Ia Mausalī Pea Lou Mautinoa Seia Oo i Le Iʻuga

SEʻI faaāta i lou mafaufau se tamai vaalele o loo lele i tulaga loulouā o le tau. Ua lē toe mafai ona iloa atu e le pailate mea i le laueleele. Ua punitia lana vaai e ao mafiafia. Ua lē mafai ona ia vaai i talaatu o le tioata o loo i ona luma, peitai o loo ia mautinoa pea e mafai ona ia faataunuuina ma le manuia lana malaga. O le ā le mafuaaga o lona mautinoa?

O loo ia te ia meafaigaluega saʻo e mafai ai ona ia pāsia ao ma tulaueleele ai e ui i le pogisa. I lona ala, ae maise lava le lalata atu i le malae vaalele, e taʻitaʻia saogalemu ai o ia e faailoilo faaeletise mai lalo, ma o loo iai sana uaealesi e fesootai ai ma ē o loo faatonutonuina vaalele i le malae vaalele.

I le faatusatusa atu i ai, e mafai foi ona tatou fesagai ma le lumanai i se ala mautinoa, e ui lava ina faateteleina le nenefu i lea aso ma lea aso o tulaga o le lalolagi. O la tatou faigamalaga atu i lenei faiga leaga o mea atonu e umi nai lo le mea o faatalitalia e nisi, ae e mafai ona tatou mautinoa o loo tatou iai i le ala saʻo ma o loo ogatusa ma le faasologa o taimi. Aisea tatou te matuā mautinoa ai? Auā o loo ia i tatou le taʻiala e mafai ona tatou iloa moni ai mea e lē mafai ona iloa i le vaaiga faaletagata.

O le Afioga a le Atua o le ‘malamalama i o tatou ala,’ ma e “faamaoni . . . e faapotoina ai le ua faigofie.” (Salamo 19:7; 119:105) E pei o faailoilo faaeletise e faailoaina ai le ala e lele ai le pailate, ua faapena ona faatulaga mai ma le saʻo e le Tusi Paia mea tutupu i le lumanai ma aumaia ia i tatou faatonuga ina ia faamautinoa ai tatou te taunuu saogalemu i lo tatou taunuuga. Ae peitai, ina ia maua aogā mai taʻiala a le Atua, e tatau ona tatou faatuatua atu i ai.

I lana tusi i Kerisiano i Eperu, na uunaia ai e Paulo Kerisiano Iutaia ina ia ‘taofi mau pea i lo latou muai mautinoa seia oo i le iuga.’ (Eperu 3:14) E mafai ona māluelue le faatuatua pe a lē ‘mau’ le tatou taofi atu i ai. Ua oso aʻe ai la se fesili, E mafai faapefea ona tatou faatumauina ma le mausalī lo tatou mautinoa ia Ieova seia oo i le iuga?

Ia Faatinoina Lou Faatuatua

A o lei oo ina ave e se pailate se vaalele i taimi ua ia lē toe iloa atu ai se mea, e faalagolago atoatoa atu i ana meafaigaluega ma le faatonutonuga mai tagata o loo faatonutonuina vaalele i lalo, e na te manaomia le lava o se toleniga ma le tele o itula e alu ai e faataʻitaʻi ona  lele. E faapena foi, ona manaomia e se Kerisiano le faatinoina pea o lona faatuatua ina ia tumau ai lona mautinoa i le taʻitaʻiga a Ieova, ae maise pe a mapuna mai tulaga faigata. Na tusi le aposetolo o Paulo e faapea: “O loo ia te i matou lea lava agaga faatuatua, pei ona tusia, Ua ou faatuatua, o le mea lea na ou tautala atu ai; o i matou foi ua matou faatuatua, o le mea lea ua matou tautala atu ai.” (2 Korinito 4:13) O lea, pe a tatou talanoa e faatatau i le tala lelei a le Atua, o loo tatou faatinoina la ma faamalosiaina ai lo tatou faatuatua.

