Le Faa-Kerisiano i le Uluai Senituri ma le Faiga Malo

INI nai itula lava a o lei maliu, na fetalai atu ai Iesu i ona soo: “E lē ni o le lalolagi outou, a ua ou filifilia outou nai le lalolagi, o le mea lea e ʻinoʻino ai le lalolagi ia te outou.” (Ioane 15:19) Po o le uiga ea la o lenei mea e iai i Kerisiano se uiga faatautee i faipule silisili o lenei lalolagi?

E Lē ni Ō le Lalolagi ae e Lē Faatautee Foi

Na taʻu atu e le aposetolo o Paulo i Kerisiano na soifua i Roma: “Ia usiusitai tagata uma i faipule silisili.” (Roma 13:1) O le tulaga foi lea na tusi ai le aposetolo o Peteru e faapea: “O lenei, ia outou usiusitai atu i tofiga uma a tagata auā o le Alii; po o le tupu ina ua sili; po o alii, o i latou ua aauina mai e ia ina ia faasalaina ai ē amio leaga, a ia viia ē amio lelei.” (1 Peteru 2:13, 14, LT) O le usiusitai i le Faiga Malo ma ona sui tofia ua tatau ai, e manino mai sa avea o se mataupu silisili na talia e uluai Kerisiano. Na latou vilivilitai ina ia avea ma tagatānuu e tausi tulafono ma nofo lelei ma tagata uma.—Roma 12:18.

I le ulutala “Lotu ma le Faiga Malo,” ua faalauiloa mai ai e le Encyclopedia of Religion e faapea: “I uluai senituri muamua e tolu TA, o le lotu Kerisiano sa matuā tū ese mai tagata maualuluga o le malo o Roma . . . E ui i lea, o taʻitaʻi

 Kerisiano . . . na aʻoaʻoina atu le usiusitai i le tulafono a Roma ma le faamaoni i le emeperoa, i tapulaa na faataatitia mai e le faatuatuaga faa-Kerisiano.”

Āva, ae Lē Tapuai i Ai

Sa lei faatautee Kerisiano i le emeperoa o Roma. Na latou faaaloalogia lana pule ma avatu ia te ia le āva e tatau ai mo lona tulaga. I le taimi o le pulega a le emeperoa o Nero, na tusi ai le aposetolo o Peteru i Kerisiano na ola i vaipanoa eseese o le Emepaea o Roma e faapea: “Ia outou ava i tagata uma; . . . ia ava i le tupu.” (1 Peteru 2:17) O le upu “tupu” sa faaaogā e tagata na tāutatala i le gagana Eleni e lē gata mo o latou lava tupu ae mo le emeperoa foi o Roma. Na fautua atu le aposetolo o Paulo i Kerisiano na ola i le taulaga o le Emepaea o Roma e faapea: “O lenei, ia avatu i tagata uma lava a latou mea; . . . o le faaaloalo i e ua tatau i ai le faaaloalo.” (Roma 13:7) Na sili ona faaaloalogiaina le emeperoa o Roma. Na iai le taimi na oo lava ina manaomia ai ona tapuai atu ia te ia. O iinei la, na lei lolo atu ai loa uluai Kerisiano.

I lona faamasinoga i luma o le sui konesula o Roma i le senituri lona lua T.A., na lipotia mai ai le tala a Polycarp sa fai e faapea: “O aʻu o le Kerisiano. . . . Ua aʻoaʻoina i matou e avatu le āva uma e tatau ai . . . i pule ma faipule silisili ia ua tofia e le Atua.” E ui i lea, na filifili Polycarp e oti nai lo le tapuai atu i le emeperoa. Na tusia e lē na puipuia le faatuatua i le senituri lona lua o Teofilo o Anetioka e faapea: “O le a ou āva i le emeperoa, e lē ia tapuai ia te ia, ae ou te tatalo mo ia. Ae o le Atua, le Atua soifua ma o le Atua moni, ou te tapuai i ai.”

O tatalo talafeagai e faatatau i le emeperoa e matuā leai se fesootaiga ma le tapuai i le emeperoa po o le lotonuu. Na faamatala e le aposetolo o Paulo la latou fuafuaga: “O lenei, e muamua i mea uma ou te apoapoai atu ia faia olega, ma tatalo, ma faatoga, ma faafetai mo tagata uma lava; mo tupu ma i latou uma ua i ai le pule, ina ia tatou nonofo ma le le atuatuvale ma le filemu, i le amio Atua uma lava ma le amio matagofie.”—1 Timoteo 2:1, 2.

