Le Atua ma Kaisara

“O mea a Kaisara ia outou avatu ia Kaisara; a o mea a le Atua avatu ia i le Atua.”—LUKA 20:25.

1. (a) O le ā le tulaga sili ona maualuga o Ieova? (e) O le ā le mea o loo tatou nofo aitalafu ai ia Ieova, e lē mafai ona tatou tuuina atu ia Kaisara?

INA ua tuuina atu e Iesu Keriso lena faatonuga, e mautinoa sa ia silafia lelei o mea o loo faafinagaloina e le Atua mai Ana auauna, e faamuamua le tāua nai so o se isi mea atonu e manaomia e Kaisara, po o le Faiga Malo a le atunuu mai ia i latou. E sili atu le silafia e Iesu nai lo se isi lava tagata, e faatatau i le moni o le tatalo a le faisalamo ia Ieova e faapea: “O lou malo o le malo lea e faavavau lava; ma lau pule [pule silisili ese] * e āu tupulaga lava lea.” (Salamo 145:13) Ina ua ofo atu e le Tiapolo ia Iesu le pule i malo uma o le lalolagi, na tali Iesu: “Ua tusia, ‘E ao ona e tapuai atu ia Ieova lou Atua, ma ua na o ia lava e ao ona e avatu i ai le auaunaga paia.’” (Luka 4:5-8, NW) E lē mafai lava ona tuuina atu se tapuaiga ia “Kaisara,” e tusa lava po o Kaisara o le emeperoa o Roma, po o nisi pule faaletagata, po o le Faiga Malo lava ia.

2. (a) O le ā le tulaga o Satani i le fesootai atu ma lenei lalolagi? (e) O le faatagaga a ai ua tauaveina ai e Satani lona tulaga?

² Sa ioeina e Iesu o malo o le lalolagi o loo pule ai Satani. I se taimi mulimuli ane, na ia  taʻua ai Satani o “le alii o lenei lalolagi.” (Ioane 12:31; 16:11) I le agaʻi atu i le iuga o le uluai senituri T.A., na tusi ai le aposetolo o Ioane: “Ua tatou iloa e mai le Atua lava i tatou, a o le lalolagi uma o loo nofo toilalo i loo leaga.” (1 Ioane 5:19) E lē o le uiga o lenei mea e faapea ua faaui ese mai e Ieova lana pule silisili ese i le lalolagi aoao. Seʻi manatua, ina ua ofoina atu e Satani ia Iesu le pule i malo faapolotiki, na ia taʻua: “Ou te avatua ia te oe lenei pule uma . . . auā ua tuuina mai ia te au.” (Luka 4:6) E na o le pau le mafuaaga ua pule ai Satani i malo o le lalolagi, ona o le faatagaga a le Atua.

3. (a) O le ā le tulaga o loo iai faiga malo a atunuu i luma o Ieova? (e) E mafai faapefea ona tatou faapea atu o le gauai i faiga malo o lenei lalolagi e lē faauiga i lo tatou gauai atu ia Satani, le atua o lenei lalolagi?

³ I se tulaga tutusa, e na o le pau le mafuaaga ua faia ai e le Faiga Malo lana pulega, talu ai ua faatagaina e le Atua o le Pule Silisili Ese le faia faapea. (Ioane 19:11) O lea la, e mafai ona faapea atu, “o pule uma lava o loo fai nei” ua ‘faatulagaina e le Atua i o latou tulaga e fai faatatau.’ I le faatusatusa atu i le pulega silisili ese a Ieova, ua avea ai ia pulega o ni pulega e itiiti lava se pule o ia i latou. Ae peitai, o i latou o “auauna ia a le Atua,” ‘o auauna i le lautele a le Atua,’ lea latou te faia ai auaunaga talafeagai, tausisia tulafono ma le maopoopo, ma faasalaina tagata amioleaga. (Roma 13:1, 4, 6) E manaomia ai la ona malamalama Kerisiano, e ui lava o loo avea Satani ma pule lē vaaia o lenei lalolagi, po o lenei faiga o mea, ae latou te lē gauai atu ia Satani, pe afai latou te amanaiaina lo latou gauai atu fai faatatau i le Faiga Malo. O loo usiusitai atu i latou i le Atua. I lenei tausaga, e 1996, o loo avea pea le Faiga Malo faapolotiki o se vaega o “le sauniga a le Atua,” o se faatulagaga ua faataga e le Atua ina ia iai mo se taimi lē tumau, ma o le tulaga  lena e tatau ona amanaia ai i latou e auauna a Ieova o loo i le lalolagi.—Roma 13:2.