O Matalena, o lē na fa tausaga o iai i le nofoaga o faasalaga i le taimi o le taua lona lua a le lalolagi, ua ia faamatala mai le aogā o le galuega talaʻi e faapea: “Na aʻoaʻo mai aʻu e loʻu tinā e faapea ina ia faatumauina se faatuatua malosi, e tāua tele le manatu i le lelei faaleagaga o isi. Ou te manatua se tasi mea na tupu e faailoa atu ai le lagona na ia i maʻua. Ina ua tatalaina i maʻua mai le nofoaga o faasalaga o Ravensbrück, sa ma taunuu ai ma loʻu tinā i lo matou aiga i le Aso Faraile. I le lona lua o aso mulimuli ane ai, i le Aso Sa, na ma auai atu ai i le talaʻiga a uso mai lea fale i lea fale. Ua ou talitonu ma le mausalī ai afai tatou te uaʻi atu i le fesoasoani i isi ina ia faatuatua i folafolaga a le Atua, o folafolaga foi lava na o le a sili atu ona moni ia i tatou.”—Faatusatusa i le Galuega 5:42.

O le faatumauina o lo tatou mautinoa mausalī seia oo i le iuga e manaomia ai gaoioiga faaleagaga i isi itu. O le suesuega totino o le isi faatinoga sili ona lelei lea o le faamalosiga o le faatuatua. Afai tatou te faataʻitaʻi i tagata Perea ma toaaga e iloilo le Tusi Paia i lea aso ma lea aso, o le a fesoasoani lea ia i tatou “ina ia mautinoa le faamoemoe e oo i le gataaga.” (Eperu 6:11; Galuega 17:11) E moni, o suesuega totino e manaomia ai le taimi ma le maumauai. O le mea moni, o le mafuaaga lena na lapatai atu ai Paulo i Kerisiano i Eperu e uiga i le matautia o le “paie,” po o le augatā, i na mataupu.—Eperu 6:12.

O se uiga augatā e mafai ona iai ni āuga matautia i le tele o vala o le olaga. Na taʻua e Solomona e faapea “o le le tago foi o lima i mea, e tutulu ai le fale.” (Failauga 10:18) E lē umi lava ae amata ona tutulu se fale ua lē tausia lelei. Afai tatou te lē gaoioi faaleagaga ma lē taulau ona faaleleia lo tatou faatuatua, ona faasolosolo lemu ane loa lea o masalosaloga. Peitai, o le mafaufau loloto e lē aunoa ma suesue i le Afioga a le Atua, o le a toe fafagaina ma puipuia ai lo tatou faatuatua.—Salamo 1:2, 3.

Faatupuina le Faatuatua i Mea Tutupu

O le mea moni, e aʻoaʻoina e se pailate i lona poto masani atoa ai ma suesuega e faapea o ana meafaigaluega e maufaatuatuaina. E faapena foi ona tupu lo tatou mautinoa ia Ieova pe a tatou vaaia i o tatou lava olaga faamaoniga o lana tausiga alofa. Na oo Iosua i lena mea, ma na ia faamanatu atu i ona uso Isaraelu e faapea: “Ua outou iloa ma o outou loto atoa, ma o outou agaga atoa, e lei iuvale se upu e tasi i upu lelei uma na fetalai mai ai Ieova lo outou Atua ia te outou; ua taunuu uma ia te outou, ua le iuvale se upu e tasi.”—Iosua 23:14.

Na aʻoaʻoina foi e Sosefina, o se tuafafine mai Filipaina ua faaipoipo, le lesona lava lena. Ua ia faamatala mai le olaga sa iai a o ia lei iloaina le upu moni: “Na masani ona inu pia tele laʻu tane, ma a onā, ona ita lea ma fasi aʻu. Na aafia ai foi la ma tama tama i la ma faaipoipoga lē fiafia. Sa ma faigaluega uma ma laʻu tane, ma mauaina le tele o tupe, ae na tele ina faaalu o ma totogi i pelegatupe. Sa tele uo a loʻu toʻalua, ae o le toatele o i latou, na fiafia e faauo ia te ia ina  ia ona totogia meainu, ma o nisi, sa latou taumafai e faaonā o ia ina ia taliē ai i ai.

