Saogalemu Moni—I le Taimi Nei ma e Faavavau

E MAUTINOA le mafai ona saunia e Ieova le Atua o le saogalemu mo ona tagata. O ia o “Le e ona le malosi uma lava.” (Salamo 68:14) O lona suafa tutasi e uiga “O Ia ua Māfua ai Ona Iai.” Ua faailoa mai ai o ia ua na o Ia i le vateatea e mafai ona faaleleia so o se faafitauli ina ia faataunuuina ai ana folafolaga ma faia ai lona finagalo. O le Atua lava ia ua fetalai mai: “E faapea foi laʻu upu e alu atu ai loʻu gutu, e le foi mai fua ia te au; a e peitai e faia le mea ou te loto i ai, e manuia foi i le mea ou te auina atu ai.”—Isaia 55:11.

E aumaia e le Atua le saogalemu mo i latou o ē faatuatua atu ia te ia. Ua faamautinoa mai e lana Afioga lenei mea. “O le suafa o Ieova, o le ʻolo malosi lea,” ua taʻua ai ma le poto e le tupu o Solomona i le faagaeega tauatua. “E sola atu i ai lē amiotonu, ona sao ai lea o ia.” Na ia faapea mai atili: “O lē faatuatua ia Ieova e faamamaluina o ia.”—Faataoto 18:10; 29:25.

Saogalemu mo Auauna a le Atua

Ua aumaia pea e Ieova le saogalemu mo i latou o ē faalagolago atu ia te ia. Mo se faaaoaoga, na olioli le perofeta o Ieremia i le puipuiga a le Atua. Ina ua siomia e ʻau a Papelonia le nuu aposetate o Ierusalema, na ʻaai ma le atuatuvale tagata i meaʻai ua fuatia.’ (Esekielu 4:16) E matuā matautia le tulaga na oo i ai, na iu ai ina tunu ma ʻai e nisi fafine a latou lava tamaiti. (Auega 2:20; 4:10) E ui lava ina saisaitia faafuasei Ieremia ona o lana talaʻiga ma le lē fefe, ae na faamautinoa e Ieova ua “avatu foi ia te ia i lea aso ma lea aso se potoi areto mai le ala o e fai areto, seia uma le areto uma lava o i le aai.”—Ieremia 37:21.

Ina ua faatoilaloina Ierusalema e Papelonia, sa lei fasiotia Ieremia pe avefaapagotaina i Papelonia. Nai lo lea, na “foai . . . ia te ia e le pule [Papelonia] i le ʻau e faafeao o mea e ʻai, ma  se mea alofa, ma na tuuina o ia e alu.”—Ieremia 40:5.

I senituri mulimuli ane, na faamautinoa ai e Iesu Keriso i auauna a le Atua e faapea: “Aua neʻi outou popole, ma faapea ane. Ni a mea tatou te aai ai, ni a foi mea tatou te inu ai, ni a foi mea tatou te oofu ai? Auā o mea uma ia ua sailia e nuu ese. Auā ua silafia e lo outou Tamā o i le lagi e aoga ia mea uma ia te outou. A ia outou muai saili lona malo ma lana amiotonu; ona faaopoopoina atu lea o ia mea uma ia te outou.”—Mataio 6:31-33.

Pe o le uiga ea o lenei mea o le a olioli auauna a Ieova i le puipuiga tauatua mai mala uma lava o iai i le taimi nei? E leai, e lē o lena. E lē faapea o le a lē oo ni tulaga leaga i ē faatuatua. E mamaʻi Kerisiano moni, e oo i ai sauāga, e lavevea fua i faiga solitulafono, e maliliu i faalavelave tutupu faafuasei, ma pagatia i isi auala.

E ui lava e lē o aumaia e Ieova le saogalemu atoatoa mai le faaleagaina, ae o lipoti ua faaalia ai e na te faaaogaina lona mana e fesoasoani ai i ana auauna ma puipuia i latou. Ua puipuia foi Kerisiano mai le tele o faafitauli ona latou te faatinoina mataupu silisili o le Tusi Paia i o latou olaga. (Faataoto 22:3) E lē gata i lea, latou te olioli i le saogalemu o le aufaatasiga i le lalolagi aoao o uso ma tuafāfine faaleagaga e alolofa, o ē e fesoasoani le tasi i le isi i taimi e manaomia ai. (Ioane 13:34, 35; Roma 8:28) Mo se faaaoaoga, i le tali atu i le tulaga pagatia o o latou uso o ē o loo i nofoaga sa vevela ai le taua i Rwanda, na vave lava ona fai e Molimau a Ieova i Europa meaalofa tauofo ma auina atu ai ia i latou le 65 tone o lavalava ma vailaau, meaʻai, ma isi mea e tusa e $1,600,000 Amerika e faaaluina ai.—Faatusatusa i le Galuega 11:28, 29.

