“O Ona Po e Faalologo ai, ma Ona Po e Tautala Ai”

UA FAAFIA ona e tagi talatala e faapea, “Maimau pe ana faapea ou te lei faia lena tala?” Peitai, atonu e te manatua nisi o taimi sa lē taulau ai ona e tautala atu. Atonu ua e toe manatu ifo ma e faapea ane, ‘Maimau pe ana faapea na fai saʻu tala.’

Ua fai mai le Tusi Paia e iai “ona po e faalologo ai, ma ona po e tautala ai.” (Failauga 3:7) O le faafitauli la lea e tulai mai, o le filifiliina o le taimi saʻo e tautala ai ma le taimi e faalologo ai. O o tatou uiga lē lelei atoatoa e masani lava ona ia uunaia i tatou e gaoioi pe tautala i le taimi sese. (Roma 7:19) E mafai faapefea ona tatou pulea le osovale o o tatou laulaufaiva?—Iakopo 3:2.

Auala e Pulea ai le Laulaufaiva

Ina ia fesoasoani ia i tatou e filifili le taimi e tautala ai ma le taimi e faalologo ai, e lē manaomia ona fai se tatou lisi umi o tulafono ua fuafua e faaaofia ai tulaga uma. Nai lo lea, e manaomia ona taʻitaʻiina i tatou i uiga ia ua avea ma vaega moni o uiga totino faa-Kerisiano. O ā ia uiga?

Na faamatalaina e Iesu Keriso e faapea o le alofa o le uiga autū lea e uunaia ai ona soo. Na ia fetalai e faapea: “O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:35) O le tele e tatou te faaalia ai lea alofa faaleuso, o le sili foi lea ona lelei o lo tatou puleaina o o tatou laulaufaiva.

E lua uiga e talitutusa o le a sili foi ona avea ma fesoasoani. O se tasi o nei uiga o le lotomaulalo. E na te uunaia i tatou e ‘manatu e sili isi ia i tatou.’ (Filipi 2:3) O le isi uiga o le agamalu, e mafai ona fesoasoani ia i tatou e ‘onosaia mea lē lelei.’ (2 Timoteo 2:24, 25) Ua tatou maua mai ia Iesu Keriso se faaaoaoga lelei atoatoa i le auala e tatau ona faatinoina ai nei uiga.

Talu ai e matuā faigata ona pulea le laulaufaiva pe afai tatou te fesagai ma omiga, o lea seʻi o tatou manatunatu ai i le po a o lei maliu Iesu—o se taimi sa matuā ‘tiga ai ma atuatuvale’ o ia. (Mataio 26:37, 38) E lē o se mea e faateʻia ai le oo o faalogona faapea ia Iesu, talu ai o le ola e faavavau o tagata uma lava sa faalagolago i lona tumau faamaoni i le Atua.—Roma 5:19-21.

E mautinoa lava o se taimi lea mo Iesu e talanoa atu ai i lona Tamā faalelagi. O lea, sa maliu atu ai o ia e tatalo, ma sa ia fautua atu i ona soo e toatolu ina ia mataala pea. Ina ua mavae sina taimi sa ia toe taliu mai ma maua ai i latou o loo momoe. O lea sa ia fetalai atu ai ia Peteru: “Pe faapena ea ona outou le lavā ona tatou mataala faatasi ma aʻu i le itu po e tasi?” O lenei aoaiga alofa sa avatu faatasi ma upu na faaalia ai lona malamalama i o latou vaivaiga. Na ia fetalai e faapea: “Ua manao i ai le loto, a o le tino ua vaivai.” Mulimuli ane, ona maliu ane ai lea o Iesu ua ia silafia ona soo ua toe momoe. Na ia tulei atu ma le agalelei, ma “ua . . . maliu ane, ua tatalo o le atu tolu lea.”—Mataio 26:36-44.

I le taimi lona tolu na toe maua atu ai foi e Iesu ona soo o momoe, sa lei inainā o ia ae sa fetalai atu e faapea: “Ina momoe pea ia, ma malolo; faauta, ua latalata le itu po e faalataina ai le Atalii o le tagata i lima o tagata agasala.” (Mataio 26:45) E na o lē e tumu lona loto i le alofa, e iai moni se uiga agamalu ma lotomaulalo, e mafai ona ia faaaogaina lona laulaufaiva i se auala faapena i se taimi faigata faapea.—Mataio 11:29; Ioane 13:1.

E lei leva lava, ae puʻea loa Iesu ma tuuina atu ia faamasinoina. O iinei ua tatou aʻoaʻoina ai e iai taimi e sili ai ona lelei le na o le faalologo, e tusa lava foi pe o auai i la tatou faiva faa-Kerisiano. Ona o faufauga ia faasala Iesu,  sa lē taitai ai ona naunau ositaulaga sili ina ia iloa le mea moni. I lalo o nei tulaga faatupu vevesi sa tumau pea Iesu i le faalologo.—Faatusatusa i le Mataio 7:6.