Auauna Anamua a Ieova ma le Faiga Malo

4. Aisea na faataga ai Iosefa e Ieova ina ia taualoa i le faiga malo a Aikupito?

⁴ I aso anamua a o lei oo mai le Faa-Kerisiano, sa faataga ai e Ieova nisi o ana auauna e tauaveina ni tulaga taualoa i faiga malo faapolotiki. Mo se faaaoaoga, i le senituri lona 18 T.L.M., na avea ai Iosefa ma palemia o Aikupito, e lona lua atu lona tulaga i le Farao sa i le nofoaiga i lena taimi. (Kenese 41:39-43) O mea na tutupu na sosoo mai ai ua manino ai sa faapogaia e Ieova lenei mea ina ia mafai ai ona auauna Iosefa o se auala mo le faasaoina o le ‘fanau a Aperaamo,’ o ē na tupuga mai ia te ia, mo le faataunuuina o Ana fuafuaga. O le mea moni, e tatau ona manatua na faatauina atu Iosefa i Aikupito e avea ma pologa, ma sa ola o ia i le vaitaimi sa lei maua ai e auauna a le Atua le Tulafono Faa-Mose, sa lei iai foi “le tulafono a Keriso.”—Kenese 15:5-7; 50:19-21; Kalatia 6:2.

5. Aisea na poloaiina ai tagata Iutaia na faatafea ina ia latou ‘saili le manuia’ o Papelonia?

⁵ I senituri mulimuli ane, sa faagaeeina ai e Ieova le perofeta o Ieremia e taʻu atu i tagata Iutaia na faatafea, ina ia latou gauai atu i pule a o latou faatafea ai i Papelonia ma ia tatalo foi mo se manuia o lena aai. I lana tusi atu i ia tagata, na ia tusi ai: “O loo faapea ona fetalai mai o Ieova o ʻau, le Atua o Isaraelu, i le tafeaga uma, . . . Ia outou sailiili foi ia manuia le aai ua ou faatāfea ai outou; ma ia outou tatalo atu ia Ieova mo lena aai; auā o lona manuia e manuia ai outou.” (Ieremia 29:4, 7) E masani pea ona iai i tagata o Ieova mafuaaga e ao ai ona “saili i le filemu” mo i latou lava ma i le atunuu o loo latou nonofo ai, ina ia maua le saʻolotoga e tapuai atu ai ia Ieova.—1 Peteru 3:11.

6. E ui lava ina avatu i ai ni tulaga maualuluga faalemalo, ae o ā auala na teena ai e Tanielu ma ana uo e toatolu lo latou solia o Tulafono a Ieova?

⁶ A o iai i le tafeaga i Papelonia, na lolo atu ai Tanielu ma isi tagata Iutaia faamaoni e toatolu o ē na avefaapagota i Papelonia, e faia ni aʻoaʻoga mai le Faiga Malo ma iu ina avea ai i latou o ni tagata sa galulue i ni tulaga maualuluga i Papelonia. (Tanielu 1:3-7; 2:48, 49) Peitai ane, e oo lava i taimi a o aʻoaʻoina i latou, sa maumauai pea lo latou tulaga e tusa ai o ni mataupu e faatatau i meaʻai lea e ono latou solia ai le Tulafono na saunia e lo latou Atua, o Ieova, e ala mai ia Mose. Sa faamanuiaina i latou ona o lenei mea. (Tanielu 1:8-17) Ina ua faatūina e le tupu o Nepukanesa se faatusa a le Faiga Malo, e mautinoa na faamalosia uo Eperu e toatolu a Tanielu ina ia auai atu i le sauniga ma isi tagata sa latou faipule faatasi i le Faiga Malo. E ui lava i lea, sa latou teena le “faapauu ai ma ifo” i le tupua a le Malo. Ona toe tauia foi lea e Ieova lo latou faamaoni. (Tanielu 3:1-6, 13-28) I se tulaga tutusa ma aso nei, e faaaloalo Molimau a Ieova i le fuʻa a le atunuu o loo latou nonofo ai, ae o le a latou lē faatinoina atu i ai se gaoioiga tau tapuaiga.—Esoto 20:4, 5; 1 Ioane 5:21.

