Ia Sola Ese Ina ia Saogalemu ai a o Lei Oo Mai le “Puapuaga Tele”

“A iloa e outou ua siosiomia Ierusalema i ʻau o le taua, . . . o e ua i Iutaia ia latou sosola i mauga.”—LUKA 21:20, 21.

1. Aisea ua matuā manaomia tele ai ona sosola ese i latou o loo avea pea ma vaega o le lalolagi?

MO I latou uma o loo avea ma vaega o le lalolagi a Satani, ua matuā manaomia tele ona latou sosola ese. Pe afai latou te fia faasaoina pe a soloiesea mai le lalolagi le faiga o mea o loo iai nei, e tatau la ona latou faamaonia maumauai mai lo latou tutū mausalī atu i le itu a Ieova ma ua lē o toe avea ma vaega o le lalolagi lea o loo pule ai Satani.—Iakopo 4:4; 1 Ioane 2:17.

2, 3. O ā fesili e fesootai atu ma fetalaiga a Iesu o loo tusia i le Mataio 24:15-22, o le a tatou talanoaina?

² I lana valoaga sili e faatatau i le faaiuiuga o le faiga o mea, na faamamafa ai e Iesu le manaoga matuā tāua mo lena solaaga. E masani ona tatou talanoaina mea o loo tusia i le Mataio 24:4-14; peitai, o mea o loo sosoo mai ai ua tutusa pau lava le tāua. Matou te faalaeiauina oe ina ia suʻe nei lau Tusi Paia ma faitau fuaiupu e 15 e oo atu i le 22.

³ O le ā e uiga i ai lena valoaga? I le uluai  senituri, o le ā sa avea o “le mea e inosia e faatafunaina aʻi”? O le ā na faamaonia mai e lona tu i totonu o “le mea paia”? O le ā le tāua ia i tatou o lena mea na tupu?

“Ina Iloa ia e Lē Faitau”

4. (a) O le ā na fai mai ai le Tanielu 9:27 o le a sosoo mai i le teena e tagata Iutaia o le Mesia? (e) I le faasino atu i lenei mea, e manino mai, aisea ma fetalai mai ai Iesu, “Ina iloa ia e lē faitau”?

⁴ Seʻi mātau i le Mataio 24:15 sa faasino atu ai fetalaiga a Iesu i mea na tusia i le tusi a Tanielu. I le mataupu e 9 o lena tusi o loo iai se valoaga na valoia ai le afio mai o le Mesia ma le faamasinoga o le a faaooina i le nuu o Iutaia ona o lo latou teena o ia. I le vaega mulimuli o le fuaiupu e 27 ua faapea mai: “E i ai foi i le itu o le malumalu mea e inosia e faatafunaina aʻi.” I le talafaasolopito faa-Iutaia, sa faatatauina ai lena vaega o le valoaga a Tanielu i le faaleagaina o le malumalu o Ieova i Ierusalema e Antiochus IV i le senituri lona lua T.L.M. Ae na lapatai atu Iesu: “Ina iloa ia e lē faitau.” E ui sa matuā inosia lava le faaleagaina o le malumalu e Antiochus IV, ae sa lei iu atu i se faaumatiaga—o Ierusalema, o le malumalu, po o le nuu o Iutaia. E manino mai la sa lapataia e Iesu lana ʻau faalogologo e faapea o le faataunuuga o lenei valoaga sa lē mo le taimi ua tuanai ae mo le lumanai o loo fotuai mai.

5. (a) Ua faapefea i le faatusatusaina o tala a Evagelia ona fesoasoani ia i tatou ina ia iloa ai le “mea e inosia” sa iai i le uluai senituri? (e) Aisea na aauina faavave atu ai e Cestius Gallus vaegaʻau a Roma i Ierusalema i le 66 T.A.?

