga, na uunaia ai loa e le pule o le Towers ia Molimau a Ieova e latou te faatauina le faletalimalo. Na latou faapea mai: “Talu lava ona matou iai iinei, ua faatuputeleina lava outou, ma tou te manaomia le fale.”

Na tali atu le sui o le Sosaiete e faapea: “O loo tumu le fale i tagata nofo lisi. Afai matou te faatauina le fale, matou te mananao e tuu ai o matou lava tagata iina.”

Na folafola mai e le pule o le Towers e faapea: “O le a matou faagaogaoina le fale mo outou.” Ia, e lei pine lava mulimuli ane, ae faatau loa e Molimau a Ieova le fale o le Towers i se tau talafeagai. “Aisea na tusia ai e le uso o Knorr lena tusi?” Na fesili atu ai le uso o Couch i lana aofia o loo fia iloa. “Atonu na te lei iloa foi e ia, ae o lena mea na tupu, na mafua ai ona faatau atu le Towers Hotel i le Sosaiete o le Olo Matamata.”

Na faamatalaina foi e le failauga le auala na faatau ai e Molimau a Ieova le fanua i le 97 Columbia Heights, sa uluai avea ma tulaga o le faletalimalo taʻutaʻua o Margaret Hotel, e i le isi itu auala e faafesagai ma le Aiga Peteli  tuai. E talafeagai lelei lava le nofoaga, auā e faigofie ona faafesootai ma le fale Peteli i le eliina lea o se auala i lalo ifo o le alatele. Ia Fepuari 1980, ina o faagasolo le toe faafouina o le fale, na mu ai le fale atoa. O lea, sa iai faafitauli na lē mafai ai e le tagata e ona le fale ona toe faia se fale fou i le nofoaga lea, ma na ia faatauina atu ai le fanua i Molimau a Ieova.

Na faaalia e le uso o Couch e faapea: “O le mea moni, o nei fale taitasi uma, e iai se tala faaoso naunau e mafai ona faasino saʻo atu i le mafuaaga e tasi—e faapea o Ieova le Atua o lē o loo faatonutonuina le faalapotopotoga vaaia ina ia maua lena fale patino.”

Le Tala e Uiga i le Fale i le 90 Sands

O le fale aupito fou ma aupito telē, o loo i le 90 Sands Street. Ina ua faatauina le fanua e Molimau a Ieova ia Tesema 1986, sa iai faatasi ma se falegaosimea telē i le 160 Jay Street. * Na talepe i lalo le falegaosimea, ma ia Aokuso 30, 1990, na faailoa atu ai i le aiga Peteli e faapea, ua tuuina mai se pemita mo le fausiaina o se fale fogafale 30 e nonofo ai i lea nofoaga.

I se faatalanoaga na faia e se sui o le Vaega Pule, o Theodore Jaracz, na faamatala ai e Max Larson le ovasia o falegaosimea a le Sosaiete i Brooklyn le auala na tuuina mai ai le faatagaga mo le fausiaina o le fale e nonofo ai i le 90 Sands Street. Na faamatala e le uso o Larson e faapea, e tāua tele le mea na tupu i tuā i le 1965.

I tuā i lena vaitaimi, sa manao le Sosaiete e faatūina se falegaosimea fogafale sefulu i se fanua e sosoo atu ma isi ona falegaosimea, ae o le āiāiga mo lena fanua, na faatagaina ai e na o fale e taʻi fogafalelua. Na ioe se tagata tusiata na te saunia ni ata mo le falegaosimea fou ua fuafuaina, ae na ia faapea mai: “Ou te lē manao e faamasiasia aʻu lava i le tuuina atu o nei ata i le komiti.” Sa ia mautinoa lelei e faapea o le a lē mafai ona suia e le Komiti o Tulafono ma Talosaga la latou āiāiga e uiga i le fanua. Ae ina ua faamaonia ata mo le fausiaina o le fale, sa ia faapea mai ma le ofo tele: “Na mafai faapefea ona outou maua o lena faamaoniga!”

Na faaauau mai Larson e faapea, o le mafuaaga, ina ua toe suia āiāiga e faatatau i le fanua mo le fausiaina ai o lo tatou fale fogafale sefulu, na suia ai foi ma āiāiga i isi fanua e latalata ane e aofia ai ma le fanua lea e iai le fale i le 160 Jay Street. Ma o le mea e ofo tele ai, ona na toe suia āiāiga mo lena fanua ina ia mafai ona fausia ai se faletalimalo. Ae na faailoa mai e Larson e faapea, o se mea sa lei iloaina e se tasi—pe ā ma le 25 tausaga mulimuli ane, ina ua amata ona matou vaavaai mo se fanua e fausia ai se fale Peteli fou. O lea, na toe iloaina ai le āiāiga mo le fanua!

Na faamatala e le uso o Larson le mea na tupu: “Ina ua matou saunia ata mo lo tatou fale fogafale 30 ma ave atu i le matagaluega o faugafale, na taʻu mai ia i matou e faapea: ‘E lē mafai ona faia so outou fale e nonofo ai iina. O fanua uma na e mo na o falegaosimea, ma e lē mafai e le Komiti o Tulafono ma Talosaga ona suia la latou āiāiga ona o outou.’

“Na matou faailoa atu i alii ofisa e faapea, ‘E lē tatau ona latou suia le āiāiga. Ua uma ona fuafuaina mo le faatūina ai o se faletalimalo.’ Ina ua latou suʻeina i faamaumauga, sa faateʻia i latou! Ia o le auala lena na maua ai lo tatou fale fogafale 30,” na faaiu mai ai Larson.

Iloatino le Faamanuiaga a Ieova

Na tusi se faisalamo o le Tusi Paia e faapea: “Afai e le atiina ae e Ieova le fale, e galulue fua i latou o e atiina ae.” (Salamo 127:1) E manino lava, o loo iai le faamanuiaga a Ieova i le galuega o faugafale a Molimau a Ieova ina ia faafaigofieina ai le galuega talaʻi ma le aʻoaʻo atu i le lalolagi aoao lea na poloaiina e Iesu ona soo ina ia faia.—Mataio 24:14; 28:19, 20.

O i latou na maua le faaeaga e faalogologo ai i le polokalame ia Setema 18, 1995, na matuā faafiafiaina ina ua iloatino lena faamanuiaga ona o le faatelega i le nofoaga autū o auauna a Ieova i le lalolagi, i Brooklyn, i Niu Ioka. E mafai e tagata o Ieova ona mautinoa e uiga i le faaauauina pea o lana faamanuiaga a o faaauau ona latou faia o le mea ua ia poloaiina.

[Faaopoopoga i lalo]

 [Ata i le itulau 23]

90 Sands St. • 1995

 [Ata i le itulau 24,25]

O nisi na o fale faaopoopo e nonofo ai ia na faapaiaina

97 Columbia Hts. • 1986

Bossert Hotel, 98 Montague St. • 1983

34 Orange St. • 1945

Standish Hotel, 169 Columbia Hts. • 1981

67 Livingston St. • 1989

108 Joralemon St. • 1988

Towers Hotel, 79-99 Willow St. • 1975

[Ata i le itulau 26]

175 Pearl St. • 1983

69 Adams St. • 1991

360 Furman St. • 1983