Po o Oe o se Paeonia e Paleni Lelei?
Po o Oe o se Paeonia e Paleni Lelei?
UA TILOTILO atu ma le fiafia mata o Tamā a o faaloloa atu ona lima e faatali ai si ona afafine pepe a o tau amata ona laalaa. Ina ua faafuasei ona paʻū na ia faalaeiau i ai e toe taumafai atili. Na ia iloaina ua toeitiiti maua lona paleni lelei ma lona malosi.
I se auala talitutusa, o se faifeau paeonia fou atonu o loo manaomia le taimi ma faalaeiauga, a o lei maua lona paleni lelei manaomia e taulau ai i le avea ma sē folafola faataimi atoa le Malo. E toatele paeonia ua faaauau ona auauna ma le olioli mo le tele o tausaga. E iai nisi ua leiloa lo latou paleni lelei ona o suiga sa lei faatalitalia mai i o latou tulaga. O nisi ua oo lava ina leiloa lo latou olioli. I se tasi o atunuu, o le 20 pasene o i latou na amata ona paeonia na tuua la latou auaunaga faapaeonia a o lei maeʻa le lua tausaga o la latou auaunaga faataimi atoa. O le ā atonu o le a aveesea ai se paeonia mai i lenei auaunaga pito sili ona fiafia? Pe e iai se mea e mafai ona faia e alofia ai nei mea e ono faavaivaia ai?
E ui o le lē lelei o le soifua maloloina, o manaoga tautupe, ma avega tauave faaleaiga atonu e faapogaia ai nisi e tuua le faiva faataimi atoa, ae o nisi ua faavaatuʻia ona o le lē taulau ona tausia se paleni lelei i va o nisi o avega tauave faa-Kerisiano. O le paleni lelei ua faaalia mai ai “se tulaga o le a lē avea ai se vaega se tasi, se vala tāua, se gaoioiga lelei, po o ni taaʻiga e afaina ai le faapaleniina lelei o isi mea.
Na faaali atu e Keriso i ona soo le auala e faatino ai le galuega talaʻi ma faia ma soo. I lana faiva na faataʻitaʻia ai e Iesu le auala e tausia ai le paleni lelei. Na faaalia mai e Iesu le leai o se paleni lelei i taʻitaʻi lotu Iutaia i lona fai atu faapea: “Ua outou avatu mea e sefulu aʻi o le mili, ma le aneto, ma le kumina, a ua tuu e outou o mea silisili o i le tulafono, o le amiotonu ma le alofa, ma le faamaoni; e tatau pe ana faia nei mea, a e aua foi le tuu na mea.”—Mataio 23:23.
Ua talafeagai le faatatauina o lenei manatu tāua i aso nei, ae maise lava i le faiva faapaeonia. O uunaiga aasa ma faanaunauga lelei ua māfua ai ona paeonia nisi e aunoa ma le sauniuni atoatoa ma fuafua lelei po o ā mea o aofia ai. (Luka 14:27, 28) Ona o le maelega tele o nisi i le faiva i le fanua ua latou lē amanaiaina ai isi vaega tāua o le Faa-Kerisiano. E faapefea ona latou mauaina ma tausia le paleni lelei?
Ia Tausia le Malosi Faaleagaga!
Sa lē tuulafoaia e Iesu lona tulaga faaleagaga. E ui lava ina ō ane ia te ia le motu o tagata e toatele e faalogologo ia te ia ma ia faamaloloina na manaomia ona faaaluina ai le tele o lona taimi, ae na ia faataatia ese lava se taimi e tatalo ai ma manatunatu loloto ai. (Mareko 1:35; Luka 6:12) O paeonia e paleni lelei i aso nei e manaomia ai foi le tulaga lava lea e tasi o le faaaogā o sauniuniga uma ua maua e tausia ai le malosi faaleagaga. Na fai mai Paulo e faapea: “Lenei foi, o oe lē aʻoaʻo atu i le tasi tagata, e te le aʻoaʻo ea oe ia te oe?” (Roma 2:21) E mautinoa o se mea sese le faaaluina o le taimi o se tasi e talaʻi atu ai i isi ae tuulafoaia ai le faaavanoaina o se taimi faapitoa mo suesuega totino ma le tatalo e lē aunoa.