⁵ O le ā “le mea e inosia” lea sa tatau ona latou tulimataʻia? E lelei ona mātau ua faapea mai le tala a Mataio: “Pe a iloa foi e outou le mea e inosia e faatafunaina aʻi . . . ua tu i le mea paia.” Peitai e faitauina faapea lona tala tutusa o loo i le Luka 21:20: “A iloa e outou ua siosiomia Ierusalema i ʻau o le taua, ia outou iloa i lea aso ua latalata lona faatafunaina.” I le 66 T.A., na vaaia ai e Kerisiano sa nonofo i Ierusalema le mea na valoia e Iesu. Sa iai se faasologa o mea tutupu e aofia ai le feteenaiga i le va o tagata Iutaia ma taʻitaʻi o le malo o Roma, lea na iu ai i le avea o Ierusalema ma fouvale autū ia Roma. O le iuga, na sasao aʻe faiga sauā i totonu o Iutaia atoa, o Samaria, o Kalilaia, o Tekapoli, ma Foinie, i le itu i mātū e faasolo atu i Suria, ma i le itu i saute e faasolo atu i Aikupito. Mo le toe faafoisia o se filemu i lena vaega o le emepaea a Roma, na aauina faavave ai e Cestius Gallus ni vaegaʻau mai Suria ia ō atu i Ierusalema, le nofoaga sa taʻua e tagata Iutaia o lo latou “aai paia.”—Neemia 11:1; Isaia 52:1.

6. Na faapefea ona moni e faapea o le “mea e inosia” lea na mafai ona faapogaia ai le faaumatiaga sa “tu i le mea paia”?

⁶ Sa fai ma tū masani a vaegaʻau a Roma le tauaveina o fuʻa, po o faailoga, ia na latou manatu i ai e paia ae sa manatu i ai tagata Iutaia o se ifo i tupua. Seʻi mātau, o le upu Eperu ua faaliliuina o le “mea e inosia” i le tusi o Tanielu ua faaautū lona faaaogaina i tupua ma faiga faaifo i tupua. * (Teuteronome 29:17) E ui lava ina teena e tagata Iutaia, ae na sao atu i totonu autau a Roma ma a latou faailoga e pei o ni tupua ma faaulufale atu i Ierusalema ia Novema o le 66 T.A. ma amata ai ona eli i lalo o le pa o le malumalu i le itu i mātū. Sa leai se tau faaletonu—o le “mea e inosia” lea na mafai ona faapogaia le faaumatiaga aʻiaʻi o Ierusalema sa “tu i le mea paia”! Ae na ono mafai la faapefea e se tasi ona sola ese?

Sa Manaomia Faanatinati Ona Sosola Ese!

7. O le ā le mea na faafuasei ona faia e le autau a Roma?

⁷ Na faafuasei lava ma e aunoa ma se mafuaaga tatau pe a mafaufau faaletagata i ai, ma ua foliga foi ua faigofie ona faatoilaloina Ierusalema, ona toe solomuli le autau a Roma. Na tuliloa atu e tagata fouvale a Iutaia autau a Roma ia na toe solomuli, ae na pau le mamao na latou oo atu i ai o Anipateri, pe tusa ma le 30 maila [50 kilomita] mai Ierusalema. Ona latou toe foi mai lea. Ina ua toe  taunuu i Ierusalema, sa latou faapotopoto i le malumalu ma fuafua ai se isi a latou osofaiga. Sa faatonuina tagata talavou ina ia faatoateleina ai le vaegaʻau ma ia auai atu i le autau. Pe sa tatau ea i Kerisiano ona latou aafia i na mea? E tusa lava pe na latou alofia, ae pe sa tatau ea ona latou nonofo ai pea i se nofoaga sa lamatia pe a oo ina toe taliu ane autau a Roma?

8. O le ā le gaoioiga sa manaomia faanatinati ona faia e Kerisiano i le usiusitai atu i fetalaiga faavaloaga a Iesu?

⁸ Sa vave ona gaoioi Kerisiano na i Ierusalema ma vaega uma o Iutaia ina ia utagia le lapataiga faavaloaga na avatu e Iesu Keriso ma latou sosola ese loa mai le nofoaga o loo lamatia. Sa manaomia faanatinati ona sosola ese! Na latou ui atu ai i vaipanoa maugā, ma atonu na nonofo ai loa nisi i Pela, i le itumalo o Perea. O i latou na utagia le lapataiga a Iesu sa latou lei toe foi atu ma le valea e taumafai e faasaoina mai a latou mea faitino. (Faatusatusa i le Luka 14:33.) O le ō ese i ni tulaga faapena, sa mautinoa lava o ni faigamalaga faigata mo le savalia e fafine totō ma fafine failelele. Sa lei taofia la latou solaaga e tulafono o le aso Sapati, ma e ui lava na lalata ane le tau mālūlū, ae lei faapea ua oo ane. O i latou na utagia le lapataiga a Iesu ma faanatinati ona sosola ese, sa vave lava ona saogalemu i latou i fafo atu o Ierusalema ma Iutaia. O le mea lena sa faalagolago i ai o latou ola.—Faatusatusa i le Iakopo 3:17.