7. (a) O le ā le tulaga e sili ona lelei na maumauai i ai Tanielu, e ui lava sa ia te ia se tulaga maualuga i le faiga malo a Papelonia? (e) O ā suiga na oo mai i le vaitaimi o Kerisiano?

⁷ Ina ua paʻū le pulega malosi a Papelonia, sa faaeeina atu ia Tanielu se tulaga maualuga faalemalo, e le pulega a Metai ma Peresia lea na soloaʻi ane e suitulaga ia Papelonia. (Tanielu 5:30, 31; 6:1-3) Peitai na te lei faatagaina lona tulaga maualuga e faalēaogaina ai lona faamaoni. Ina ua faatonuina o ia e le tulafono a le Faiga Malo ina ia tapuai atu i le tupu o Kuresa nai lo le tapuai ia Ieova, sa teena e ia. O le mafuaaga lena na lafoina ai o ia i le lua o leona, peitai na faasaoina o ia e Ieova. (Tanielu 6:4-24) Ioe, o mea na sa tutupu i le vaitaimi a o lei oo mai le Faa-Kerisiano. Ae ina ua faavae le faapotopotoga Kerisiano, ona iai loa lea o auauna a le Atua “i le tulafono ia Keriso.” Sa tatau ona ese le vaaiga e ao ona latou vaai ai i le tele o mea sa faatagaina a o iai i le faiga o mea faa-Iutaia, e faavae aʻe i le ala lea o loo feutagai  ai nei Ieova ma ona tagata.—1 Korinito 9:21; Mataio 5:31, 32; 19:3-9.

Le Silafaga a Iesu e Faatatau i Faiga Malo

8. O le ā le mea na tupu e faaalia ai sa maumaututū Iesu ina ia alofia le faia o sana vaega i faiga faapolotiki?

⁸ A o iai Iesu Keriso i le lalolagi, na ia faavaea ai ni tapulaa maualuluga mo ona soo, ma sa ia teena uma le faia o ni vaega i mataupu faapolotiki po o mataupu faavaegaʻau. Ina ua mavae le fafagaina faavavega e Iesu o le faitau afe o tagata i ni nai pāpāfalaoa ma tamai iʻa e lua, ona mananao lea o tagata Iutaia e pue mai o ia e fai ma tupu faapolotiki. Peitai na alofia e Iesu i latou i lona sola vave atu i mauga. (Ioane 6:5-15) E faatatau i lenei mea na tupu, ua taʻua i le New International Commentary on the New Testament: “Sa matuā tetele manaonaoga faalotonuu o tagata Iutaia i lena vaitaimi, ma e mautinoa o le toatele o i latou o ē na vāai i le vavega sa latou manatu o lea la ua iai se taʻitaʻi agavaa mai le Atua, o ia tonu lea e ao ona taʻitaʻia i latou e tetee atu ai i tagata Roma. Ona latou maumauai ai lea ina ia fai o ia ma tupu.” Ua faapea atili mai lea tusi, “na matuā teena” e Iesu lenei faaeaea o se taʻitaʻi faapolotiki. Sa lē lagolagoina e Keriso so o se taumafaiga fouvale a Iutaia e tetee atu ai i le pulega a Roma. O le mea moni, na ia valoia maia mea o le a iu i ai le fouvalega lea o le a fai pe a mavae atu lona maliu—o auēga e lē mafaamatalaina ia i latou o loo ʻaināina Ierusalema ma le faaumatiaga o lena aai.—Luka 21:20-24.

9. (a) Na faapefea ona faamatalaina e Iesu le faiā a lona Malo i le lalolagi? (e) O le ā le taʻiala na avatu e Iesu i ona soo e faatatau i a latou feutagaiga ma faiga malo a le lalolagi?

