Auauna Atu i Lalo o le Tausiga Alofa a Ieova

E PEI ONA FAAMATALAINA E LAMBROS ZOUMBOS

Na ou fesagai ma se filifiliga faigata: pe talia le ofo a le uso mauoa o loʻu tamā e avea ai aʻu o se pule i le tele o ona fanua ma fale—ma foia ai faafitauli tau tupe o loʻu aiga—po o le avea ma faifeau faataimi atoa a Ieova le Atua. Seʻi oʻu faamatalaina atu po o ā mafuaaga na iu ina taʻitaʻiina ai aʻu e faia laʻu filifiliga.

NA OU fanau i le taulaga o Volos, i Eleni, i le 1919. Sa faia se pisinisi a loʻu tamā, o le faatauina atu lea o lavalava ma mea tau i tamaloloa, ma sa matou olioli ai i le manuia faaletino. Ae ona o le paʻū o le tamaoaiga i tausaga faaiuiu o le 1920, na uunaia faamalosi ai Tamā e faailoa atu e faapea, ua gau lana pisinisi ma oo ai ina tapunia lana faleoloa. Sa ou lagona le faanoanoa i taimi uma na ou vaaia ai foliga atuatuvale o loʻu tamā.

Na umi se taimi na ola matuā matitiva ai loʻu aiga. I aso uma lava, ou te tuua vave ai le aʻoga mo se itula, ina ia ou alu ou te tū i le laina faatalitali mo tufagā meaʻai. Ae peitai, e ui lava i lo matou matitiva, ae sa matou olioli i se olaga toafilemu i le aiga. Sa ou moomoo lava e fia avea aʻu ma fomaʻi, ae ina ua sefululima oʻu tausaga, na tatau ai loa ona ou tuua le aʻoga ae ou faigaluega e fesoasoani ai i le tausiga o loʻu aiga.

O lea, i le taimi o le Taua Lona Lua a le Lalolagi, na nofoia ai e ʻau a Siamani ma ʻau a Falani ia Eleni, ma sa oo ai se oge matautia. Na masani ona ou vaai i ni uo ma ē masani o maliliu i ala tetele ona o le matelaina—o se vaaiga matautia o le a lē mafai ona galo ia te au! I se tasi taimi, e 40 aso na ola ai lo matou aiga e aunoa ma se falaoa, o se meaʻai masani i Eleni. Ina ia matou ola, na ma ō ai ma loʻu uso matua i nuu tuaoi, ma aumai ai ni pateta mai uo ma tauaiga.

O se Maʻi ua Avea ma Faamanuiaga

I le amataga lava o le 1944, na oo ai ina ou maʻi tigaina i se ituaiga o maʻi e taʻua o le pleurisy na aafia ai oʻu māmā. I le tolu masina na ou iai i le falemaʻi, na aumai ai e le atalii o le uso o loʻu tamā ni tamai tusi se lua ma faapea mai: “Faitau tusi ia; ou te mautinoa o le a e fiafia i ai.” O tamai tusi, Who Is God? ma le isi tusi, le Protection, na lomia e le Watch Tower Bible and Tract Society. Ina ua uma ona ou faitau i ai, sa ou talanoa atu loa i isi tagata mamaʻi e uiga i mea o loo iai.

Ina ua ou tuua le falemaʻi, sa amata loa ona ou auaufaatasi atu ma le faapotopotoga o Molimau  a Ieova i Volos. E ui lava sa faataotolia aʻu mo se masina i loʻu fale o se maʻi tausavali, ae sa ou faaaluina le ono i le valu itula i le aso e faitau ai kopi tuai o Le Olomatamata faapea ma isi lomiga e lomia e le Sosaiete o le Olo Matamata. O le iuga, na vave ai lava ona ou tuputupu aʻe faaleagaga.

Na Toeitiiti Lava a Oo ai le Oti

I se tasi aso i le taulotoaiga o le 1944, sa ou nofonofo ai i se nofoa i le paka i Volos. Na faafuasei lava ona siomia le paka e se vaega e latou te lagolagoina le vaegaʻau a Siamani lea o loo nofoia Eleni, ma puʻea ai faapagota tagata uma na iai. Pe tusa ma le toʻa luasefulufa i matou na taʻitaʻiina atu i le auala agaʻi i le nofoaga autū o Leoleo a Siamani lea sa i le fale e faaputu ai le tapaa.