9. O le ā le vave na toe taliu ane ai autau a Roma, ma o le ā na iu i ai?

⁹ I le tausaga lava na sosoo ai, i le 67 T.A., na toe siitaua ane ai loa autau a Roma ia Iutaia. Muamua, na faatoilaloina Kalilaia. I le tausaga na sosoo ai, sa matuā faatamaʻia Iutaia. E oo ane i le 70 T.A., ua siomia atoa e autau a Roma le aai o Ierusalema. (Luka 19:43) Sa matuā matautia le oge. O i latou na puʻea ai i totonu o le aai na latou toe fetauai ai lava. So o se tasi sa taumafai e sola ese sa fasiotia. O le mea na latou oo i ai, e pei ona fetalai Iesu, o se “puapuaga tele.”—Mataio 24:21.

10. Pe afai tatou te faitau ma iloa, o ā ma isi mea o le a tatou tulimataʻia?

¹⁰ Pe na faataunuu atoatoa ai ea iina le mea na valoia e Iesu? E leai, e tele isi mea e lei oo mai. Pe afai, e pei ona fautuaina e Iesu, tatou  te faitau i le Tusi Paia ma iloa, ona mautinoa ai lea lo tatou tulimataʻia o mea o loo fotuai mai i le lumanai. O le a tatou mafaufau loloto ai foi i ona faatatauga i o tatou lava olaga.

Le “Mea e Inosia” o Ona Po Nei

11. O ā isi fuaiupu e lua o loo faasino atu ai Tanielu i “le mea e inosia,” ma o le ā le vaitaimi o loo talanoaina ai iina?

¹¹ Seʻi mātau, e lē gata i mea ua tatou vaaia i le Tanielu 9:27, ae ua iai foi i le Tanielu 11:31 ma le Tanielu12:11, isi manatu e faasino atu i “le mea e inosia e faatafunaina aʻi.” E lē o talanoaina i nei faamaoniga uma mulimuli le faaumatiaga o Ierusalema. O le mea moni, o mea o loo taʻua i le Tanielu 12:11 ua aliaʻe mai i le na o le lua lava fuaiupu talu ona uma le taʻua o “ona po o le iuga.” (Tanielu 12:9) Ua tatou ola nei i lena vaitaimi talu mai le 1914. O lea e manaomia ai ona tatou mataala e mātaulia le “mea e inosia e faatafunaina aʻi” o ona po nei, ona faamautinoa lea ua tatou ō ese mai le nofoaga o loo lamatia.

12, 13. Aisea ua talafeagai ai ona faamatalaina Malo Sosoo o le “mea e inosia” o ona po nei?

¹² O le ā lena “mea e inosia” o ona po nei? Ua faasino atu faamaoniga i Malo Sosoo, lea na faavaeina i le 1920, ina ua faatoʻā mavae lava le ulu atu o le lalolagi i ona po o le iuga. Ae ua faapefea ona avea ma “mea e inosia e faatafunaina aʻi”?

¹³ Ia manatua, o le upu Eperu mo le “mea e inosia” ua faaautū lona faaaogaina i le Tusi Paia e faasino atu i tupua ma faiga faaifo i tupua. Pe sa avea ea Malo Sosoo o se tupua? O le mea moni lena! Sa faatulaga ai e taʻitaʻi lotu “i le mea paia,” ma na sosoo ai ma le faaauau ona matuā tuutoina atu i ai o latou tagata lotu. Na faalauiloa mai e le Federal Council of the Churches of Christ i Amerika e faapea, o le a avea Malo Sosoo ma “faailoaga faapolotiki o le Malo o le Atua i luga o le lalolagi.” Sa maua e le Senate o le Iunaite Setete le anoanoai o tusi mai vaega faalotu e uunaia atili ai le faamausalīina o le Feagaiga a Malo Sosoo. Sa viiviia e le faalapotopotoga tuufaatasi o tagata mai le lotu Papatiso, le lotu Faapotopotoga, ma le lotu Perepereane i Peretania le Malo Sosoo e faapea “ua na o le pau lea o le meafaigaluega o loo iai mo le mauaina o le [filemu i le lalolagi].”—Tagai i le Faaaliga 13:14, 15.

14, 15. I le ā le itu na oo atu ai Malo Sosoo ma mulimuli ane o Malo Aufaatasi, i le tulaga o le tu “i le mea paia”?