E luasefulu tausaga na paeonia ai Kumiko. E ui e toatolu lana fanau ma o lana tane e lē talitonu, ae na ia iloa e ala i mea na tutupu o le taimi sili mo ia e faitau ma suesue ai le Tusi Paia o le taimi lea a o lei alu e moe. A o ia suesue, e na te tusitusia i lalo manatu patino e mafai ona ia faaaogā i le faiva i le fanua ina ia mafai ona faaolaola ai pea lana faiva i aso taitasi ma fiafia i ai isi. O nisi paeonia taulau ua alapopō i luga a o lei feala uma le aiga ina ia olioli i le fafagaina o i latou faaleagaga i ni nai itula taaligoligoa o le taeao. Atonu e iai nisi o taimi talafeagai ua e faataatia ese e sauniuni ai mo sauniga ma le faitauina o lomiga fou faa-Kerisiano. Afai e te faanaunau ia tumau lou olioli i le faiva, e lē mafai la ona faatopelauina ma tuulafoaia ai suesuega totino.
Faapaleniina Lelei o Avega Tauave a le Aiga
E manaomia ona manatua e mātua o loo paeonia o se isi vaega tāua tele o le ‘finagalo o Ieova’ mo i latou, e aofia ai le tausia o manaoga faaletino, tau faalogona, ma faaleagaga o o latou lava aiga. (Efeso 5:17; 6:1-4; 1 Timoteo 5:8) E oo lava i paaga ma tagata o aiga talitonu e iai taimi e popole ai neʻi teʻi ua latou lē maua faamafanafanaga ma le lagolagosua mai avā ma tinā i le taimi e amata paeonia ai. O na faalogona e iu ai i se tali faalēnaunau i ona faanaunauga e avea ma se paeonia. Ae peitai o le fuafua lelei ma mafaufau muamua i ai, e mafai ona tausia ai le paleni lelei.
O le toatele o paeonia e taumafai e faia uma la latou galuega talaʻi pe a lē o iai tagata o o latou aiga i le fale. O Kumiko lea na taʻua muamua, e inu ti faatasi ma lona aiga i le ʻaiga i le taeao, e faatofa atu i lana tane ma lana fanau i taeao, ma e toe alu atu i le fale a o lei foi ane lona aiga. E na te faaaogā le Aso Gafua e vave kuka uma ai nisi o meaʻai mo aso e sosoo ai ina ia mafai ona mālōlō ma aai faatasi ma lona aiga nai lo o le pisi i le umukuka. E fesoasoani foi le faia o feau e sili atu i le tasi, e pei o le faia o isi galuega teufale a o saunia le meaʻai. O le faia faapena na maua ai e Kumiko se taimi e valaaulia ai uo a lana fanau ma sa ia faia ai ni sauniuniga faapitoa mo i latou.
A o tutupu aʻe tamaiti i o latou tausaga talavou, e masani ona latou manaomia se uaʻi faapitoa a mātua i le faafesagaia o faalogona fou, faanaunauga, o mea e faaluafesasi ai ma popolega e saputu atu ia i latou. E manaomia ai e lenei mea le mataalia ma fetuutuunaiga i faasologa a se tasi o mātua o loo paeonia. Seʻi mafaufau ia Hisako, o se tinā paeonia e toatolu lana fanau. O le ā na ia faia ina ua amata ona faaalia mai e lana tama teine matua le leai o se fiafia ma se filigā mo sauniga faa-Kerisiano ma le auaunaga i le fanua ona o taaʻiga a uo faalelalolagi i le aʻoga? Sa manaomia moni e lana tama teine ona avea le upu moni o sana lava mea totino ma ia iloa atoatoa o le vavae ese mai le lalolagi o se auala sili.—Iakopo 4:4.
Ua taʻutino mai Hisako e faapea: “Na ou filifili e toe suesue faatasi ma ia aʻoaʻoga faavae o loo i le tusi o le Ola e Faavavau i se auala faifai pea. I le taimi muamua na mafai ona ma suesue mo na o ni nai minute ma laʻu tama teine ona e masani ona faameo ona o le tiga tele o lona manava ma lona ulu pe a oo i taimi o le suesuega. Ae sa ou faia pea le suesuega e lē aunoa. Ina ua mavae ni nai masina, na faaleleia atili lona tulaga, ma e lei umi se taimi ae tuuina atu loa ma papatisoina.” I le taimi lenei o loo olioli ai Hisako i le faiva faataimi atoa i le fanua faatasi ma lana tama teine.
