Ia Faitau le Afioga a le Atua ma Auauna ia te Ia i le Upu Moni
Ia Faitau le Afioga a le Atua ma Auauna ia te Ia i le Upu Moni
“Ieova e, ia e faasino mai ia te au lou ala, ou te savali i le mea moni mai ia te oe.”—SALAMO 86:11.
1. I se aotelega puupuu, o le ā na taʻua e le uluai lomiga o lenei mekasini e faatatau i le upu moni?
UA FAASUSULU mai e Ieova le malamalama ma le upu moni. (Salamo 43:3) Ua ia foaia mai foi ia i tatou le tomai e faitau ai lana Afioga, le Tusi Paia, ma aʻoaʻoina le upu moni. O le uluai lomiga o lenei mekasini—Iulai 1879—na taʻua ai: “O le upu moni, ua faapei o sina tamai fugalaau manaia o loo iai i le vaomatua o le olaga fenuminumiai ma le faigata, lea ua siosiomia ma ua toetoe lava tineia ona o le tutupu tetele aʻe o vao o aʻoaʻoga sese. Afai e te fia suʻeina, e tatau la ona e matuā mataalia e saili pea. Afai e te iloa atu lona matagofie, e tatau ona e matuā saluesea vao o mea sese ma laau tuitui o manatu faauamaaʻa. Afai e te fia mauaina, e tatau ona e matuā gaoioi ma le punouai e saili. Aua le malie gofie i sina fugalaau e tasi po o ni nai vala o le upu moni. Pe ana fai e lava i le fugalaau e tasi po o ni nai aʻoaʻoga o le upu moni, semanū e lē toe saunia mai nisi mea. Ia aoaoina pea, ia sailiili atu pea.” O le faitauina ma le suesueina o le Afioga a le Atua e mafai ai ona tatou maua le poto saʻo ma savavali i lana upu moni.—Salamo 86:11.
2. O le ā na iu i ai ina ua faitau atu e Esera ma isi le Tulafono a le Atua i tagata Iutaia sa iai i Ierusalema anamua?
2 Ina ua maeʻa ona toe atiaʻe pa o Ierusalema i le 455 T.L.M., ona faitau atu lea e le faitaulaga o Esera ma isi le Tulafono a le Atua i tagata Iutaia. Ona sosoo lea ma se Tausamiga fiafia o Fale Apitaga, le taʻutinoga o agasala, ma le faaiuina o “le feagaiga moni.” (Neemia 8:1–9:38) Tatou te faitau ai: “Ua latou faitau maeʻa i le tusi i le tulafono a le Atua, ma ua latou folafola atu le uiga, ma faamatalaina atu ia te i latou le mea ua faitauina.” (Neemia 8:8) Ua faapea mai manatu o nisi tagata popoto, sa lei malamalama lelei tagata Iutaia i le gagana Eperu, ona toe faaupu ai lea o faamatalaga i le gagana Arama. Ae o le faaliliuga ua lē na o se faamalamalamaga o upu o le gagana Eperu. Sa faamatala auiliili atu e Esera ma isi le Tulafono ina ia manino ai tagata i ona mataupu silisili ma latou faatatauina. Ua faapena foi ona aogā lomiga faa-Kerisiano ma sauniga mo le ‘iloaina o le uiga’ o le Afioga a le Atua. Ua faapena foi ona faia e toeaina tofia, o ē e “mafaia ona aʻoaʻo atu.”—1 Timoteo 3:1, 2; 2 Timoteo 2:24.
Aogā Tumau
3. O ā nisi o aogā e maua mai le faitauina o le Tusi Paia?
3 Pe a faitauina faatasi e aiga Kerisiano le Tusi Paia, e mautinoa lo latou tofo ai i ni aogā tumau. E iu ina latou masani lelei ai i tulafono a le Atua ma iloa ai le mea moni e faatatau i talitonuga, o valoaga, ma isi lava mataupu. Pe a uma ona faitau se vaega o le Tusi Paia, atonu e fesili atu le ulu o le aiga: E tatau faapefea ona aogā lenei manatu ia i tatou? E faapefea ona fesootai atu lenei manatu i isi aʻoaʻoga a le Tusi Paia? E faapefea ona tatou faaaogā nei manatu i le talaʻia o le tala lelei? E mauaina e se aiga le tele o le malamalama a o faitauina le Tusi Paia, pe afai latou te faia ni sailiiliga e ala i le faaaogaina o le Watch Tower Publications Index po o isi faasino tusi o loo i totonu o lomiga a le Sosaiete. O tusi e lua o le Insight on the Scriptures e mafai foi ona saili atu i ai ma maua ai aogā.
