Se Tauiviga Taulau Manuia o le Molimau Atu i Eleni

UA LOA ona fesagai Molimau a Ieova ma teteega i Eleni. Ua sauāina e nisi o leoleo, faamasinoga, ma taʻitaʻi o le malo ia Molimau, e masani lava ona o uunaiga mai taʻitaʻi o le Lotu Orthodox i Eleni. I nisi taimi, ua faia ai se faamolemolega e faapea ona o le tulafono a Eleni e faasa ai le faaliulotuina o isi, o nisi taimi e faapea ona o le tetee o Molimau e faavae i le Tusi Paia, ua latou lē ō ai i taua po o le lē talia o tuigatoto.—Isaia 2:2-5; Galuega 15:28, 29.

I se taumafaiga e faaofi atu le malamalamaga sili i taʻitaʻi loto faamaoni o Eleni, na faia ai talu ai nei e ni Molimau e 200 o ē ua talia e le malo o Eleni o ni faifeau lotu, faapea ma nisi Molimau o ē o loo galulue i le faiva faaloia se tauiviga i le atunuu atoa. Na latou ofoina atu se polosiua na fuafuaina faapitoa, o lona matua e faapea, Jehovah’s Witnesses in Greece, faapea ma le tusi, Jehovah’s Witnesses—Proclaimers of God’s Kingdom. Na latou saunia foi se tusi o ni faamaoniga e faaalia ai e leai se faavae talafeagai faaletulafono e ala ai ona sauāina Molimau a Ieova. Na asiasi atu Molimau i taʻitaʻi leoleo, i pulenuu, i loia e tutū mo le malo, ma isi lava tagata maualuluga.

O le ā le tali mai? E faitau selau mea lelei na oo i ai. Manatu i nisi o faaaoaoga.

Na talia fiafia e le pule o se ofisa o leoleo i Maketonia i Sisifo ia uso ma faapea atu: “Ua leva tausaga talu ona ou iloa outou, . . . ma ou  te viiviia le filemu ma amioga lelei a o outou tagata. . . . Ou te lē ioe i le tulafono e faasaina ai le faaliulotuina o se tasi, ma ana faapea e ia te au le pule, semanū ua ou soloia lena tulafono.”

Na faia e pule o ofisa eseese o leoleo i le tele o aai faamatalaga e pei o nei: “Ou te faamālō atu ia te outou ona o le galuega ua outou faia mo le lelei lautele.” “E lē faatupuina lava e tou tagata ni faafitauli mo leoleo; ua outou faataunuuina se galuega mo le lelei lautele.” “E matuā leai lava se faafitauli i le va o outou ma matou. Matou te faaaloalo ia te outou ma viiviia outou.”

I Piraeus, na faailoa atu ai ma loimata e se alii ofisa sili o le vaega a leoleo mo le saogalemu i uso e faapea, ua ia iloa tatalo atu i le suafa o Ieova le Atua e ala ia Iesu Keriso. Sa ia faaofoina atili Molimau ina ua ia taʻu atu ia i latou e faapea, sa ia iloa latou te faatalitalia ni sauāga a o lumanai Amaketo, ma ua ia faamoemoe o le a faaaogaina o ia e le Atua e fesoasoani ia i latou i lena taimi! Sa ia talia le valaaulia a uso ina ia faia nisi talanoaga atili.

Ua Tali Mai Taʻitaʻi o le Malo

Na faapea mai se tasi o pulenuu i Thessaly e faatatau i le tusi, Proclaimers: “Ua tatau ona tuu le tusi lenei i le faletusi o le malo—i se mea ia iloa uma ai!” O lea, na ia aveesea ai nisi o tusi mai le fata ma faatū ai le tusi Proclaimers iina, ina ia mafai ai ona iloa atu lona faavaa.

I Eleni i mātū, na talia ai ma le mafana e se pulenuu le asiasiga a uso ma faapea atu: “O outou o ni tagata e aupito sili ona lelei ou te manao ina ia iai i laʻu puleaga.” Na taʻu atu e se pulenuu agalelei i Euboea i mātū i uso e faapea: “Sa avea muamua aʻu o se fitafita i le vaegaʻau. Ae o outou—ou te matuā viia lava.” Sa ioe ma le fiafia o ia i faamatalaga na faia atu e Molimau. Ina ua latou faaali atu ia te ia ni tusi eseese na lomia e le Sosaiete o le Olo Matamata, na ia faapea mai: “Afai ou te folafola atu nei o le a ou faitauina uma na tusi, pe tou te aumaia la ia te au?” Na latou tali atu e faapea: “O le mea moni—o au tusi uma lava na!” Sa matuā faafiafiaina o ia ma na tau lē mafai ona ia tuu atu uso e ō!

I se nuu e tau lata ane i le taulaga i Attica, na talia fiafia ai e se pulenuu le lomiga na  ofoina atu e uso ma talosaga atu ia i latou ina ia faaauau pea ona aumai ia te ia lomiga a le Sosaiete. A o latou foi atu, na ia taʻu atu ia i latou e faapea: “Ua matuā lē fiafia lava tagata i faiga faapolotiki ma ua saili ai mo le upu moni i se isi mea. Ou te mautinoa e faapea, e amata atu nei o le a outou matuā pisi ai ona o loo ia te outou le upu moni.”