Ina ua mavae ni nai minute, sa ou faalogo ai o valaau mai se tasi i loʻu igoa ma le igoa o le tagata lea na ma talanoa i le paka. Na tālo mai ia i maʻua se alii ofisa o le vaegaʻau a Eleni ma fai mai ia i maʻua e faapea, ina ua iloa mai e se tasi o loʻu aiga o aumai faapagota i maʻua e fitafita, sa ia taʻu atu loa ia te ia o i maʻua o Molimau a Ieova. Ona faapea mai lea o le alii ofisa Eleni i le taimi lea, ua tatala i maʻua e ma te ō i lo ma aiga, ma na ia tuuina mai ia i maʻua lana pepa faamaonia ma te faaaogā ina neʻi toe puʻeina foi i maʻua.

I le aso na sosoo ai, na ma iloa ai e faapea, o le toatele o i latou na puʻeina e Siamani, na fasiotia e avea o se taui ma sui i le fasiotia o ni fitafita Siamani se toalua e le vaega o fitafita faalilolilo a Eleni. E lē gata i le faasaoina mai le oti, ae na ou iloa ai i lena taimi le tāua o le solitu faa-Kerisiano.

I le tau e afu ai mea i le 1944, na faatinoina ai loʻu tuuina atu ia Ieova e ala i le papatisoina i le vai. I le taumafanafana na sosoo ai, na faia ai e Molimau se fuafuaga mo aʻu ou te galue faatasi ma le faapotopotoga i Sklithro i luga o atumauga, ina ia mafai ai ona toe maua atoatoa loʻu malosi. O le taua na sosoo ai a tagata o le atunuu ina ua tuumuli ʻau a Siamani, na matuā faateteleina i lena taimi i Eleni. O le nuu lea sa ou nofo ai, sa fai ma nofoaga autū mo ʻau a fitafita lalafi solo. Na tuuaʻia ai aʻu e le patele o le nuu ma se isi tamaloa matuā sauā e faapea, o aʻu o loo sipai mo le autau a le malo, ma sa suesueina ai aʻu i se faamasinoga na tofia e ia lava, o fitafita lalafi solo.

Sa auai i lenei faamasinoga faataʻitaʻi ia le taʻitaʻi o le ʻau a fitafita lalafi solo o lena vaipanoa. Ina ua uma ona ou faamatalaina atu le mafuaaga na ou nofo ai i le nuu ma faailoa atu i ai e faapea, ona o aʻu o se Kerisiano, ou te matuā solitu ai lava i fetauaiga a tagata o le atunuu, ona fai atu lea o le taʻitaʻi i isi: “O se tasi e faaoolima i lenei tagata, o le a vaai lava i le mea ou te faia i ai!”

Mulimuli ane, na ou foi atu i loʻu nuu moni o Volos, ua sili atu ai ona malosi loʻu faatuatua nai lo loʻu soifua maloloina faaletino.

Agaigai i Luma Faaleagaga

E lei pine mulimuli ane, na tofia ai aʻu e avea ma auauna o tupe i la matou faapotopotoga. E ui lava i faigata na faapogaia e le taua a le atunuu —e aofia ai ma le anoanoai o tagata na puʻea faapagota ona o tuuaʻiga na uunaia e taʻitaʻi lotu e uiga i le faaliulotuina o tagata—ae o le faia o se sao i le faiva faa-Kerisiano, na ou matuā olioli ai faapea foi ma la matou faapotopotoga atoa.

