Saogalemu Moni—O se Sini e Faigata Ona Ausia

O ARNOLD o se tamaitiiti e fiafia tele i lana meataalo o se taika e faia i ieie. E so o se mea lava e alu i ai, e na te aveina ai lava lana meataalo lea—i le mea e taalo ai, i le laulauʻai, i lona moega foi. Ia te ia, ua avea le taika ma mea e maua ai lona lototele ma le saogalemu. I se tasi aso, na tupu ai se mea e faanoanoa tele ai. Ua leiloa le taika!

A o tagi Arnold, na suʻe solo e lona tinā, lona tamā ma ona uso matutua e toatolu lo latou fale telē ina ia sailia le taika. Na mulimuli ane toe maua e se tasi o i latou le taika i totonu o se pusa toso. E foliga mai na tuu ai iina e Arnold ae ua matuā galo lava ia te ia le mea na iai. Na toe avatu ia Arnold le taika, ma ia soloina loa ona loimata. Sa ia toe lagona le fiafia ma le saogalemu.

E maeu le lelei o le a iai pe a mafai ona foia i se auala faigofie faapena ia faafitauli uma lava—e pei o le faigofie o le mauaina o se taika meataalo i se pusa toso! Ae mo le toatele o tagata, o fesili i le saogalemu ua sili atu ona matuia ma lavelave nai lo lena. I so o se mea lava, ua tau mānatu ai tagata, ‘Pe o le a ou aafia ea ona o faiga solitulafono po o faiga sauā? Po o lamatia ea aʻu i le lē toe iai o saʻu galuega? Po o mautinoa o lava meaʻai mo loʻu aiga? Pe o le a alofia ea aʻu e isi ona o laʻu lotu pe ona e ese le atunuu ou te sau ai?’

Ua telē lava le aofai o tagata e lē o mauaina le saogalemu. E tusa ai ma tala o Malo Aufaatasi, e toetoe lava tolu piliona ua lē gafatia tausiga faafomaʻi e lē gata i togafitiga o faamaʻi e masani ai ae faapea foi i vailaau tatau mo le tausiga. E sili atu i le piliona tagata ua mafatia i le matuā matitiva lava. E toeitiiti tasi le piliona, e ui e mafai ona faigaluega, ae e lē o ni galuega e tusa ma lo latou poto masani. Ua faateleina le aofai o tagata sulufai. I le iuga o le 1994, pe tusa e 1 mai le taʻi 115 tagata i luga o le lalolagi ua faamalosia ina ia tuua o latou aiga. E faitau miliona ola ua faatamaʻia ona o fefaatauaiga o vailaau faasaina e tusa ma le $500 piliona e maua ai i le tausaga lea ua māfua mai ai le anoano o gaoioiga solitulafono ma le faiga sauā. Ua faaumatia e taua ola o le faitau miliona o tagata. I le 1993 lava ia, e 42 atunuu na auai i fetauaiga tetele, a o isi atunuu e 37 na oo i ai faiga sauā faapolotiki.

O taua, o le mativa, o solitulafono, ma isi lamatiaga o le saogalemu o le tagata ua tutusa uma lava, ma ua faasolo pea ina faateleina. E leai ni vaifofo faigofie i ia faafitauli. O le mea moni, o le a lē foiaina e tagata na faafitauli uma.

Ua fautua mai le Afioga a le Atua, le Tusi Paia: “Aua tou te faatuatua i alii, po o le fanau a tagata, e le o i ai se olataga.” O ai la, e mafai ona tatou faatuatua atu i ai? Ua faaauau mai lenei mau: “Amuia le tagata o i ai le Atua o Iakopo e fai mona fesoasoani; o i ai lona faamoemoe ia Ieova lona Atua; o le na faia le lagi atoa ma le lalolagi, o le sami ma mea uma o i ai.”—Salamo 146:3-6.

Aisea e mafai ai ona tatou faatuatua ia Ieova na te aumaia le saogalemu i lenei lalolagi? Pe e mafai ea ona olioli i olaga saogalemu ma fiafia i le taimi nei? O le a faapefea ona aveesea e le Atua mea o loo taofiofia ai le mauaina e tagata o le saogalemu?