Ua Tali Mai Loia a le Malo

E manatua e uso o ē na asiasi atu i se loia fesoasoani a le malo i Eleni i mātū e faapea: “Sa maofa o ia i a tatou lomiga ma le auala o faafoeina ai, faapea foi ma taumafaiga ua tatou faia e faamautinoa ai o loo maua e o tatou tagata le fesoasoani pe a fesagai ma le mataupu tāua e faatatau i le tuiina o le toto. I le iuga, na ia faafetai mai ia i matou ma faamālō ma le mafana mai ia i matou ona o lo matou tausolomua ona asiasi atu ma faailoa atu ia te ia. Mulimuli ane, na matou iloa ai e faapea, i le fa tausaga ua mavae, o ia lea na telefoni atu i leoleo ma poloaiina le puʻea faapagota o uso e toalua o ē na auai i le auaunaga i le fanua.”

Na maofa ni loia Molimau se toalua o ē na asiasi atu i ofisa o loia a le malo i Atenai ina ua vaaia ai se loia ua matua ma e matuā lauiloa ma faaaloalogia a le malo, o faalatalata atu ia i laua. Na ia taʻitaʻi ese i laua ma fai atu ia te i laua, o le tulafono e faasa ai le faaliulotuina o tagata, e leai se faavae, ma ua faapogaia ai le fenuminumiai i faiga o faamasinoga i Eleni. Sa ia faafetai atu ma lūlūlima ma le fiafia ma i laua.

I le itu i mātū o Eleni, na talia fiafia ai e se loia faaleuo a le malo se lomiga. A o ia suʻeina itulau taitasi o le tusi, Questions Young People Ask—Answers That Work, sa faateʻia o ia i le vaaia o le matalasi o mataupu eseese i le faasologa o mataupu. Na ia faapea mai: “O mataupu o loo aumaia i lenei tusi, ou te lei vaai muamua lava i ai i aʻoaʻoga uma a le Lotu Orthodox i Eleni.”

Na ioeina e se loia a le malo i Boeotia e faapea, i aso ua mavae, o ia na tuuina atu poloaiga mo le tuiina faamalosi o toto i Molimau, o se mea e lē tusa ma lo latou manao. Ae ina ua uma ona faamalamalama ia te ia e uso e tusa ai ma le mataupu, na ia folafola mai e faapea: “I le lumanai, ou te lē toe tuuina atu ai se poloaiga faapena!” Na ia faaiu mai e faapea, e tatau ona faafesootaia le Komiti mo Fesoasoani Manaomia Faafomaʻi a Molimau a Ieova pe a aafia le mataupu i le toto, ina ia iloiloina mea uma e mafai ona sui ai le toto. Sa ia talia ma le fiafia le tusi o le Young People Ask.

Ua Tali Mai Pule o Faletusi

Sa faailoa atu foi le mataupu i le toatele o pule o faletusi. I se tasi o faletusi i Atenai, na talia ai e se alii pule faaaloalo se lomiga ma faapea mai: “O se mea lelei tele le aumaia o a outou tusi ia i matou, auā o le tele o tusi o loo i lo matou faletusi, e faasagatau ia te outou. . . . Sa lē fiafia lava se patele ina ua vaai i a outou tusi i le faletusi. . . . Ae e lē afaina. E tatau lava ona faalogo atu i manatu uma.”

O se tagata maualuga foi i se faletusi o le malo i Crete, o lē na iloa Molimau a Ieova ia na taofia i le nofoaga o vaegaʻau, na ia taʻu atu i uso e faapea, na ia mātauina lava le teena e Molimau o le faia o se vaega i le taua. Sa tuufesili ifo pea o ia ia te ia e faapea, ‘Aisea ua puapuagatia ai nei tagata?’ Na ia talia lomiga mai uso ma faapea mai e tusa ai ma la latou tauiviga o loo faia: “Ua outou faia se galuega e sili ona lelei, ma sa tatau ona faia lenei galuega i le tele o tausaga ua mavae. . . . I Eleni, o loo tele ai faiga faaituau.” Sa ia talosaga i uso ina ia toe asiasi vave atu ia te ia.

I le taimi o lenei tauiviga faapitoa, na tufaina atu ai e uso le silia i le 1,000 tusi o le Proclaimers, e 1,600 polosiua, Jehovah’s Witnesses in Greece, faapea ma le faitau selau o tusi ma mekasini. O le isi foi mea e sili atu ona lelei, o lo latou talanoa faafesagai lelei lea ma le faitau selau o tagata maualuluga o le malo o Eleni. Ua iai nei le faamoemoe o auauna faamaoni a Ieova i Eleni ma le lalolagi aoao, o le a maua e faipule silisili o Eleni se manatu lē faaituau e uiga i Molimau a Ieova.