“E Lē Tutusa ma Tagata Lautele”

O lenei amio faaaloalo a uluai Kerisiano sa lei avea ai i latou ma uo a le lalolagi lea na latou ola aʻe ai. Ua taʻua e le tusitala o talafaasolopito mai Falani o A. Hamman e faapea o uluai Kerisiano sa “lē tutusa ma tagata lautele.” O le mea moni na ola i latou e lē pei, o le sosaiete o tagata Iutaia ma le sosaiete o tagata Roma, ma latou fesagai ai ma le tele o tuuaʻiga lē tonu ma manatu sese mai ia i latou na.

O se faaaoaoga, ina ua tuuaʻia sese o ia e taʻitaʻi Iutaia, sa taʻua ai e le aposetolo o Paulo i lana tali atu i le kovana Roma e faapea:  “Ua ou le agasala lava i le tulafono o Iutaia, po o le malumalu, po o Kaisara. . . . Ou te valaau ia Kaisara.” (Galuega 25:8, 11) O le iloaina e faapea na taupulepule Iutaia e fasiotia o ia, na faia ai e Paulo se tagi ia Nero, ma faapea ona amanaia ai le pule a le emeperoa o Roma. I le faagasologa mai o le taimi, i lona faamasinoga muamua i Roma, e aliali mai ai sa sao Paulo mai le faamasinoga. Ae na mulimuli ane toe faafalepuipuiina o ia, ma e tusa ai i le talafaasolopito na faasalaina o ia i le oti ona o faatonuga a Nero.

E tusa ai i le tulaga faigata o uluai Kerisiano i totonu o Roma, na tusi ai e se tasi o lē e suesue i olaga o tagata ma o se aʻoaʻo faafaifeau, o Ernst Troeltsch e faapea: “Na matuā faasaina ofisa uma ma galuega sa iai fesootaiga ma tapuaiga i tupua, po o le tapuai atu i le emeperoa, po o i latou na auai i le faamasaatoto po o faasalaga oti, po o i latou na aumaia Kerisiano i se fesootaiga ma amioga lē mamā faapaupau.” Pe na lei tuua ai ea e lea tulaga se avanoa mo se faiā filemu ma le feāvatai i le va o Kerisiano ma le Malo?

Totogi Atu ia Kaisara Ana “Mea”

Na saunia e Iesu se faatulagaga tāua lava e mafai ona pulea ai amioga a Kerisiano agaʻi i le Malo o Roma po o, e tusa ai o lena fetalaiga, i so o se isi lava malo, ina ua ia fetalai e faapea: “O mea a Kaisara, ia outou avatu ia Kaisara; a o mea a le Atua ia avatu ia i le Atua.” (Mataio 22:21) O lenei fautuaga i soo o Iesu sa matuā eseese mamao lava ma uiga o le toatele o tagata Iutaia lotonuu o ē na lei fiafia i le pulega a Roma ma faafinau atu i le faamaoniga faaletulafono o le totogia o lafoga i se pulega ese.

Mulimuli ane, na taʻu atu ai e Paulo i Kerisiano na soifua i Roma e faapea: “O lenei, e tatau ona usiusitai, e le gata ona o le toasa, a e peitai ona o le loto fuatia ifo. O le mea foi lea tou te avatu ai taulaga, auā o auauna i latou [“faipule silisili” faalemalo] a le Atua, o loo finafinau i lenei lava mea. O lenei, ia avatu i tagata uma lava a latou mea; o le lafoga i e ua tatau i ai le lafoga; o le tiute i e ua tatau i ai le tiute.” (Roma 13:5-7) A o lē avea Kerisiano ma ni ō le lalolagi, ae sa tatau ia i latou ona faamaoni, o ni tagatānuu e totogi a latou lafoga, o le totogia lea o le Malo mo auaunaga o loo latou saunia maia.—Ioane 17:16.

Ae pe na o le totogia ea o lafoga na faatatau i ai fetalaiga a Iesu? Talu ai sa lei faamatalaina  tonu mai e Iesu po o ā mea a Kaisara a o ā mea a le Atua, e iai la tuaoi o mea e tatau ona filifili ai e tusa i le aotelega atoa o le mau pe e tusa ai i lo tatou malamalamaga o le Tusi Paia atoa. I nisi faaupuga, o le filifilia o mea e mafai e se Kerisiano ona totogia ia Kaisara o le a aofia ai i nisi taimi le loto fuatia ifo o se Kerisiano, lea ua aʻoaʻoina e mataupu silisili o le Tusi Paia.