“Na suia le tulaga o mea ina ua oo ina ma iloa Ieova ma taliaina ana fautuaga. Ua lē toe inu ʻava laʻu tane, ua tuu foi le ma pelētupe, ma ua iai a ma uo moni e alolofa ma fesoasoani ia i maʻua. Ua fiafia la ma faaipoipoga, ma ua ola aʻe foi la ma tama ua avea ma tama lelei. Ua itiiti itula ma te galulue ai ae o loo tele lava a ma tupe. Ua aʻoaʻo mai e mea tutupu ia i maʻua e faapea o Ieova e pei o se Tamā alofa, e na te taʻitaʻiina pea i tatou i le ituala saʻo.”

Ona o faatonuga e uaealesi mai i ē o loo faatonutonu vaalele i lalo po o se siakiina o meafaigaluega, e iloa ai e pailate i nisi taimi le manaomia ona toe faasaʻoina lo latou ala. E faapena foi ona tatau ona tatou suia le mea o tatou agaʻi atu i ai ina ia ogatusa ma faatonuga a Ieova. “E faalogo foi o outou taliga i le upu i o outou tua, pe a outou afe ane i le itu taumatau pe afe ane i le itu tauagavale, e faapea mai, O le ala lava lenei, ia outou savavali ai.” (Isaia 30:21) E ala mai i lana Afioga ma lana faalapotopotoga, tatou te maua ai fautuaga ina ia tatou mataala i lamatiaga faaleagaga. O se tasi o nei mea o aumea.

E Mafai e Aumea Ona Taaʻina Sese ai i Tatou

E mafai ona sē gofie se tamai vaalele pe afai e lē o faia faasaʻoga manaomia. E faapena foi, o aafiaga mai i fafo e faafaigata ai pea mea mo Kerisiano i aso nei. Ua tatou ola i se lalolagi e manatu faaletino ona tagata lea e faaleamanaiaina ai e le toatele mea faaleagaga, ae sili ona pipii atu i le faatāuaina o tupe ma fiafiaga. Na lapataia e Paulo ia Timoteo e faapea o aso e gata ai o le a “faigata.” (2 Timoteo 3:1-5) O talavou e faanaunau ia talia aloaia ma ia lauiloa, e faigofie lava ona fiafia atu i aumea leaga.—2 Timoteo 2:22.

Ua faamatala mai e Amanda e 17 tausaga le matua e faapea: “Mo se vaitaimi, na matuā vaivai ai loʻu faatuatua ona o aʻu uo i le aʻoga. Na latou fai mai pea lava pea o laʻu lotu e faasāsā ma e lē fetuutuunai, ma na amata faavaivaia ai aʻu i lenei mea. Ae peitai, na fesoasoani mai oʻu mātua ia te au ia ou malamalama o taʻiala faa-Kerisiano, e puipuia ai nai lo le faasāsā. Nei la, ua ou iloaina o nei mataupu silisili ua fesoasoani ia te au ina ia ou maua se olaga e sili atu ona faamalieina ai, nai lo le olaga sa iai i aʻu uo ia na fai i le aʻoga. Ua ou aʻoaʻoina le tatau ona ou faatuatuaina i latou e manatu mamafa moni mo aʻu—o oʻu mātua ma Ieova—ma ua ou olioli ai i le auaunaga faapaeonia.”