Peitai, sa lei tumau ai pea ona faalologo Iesu, ina ua faatonu malosi e le ositaulaga sili e faapea: “Ou te fai atu ia te oe, ia e tauto mai ia te i matou i le suafa o le Atua soifua, po o oe o le Keriso, o le Alo o le Atua.” (Mataio 26:63) Ona o lea ua faatauto Iesu, o le taimi la lea mo ia e tulei ai. Ona ia fetalai atu lea: “O lea lava; ou te fai atu foi ia te outou, E mulimuli ane tou te iloa ai le Atalii o le tagata e nofo i le itu taumatau o le e ona le mana, e sau foi o ia i ao o le lagi.”—Mataio 26:64.

A o faagasolo lena aso matautia, na faatinoina ai e Iesu le pulea atoatoa o lona laulaufaiva. I lona tulaga, o le alofa, o le agamalu, ma le lotomaulalo, sa avea moni o ni vaega o ona uiga totino. E mafai faapefea ona tatou faaaogaina nei uiga e pulea ai o tatou laulaufaiva pe a oo ia i tatou omiga?

Puleaina o le Laulaufaiva pe a Ita

Pe a tatou ita, e masani lava ona lē mafai ona tatou puleaina o tatou laulaufaiva. O se faataʻitaʻiga, sa iai se feeseeseaiga i manatu o Paulo ma Panapa i se tasi taimi. “Ua loto Panapa ia latou o ma Ioane, o le ua igoa ia Mareko. A ua manatu Paulo, e le tatau ona latou o ma le na alu ese ia te i laua i Pafulia, ma ua le o ma i laua i le galuega. Ona tiga tele lea o loto, ua teʻa eseese ai i laua.”—Galuega 15:37-39.

O Mikaele, * o lē sa galue mo ni tausaga i galuega faufale, ua ia taʻua e faapea: “Sa iai se tasi i le vaega faufale o lē sa ou iloaina lelei ma sa ou faaaloalo foi i ai. Ae sa foliga mai e faitio tele o ia i aʻu galuega. Sa tiga loʻu loto ma sa ou maitaita ae sa ou lei faaalia oʻu faalogona. I se tasi aso na lē mafai ai ona ou toe onosai ina ua ia toe faitio mai foi i se galuega na faatoʻā uma lava ona ou faia.

“Na faapa uma atu loa oʻu faalogona sa natia. O loʻu ita tele na galo ai ia te au le vaaiga matagā a tagata uma na siomia ai i maʻua. Ou te lei toe manao e tautala atu ia te ia pe vaai foi i ai i lena aso. Ua ou iloaina nei, e lei lelei le auala na ou taulimaina ai le faafitauli. Atonu sa sili ai ona lelei pe ana ou faalologo pea ma tautala mulimuli ane ai pe a tau toʻa ane loʻu ita.”

E fiafia lava, ona ua uunaia e le alofa faa-Kerisiano nei tagata e toalua ina ia foia le la feeseeseaiga. Ua faamatala Mikaele e faapea: “Ina ua uma nisi o talanoaga sa fefaaaliai ai manatu, ona sili ai lea ona malamalama le tasi i le isi, ma ua iai nei se ma faigauo māfana.”

E pei lava ona aʻoaʻoina e Mikaele, afai tatou te ita, o se gaoioiga poto i nisi taimi le faalologo. Ua faapea mai le Faataoto 17:27: “O le ua agamalu foi, o le tagata faautauta lea.” O le faautauta ma le alofa faaleuso o le a fesoasoani ia i tatou e pulea ai le faapasae aʻe o mea o loo tiga ai. Afai e faatiga mai se tasi ia i tatou, seʻi o tatou talanoa atu i lena tagata tau lava o oulua i se agaga agamalu ma le lotomaulalo, faatasi ai ma se manatu ia toe faafoisia le filemu. Ae ā pe afai ua uma ona faapa atu le ita? Ona aogā lea o le alofa ina ia uunaia ai i tatou e faatoilalo le faamaualuga ae saili le auala e faaleleia ai. O le taimi la lea e tautala ai, o le taimi e taʻu atu ai lou salamō ma faateʻa ai ou lagona tiga e ala i se talanoaga lelei.—Mataio 5:23, 24.