⁹ A o toeitiiti lava oo i lona maliu, na fetalai atu ai Iesu i se sui faapitoa o le emeperoa o Roma sa iai i Iutaia: “E le mai le lalolagi nei loʻu malo; afai ana mai le lalolagi nei loʻu malo, po ua tau aʻu auauna, ina neʻi tuuina atu aʻu ia Iutaia; a o lenei, e le mai iinei loʻu malo.” (Ioane 18:36) E usiusitai pea soo o Keriso i lana faaaoaoga, seiloga lava ua faaiuina e lona Malo le pulega a faiga malo faapolotiki. Latou te usiusitai atu i na pule ua faavaeina, ae latou te lē faauilavea i mea faapolotiki o loo faia e na pule. (Tanielu 2:44; Mataio 4:8-10) Na saunia e Iesu ni taʻiala mo ona soo, i le fetalai atu: “O lenei, o mea a Kaisara, ia outou avatu ia Kaisara; a o mea a le Atua ia avatu ia i le Atua.” (Mataio 22:21) I se taimi muamua atu, i lana Lauga i luga o le Mauga, na fetalai ai Iesu: “Ai se [“o iai le pule,” NW] na te tauanau mai lua te o ma ia i le maila e tasi, ina o ia oulua ma ia i maila e lua.” (Mataio 5:41) E tusa ai ma le mataupu atoa o lenei lauga, sa faataʻitaʻi ai e Iesu le mataupu silisili o le gauai atu ma le loto malie i poloaiga talafeagai, pe o ni poloaiga mai tagata po o ni manaoga mai le malo, o loo ogatusa ma le tulafono a le Atua.—Luka 6:27-31; Ioane 17:14, 15.

O Kerisiano ma Kaisara

10. E tusa ai ma faamatalaga a se tasi tusitala o talafaasolopito, o le ā le tulaga talafeagai sa tauaveina e uluai Kerisiano e faatatau ia Kaisara?

¹⁰ O taʻiala pupuu nei sa tatau ona pulea ai le faiā i le va o Kerisiano ma le Faiga Malo. I le tusi a le tusitala o talafaasolopito o E. W. Barnes e taʻua o le Rise of Christianity, na ia tusi ai e faapea: “Mo le tele o isi senituri mulimuli ane, po o le ā lava se mea sa tau faaletonu ai se Kerisiano e faatatau i ona tiute agaʻi i le Faiga Malo, sa liliu atu o ia i aʻoaʻoga silisili a Keriso. Sa ia totogia lafoga: atonu sa mamafa naʻuā lafoga na tāpā—na oo ina tau lē mafai ona tatalia le tetele o lafoga a o lei oo ina malepe ifo le Emepaea o atunuu i Sisifo—peitai o le a onosaia pea e le Kerisiano na faigata. O le a faapena foi ona ia talia isi uma avega tauave mai le Faiga Malo, o mea sa lē manaomia ai ona ia tuuina atu ia Kaisara mea e tatau ona tuuina atu i le Atua.”

11. O le ā le auala na fautua atu ai Paulo i Kerisiano ina ia latou feutagai ai ma pule o le lalolagi?

¹¹ I le ogatusa ma lenei mataupu silisili, i  le sili laitiiti atu lava i le 20 tausaga talu ona mavae le maliu o Keriso, na taʻu atu ai e le aposetolo o Paulo i Kerisiano i Roma: “Ia usiusitai tagata uma i faipule silisili.” (Roma 13:1) Pe tusa ma le sefulu tausaga mulimuli ane, a o toeitiiti lava oo i lona faafalepuipuiina lona lua ma lona fasiotia i Roma, na tusi atu ai Paulo ia Tito: “Ia e faamanatu atu ia i latou [o Kerisiano i Kereta] ia latou usiusitai i alii sili ma faipule, ia gauai, ia nofo sauniuni foi i latou i galuega lelei uma lava, aua neʻi upu leaga i se tasi, aua neʻi faamisa, a ia faapalepale, ma ia faaali atu le agamalu uma i tagata uma lava.”—Tito 3:1, 2.