Po o le ā lava le matua o tatou iai, o le a tatou fetaiai ma tagata e fai maia tala lē manuia e uiga i o tatou talitonuga. E latou te ono foliga mai e popoto faalelalolagi nei, ae i le silafaga a le Atua o i latou o ni tagata e faaletino, e lē faaleagaga. (1 Korinito 2:14) O se vaega na latou faaaafia le toatele i Korinito i taimi o Paulo, o Tagata Faitio i talitonuga faalotu ae popoto i mea faalelalolagi. O aʻoaʻoga a lenei ʻau faifilosofia sa tauāu ina faavaivaia ai le faatuatua o nisi Kerisiano Korinito i le faamoemoe o le toetu. (1 Korinito 15:12) Na lapatai mai le aposetolo o Paulo: “Aua neʻi faaseseina outou, ‘O le feoai ma e amio leaga e leaga ai amio lelei.’”—1 Korinito 15:33.

Peitai, o aumea lelei e faamalosia ai i tatou faaleagaga. I totonu o le faapotopotoga Kerisiano, ua ia i tatou le avanoa e aufaatasi ai ma tagata e ola i se olaga o le faatuatua. O Norman, o se uso na ia aʻoaʻoina le upu moni i le 1939, o loo avea pea ma puna o faalaeiauga e tele i tagata uma. O le ā na tumau ai ona maʻati pea lana vaai faaleagaga? Ua ia tali mai: “E tāua tele sauniga ma faigauo māfana ma uso faamaoni. Na fesoasoani lenei ituaiga o faatasiga ia te au ou te iloa manino ai le eseesega i le va o le faalapotopotoga a le Atua ma le faalapotopotoga a Satani.”

Le Mana Taufaasese o le Oa

Ua faamatala mai e se pailate poto o Brian e faapea “i nisi taimi e faafaigata ai i se pailate ona talitonu i ana meafaigaluega—talu ai ona e lē tutusa ma ona lava faalogona o iai. O pailate o vaegaʻau ua iai le poto masani, ua iloa e iai taimi latou te felelei ai e ū i luga le pito i lalo o a latou vaalele ona o le foliga mai e pei ni fetu molī o le laueleele—e ui ina taʻu atu ia i latou e a latou meafaigaluega e lē o saʻo o latou manatu.”

 E mafai foi faapena ona faaseseina i tatou faaleagaga, e o tatou uiga manatu faapito. Na fetalai Iesu o le oa e iai lona ‘mana taufaasese,’ ma na lapatai mai Paulo ‘o le manao i tupe ua taʻitaʻi ese atu ai le toatele mai le faatuatua.’—Mareko 4:19; 1 Timoteo 6:10.

E pei o molī emoemo taufaasese, e mafai ona tataʻi atu ai i tatou i le itu sese e sini olaola o le matapeapea i meafaitino. Nai lo le olioli i le “faalagolago lea i mea ua faamoemoe i ai,” e mafai ona taʻitaʻi ese atu ai i tatou e le faalialia o le lalolagi lea o le a mavae atu. (Eperu 11:1; 1 Ioane 2:16, 17) Afai tatou te “manao” ia maua se olaga solosolo lelei, o le a itiiti la se taimi e tatou te tutupu aʻe ai faaleagaga.—1 Timoteo 6:9; Mataio 6:24; Eperu 13:5.

Na taʻua e se tamaloa talavou ua faaipoipo e igoa ia Paterika e faapea o ia ma lana avā na la tuua o la sini faaleagaga mo le sailia o se tulaga sili ona lelei o le soifuaga faaletino. Ua ia faamatala mai: “Na taaʻina i maʻua ia i latou o i le faapotopotoga o ē e iai a latou taavale taugata ma fale e sili ona matagofie. E ui sa lei mou atu lava lo ma vaai i le faamoemoe o le Malo, ae na ma lagona e faapea e tatau foi ona ma maua se olaga sologa lelei. E ui i lea, na oo mai le taimi, na ma iloa ai o le fiafia moni e maua i le auauna atu ia Ieova ma le tuputupu aʻe faaleagaga. I le taimi la lenei, ua toe faigofie ai lo ma olaga. Ua faaitiitia o ma itula faigaluega, ma ua avea i maʻua ma paeonia sauatoa.”