Ona oo lea i le amataga o le 1947, na asiasia ai i matou e se ovasia faimalaga o Molimau a Ieova. O se uluai asiasiga faapea lea ua faia i la matou faapotopotoga talu mai le Taua Lona Lua a le Lalolagi. I lena taimi, na vaeluaina ai la matou faapotopotoga ua tupu tele i Volos, ma na tofia ai aʻu e avea ma ovasia taʻimua i se tasi o faapotopotoga. O faalapotopotoga faavaegaʻau ma faalapotopotoga e lagolagoina faiga faaituau i le atunuu, na faatupuina ai le mataʻu o tagata i lena taimi. Ma sa faaaogā ai loa e taʻitaʻi lotu lena tulaga. Na latou faatupu le ita o faipule silisili i Molimau a Ieova i lo latou faasalalauina o tala pepelo e faapea o i matou o Komunisi po o ē lagolagoina vaega tetee.

Puʻea ma Faafalepuipuiina

I le faagasologa o tausaga o le 1947, e faasefulu ona puʻea faapagota aʻu, ae faatolu ona molia i luma o le faamasinoga. O ia moliaga taitasi sa faamagaloina ai aʻu. I le tau e totogo ai mea i le 1948, na faasalaina ai aʻu mo le fa masina i le falepuipui ona o le moliaga i le faaliulotuina o tagata. Sa tuli loʻu faasalaga i le falepuipui i Volos. I le taimi lea, na faaluaina ai le aofai o ē folafola le Malo i la matou faapotopotoga, ma na faatumuina ai loto o uso i le fiafia ma le olioli.

Ia Oketopa 1948, a o faia sa matou feiloaiga ma le isi toaono o ē taʻimua i la matou faapotopotoga, ae osofai mai leoleo e toalima i le fale ma faalālā mai a latou fana ma puʻeina i matou. Na latou ave i matou i le ofisa o leoleo e aunoa ma se faamatalaga e uiga i le mafuaaga ua puʻea ai i matou, ma na sasaina ai i matou iina. Sa tatuʻi oʻu mata e se leoleo na avea muamua ma tagata fusu. Ona lafo lea o i matou i se sela.

Mulimuli ane, na sau ai se feau mai le pule o leoleo ia te au ou te alu atu i lona ofisa. Ina ua ou tatalaina le faitotoa, na ia togiina aʻu i se fagu vaitusi, na misi ae tau i le puipui ma taʻe ai. Na ia faia lenei mea i le taumafai e faafefe aʻu. Ona ia tuuina mai lea ia te au se fasi pepa ma se peni ma faatonuina aʻu e faapea: “Ia tusi i lalo igoa o Molimau a Ieova uma i Volos, ma ia aumai ia te au le lisi lena i le taeao. Afai e te lē aumaia, ona e iloa lea o le mea o le a oo ia te oe!”

Ou te lei tali i ai, ae ina ua ou foi atu i le sela, na matou tatalo faatasi uma ma uso ia Ieova. Na ou tusia lava na o loʻu igoa i le pepa ma faatalitali seʻi toe valaau mai. Ae e lei toe feau maia lava aʻu e le leoleo. I le po, na ō mai ai vaegaʻau tetee, ma na taʻitaʻi ai e le leoleo lana vaega e tau faasaga ia i latou na. I le vevesi na mulimuli mai ai, na matuā manuʻa tigaina ai o ia, ma na tipi mutu ese ai le isi ona vae. Mulimuli ane, na tuuina atu ai lo matou moliaga i luma o le faamasinoga, ma na molia ai i matou i le faia o se fonotaga e lē faaletulafono. Na faasalaina le toafitu o i matou i le taʻi lima tausaga i le falepuipui.

Talu ai loʻu lē fia auai i le Misasā i le falepuipui i le Aso Sa, na loka ai na o aʻu i se potu. I le aso lona tolu, na ou talosaga ai ou te fia talanoa i le faatonu o le falepuipui. “Ma le faaaloalo tele e tatau ai,” na ou faapea atu ai ia te ia, “e foliga mai o se mea valea le faasalaina o se tagata o lē ua lotomalie e faaalu le lima tausaga i le falepuipui ona o lona faatuatuaga.” Sa ia mafaufau loloto e uiga i lena mea, ma na iu ina ia faapea mai: “O ā taeao, o le a e galue ai iinei i oʻu tafatafa, i loʻu ofisa.”