Le Malamalamaga Atili e Faatatau i “Faipule Silisili”

12. (a) O le ā le manatu o Charles Taze Russell e tusa ai o le tulaga talafeagai o se Kerisiano e fai faatatau atu i pule faalemalo? (e) E tusa ai ma le auai atu i vaegaʻau, o ā manatu eseese na iai i Kerisiano faauuina i le taimi o le Taua Muamua a le Lalolagi?

¹² I tuā lava i le 1886, na tusia ai e Charles Taze Russell i le tusi The Plan of the Ages e faapea: “Sa lē faalavelave fua Iesu po o le ʻau Aposetolo i pule o le lalolagi i so o se mea lava. . . . Sa latou aʻoaʻoina le Ekalesia ina ia usiusitai i tulafono, ma ia faaaloalo ia i latou o loo i le tulaga pule ona o lo latou tofiga, . . . ia totogi a latou lafoga ua faatonuina, ae seʻi vaganā vaega ua feteenai tulafono a le Faiga Malo ma tulafono a le Atua (Galuega 4:19; Galuega 5:29) ia leai se tetee atu i so o se tulafono ua faavaeina. (Roma 13:1-7; Mataio 22:21) Sa usiusitai Iesu ma le ʻau Aposetolo ma le ekalesia anamua i tulafono, e ui lava sa vavae ese mai i latou, ma lē faia sa latou vaega i faiga malo a lenei lalolagi.” Ua faailoa saʻo mai e lenei tusi i latou ua taʻua o “pule maualuluga,” po o “faipule silisili,” lea na taʻua e le aposetolo o Paulo, o ni ē pule i faiga malo faaletagata. (Roma 13:1, King James Version) I le 1904 na taʻua ai e le tusi The New Creation e faapea, o Kerisiano moni “e tatau ona aofia ai i tagata o ē sili ona latou usiusitai i tulafono o aso nei—e lē faatupu vevesi, e lē faamisa, e lē suesue masei.” Sa faauiga e nisi lenei manatu e faapea, o le matuā gauai atoatoa atu i pule o malo, e oo atu lava i le tulaga o le taliaina o le auai i le vaegaʻau i le taimi o le Taua Muamua a le Lalolagi. Peitai ane, sa manatu isi o le auai i le vaegaʻau e feteenai lena ma le fetalaiga a Iesu e faapea: “O i latou uma o e tago i le pelu, e oti i latou i le pelu.” (Mataio 26:52) E manino mai la, sa manaomia se malamalamaga e sili atu ona manino o le gauai atu faa-Kerisiano i faipule silisili.

13. O le ā le suiga o le malamalamaga i le mātauliaina o pule maualuluga na faaalia mai i le 1929, ma na faapefea ona faamaonia le aogā o lenei mea?

¹³ I le 1929, i le taimi ina ua amata ona faasā e tulafono a nisi faiga malo, mea o loo tāpā mai e le Atua, po o le tāpā mai e faiga malo o mea e faasā e tulafono a le Atua, ona iai lea o le talitonuga faapea, atonu o pule maualuluga sa faatatau atu ia Ieova le Atua ma  Iesu Keriso. * O le malamalamaga lena o auauna a Ieova i le vaitaimi faigata a o lei oo mai ma ina ua faagasolo foi le Taua Lona Lua a le Lalolagi ma faasolo mai ai i Taua Faaupufai a Malo, faatasi ai ma lona faaputuina o meatau faaniukilia ma ana sauniuniga faavaegaʻau. I le tepa atu i tuā i na taimi, e tatau ai ona faapea atu, o lenei manatu i tulaga o mea, i le siitiaina e pei ona iai i lena taimi o le silisili ese o Ieova ma lana Keriso, sa fesoasoani lea i tagata o le Atua ina ia tausisia ai se tulaga solitu lē maluelue i le gasologa o lenei vaitaimi faigata.

Le Gauai e Fai Faatatau

14. Na faapefea i le 1962 ona susulu atu le malamalama ua faateleina e faatatau i le Roma 13:1, 2 ma isi mau e fesootai i ai?