4. Sa tatau faapefea ona faatatauina e Iosua faatonuga o loo faamauina i le Iosua 1:8?
4 O mataupu silisili e maua mai le Tusi Paia e mafai ona taʻitaʻia ai i tatou i le olaga. E lē gata i lea, o le faitau ma suesue i ‘tusitusiga paia e mafai ona faapoto ai i tatou mo le faaolataga.’ (2 Timoteo 3:15) Pe afai tatou te tuu atu i le Afioga a le Atua na te taʻitaʻia i tatou, ona tatou savavali ai pea lea i lana upu moni ma faataulauina ai o tatou faanaunauga amiotonu. (Salamo 26:3; 119:130) Peitai ane, e manaomia ona tatou saili le malamalama, e pei ona sa faia e Iosua, lea na sosoo ane ia Mose i le taʻitaʻiga o le nuu. Sa lē tatau ona teʻa ese mai lona gutu le “tusi o lenei tulafono,” ma sa tatau ona ia faitauina i le ao atoa ma le po. (Iosua 1:8) O le lē teʻa ese mai lona gutu o le “tusi o lenei tulafono” o lona uiga sa lē tatau ona taofia e Iosua lona taʻu atu o mea moni ina ia malamalama ai isi. O le faitauina o le Tulafono i le ao atoa ma le po o lona uiga sa tatau ia Iosua ona mafaufau loloto i ai, sa tatau ona suesue i ai. Sa faapena foi ona faalaeiau atu le aposetolo o Paulo ia Timoteo ina ia “mafaufau i ia mea”—ia manatunatu loloto i ai—i lana amio, lana faiva, ma lana aʻoaʻo atu. Ona o se toeaina Kerisiano, sa manaomia ai ia Timoteo ona matuā faaeteete ina ia avea lona olaga ma faaaoaoga lelei ma sa tatau ona ia aʻoaʻo atu le upu moni o le Tusi Paia.—1 Timoteo 4:15.
5. O le ā e manaomia pe afai tatou te fia maua le upu moni a le Atua?
5 O le upu moni a le Atua o se oloa e sili ona tautele. Mo le mauaina e manaomia ai ona ʻeli, ia maumauai pea e sailiili le Tusi Paia. Seʻi vaganā ua pei i tatou o ni tagata aʻoga e pei o ni tamaiti a le Aʻoaʻo Sili, ona faatoʻā mafai lea ona tatou maua le atamai ma tatou malamalama ai i le mataʻu ma le migao ia Ieova. (Faataoto 1:7; Isaia 30:20, 21) O le mea moni, e tatau ona tatou faaaogā le Tusi Paia e faamautinoa ai ia i tatou mea. (1 Peteru 2:1, 2) O tagata Iutaia i Perea sa “sili ona amio lelei o i latou nei i tagata Tesalonia, auā ua latou talia le upu ma le fiafia tele, ua saili i Tusi i lea aso ma lea aso, pe moni ia mea [na taʻu atu e Paulo].” Sa faamālō atu i tagata Perea nai lo le otegiaina i lo latou faia faapea.—Galuega 17:10, 11.
6. Aisea na mafai ai e Iesu ona faaali atu e faapea sa lei aogā i nisi tagata o Iutaia lo latou suesue i le Tusi Paia?
6 Na fetalai atu Iesu i nisi o tagata Iutaia: “E suesue outou i Tusi, auā ua outou manatu tou te maua ai le ola faavavau; o Tusi foi ia o loo molimau ia te au; a e le mafafai outou ina o mai ia te au, ia outou maua ai le ola.” (Ioane 5:39, 40) Sa latou suesueina le Tusi Paia ona o se faanaunauga saʻo—ina ia mafai e nei mea ona taʻitaʻia ai i latou ina ia maua le ola. O le mea moni, ua iai i le Tusi Paia valoaga e faatatau i le Mesia lea na faasino atu ia Iesu e avea ma ala i le ola. Ae na teena o ia e tagata Iutaia. O lea na lē aogā ai ia i latou lo latou suesueina o le Tusi Paia.