Le Taimi e Lē Aogā ai le Faalologo

O le ita po o le maitaita e ono faapogaia ai i tatou e taofia le tautala atu i lē o loo faasoesa mai. E matautia tele lenei mea. “I le uluai tausaga  o le ma faaipoipoga, sa iai taimi sa ou lē fia tautala ai i laʻu tane mo ni nai aso pe a ou ita,” o le taʻutinoga lea a Maria. * “E masani lava, e lē māfua i ni faafitauli tetele ae o nai tamai mea e faigofie ona ou ita ai, ae ou te faaputuputuina lava. Ou te mafaufau loloto i ai i nei mea seia oo lava ina avea ma faafitauli telē e pei o se mauga. Ona oo lea i le taimi ua lē mafai ai ona ou onosaia, ma ou lē tautala ai loa i laʻu tane seiloga lava e teʻa loʻu lē fiafia.”

Ua toe faaopoopo mai Maria: “O se mau faapitoa o le Tusi Paia sa fesoasoani ia te au e toe fetuunai loʻu mafaufau o le, ‘aua le goto le la o e ita pea.’ Sa ma galulue mamafa ma laʻu tane e faaleleia fesootaiga ina ia taofia ai le faatuputupulaia o faafitauli. Sa lei faigofie, ae ina ua mavae le sefulu tausaga o le olaga faaipoipo, ou te fiafia lava e taʻu atu e faapea o ia taimi e faafaigata ai ona tautala atu ua seāseā lava tupu. Peitai, e tatau ona ou taʻutino atu, o loo faaauau pea ona ou galue e pulea lenei faanaunauga.”—Efeso 4:26.

E pei ona iloaina e Maria, pe a iai faalogona lē lelei i tagata e toalua, e lē o se vaifofo le lē fetautalaai. O tulaga faapena, e ono tupu aʻe ai le ita faamoemoe, ma e faaleagaina ai le faiā. Na fetalai Iesu e ao ona tatou ‘vave foia mataupu.’ (Mataio 5:25) “O le upu ua fai faatatauina” e mafai ona fesoasoani ia i tatou e ‘sailia le filemu.’—Faataoto 25:11; 1 Peteru 3:11.

E manaomia foi ona tatou tautatala atu pe a tatou manaomia se fesoasoani. Pe a tatou mafatia ona o nisi o faafitauli faaleagaga, e mafai ona tatou lē mananao e faalavelave i isi. Ae afai tatou te lē tautatala atu, e mafai ona oo atu le faafitauli i sona tulaga e sili ona leaga. E tausia i tatou e toeaina Kerisiano ua tofia, ma afai tatou te faatagaina i latou, e mautinoa lo latou naunau e fesoasoani mai. O le taimi lea e ao ai ona tatou tautatala atu.—Iakopo 5:13-16.

Ae sili i na mea uma, e ao ona talanoa atu e lē aunoa ia Ieova i le tatalo mai le loto, e pei ona sa faia e Iesu. Ioe, ia matuā ‘sasaa atu o tatou loto’ i lo tatou Tamā faalelagi.—Salamo 62:8; faatusatusa i le Eperu 5:7.

“O se Taimi e Tautala ai” e Faatatau i le Malo o le Atua

O le faiva faa-Kerisiano o se tofiga tauatua e tatau ona faataunuuina a o lei oo mai le iuga. E lei iai muamua se isi taimi faapea, o lea ua sili atu ai ona tāua i auauna a Ieova le faalauiloaina atu o le tala lelei o le Malo. (Mareko 13:10) E faapei o aposetolo, o Kerisiano moni ‘e lē mafai ona taofia lo latou tautatala atu i mea ua latou vaaia ma faalogo i ai.’—Galuega 4:20.

E moni, e lē o tagata uma e fia faalogo i le tala lelei. O le mea moni, ina ua auina atu ona soo e talaʻi, sa fautuaina i latou e Iesu e ‘saili i ē ua tatau i ai.’ Talu ai e lē taitai ona faamalosia e Ieova se isi e tapuai ia te ia, e lē faaauau foi la ona tatou talanoa i se tasi o lē e tumau pea ona ia teena le feau o le Malo. (Mataio 10:11-14) Ae tatou te fiafia e talanoa e uiga i le pulega a Ieova ia i latou o ē “ua saunia i le ola e faavavau.”—Galuega 13:48; Salamo 145:10-13.

O le alofa, le agamalu, ma le lotomaulalo o uiga ia e mafai ona fesoasoani ia i tatou e pulea o tatou faanaunauga lē lelei atoatoa e soona tautatala ai po o le lē fia tautatala. A o tatou tutupu aʻe i le faatinoina o nei uiga lelei, o le a tatou agavaa atili ai i le iloaina o le taimi e tatau ma le taimi e lē tatau ai ona tautala.

[Faaopoopoga i lalo]

[Ata i le itulau 23]

O fesootaiga lelei e mafai ona foia ai faafitauli