Na iu ina ou maua se galuega e avea o sē e fesoasoani i se fomaʻi o le falepuipui. O le iuga, e tele ni mea na ou aʻoaʻoina ai e uiga i le tausiga o le soifua maloloina, o se galuega na matuā aogā tele i tausaga mulimuli ane. A o iai i le falepuipui, na ou maua ai ni avanoa se tele ou te talaʻi ai, ma e toatolu tagata na tali lelei mai ma oo ina avea ma Molimau a Ieova.

Ina ua mavae le toeitiiti lava atoa le fa tausaga i le falepuipui, na iu ai ina faasaʻolotoina aʻu i le 1952 ona o le amio lelei. Mulimuli ane, sa ou tū ai i luma o le faamasinoga i Korinito ona o le mataupu i le solitu. (Isaia 2:4) O inā na taofia ai aʻu mo sina taimi puupuu i se falepuipui o le vaegaʻau, ma na amata ai foi se isi faasologa o faiga sauā. O isi leoleo na matuā fai moni mai lava a latou faamataʻuga, i le faapea  mai: “Ou te vaneesea lou fatu ma tipitipi ninii i se pelu,” pe faapea mai foi, “Aua neʻi e faapea e te vave oti, e faataugā lava oe, e ono lava pulu.”

Se Ituaiga o Tofotofoga Ese

Ae peitai, e lei pine ae ou toe foi i loʻu aiga, ma toe auauna faatasi ma le faapotopotoga i Volos ma galue faavaitaimi i se galuega totogi. I se tasi aso, na ou maua ai se tusi mai le ofisa o le lālā o le Sosaiete o le Olo Matamata i Atenai, e valaaulia ai aʻu mo se toleniga e lua vaiaso ona amata ai loa lea ona ou asiasia faapotopotoga o Molimau a Ieova i le avea o se ovasia matagaluega. O le taimi foi lea, na fesili mai ai ia te au le uso o loʻu tamā, o lē e leai sana fanau ma e matuā tele ona fanua ma fale, ina ia avea aʻu ma pule e vaaia ana alamanuia. Sa nofo matitiva pea loʻu aiga, ma o lenei galuega e ono mafai ona foia ai o latou faafitauli tau tamaoaiga.

Sa ou asiasi atu i le uso o loʻu tamā e faailoa atu i ai loʻu loto faafetai mo lana ofo, ae na ou faailoa atu ia te ia e faapea, ua uma ona ou filifili e talia se tofiga faapitoa i le faiva faa-Kerisiano. I lena faaaliga, na tū ai o ia i luga ma pupula faamatapaū mai ia te au, ma tuua faanatinati le potu. Na toe foi mai o ia ma se meaalofa tupe na mafai ona tausia ai loʻu aiga mo ni masina. Na ia faapea mai ia te au: “Ave le tupe lea ma fai ai se mea e te manao ai.” E oo mai i le asō, e lē mafai ona faamatalaina lagona na oo ia te au i lena taimi. Na pei lava ua ou faalogo i le siufofoga o Ieova o fetalai mai ia te au, ‘Ua e faia le filifiliga saʻo. Ou te faatasi pea ma oe.’

Faatasi ma le faamanuiaga a loʻu aiga, na ou alu atu ai i Atenai ia Tesema i le 1953. E ui lava sa na o loʻu tinā na oo ina avea ma Molimau, ae sa lei tetee lava isi tagata o loʻu aiga i laʻu galuega faa-Kerisiano. Ina ua ou alu atu i le ofisa o le lālā i Atenai, na faatalitali mai ai foi iina le isi mea e faateʻia ai. Sa iai se feau faauaealesi mai loʻu tuafafine, e faailoa mai ai e faapea, o le aso lena na iu manuia ai le taumafaiga a Tamā mo le lua tausaga ina ia maua se penisione mo tagata matutua. O le ā la se isi mea ou te toe manao ai? Sa oo ia te au le lagona e pei ua fai ni oʻu apaau, ua ou nofo sauni e lele maualuga atu i le auaunaga ia Ieova!