E ui lava ina faatagaina e Ieova tofotofoga e oo i Kerisiano moni, ae ua ia i latou le faamautinoaga o le a ia avatua ia i latou le malosi, le fesoasoani, ma le poto ina ia tumau ai. O lana tusi atu i uso talitonu na taʻua ai e le aposetolo o Paulo e faapea: “Ua le maua outou e se faaosoosoga [tofotofoga] e ese i lo tagata, a ua faamaoni le Atua, o le na te le tuuina atu outou i le faaosoosoga [e tofotofoina] e sili i se mea ua outou lavatia, a e sauni foi faatasi ma le faaosoosoga [tofotofoga] se mea e sao ai, ina ia outou lavā oono.”—1 Korinito 10:13; The Emphatic Diaglott.

Le Mea o Faia e le Atua mo Ona Tagata

I aso nei, e faitau miliona tagata ua fiafia e faia le finagalo o le Atua. E lē o faamalosia i latou e auauna i le Atua; latou te faia faapea ona ua latou iloa ma alolofa ia te ia. O lea, ona e alofa Ieova i ana auauna faamaoni, ua ia fuafua ai e faaliliuina le lalolagi e avea o se parataiso lea o le a olioli ai tagata usiusitai i le filemu, soifua maloloina lelei,  ma le saogalemu e faavavau.—Luka 23:43.

O le a faia e le Atua lenei mea e ala i se pulega faalelagi, i le avea ai o lana Tupu tofia o Iesu Keriso, ma ona Pule. (Tanielu 7:13, 14) Ua faasino e le Tusi Paia i lenei pulega o le “malo o le Atua” ma o “le malo o le lagi.” (1 Korinito 15:50; Mataio 13:44) O le a suitulaga le Malo o le Atua i pulega uma faaletagata. Nai lo le tele o pulega i luga o le lalolagi, o le a na o le tasi lava le pulega. O le a pule mai i le amiotonu i le lalolagi atoa.—Salamo 72:7, 8; Tanielu 2:44.

Ua faalautele atu e Ieova le valaaulia i tagata uma ina ia ola ai i le pulega a le Malo. O se tasi o auala ua ia faia ai lenei mea o le tufatufa atu lea i le lautele o le Tusi Paia, le tusi ua faamatala mai ai le mea o le a faia e le Malo mo tagata. O le Tusi Paia o le tusi aupito sili lea ona taatele lona tufatufaina atu i le lalolagi aoao, ma ua mauaina nei, i le tusi atoa pe i ni ona vaega foi, i gagana e silia i le 2,000.

Ua fesoasoani ma le alofa Ieova le Atua i tagata ina ia malamalama i le mea ua aʻoaʻo e le Tusi Paia e uiga i le Malo. Ua ia faia faapea e ala i le faatonutonuina ma le aauina atu o tagata e faamalamalama le Tusi Paia i isi. E silia i le lima miliona Molimau a Ieova o loo faalauiloaina nei le tala lelei o le Malo o le Atua i le silia i le 230 atunuu.

Saogalemu Moni mo Tagata Uma?

Pe o le a talia ea e tagata uma le valaaulia ina ia avea ma tagatānuu o le Malo o le Atua, e ala i le ola ai e ogatusa ma ana tapulaa amiotonu? E leai, auā e toatele tagata e leai se naunau i le faia o le finagalo o le Atua. E latou te teena taumafaiga ina ia fesoasoani ia i latou e faaleleia o latou olaga. O le mea moni, ua latou faaali mai i latou lava e pei o tagata na fetalai faatatau i ai Iesu e faapea: “Auā ua mafiafia loto o lenei nuu, ma ua faalogo gata o latou taliga i faalogo, ua moeiini foi o latou mata; neʻi vaai o latou mata, ma faalogo o latou taliga, ma lagona o latou loto, ma liliuina i latou, ma . . . faamaloloina [e le Atua] i latou.”—Mataio 13:15.

E mafai faapefea ona iai se saogalemu moni i luga o le lalolagi a o iai pea ma i latou o ē mumusu e ola e ogatusa ma ala amiotonu a le Atua? E lē mafai ona iai. Ua faamataʻuina e tagata e lē amioatua le saogalemu o i latou o ē fia auauna ia Ieova.