E manaomia e tamā o loo paeonia le faaeteete ia aua le pisi naʻuā i le tausia o ē fiafia i le fanua ma o latou tiute i le faapotopotoga ae lē taulau ai i le avatua i a latou fanau o loo tutupu aʻe le lagolagosua malosi i o latou itu tau faalogona ma le taʻitaʻiga e tatau ona latou maua. E lē o se mea lenei e tatau ona tuuina atu e le tane e faatino e lana avā. O se toeaina Kerisiano pisi sa paeonia mo se taimi umi ma sa ia faagaoioia se tamai pisinisi na ia faataatia ese se taimi e suesue ai taitoatasi ma lana fanau e toafā. (Efeso 6:4) E faaopoopo atu i ai, na ia sauniuni mo sauniga faalevaiaso ma lona aiga. O paeonia e paleni lelei latou te lē tuulafoaia o latou aiga i le itu faaletino po o le faaleagaga.
Paleni Lelei i le Itu Tau Tamaoaiga
O se vaaiga talafeagai mo manaoga i aso taitasi o le isi na vaega e tatau i paeonia ona taumafai e tausia ai le paleni lelei. E tele ni mea ua tatou toe aʻoaʻoina foi iinei mai faataʻitaʻiga a Iesu ma ana fautuaga. Na ia lapatai faasaga i le soona popole vale i mea faitino. Nai lo lena, na ia faalaeiauina ona soo e faamuamua le Malo, ma sa folafola atu e tausia i latou e le Atua e pei ona ia faia i isi o ana foafoaga. (Mataio 6:25-34) E ala i le mulimuli i lenei fautuaga lelei, ua toatele paeonia ua mafai ona tumau i le auaunaga faataimi atoa mo le tele o tausaga, ma ua faamanuiaina e Ieova a latou taumafaiga mo le mauaina ‘o meaʻai i aso taitasi.’—Mataio 6:11.
Na fautuaina e le aposetolo o Paulo uso Kerisiano ina ia ‘faailoa atu lo outou faautaga poto i tagata.’ (Filipi 4:5) E mautinoa e manaomia le faautaga poto ina ia tausia lelei ai lo tatou soifua maloloina. O paeonia e paleni lelei e faia taumafaiga uma e faaali atu ai le faautaga poto i auala o loo latou ola aʻe ai ma a latou amio e faatatau i mea faitino, ma le iloaina o loo vaavaai mai isi i a latou amio.—Faatusatusa i le 1 Korinito 4:9.
O talavou o loo faia le auaunaga faapaeonia e tatau ona aloese mai le faaaogaseseina o le agalelei faaletino a o latou mātua. Afai o loo latou nonofo faatasi ma o latou mātua, o le faaalia o le paleni lelei ma le agaga talisapaia le faia o se vaega i tiutefai i totonu o le aiga ma ia iai se galuega faavaitaimi ina ia mafai ai ona avatua se fesoasoani mo le faagaoioia o tulaga tautupe i totonu o le aiga.—2 Tesalonia 3:10.
O Paeonia e Paleni Lelei o se Faamanuiaga Moni
Atonu o oe o se paeonia o loo galue mamafa ia tausia le paleni tatau. Ia iai lagona mautinoa. E pei lava ona manaomia e se tamaitiiti se taimi e aʻoaʻoina ai le faapaleniina lelei o ia ma savali, o le toatele o paeonia taʻumatuaina ua latou fai mai na latou faaaluina se taimi ina ia maua ai le paleni lelei i le tausia o a latou avega tauave.
O le faia o suesuega totino, tausia o tagata o le aiga, ma le tausia o i latou lava i o latou manaoga faaletino o mea na e aafia i vaega o loo taumafai paeonia e paleni lelei ai. Ua faaalia mai i lipoti le toatele o paeonia ua faataunuuina o latou avega tauave i se auala tumatilatila. Ua avea moni i latou ma faamanuiaga i nuu ma ua taʻuleleia ai Ieova ma lana faalapotopotoga.