Se Tulaga Paleni Lelei i Vaega Tauva e Lua

E tele ina galo i le toatele o tagata, ina ua uma ona taʻua le tatau ona toe avatu mea a Kaisara ia te ia, na faaopoopo mai Iesu: “A o mea a le Atua [toe totogi] i le Atua.” Na faaalia e le aposetolo o Peteru le mea e ao ona faamuamua e Kerisiano. Ae ina ua maeʻa ona fautuaina le gauai atu i le “tupu,” po o le emeperoa, ma ona “alii,” na tusi ai faapea Peteru: “[Ia] pei o e saʻoloto, a e aua neʻi fai le saʻolotoga ma ufiufi o le loto leaga, a ia faapei o auauna a le Atua. Ia outou ava i tagata uma; ia alolofa atu i le au uso; ia matatau i le Atua; ia ava i le tupu.” (1 Peteru 2:16, 17) Na faaalia e le aposetolo e faapea o Kerisiano o auauna a le Atua, ae lē o ni auauna a se pule faaletagata. E ui ina tatau ona latou faaalia le āva ma le faaaloalo e tatau ai mo sui o le Malo, ae manaomia ona latou faia faapea ona o le matataʻu i le Atua, o lē e silisili atu ona maualuga ana tulafono.

I tausaga muamua atu na faamautinoa ai e Peteru i isi le sili mamao atu o tulafono a le Atua nai lo tulafono a tagata. O le ʻau Saniterini Iutaia sa avea ma pulega na tuuina atu i ai e Roma le pule i ona tagata ma lotu. Ina ua latou faatonuina soo o Iesu e taofi le aʻoaʻo i le suafa o Keriso, na tali atu ma le faaaloalo ae maumauai ia Peteru ma isi aposetolo e faapea: “E tusa ona sili o lo matou anaana i le Atua i lo matou anaana i tagata.” (Galuega 5:29) E manino mai la, na tatau i uluai Kerisiano ona tausisia se tulaga paleni lelei i le usiusitai i le Atua ma le gauai tatau atu i faipule silisili faaletagata. Na faapea ona taʻua ai e Tetuliano i le amataga lava o le senituri lona tolu T.A.: “Afai e o Kaisara mea uma, o le ā o le a totoe mo le Atua?”

Maliega ma le Malo

A o mavae atu le taimi, o le tulaga na tausisia e Kerisiano i le uluai senituri i le va ma le Malo, na faasolo ina faavaivaia. O le faaaposetasi lea na valoia e Iesu ma le ʻau aposetolo na matuā olaola mai i le senituri lona lua ma le lona tolu T.A. (Mataio 13:37, 38; Galuega 20:29, 30; 2 Tesalonia 2:3-12; 2 Peteru 2:1-3) Na faia e le Faa-Kerisiano aposetate ni maliega ma Roma, na latou faataʻitaʻi i ana faamanatuga faapaupau ma ana filosofia, ma talia ana auaunaga e lē gata mo le malo ae faapea foi auaunaga faavaegaau.

Na tusia e le polofesa o Troeltsch e faapea: “Mai le senituri lona tolu ma faasolo mai ai, na sili atu ona faigata le tulaga o mea, auā na iu ina sili atu ona toatele Kerisiano na iai i vaega maualuluga o le Sosaiete ma galuega sili ona taulia, i le vaegaau ma galuega aloaia faalemalo. I nai itulau o tusitusiga Kerisiano [e lē faale-Tusi Paia] o loo iai taʻutinoga tiga e faatautee i le auai i nei mea; i le isi itu ua maua ai foi taumafaiga ina ia faagutugutulua—o finauga ua fuafua ina ia tau faaleleia ai loto fuatia ifo ua faapopoleina . . . Mai le taimi o Konesetatino, na mou atu ai ia faigata; na muta ai feeseeseaiga i le va o Kerisiano ma faiga faapaupau, ma na avanoa ai ofisa uma i le Malo e maua ai tofiga mo Kerisiano faatagafai.”

I le agaʻi atu i le iuga o le senituri lona fa T.A., na avea ai lenei ituaiga o faiga pisipisia ma le lē faamaoni o le Faa-Kerisiano ma lotu a le Malo o le Emepaea o Roma.

I lona talafaasolopito atoa, o Kerisinetoma—lea e suitulaga ai Lotu Katoliko, Lotu Orthodox, ma Lotu Porotesano—ua faaauau ona lolo atu i le Malo, ma atili auai atu i ana mea faapolotiki ma lagolagoina ana taua. O le toatele o tagata faamaoni o lotu na faateʻia ai i lenei mea, e mautinoa le fiafia e iloa o loo iai Kerisiano i aso nei o loo tausisi atu i le tulaga o Kerisiano o le uluai senituri i la latou faiā ma le Malo. O mataupu e lua o mulimuli mai o le a talanoaina atili ai lea mataupu.

[Ata i le itulau 5]

O Kaisara Nero, o lē na tusi ai Peteru e faapea: “Ia ava i le tupu”

[Ē Ana le Ata]

Musei Capitolini, Roma

[Ata i le itulau 6]

Na filifili Polycarp e oti nai lo le tapuai atu i le emeperoa

[Ata i le itulau 7]

Sa avea uluai Kerisiano ma tagatānuu e nofo lelei ma tagata uma, e faamaoni, ma totogi a latou lafoga