7. O le ā e manaomia ina ia tuputupu aʻe ai i le malamalama o le Tusi Paia, ma aisea?
7 Ina ia tatou tuputupu aʻe i lo tatou malamalamaga o le Tusi Paia, tatou te manaomia le taʻitaʻiga a le agaga o le Atua, po o le mana galue. “E suesue ifo le Agaga i mea uma, e oo lava i le uiga loloto o le Atua” ina ia malamalama ai i o latou uiga. (1 Korinito 2:10) Sa tatau i Kerisiano i Tesalonia ona latou “tofotofo i mea uma lava” i so o se valoaga na latou faalogo i ai. (1 Tesalonia 5:20, 21) Ina ua tusi atu Paulo i Kerisiano i Tesalonia (pe tusa o le 50 T.A.), sa na o le pau lava le vaega o Tusitusiga Eleni ua uma ona tusia, o le Evagelia a Mataio. O lea sa mafai ai e i latou i Tesalonia ma Perea ona faamautinoa i mea uma lava, atonu i le siakiina o le faaliliuga o le Septuagint faa-Eleni o Tusitusiga Eperu. Sa latou manaomia ona faitau ma suesue i le Tusi Paia, ma e faapena foi ia i tatou.
E Matuā Tāua mo Tagata Uma
8. Aisea e tatau ai i toeaina tofia ona matuā malamalama lelei i le poto o le Tusi Paia?
8 E tatau i toeaina tofia ona matuā malamalama lelei i le Tusi Paia. E ao ona latou “mafaia ona aʻoaʻo atu” ma e ao ona latou “taofi mau i le upu moni.” Sa tatau i le ovasia o Timoteo ona “talaʻitonuina le upu moni.” (1 Timoteo 3:2; Tito 1:9; 2 Timoteo 2:15) O lona tinā, o Eunike, ma le tinā o lona tinā o Loi sa la aʻoaʻoina o ia i tusitusiga paia mai lava i lona tamameamea, i le faamausalīina o le “faatuatua faamaoni” ia te ia, e ui lava sa lei talitonu lona tamā. (2 Timoteo 1:5; 3:15) E tatau i tamā talitonu ona tausia aʻe a latou fanau “i aoaiga ma apoapoaiga a le Alii [Ieova],” ae maise lava pe afai o toeaina o ni tamā o ē o loo iai ni a latou “fanau e faatuatua, e lei taʻua i latou ua ulavavale pe soli i tulafono.” (Efeso 6:4; Tito 1:6) E tusa lava po o ā o tatou tulaga o iai, ae tatau ona tatou matuā utagia le manaoga ina ia faitau, suesue, ma faatatauina le Afioga a le Atua.
9. Aisea e suesueina ai le Tusi Paia a o auaufaatasi ma isi uso Kerisiano?
9 E tatau foi ona tatou suesueina le Tusi Paia a o auaufaatasi ma isi uso talitonu. Sa manao Paulo i Kerisiano Tesalonia ina ia latou fetalanoaai i ana fautuaga. (1 Tesalonia 4:18) Ina ia faamaaiina lo tatou malamalama o le upu moni, e leai se mea e sili atu ona lelei nai lo le aufaatasi atu i isi tagata aʻoga loto naunau i le iloiloina o le Tusi Paia. Ua moni ai le faataoto: “E maamaai le uamea i le uamea, e faapena foi ona faamafanafana o le tagata i lana uo.” (Faataoto 27:17) E ono elea le uamea pe afai e lē faaaogaina soo ma faamaai. I se tulaga tutusa, e manaomia ona tatou feiloai e lē aunoa ma faamaaiina e le tasi le isi e ala i le fetufai i le poto ua tatou maua mai le faitau, suesue, ma le mafaufau loloto i le Afioga o le upu moni a le Atua. (Eperu 10:24, 25) E lē gata i lea, o le auala lenei e faamautinoa ai ua tatou maua aogā mai sulu o le malamalama faaleagaga.—Salamo 97:11; Faataoto 4:18.