¹⁴ O le 1961 na maeʻa ai ona saunia le New World Translation of the Holy Scriptures. O lona sauniunia sa manaomia ai se suesuega maeʻaeʻa o le gagana sa uluai tusia ai le Tusi Paia. O le faaliliuga saʻo aʻiaʻi o upu ia e faaaogā i le Roma mataupu e 13 faapea foi i isi fuaitau e pei o le Tito 3:1, 2 ma le 1 Peteru 2:13, 17, ua manino mai ai o le taʻu “faipule silisili” ua faasino atu, e lē ia Ieova, le Pule Silisili, ma lona Alo, o Iesu, ae faasino atu i pule o faiga malo faaletagata. I le faaiuiuga o le 1962, na lomia ai mataupu i Le Olomatamata faa-Peretania na avatu ai se faamatalaga saʻo o le Roma mataupu e 13 ma saunia ai foi se manatu ua sili atu ona manino nai lo le manatu lea sa iai i le vaitaimi o C. T. Russell. Na taʻua e nei mataupu e faapea o le gauai faa-Kerisiano i pule e lē mafai ona faia i se tulaga atoatoa. E tatau ona fai faatatau, o le gauai atu i ai e lē tatau ona aumaia ai se feteenaiga a auauna a le Atua ma tulafono a le Atua. O isi mataupu o Le Olomatamata ua faamamafa atili ai lenei manatu tāua. *

15, 16. (a) O le ā le manatu ua sili ona talafeagai ua iu ina maua, ona o le malamalamaga fou o le Roma mataupu e 13? (e) O ā fesili e tatau ona taliina?

¹⁵ O le ki lenei i le malamalamaga saʻo o le Roma mataupu e 13 ua mafai ai e tagata o Ieova ona faapaleniina le faaaloalo tatau mo pule faapolotiki ma se tulaga maumauai i mataupu silisili tāua faale-Tusi Paia. (Salamo 97:11; Ieremia 3:15) Ua mafai ai ona latou maua se vaaiga talafeagai i la latou faiā ma le Atua ma a latou feutagaiga ma le Faiga Malo. Ua faamautinoa ai, a o latou totogi atu mea a Kaisara ia Kaisara, e latou te lē lafoaia ai foi le totogi atu o mea a le Atua i le Atua.

¹⁶ Ae o ā la mea a Kaisara? O ā mea faaletulafono e mafai ona tāpā e le Faiga Malo mai i se Kerisiano? O fesili nei o le a talanoaina i le mataupu o loo sosoo mai.

[Faaopoopoga i lalo]

Ia mātauina, i lana faamatalaga i le Roma mataupu e 13, ua tusi ai le polofesa o F. F. Bruce e faapea: “O loo manino mai i le aotelega o le mataupu lena e tasi, e pei ona aumaia i le aotelega faalauaitele o tusitusiga a aposetolo, e mafai ona tāpā ma le tonu e le faiga malo le usiusitai, ae faatapulaa e tusa ai o fuafuaga ua faatagaina ai i latou e le Atua—ae maise lava, e lē gata ina mafai ae tatau foi ona teena le faiga malo, pe afai latou te tāpā le usiusitai lea e na o le Atua e tatau i ai.”

Pe Mafai Ona E Faamatala?

□ Aisea e lē faauiga ai le gauai atu i faipule silisili, i le gauai atu foi ia Satani?

□ O le ā le manatu sa ia Iesu agaʻi i faiga faapolotiki i ona aso?

□ O le ā le fautuaga na tuuina atu e Iesu i ona soo e faatatau i a latou feutagaiga ma Kaisara?

□ O le ā le auala na fautua atu ai Paulo i Kerisiano ina ia latou feutagai ai ma pule o atunuu?

□ Ua faapefea ona tuputupu aʻe pea i le gasologa o tausaga le malamalamaga e faatatau i le mātauliaina po o ai faipule silisili?

[Fesili mo le Suʻesuʻega]

[Ata i le itulau 10]

Ina ua ofoina atu e Satani ia Iesu le pule i malo faapolotiki, sa teena e Iesu

[Ata i le itulau 13]

Na tusia e Russell e faapea o Kerisiano “e tatau ona aofia ai i tagata o ē sili ona latou usiusitai i tulafono o aso nei”