¹⁴ Na faavaeina i le lagi le Malo faa-Mesia o le Atua i le 1914, ae sa faaauau pea ona fetauai malo mo ni o latou lava pulega silisili. (Salamo 2:1-6) E faatulai mai Malo Sosoo, ae faatoʻā uma lava ona tau e malo le taua muamua a le lalolagi, faapea ma taʻitaʻi lotu o ē na faamanuia atu i a latou vaegaʻau, ua faatoʻā uma lava ona latou faaalialia mai lo latou lafoaia o le tulafono a le Atua. Sa latou lei faamoemoe atu ia Keriso o le Tupu. O lea ua latou tuuina atu i se faalapotopotoga faaletagata le matafaioi a le Malo o le Atua; ua latou faatulaga ai Malo Sosoo “i le mea paia,” o le mea sa lē tatau ona iai.

¹⁵ Ia Oketopa 24, 1945, na fofoa mai ai Malo Aufaatasi e sui ai Malo Sosoo. Mulimuli ane, sa viiviia e pope o Roma Malo Aufaatasi e faapea o le “faamoemoe mulimuli lea mo le autasi ma le filemu” ma o “le auala silisili mo le mauaina mai o le filemu ma le faamasinotonu.” Ioe, o Malo Sosoo, faatasi ai ma lona sui, o Malo Aufaatasi, ua avea moni lava ma tupua, o se “mea e inosia” i le silafaga a le Atua ma ona tagata.

Ia Sola Ese Mai le Ā?

16. Mai le ā ua manaomia e ē alolofa i le amiotonu ona sosola ese mai ai i aso nei?

¹⁶ I le ‘vaaia’ o lenei mea, i le mātauina o le tulaga tonu o lenei faalapotopotoga faavaomalo, ma le auala ua avea ai ma tupua o loo tapuaia, ua manaomia ai e ē alolofa i le amiotonu ona sosola ese mo le faasaoina. Ia sola ese mai le ā? Mai lena mea o loo faaāta mai ai i ona po nei Ierusalema lē faamaoni, lea ua taʻua, o Kerisinetoma, ma ia sola ese mai ia Papelonia le Aai Tele, o le faiga o mea i le lalolagi aoao o lotu sese.—Faaaliga 18:4.

17, 18. O le ā le faatamaʻiaga o le a faapogaia e le “mea e inosia” o ona po nei?

 ¹⁷ Ia manatua foi, i le uluai senituri, o le mafuaaga na ō atu ai le autau a Roma ma a latou fuʻa e pei o ni tupua i totonu o le aai paia o tagata Iutaia, o le faaooina lea o le faatamaʻiaga o Ierusalema ma lana faiga faatapuaiga. I o tatou aso o le a oo mai le faaumatiaga, e lē i le na o se tasi se aai, e lē i na o Kerisinetoma, ae i le faiga atoa o lotu sese i le lalolagi aoao.—Faaaliga 18:5-8.

¹⁸ E pei ona tusia i le Faaaliga 17:16, ua valoia ai e faapea, o le manu feai faafaatusa lanu mūmū, lea ua faamaonia o Malo Aufaatasi, o le a toe liliu atu ia Papelonia le Aai Tele ua pei o se fafine talitane, ma matuā faatamaʻia o ia. I le faaaogā o se gagana faafaatusa, ua faapea mai: “O nifo foi e sefulu na e iloa i le manu feai, latou te ʻinoʻino i le fafine talitane, ma faasaunoa ia te ia; ma to ese ona ofu, latou te aai foi i lona tino, ma susunu ia te ia i le afi.” O le mea o le a uiga i ai lenei fuaitau e matuā matautia lava pe a manatunatu i ai. O le a iu atu i le iuga o so o se ituaiga o lotu sese i vaega uma o le lalolagi. O le mea lenei o le a faamaonia moni ai lava ua amata le puapuaga tele.

19. O ā mea ua avea ma vaega o Malo Aufaatasi talu mai lona faavaeina, ma aisea ua mataina ai lenei mea?

¹⁹ E lelei ona mātau, talu mai ona faagaoioia Malo Aufaatasi i le 1945, ua avea ai tagata o ē faapaupau ma ē tetee i lotu, o ni ona sui taualoa. I nisi o taimi i le lalolagi aoao, ua avea ai na vaega o loo faia suiga tetele ma meafaigaluega i le aumaia o ni faasasaaga mamafa i faiga faalotu po o le matuā faasā aʻiaʻi loa. Peitai i ni tausaga ua mavae atu, e tele atunuu ua lē o toe aumaia ai e faiga malo ni omiga i vaega faalotu. I le manatu o nisi tagata e foliga mai ua matuā lē toe iai lava se lamatiaga i lotu.

