Lipoti a Ē Faalauiloa le Malo

‘O Au Poloaiga Uma e Moni Lava Ia’

INA ua latalata i le taimi o lona maliu, na faatonuina ai e Mose tagata o Isaraelu e usitaia poloaiga uma a Ieova. Na ia faapea atu: “Ia outou manatunatu i upu uma ou te taʻu atu ia te outou i le aso nei; tou te poloai atu ai i a outou fanau ia anaana e faia upu uma o lenei tulafono. Auā e le se upu faatauvaa lea ia te outou, auā o i ai lo outou ola.”—Teuteronome 32:46, 47.

I le faitau selau o tausaga mulimuli ane, na faamamafa ai e le faisalamo le tāua o aʻoaʻoga uma a le Atua ina ua ia faapea mai: “Ua latalata mai oe Ieova e; o au poloaiga uma foi e moni lava ia.” (Salamo 119:151) I le uluai senituri, na oo foi ia Iesu lava ia na ia faasino atu le tāua “o afioga uma e tulei mai i le fofoga o le Atua.” (Mataio 4:4) Ma i lalo o le taitaiga a le Atua na tusi ai le aposetolo o Paulo e faapea, “o tusi paia uma lava e mai le Agaga o le Atua ia, e aoga.”—2 Timoteo 3:16.

E manino la, e faatalitalia mai e Ieova le Atua ana auauna ina ia iloilo totoʻa ma faatāuaina le feau atoa o loo faaoo mai ia i tatou e itulau o lana Afioga. E leai se vaega o le Tusi Paia e lē tāua. Ua faapena lagona o Molimau a Ieova e faatatau i le Afioga a le Atua, e pei ona faataitaia mai i le tala i se mea na tupu i Mauritius lea o loo mulimuli mai.

Na nofo le Susuga a D—— i se nuu maotua, sa avea ai o ia ma leoleopo. Na saili ma le naunautai o ia mo se taimi umi mo le auala saʻo i le tapuaiga i le Atua. I se tasi po a o faia lana tiute, na amata ai ona ia faitauina le Tusi Paia. Na iu lava ina ona faitauina le Tusi Paia atoa. Na ia aʻoaʻoina ai e faapea o le suafa o le Atua, o Ieova—o le suafa o loo faatele ona taʻua i lana Tusi Paia faa-Hinitu. Na ia iloa faapitoa lava iina le ofoofogia o le tusi o Faaaliga.

O lea na ia tau mānatu ai pe faamata ea e iai se lotu o loo mulimuli atu i le Tusi Paia atoa. Na ia mātauina o lotu sa masani ona ia alu i ai, e na ona mulimuli i nisi vaega o le Tusi Paia. O nisi lotu e talia Tusitusiga Eperu ae teena Tusitusiga Kerisiano Eleni. O isi lotu ua lē amanaiaina Tusitusiga Eperu, ae talitonu faapea e na o Tusitusiga Kerisiano Eleni o loo iai fesoasoani aogā.

I se tasi aso na iloa atu ai e le Susuga a D—— se ulugalii ua timuʻia ma sa ia faaafe ane ai loa i laua i lona fale. O i laua o ni Molimau a Ieova. Sa umia e le avā le tusi Revelation—Its Grand Climax At Hand! * Na talosaga atu loa le Susuga a D—— i le taimi lava lena mo le tusi. Na mafaufau Molimau o faamatalaga i valoaga o loo i le Faaaliga e loloto tele mo ia, o lea na la ofoina loa i ai se isi lomiga. Ae na maumauai pea le Susuga a D—— ia ona mauaina le tusi Revelation.

Ina ua maua lana kopi, na vave lava ona ia faitauina le tusi. Na sosoo ai ma lona taliaina o se suesuega faale-Tusi Paia ma Molimau a Ieova. E lei umi ae maofa o ia i faamaoniga o le faasilisilia i manatu o Molimau o le Tusi Paia atoa i se tulaga maualuga. Na amata ona ia auai i sauniga i le Maota o le Malo a Molimau a Ieova e lē aunoa, lea e suesueina ai ma le tinou Tusitusiga Eperu ma Tusitusiga Kerisiano Eleni. Ua avea nei o ia ma sē folafola le Malo ma o se tagata papatiso o le faapotopotoga Kerisiano.

[Faaopoopoga i lalo]