10. O le ā le uiga o le faaupuga ia savavali i le upu moni?
10 A o tatou suesueina le Tusi Paia, e mafai ona tatou tatalo atu i le Atua e pei ona sa faia e le faiSalamo: “Ia e aauina lou malamalama ma lau upu moni, ia la taʻitaʻi mai ia te au.” (Salamo 43:3) Pe afai tatou te faanaunau e maua le finagalo malie o le Atua, e tatau la ona tatou savavali i lana upu moni. (3 Ioane 3, 4) E aofia ai le usitaia o mea o ia faafinagaloina ma auauna ia te ia i le faatuatua ma le faamaoni. (Salamo 25:4, 5; Ioane 4:23, 24) E tatau ona tatou auauna ia Ieova i le upu moni, e pei ona faaalia i lana Afioga ma faamanino mai i lomiga a “le auauna faamaoni ma le mafaufau.” (Mataio 24:45-47) O lenei mea e manaomia ai le poto saʻo o le Tusi Paia. E tatau la faapefea ona tatou faitauina ma suesue le Afioga a le Atua? Pe tatau ea ona tatou faitauina e faasolosolo mai lava i le Kenese mataupu 1, fuaiupu 1, e faasolo atu i tusi uma e 66? Ioe, e tatau i Kerisiano uma o ē o loo maua i a latou gagana le Tusi Paia atoa, ona faitau mai le Kenese seia oo i le Faaaliga. Ma o lo tatou sini e tatau ona iai i le faitauina o le Tusi Paia ma lomiga faa-Kerisiano, o le faateleina lea o lo tatou malamalama i le vaega tele o upu moni o le Tusi Paia ua faaalia mai e le Atua e ala mai i le ‘auauna faamaoni.’
Ia Faitau Leotele le Afioga a le Atua
11, 12. Aisea e aogā ai le faitau leotele o le Tusi Paia i sauniga?
11 Atonu e fai lē leoa la tatou faitau pe a na o i tatou. Peitai i aso anamua, o faitautusi sa faia e le tagata lava ia sa faia ma le leo. A o tietie atu le eunuka Aitiope i lana kariota, sa lagona mai e le faievagelia o Filipo lona faitauina o le valoaga a Isaia. (Galuega 8:27-30) O le upu Eperu ua faaliliuina o le “faitau” o lona uiga autū o le “valaau.” O i latou la e amata ona faitau ma le lēleoa ae lē iloa le uiga o mea o loo latou faitauina e lē tatau ona faavaivai e taʻu leotele upu taitasi. O le mea tāua o le aʻoaʻoina lea o le upu moni e ala i le faitauina o le Afioga tusia a le Atua.
12 E aogā le faitau leotele o le Tusi Paia i sauniga faa-Kerisiano. Na faalaeiauina e le aposetolo o Paulo lana aumea faigaluega o Timoteo e faapea: “Ia e matuā sagai i le faitau atu i le lautele, i le apoapoai atu, i le aʻoaʻo atu.” (1 Timoteo 4:13, NW) Na taʻu atu e Paulo i uso i Kolose: “Pe a uma ona faitau e outou o lenei tusi, ia faitauina foi e le ekalesia i Laotikaia, ia outou faitau foi le tusi mai Laotikaia.” (Kolose 4:16) Ma ua faapea mai le Faaaliga 1:3: “Amuia lē faitau [“faitau leotele,” NW] atoa ma e faalogologo i upu o lenei valoaga ma tausi i mea ua tusia ai; auā ua latalata ona po.” O lea la, e tatau i se failauga i le lautele ona faitau atu mau mai le Tusi Paia e lagolagoina ai mea o loo ia fai atu ai i le faapotopotoga.
Suesue e Ala i le Faaaogaina o Mataupu Taitasi
13. O le ā le faiga e sili ona alualu i luma i le aʻoaʻoina o upu moni o le Tusi Paia, ma o le ā e mafai ona fesoasoani ia i tatou ina ia maua ai mau?
13 O le suesue e ala i le faaaogaina o mataupu taitasi o se faiga lea ua sili ona alualu i luma e aʻoaʻoina ai upu moni o le Tusi Paia. O loo lisi mai i le faasino mau (concordance), upu faale-Tusi Paia i le alafapeta faa-Peretania i vaega o loo maua ai i le tusi, le mataupu, ma fuaiupu, ina ia faigofie ai ona maua mau e sootaga atu i se mataupu. Ma e mafai ona faafesootaia lelei na mau uma auā o le Tusitala lava ia o le Tusi Paia e lē fetōaʻi. E ala i le agaga paia, na ia faagaeeina ai tane e toʻa 40 e tusia le Tusi Paia i le silia ma le 16 senituri ua mavae, ma o le suesueina o mataupu taitasi o se auala lea ua leva ona faamaonia e aogā mo le aʻoaʻoina ai o le upu moni.