20. O le ā le ituaiga o talaaga ua faia e lotu o le lalolagi mo i latou lava?

²⁰ O loo faaauau ona avea lotu a Papelonia le Aai Tele ma uunaiga malosi o faiga sauā i le lalolagi. Ua faailoa mai pea i ulutala o tala fou vaega o loo fetauai ma vaega faatupu faalavelave matautia e ala i le taʻu mai o le igoa o le lotu o loo lagolagoina. Ua oo ina ō atu faamalosi leoleo ma fitafita i totonu o falesa e taofia faiga sauā ua faia i le va o a latou vaega faalotu o loo fetauai. Ua faatupeina e vaega faalotu faiga fouvale faapolotiki. O le feainaʻi o lotu ua avea ma faalavelave i taumafaiga a Malo Aufaatasi ina ia faatumauina ni faiā mautū i le vaega o ituaiga o tagata. I le tuliloaina o le sini o le filemu ma le saogalemu, ua mananao ai vaega o loo iai i Malo Aufaatasi e vāai i le faamutaina o so o se aafiaga faalotu o loo faalavelavea ai a latou fuafuaga.

21. (a) O ai o le a fuafuaina po o afea e faaumatia ai Papelonia le Aai Tele? (e) O le ā ua manaomia faanatinati ona faia a o lei oo i lena taimi?

²¹ Ua iai foi se isi vala tāua e manatunatu i ai. E ui lava o le a faaaogaina nifo o faiga faavaegaʻau lea e mapuna mai Malo Aufaatasi e faaumatia ai Papelonia le Aai Tele, ae o lena faaumatiaga o le a avea moni o se faailoaga atu o le faamasinoga mai le Atua. O le faaooina atu o le faamasinoga o le a aumaia i le taimi atofaina a le Atua. (Faaaliga 17:17) O le ā e tatau ona tatou faia i le taimi nei? Ua tali mai le Tusi Paia: “Ia outou o ese ia te ia”—ia ō ese mai Papelonia le Aai Tele.—Faaaliga 18:4.

22, 23. O le ā e aofia ai i lena solaaga?

²² O lenei solaaga mo le saogalemu e lē o se gaoioiga e faapea e sola atu i se isi vaipanoa, e pei o lea na faia e Kerisiano Iutaia ina ua faatafunaina Ierusalema. O se solaaga ese mai lotu o Kerisinetoma, ioe, e sola ese mai so o se vaega o Papelonia le Aai Tele. O lona uiga o le vavae ese atoatoa o se tasi e lē gata mai faalapotopotoga a lotu sese, ae sola ese foi mai a latou tū masani ma le agaga o loo latou faatupuina. O se solaaga atu i le nofoaga o le saogalemu o loo i totonu o le faalapotopotoga faatiokarate a Ieova.—Efeso 5:7-11.

²³ Ina ua faatoʻā mātaulia e auauna faauuina a Ieova le mea e inosia o ona po nei, o Malo Sosoo, ina ua mavae le Taua Muamua a le Lalolagi, na faapeī le tali atu i ai a Molimau? Na latou vavaeesea lo latou toe avea ma ni sui o lotu a Kerisinetoma. Peitai na faasolosolo ina latou iloa, o loo latou faatinoina pea nisi o tū masani ma faiga a Kerisinetoma, e pei o le faaaogaina o le koluse ma le faamanatuina o le Kirisimasi ma isi aso mālōlō faapaupau. Ina ua  latou aʻoaʻoina le upu moni e uiga i nei mea, sa vave loa ona latou gaoioi. Sa latou matuā utagia le fautuaga o loo i le Isaia 52:11: “O ese ia, ina o ese outou, ia outou o atu nai lea mea; aua neʻi paʻi atu i se mea leaga; o atu ia outou nai totonu ia te ia; ia mamā outou o e tauave ipu a Ieova.”

24. Ae maise lava talu mai le 1935, o ai ua aufaatasi atu i ai i le solaaga?

²⁴ Ae maise lava talu mai le 1935 na amata foi ona faia lea lava gaoioiga e se vaega toatele ua faatuputupulaia o isi, o tagata o ē ua latou talia le faamoemoe o le ola e faavavau i le lalolagi parataiso. Na latou ‘vāai foi i le mea inosia o loo tu i le mea paia,’ ma ua latou iloa ai lona faauigaina. Ina ua uma ona faia sa latou filifiliga e sosola ese, ona latou aveesea lea o o latou igoa o ni sui o faalapotopotoga o loo avea ma vaega o Papelonia le Aai Tele.—2 Korinito 6:14-17.