E Faalagolago le Faatuatua i se Loto Fiafia e Tali Atu

O se loto fiafia e tali atu e tāua tele foi i le atiina aʻe o le mautinoa ia Ieova. E moni, “o le faatuatua, o le faalagolago lea i mea ua faamoemoe i ai, o le mautinoa lea [po o, “faamaoniga maumaututū,” i le faaopoopoga i lalo o le NW] o mea e le o vaaia.” (Eperu 11:1) Ae seʻi vaganā ua ia i tatou se loto fiafia e tali atu, ona tatou maumaututū ai loa lea. (Faataoto 18:15; Mataio 5:6) O le mafuaaga lea na faapea ai le aposetolo o Paulo “e le o i tagata uma le faatuatua.”—2 Tesalonia 3:2.

E mafai la faapefea ona tatou tausia pea o tatou loto ia tali atu i faamaoniga maumaututū e tuuina mai? E ala i le atiina aʻe o uiga faaleatua, uiga ia e faaoaina ai ma faamalosia ai le faatuatua. Ua uunaia i tatou e Peteru ina ia ‘faaopoopo i lo tatou faatuatua le amio lelei, poto, pulea totino, onosai, amio Atua, fealofani faaleuso, ma le alofa.’ (2 Peteru 1:5-7; Kalatia 5:22, 23) Peitai, afai o tatou ola i se olaga e faamuamua i tatou lava pe tau ina avatu ia Ieova na o sina auaunaga, e lē mafai la ona tatou faatalitalia o le a tupu lo tatou faatuatua.

‘Na saunia le loto’ o Esera e faitauina ai le Afioga a Ieova ma faatinoina. (Esera 7:10) Na ia Mika foi se loto fiafia e tali atu. “A o aʻu, ou te faatalitali ia Ieova, ou te faamoemoe i le Atua o loʻu olataga; e faafofoga mai loʻu Atua ia te au.”—Mika 7:7.

O Matalena foi lea na taʻua i le amataga, ua faatalitali atu ma le onosai ia Ieova. (Sapakuka 2:3) Ua ia fai mai: “Ua ia i tatou le parataiso faaleagaga. O le isi mea e sosoo ai, o le Parataiso moni lava, lea ua lē o toe mamao ae oo mai. I le taimi nei e faitau selau o afe ua aufaatasi atu i le motu o tagata e toatele. E faafiafiaina ai aʻu i le vaai atu i le toatele ua lolofi mai i le faalapotopotoga a le Atua.”

Vaai Atu i le Atua o lo Tatou Faaolataga

O le tumau mausalī i lo tatou mautinoa e oo i le iuga e manaomia ai le faatinoina o lo tatou faatuatua ma faalogo atu ma le faaeteete i le taʻitaʻiga tatou te maua mai ia Ieova ma lana faalapotopotoga. E tauia moni ai lava taumafaiga fitā. E lagona e se pailate le faamalieina loloto pe a mavae se malaga umi ma le faigata, ae faaifoifo ane loa ma alu ese mai i ao mafiafia. Ua tuu mai nei i ona luma le laueleele—lanu meamata ma saunia lelei e faafeiloaia lona tulaueleele. Ua i ona lalo ifo le ala o vaalele i le malae vaalele, o loo faatalitalia maia lona papaʻi atu i ai.

Ua tuu mai foi i o tatou luma se mea matagofie. O lenei lalolagi puaoa, amioleaga, o le a suia i se lalolagi fou amiotonu. Ua faatalitalia mai i tatou e se faafeiloaiga tauatua. E mafai ona tatou taunuu atu iina pe a tatou utagia upu a le faisalamo e faapea: “O oe lava o loʻu faamoemoega, le Alii e Ieova, o loʻu faatuatuaga oe talu ina ou tama itiiti. . . . E le aunoa ona ou vivii atu ia te oe.”—Salamo 71:5, 6.