Lipoti a Ē Faalauiloa le Malo

O le Mana o le Afioga a le Atua e Suia Ai

E ALA i lana lava taʻutinoga, na masani ona avea o ia ma sē “taufaifai, ma faasaua, ma faatāutala.” (1 Timoteo 1:13) Peitai ua suia o ia! Ona o le telē o le suiga na oo i le aposetolo o Paulo na mafai ai ona ia faailoa mai e faapea: “Ia outou faaaʻoaʻo mai ia te au, pei o aʻu ia Keriso.”—1 Korinito 11:1.

I aso nei, e faitau selau afe tagata tapuai faamaoni i le lalolagi aoao ua faia ni suiga talitutusa faapena. O le ā ua fesoasoani ia i latou e faia ia suiga? Ona ua latou ave i fale le poto o le Afioga a le Atua ma faatatauina i o latou olaga. O le mea na tupu o loo sosoo mai ua faamatilatila mai ai le mana o le Afioga a le Atua e suia ai tagata.

I Slovenia sa iai se ulugalii matutua e nonofo na o i laua lava i se nuu maotua. O le tane, o Iose, e tusa ma le 60 tausaga lona matua ma sa iai sona faafitauli ogaoga o le puleaina lea o ia e le ava malosi. Peitai, sa ia faaauau pea ona ia tausia si ana avā sa faamaʻia o Ljudmila. I se tasi aso, na asia ai Iose e tagata talaʻi e toalua o le Malo. Sa ia taliaina Molimau i totonu o lona fale, ma sa feiloai atu ai i laua i lana avā. A o faalogologo Ljudmila i le feau o le Malo, sa maligi ifo ona loimata o le olioli. Sa olioli foi Iose i mea sa faalogo i ai ma fesiligia ai le tele o fesili. Ina ua uma ona tuuina atu lomiga faale-Tusi Paia i le ulugalii ona tuumuli loa lea o Molimau.

O le masina mulimuli ane sa mafai ai ona toe foi atu Molimau, ma sa la vaaia ai le tusi E Mafai ona E Ola e Faavavau i Parataiso i Le Lalolagi o loo i luga o le laulau. Ina ua fesiligia po o fea na maua mai ai le tusi, sa fai mai Iose: “Sa ou vaaia se faasilasilaga i le itulau mulimuli o se tasi o mekasini na oulua tuuina mai ia te au. O lea sa ou tusi atu ai i lo outou ofisa i Zagreb ma talosagaina le tusi.” O le mātauina o lona naunau, sa valaaulia ai o ia e auai i le Faamanatuga o le maliu o Keriso e sosoo ai lea na faia i le Maota o le Malo. Sa matuā fiafia Molimau ina ua auai atu o ia!

E lei umi ae amataina loa se suesuega faale-Tusi Paia, ma sa lelei lava le agaigai i luma. O se faataʻitaʻiga, ina ua iloa e Iose mai le Tusi Paia e faapea e “aua e te fai mo oe se tupua ua ta, po o . . . ifo i ai, aua foi e te auauna i ai,” sa vave lava ona ia aoina faatasi faatusa ma ata faalelotu uma sa i lona fale, ma lafoaia loa.—Esoto 20:4, 5.

O le galala o Iose mo upu moni faaleagaga sa faamalieina. Peitai o le tulaga e faanoanoa ai, ona sa faaauau pea foi ona ia galala mo le ava malosi. Mo le 18 tausaga, sa masani ona ia inuina le tusa ma le fitu kuata [7 lita] o le uaina i aso taitasi. Ona o lona faafitauli i le ava malosi, o lea sa ia lē popole tele ai i ana teuga ma ona foliga atu. Peitai ina ua ia aʻoaʻoina le silafaga a le Atua i le faaaogaina sese o le ava malosi, sa ia maumauai loa e faia ni suiga.

Sa taumafai malosi o ia e faasolosolo mālie ona foia lona faafitauli, i le tusitusia lea o le aofai o ʻava malosi na te inuina i aso taitasi. E lei leva lava, ae lē toe puleaina loa o ia e le ʻava malosi. A o faagasolo pea ana suesuega faale-Tusi Paia, sa ia aʻoaʻoina ai foi o Kerisiano moni e manaomia ona tausisia le tumamā lelei o le tagata lava ia. O lea, sa ia tuuina atu ai tupe i Molimau ma faapea atu: “Ia, ō atu ma faatau mai so o se mea e talafeagai ma e manaomia ona ou faaaogaina i sauniga faa-Kerisiano ma le galuega talaʻi!” Sa toe foi atu Molimau ma ofuvae laiti, o totini, o seevae, o ofutino, o suti, o fusiua, ma le ato taʻitaʻi.

E tusa ma le tausaga talu ona fai le la suesuega faale-Tusi Paia, ae mafai loa ona avea Iose ma Ljudmila ma ē ua agavaa e auai faatasi ma Molimau i le galuega talaʻi mai lea fale i lea fale. O le tolu masina mulimuli ane ai na la faailoa atu ai lo la tuuina atu i le Atua e ala i le papatisoina i le vai i se tauaofiaga itumalo o Molimau a Ieova. E ui lava i le tulaga matua ma le lē lelei o le soifua maloloina, ae sa auai e lē aunoa Iose i le talaʻiga o le tala lelei ma mulimuli ane, sa auauna pea o ia o se auauna o le faiva i le faapotopotoga seia oo i lona maliu ia Me, 1995. O fua mautinoa ua fuaina mai i le olaga o lenei tagata loto maulalo ma lana avā ua faamaonia ai e mafai e le mana o le Afioga a le Atua ona suia le tagata!