Faaalia le Atamai

I oʻu tausaga amata i le galuega matagaluega, sa tatau lava ona ou matuā faaeteete ona sa matuā sauāina Molimau a Ieova e taʻitaʻi lotu ma taʻitaʻi o malo. Ina ia asiasi atu i o tatou uso Kerisiano, ae maise lava i latou o ē o nonofo i taulaga laiti ma nuu, sa ou savali ai mo le tele o itula i le po. O uso, o ē na lamatia i le puʻeina faapagota, sa faapotopoto ma faatalitali mai ma le onosai i se fale mo loʻu taunuu atu. Maeu se feofoofoaiga lelei o faalaeiauga na maua mai ai i na asiasiga mo i matou uma lava!—Roma 1:11, 12.

Ina ia aua neʻi iloa aʻu, sa ou faaaogā ai i nisi taimi ni laei e lē iloagofie ai aʻu. I se tasi taimi na ou ofu ai e pei o se leoleo mamoe ina ia ou sao ai mai se poloka a leoleo na faia i le auala, ma oo atu ai i se faatasitasiga a uso o ē o loo matuā manaomia se asiasiga faaleoleo mamoe faaleagaga. I se tasi taimi, i le 1955, na ma faatagā faafoliga ai ma se uso Molimau i ni tagata faatau aniani saina, ina ia alofia ai le masalomia e leoleo. O lo ma tofiga na tuuina mai, o le taumafai lea e faafesootai nisi o uso Kerisiano i se taulaga laitiiti o Árgos Orestikón, o ē ua lē toe talaʻi.

Na fola a ma mea faatau i le maketi o le taulaga. Ae peitai, na oo ina masalomia i maʻua e se leoleo talavou sa tiute ai iina, ma o taimi uma e pasi ane ai, e faataupupula masalosalo mai ai ia i maʻua. Na iu lava ina ia faapea mai ia te au: “E te lē foliga mai o oe o se faatau aniani saina.” I le taimi lava lena, na ō mai ai ni fafine talavou se toatolu ma faaalia lo latou naunau e faatau ni aniani saina. Na ou faasino i aʻu aniani ma ou fai atu: “Tagai i lenei leoleo talavou, o le mea lea e tino malosi ai ma aulelei ona e taumafa o ia i aniani saina e pei o nei!” Na tilotilo atu fafine i le leoleo ma toē. Na ʻataʻata foi le leoleo ia ma alu ese atu.

Ina ua alu ese le leoleo, na ou faaaogā ai loa le avanoa lea ou te alu atu ai i le faleoloa sa galulue ai o tatou uso faaleagaga e avea o ni tagata suʻisuʻi. Sa ou talosaga atu i se tasi o i latou e suʻi se faamau o loʻu peleue ua motu. A o ia faia lena mea, sa ou punou ma musumusu atu: “Ua ou sau mai le ofisa o le lālā e vaai outou.” Muamua, sa popole uso, ona ua āutausagā e lei  toe iai se fesootaiga ma uso Molimau. Sa ou taumafai malosi lava e faalaeiauina i latou, ma faia fuafuaga e feiloai ma i latou mulimuli ane i le fanuatanu o le taulaga ina ia matou talanoa atili ai. E fiafia lava ona sa avea le asiasiga ma faalaeiauga, na oo ai ina latou toe maelega i le faiva faa-Kerisiano.

Mauaina o se Paaga Faamaoni

I le 1956, i le tolu tausaga talu ona amata le galuega faimalaga, na ou fetaui ai ia Niki, o se fafine talavou Kerisiano o lē e matuā sili ona fiafia i le galuega talaʻi ma naunau e faaalu lona olaga i le faiva faataimi atoa. Na lagona e i maʻua le alofa o le tasi i le isi ma, na ma faaipoipo ai ia Iuni 1957. Sa ou tau mānatu pe faamata o le a mafaia e Niki ona faafetaiaia mea e manaomia i le galuega faimalaga, i lalo o tulaga faigata sa aafia tele ai Molimau a Ieova i Eleni i lena taimi. Ona o le fesoasoani a Ieova na ia mafaia ai, i lea ua avea ai o le uluai fafine na ō atu faatasi ma lana tane i le galuega matagaluega i Eleni.