14. Aisea e suesue faatasi ai Tusitusiga Eperu, ma Tusitusiga Kerisiano Eleni?
14 O lo tatou talisapaia o upu moni o le Tusi Paia e tatau ona uunaia ai i tatou e faitau ma suesue faatasi Tusitusiga Kerisiano Eleni, ma Tusitusiga Eperu. O lenei faiga o le a faaalia ai le auala ua fesootai ai Tusitusiga Eleni ma le fuafuaga a le Atua, ma o le a malamalama ai foi i valoaga i Tusitusiga Eperu. (Roma 16:25-27; Efeso 3:4-6; Kolose 1:26) Ua fesoasoani tele le New World Translation of the Holy Scriptures i lenei itu. Na saunia e auauna tuuina atu a le Atua, o ē na latou faaaogā tatau le malamalamaga ua faateleina lea na maua e faatatau i tusitusiga o le Tusi Paia i le uluai gagana faapea ma lona talaaga ma alagaupu. E matuā tāua foi, fesoasoani mo suesuega faale-Tusi Paia ia ua saunia e Ieova e ala mai i “le auauna faamaoni ma le mafaufau.”
15. E faapefea ona e faamaonia atu le talafeagai o le tasii solo mai o vaega eseese o le Tusi Paia?
15 Atonu e faapea mai nisi, ‘E faitau afe fuaiupu e sii mai e a outou lomiga mai le Tusi Paia, ae aisea tou te tasii solo mai ai i vaega eseese?’ O le siisii solo mai i vaega eseese o tusi e 66 o le Tusi Paia, ua faaaogā ai e lomiga nisi o molimau faagaeeina ina ia faamaonia ai le moni o se aʻoaʻoga. Na faaaogā foi e Iesu lenei faiga tau i le aʻoaʻo atu. Ina ua ia fofogaina atu lana Lauga i luga o le Mauga, na ia sii mai ni manatu e 21 mai Tusitusiga Eperu. O lena lauga o loo iai faamatalaga sii e tolu mai le Esoto, e lua mai le Levitiko, e tasi mai le Numera, e ono mai le Teuteronome, e tasi mai le Tupu e Lua, e fa mai le Salamo, e tolu mai le Isaia, ma le tasi mai le Ieremia. Pe o le faia ea faapea na ‘taumafai ai Iesu e tau lava ina faamaonia atu o so o se mea’? E leai, auā ‘na ia aʻoaʻo atu e pei o se tagata ua iai le pule, ae sa lei pei o le ʻau tusiupu.’ O le tulaga lena sa iai, auā na lagolagoina e Iesu ana aʻoaʻoga i le pule o le Afioga tusia a le Atua. (Mataio 7:29) Sa faapena foi le aposetolo o Paulo.
16. O ā manatu sii faale-Tusi Paia ia na taʻua e Paulo i le Roma 15:7-13?
16 I le fuaitau faale-Tusi Paia lea o loo i le Roma 15:7-13, na sii mai ai e Paulo fuaiupu mai vaega e tolu o Tusitusiga Eperu—le Tulafono, le ʻau Perofeta, ma Salamo. Na ia faaalia e faapea, o le a faamamaluina e tagata Iutaia ma tagata o Nuu Ese le Atua, ma e tatau ai i Kerisiano ona latou taliaina tagata mai nuu uma. Na faapea mai Paulo: “Ia outou talia ai le tasi e le tasi, faapei o Keriso foi ona talia o i tatou, e oo ai le viiga i le Atua. Ou te fai atu foi, ua avea Iesu Keriso ma auauna o ē ua peritomeina, ona o le faamaoni o le Atua, ina ia faamauina ai mea na folafolaina i tupuga; ina ia vivii foi nuu ese i le Atua ona o le alofa, pei ona tusia [i le Salamo 18:49], O le mea lea ou te taʻutaʻua ai oe i nuu ese, ou te pese atu foi i lou suafa. Ua toe faapea foi [i le Teuteronome 32:43], Ia olioli outou nuu ese faatasi ma lona nuu; i le ma lea, [i le Salamo 117:1], Ia vivii atu i le Alii [Ieova] outou nuu uma, ia faaneenee atu ia te ia outou tagata uma lava. Ua toe faapea mai foi Isaia 11:1, 10, E i ai le Aa o Iese; o ia foi na te tulai e pule i nuu ese, e faatuatua ia te ia nuu ese. O le Atua foi e tupu mai ai le faamoemoe, ia faatutumuina outou e ia i le olioli uma atoa ma le filemu, ina ua faatuatua; ina ia tele lava lo outou faamoemoe ona o le mana o le Agaga Paia.” O lenei la faiga o le suesue e ala i le faaaogaina o mataupu taitasi, na faaalia ai e Paulo le auala e sii mai ai mau ina ia faamausalī ai upu moni o le Tusi Paia.