25. E lē gata ina motusia uma e se tagata ana sootaga sa iai i lotu sese, ae o ā ma isi mea e manaomia?

²⁵ Peitai ane, o le sola ese mai Papelonia le Aai Tele e iai ma nisi mea e aofia ai nai lo le lafoaia o lotu sese. E iai isi mea e aofia ai nai lo le auai atu i ni nai sauniga i le Maota o le Malo po o le alu atu e talaʻi le tala lelei i le auaunaga i le fanua pe faatasi pe faalua i le masina. Atonu e alu ese se tagata mai ia Papelonia le Aai Tele, ae pe ua ia lafoaia moni lava? Pe ua ia vavaeesea mai ea o ia mai le lalolagi lea o loo avea ai Papelonia le Aai Tele ma ona vaega iloga? Po o ia piimau atu pea i mea na e atagia mai ai ona uiga—o se uiga e lē faaaloalo i tapulaa amiotonu a le Atua? Po o manatu māmā ea o ia i amioga mamā faaleituaiga ma le faamaoni i le faaipoipoga? Po o sili ea ona ia faamamafaina ona lava faanaunauga ma faanaunauga i meafaitino nai lo faanaunauga faaleagaga? E lē tatau ona ia faataitai atu i lenei faiga o mea.—Mataio 6:24; 1 Peteru 4:3, 4.

Aua Neʻi Iai se Mea e Toe Taofia Mai ai Lau Solaaga!

26. O le ā o le a fesoasoani ia i tatou ia lē tau ai ina amata le solaaga, ae ia faamaeʻaina atoatoa foi?

²⁶ I la tatou solaaga mo le saogalemu, e manaomia tele ona tatou lē toe moomoo atu i mea ua tatou lafoaia. (Luka 9:62) E manaomia ona faamausalī o tatou mafaufau ma loto i le Malo o le Atua ma lana amiotonu. Po o tatou maumauai ea e faatinoina lo tatou faatuatua e ala i le muai sailia o nei mea, faatasi ma se talitonuga maumauai o le a faamanuiaina e Ieova lena ala faamaoni? (Mataio 6:31-33) O o tatou talitonuga ua faavae aʻe i le Tusi Paia e ao ona faalaeiauina ai pea i tatou seia oo atu i lena sini a o tatou faatalitalia ma le naunautai mea mataina o le a tutupu i le lalolagi.

27. Aisea e tāua ai ona mafaufau loloto i nei fesili ua fesiligia?

²⁷ O le faaooina mai o le faamasinoga a le Atua o le a amata i le faaumatiaga o Papelonia le Aai Tele. O lena emepaea o lotu sese ua faapei o se fafine talitane, o le a aveesea e faavavau e lē toe iai. Ua latalata mai lava lena taimi! O le a faapeī o tatou tulaga taitoatasi i luma o Ieova pe a oo mai lena taimi uigaese? Ma i le tumutumuga o le puapuaga tele, pe a faaumatia le vaega o totoe o le faiga amioleaga a Satani, o lē fea itu o le a maua atu i ai oe? Pe a tatou faia nei gaoioiga manaomia, ona mautinoa ai lea o lo tatou saogalemu. Ua fetalai mai Ieova ia i tatou: “A o lē faalogo mai ia te au, e nofo o ia ma le fifilemu.” (Faataoto 1:33) O le faaauau ona auauna ia Ieova ma le faamaoni ma le olioli a o faagasolo le faaiuiuga o lenei faiga o mea, e ono mafai ona tatou agavaa ai e auauna atu e faavavau ia Ieova.

[Faaopoopoga i lalo]

E te Manatua?

□ O le ā le “mea e inosia” o ona po nei?

□ O le ā le uiga ua faapea ai o “le mea e inosia . . . ua tu i le mea paia”?

□ O le ā e aofia ai i le sosola ese mo le saogalemu i le taimi nei?

□ Aisea ua manaomia faanatinati ai lena gaoioiga?

[Fesili mo le Suʻesuʻega]

[Ata i le itulau 16]

Ina ia faasaoina, sa tatau ai i soo o Iesu ona sosola ese ma le lē faatuai