E lē o faamalosia e le Atua tagata ina ia suia, ae e lē faavavau foi ona ia faapalepale mai i le amioleaga. E ui lava ina faaauau ma le onosai e Ieova ona auina atu ana Molimau e aʻoaʻo tagata e uiga i ona ala ma ana fuafuaga, ae ua toeitiiti ona ia lē toe faia lea faapea. Na valoia e Iesu Keriso: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.”—Mataio 24:14.

 O le ā o le a uiga i ai “le gataaga” mo i latou e tetee i tapulaa a le Atua? O le a uiga i lo latou faamasinoga ma le faaumatiaga aʻiaʻi. Ua tautala le Tusi Paia i le aumaia o le “taui ma sui i e ua le iloa le Atua, ma ua le anaana i le tala lelei a lo tatou Alii o Iesu. E faasalaina i latou lava i le fanoga e faavavau lava.”—2 Tesalonia 1:6-9.

Mulimuli Ane Loa —Saogalemu Moni e Faavavau!

Pe a uma le faaumatiaga o i latou o ē teena ala o le filemu a Ieova, o le a aumaia loa e le Malo o le Atua se vaitaimi matagofie o le saogalemu mo le lelei o ē amiotonu o i luga o le lalolagi. (Salamo 37:10, 11) E maeu le eseese o lena lalolagi fou o le a iai i lo lea tatou te ola ai i aso nei!—2 Peteru 3:13.

O le a lē toe iai ni oge ma le matelāina i le fiaʻai. O le a anoanoai meaʻai a tagata uma. Ua fai mai le Tusi Paia ‘o le a olioli tagata uma i se faigaʻai o mea lelei.’ (Isaia 25:6) O le a lē faaitiitia meaʻai, auā o le a matuā tele “taumafa o saito i le nuu i tumutumu lava o mauga.”—Salamo 72:16.

O le a lē toe nonofo tagata i ni tamai fale malepelepe ma ni taulaga matagā ona o le mativa. I le pulega a le Malo o le Atua, o le a maua e tagata uma fale lelei, ma o le a latou aai i meaʻai e fua mai i o latou lava fanua. Ua folafola mai e le Tusi Paia e faapea: “Latou te faia fale, ma latou mau ai; latou te totō tovine, ma latou aai i o latou fua.”—Isaia 65:21.

Nai lo le taatele o le leai o ni galuega, o le a iai galuega lelei, ma o le a vaai tagata i iuga lelei mai ia galuega. Ua faapea mai le Afioga a le Atua: ‘E manuia galuega a ē ua filifilia e aʻu o mea na faia e o latou lima. Latou te le galulue fua.’—Isaia 65:22, 23.

I lalo o le pulega o le Malo, o le a lē pagatia ma maliliu tagata ona o faamaʻi. Ua faamautinoa mai i tatou e le Afioga a le Atua e faapea: “E le fai mai foi se tasi ua mau ai, Ou te maʻi.”—Isaia 33:24.

I le Parataiso faalelalolagi lea ua lē o toe mamao ae avea o se mea moni, o le a lē toe iai ni puapuaga ma tiga, faanoanoaga ma le oti. Ioe, e oo lava i le oti! O le a ola e faavavau tagata i le Parataiso! Ua taʻu mai e le Tusi Paia ia i tatou e faapea o le Atua “e soloiesea . . . loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 21:4.

I le pulega a Iesu Keriso, le “Alii o le filemu,” o le a saogalemu moni ai lava le olaga i luga o le lalolagi. O le mea moni, o le a iai le saogalemu i le lalolagi aoao i lalo o le pulega amiotonu ma alofa a le malo e tasi—le Malo o le Atua.—Isaia 9:6, 7; Faaaliga 7:9, 17.

[Faamatalaga faaopoopo i le itulau 4]

“O le saogalemu o le tagata ua faaalia ai le faatuatua i le lumanai, . . . [le faatuatua lea i le] mautū o tulaga faapolotiki ma le tamaoaiga.”—Se fafine e nofo i Asia

[Faamatalaga faaopoopo i le itulau 5]

“O le mea e pito sili ona e lē lagona ai se saogalemu, ona o faiga sauā ma amioga lē pulea.”—Se tamaloa e nofo i Amerika i Saute

[Faamatalaga faaopoopo i le itulau 6]

“Sa ou lē lagonaina le saogalemu i le taimi o . . . fetauaiga. Afai e fai se taua i se atunuu, e faapefea ona lagona e tagata le saogalemu?”—Se tamaitiiti aʻoga i se aʻoga tulagalua i Sasaʻe Tutotonu

[Faamatalaga faaopoopo i le itulau 7]

“O le a ou lagona le saogalemu pe a ou iloa e mafai ona ou savali i le auala i le po e aunoa ma le tosoina.”—Se teineitiiti aʻoga i Aferika