17. O le ogatasi ma le ā le faaaoaoga ua tasii solo mai ai e Kerisiano manatu mai vaega eseese o le Tusi Paia atoa?
17 O le uluai tusi faagaeeina a le aposetolo o Peteru o loo iai upu sii e 34 mai tusi e sefulu o le Tulafono, le ʻau Perofeta, ma Salamo. I lana tusi lona lua, e faaono ona sii ai e Peteru manatu mai tusi e tolu o Tusitusiga Eperu. I le Evagelia a Mataio o loo iai manatu sii e 122 mai le Kenese e oo i le Malaki. I tusi e 27 o Tusitusiga Eleni, e 320 manatu ua sii tuusaʻo mai lava i le Kenese e oo i le Malaki faapea ma le faitau selau o isi faamatalaga o loo faasino atu i Tusitusiga Eperu. Ina ia ogatasi ma le faaaoaoga muamua lea na faataatia e Iesu ma mulimuli i ai ona soo, ua faapena foi i Kerisiano i ona po nei, pe a latou faia se suesuega e ala i le faaaogaina o mataupu taitasi mai mataupu faale-Tusi Paia, latou te tasiiina solo mai vaega eseese o le Tusi Paia atoa. Ua atili fetaui lenei faiga i nei “aso e gata ai,” o le taimi o loo faataunuuina ai le tele o vaega o Tusitusiga Eperu ma Tusitusiga Eleni. (2 Timoteo 3:1) Ua faaaogā faapena e le ‘auauna faamaoni’ le Tusi Paia i a latou lomiga, peitai e lē taitai ona latou faaopoopo atu se manatu i le Afioga a le Atua, pe toese mai ai se manatu.—Faataoto 30:5, 6; Faaaliga 22:18, 19.
Ia Savavali Pea i le Upu Moni
18. Aisea e tatau ai ona tatou ‘savavali i le upu moni’?
18 E lē tatau ona tatou toesea so o se manatu mai le Tusi Paia, auā o aʻoaʻoga uma faa-Kerisiano i le Afioga a le Atua o “le tonu [“upu moni,” NW] o le tala lelei” lea. O le pipii mau atu i lenei upu moni—i le “savavali” ai—e matuā tāua mo le faaolataga. (Kalatia 2:5; 2 Ioane 4; 1 Timoteo 2:3, 4) Talu ai o le Faa-Kerisiano o “le ala o le upu moni” lea, o le fesoasoani atu la i isi i le faalauteleina o manaoga o le upu moni, e avea ai i tatou ma “fesoasoani [“aufaigaluega,” NW] i le upu moni.”—2 Peteru 2:2; 3 Ioane 8.
19. E mafai faapefea ona tatou ‘savavali pea i le upu moni’?
19 Pe afai tatou te fia “savavali [“pea,” NW] i le upu moni,” e ao ona tatou faitauina le Tusi Paia ma ia tatou faaaogā fesoasoani faaleagaga ua saunia e le Atua e ala mai i le ‘auauna faamaoni.’ (3 Ioane 4) Tau ina ia tatou faia lenei mea mo so tatou lava lelei ma ia tatou mafaia ai foi ona aʻoaʻo atu i isi e uiga ia Ieova le Atua, e uiga ia Iesu Keriso, ma e uiga i fuafuaga a le Atua. Ma ia tatou loto faafetai ona ua fesoasoani mai le agaga o Ieova ia i tatou ina ia malamalama ai i lana Afioga ma taulau manuia ai i le auauna atu ia te ia i le upu moni.
O ā Au Tali?
□ O ā nisi o aogā tumau o le faitauina o le Tusi Paia?
□ Aisea e suesueina ai le Tusi Paia a o auaufaatasi ma isi uso talitonu?
□ Aisea e talafeagai ai le siisii solo mai o manatu i vaega eseese o le Tusi Paia atoa?
□ O le ā le uiga o le faaupuga ia ‘savavali i le upu moni,’ ma e mafai faapefea ona tatou faia faapea?
[Fesili mo le Suʻesuʻega]
[Ata i le itulau 17]
Mātua e, ia aʻoaʻo a outou fanau i le Tusi Paia
[Ata i le itulau 18]
I lana Lauga i luga o le Mauga, sa sii mai ai e Iesu manatu mai vaega eseese o Tusitusiga Eperu