Na ma ō faatasi pea i le galuega faimalaga mo le sefulu tausaga, e fesoasoani i le tele o faapotopotoga i Eleni. E masani lava ona fesuiai a ma teuga ina ia aua neʻi iloagofie ai i maʻua, ma e ave a ma atopaʻu, ma savavali i le pouliuli o le po mo se taimi umi ina ia mafai ai ona oo atu i se faapotopotoga. E ui lava i faafitauli faigata e masani ona matou fetaiai, ae na matuā faafiafiaina i maʻua e muai vaai tino i le faatuputeleina mataina o le aofai o Molimau.

Auaunaga i Peteli

Ia Ianuari 1967, na valaaulia ai i maʻua ma Niki ina ia auauna i Peteli, e pei ona taʻua ai le ofisa o le lālā o Molimau a Ieova. Na faateʻia ai i maʻua uma i lea valaaulia, ae na ma taliaina, i le mautinoa o Ieova o loo ia faatonutonuina mataupu. A o mavae atu taimi, na oo ai ina ma talisapaia e faapea, maeu se faaeaga sili o le auauna ai i lenei nofoaga autū o galuega faatiokarate.

I le tolu masina talu ona ma ulu atu i le auaunaga i Peteli, na pule ai se vaega faavaegaʻau, ma sa faaauau ai pea ona galulue faalilolilo Molimau a Ieova. Na amata ona matou feiloai i ni nai vaega toaitiiti, faia a matou fonotaga i le togavao, talaʻi ma le faautauta, ma lomia ma faasalalauina atu lomiga faale-Tusi Paia i se auala faalilolilo. Sa lē o se mea faigata ona faamasani i nei tulaga, ona e foliga mai o lea ua toe tau faaolaola faiga na faia ai la matou galuega i tausaga ua mavae. E ui i faasasaāga, ae na faateleina le aofai o Molimau mai se toaitiiti, e na o le 11,000 i le 1967 i le sili atu i le 17,000 i le 1974.

Ua mavae atu nei le toetoe lava 30 tausaga i le auaunaga i Peteli, ae o loo faaauau pea e i maʻua ma Niki ona olioli i faamanuiaga faaleagaga, e ui lava i tulaga faigata o le soifua maloloina ma le tino matua. E sili atu i le sefulu tausaga o ma nonofo ai i fale o le lālā e tū i Kartali Street, i Atenai. I le 1979, na faapaiaina ai se lālā fou i Marousi, o se nofoaga e latalata ane i Atenai. Ae talu mai le 1991, ua matou olioli ai nei i se fale telē o le lālā fou i Eleona, e 40 maila i le itu i mātū o Atenai. O inei, o loo oʻu galue ai i lo matou falemaʻi i Peteli, lea ua matuā aogā ai le toleniga na ou maua i le taimi na avea ai aʻu ma fesoasoani i le fomaʻi o le falepuipui.

I le faagasologa o le sili atu i le fasefulu o oʻu tausaga i le faiva faataimi atoa, ua pei aʻu o Ieremia, ua oo ina ou iloa le moni o le folafolaga a Ieova: “Latou te sii mai le taua ia te oe, a e latou te le manumalo ia te oe; auā o aʻu ou te ia te oe e laveai ia te oe, ua fetalai mai ai Ieova.” (Ieremia 1:19) Ioe, na olioli i maʻua uma ma Niki i se ipu ua taumasuasua i faamanuiaga mai ia Ieova. Ua lē aunoa ona ma olioli i le tele o lona alofa ma le agalelei, atoa ma le alofa mutimutivale.

O laʻu faalaeiauga i le ʻau talavou i le faalapotopotoga a Ieova, ina ia tuliloa le faiva faataimi atoa. O le auala lenei e mafai ai ona latou talia le valaaulia mai ia Ieova, ina ia tofotofo atu ia te ia pe faamaoni i lana folafolaga ‘e tatalaina pupuni o le lagi ma sasaa mai le manuia e matuā silisili ona tele.’ (Malaki 3:10) I le mea na oo totino ia te au, ou te faamautinoa atu ai ia te outou le ʻau talavou e faapea, o le a matuā faamanuia e Ieova outou uma o ē faatuatua atoatoa ia te ia.

[Ata i le itulau 26]

Lambros Zoumbos ma lana avā, o Niki