“Ia Amanaia Tane Faapena”

SA LĒ lelei le tulaga mai o mea i le faapotopotoga i Korinito. Sa iai se tulaga e faateʻia ai ona o amioga lē mamā, ma fevaevaeaiga sa iai i le auuso. Sa fesagai nisi ma faafitauli ogaoga totino po o fesili sa ia i latou na manaomia ona taliina. O nisi o le auuso sa latou tuuina atu nisi uso i le faamasinoga; o nisi sa oo lava ina latou faafitia le toetu.

Sa tulai mai ai foi ma fesili faigata. Pe sa tatau ia i latou o loo iai i aiga fevaevaeai tau tapuaiga ona faatasi pea ma a latou paaga lē talitonu, pe sa tatau ona latou teteʻa? O le ā le matafaioi a tuafāfine i le faapotopotoga? Pe sa tatau ona taumafaina aano o manu sa faia ai taulaga i tupua? E ao faapefea ona taulimaina sauniga—e aofia ai le Talisuaga Afiafi a le Alii?—1 Korinito 1:12; 5:1; 6:1; 7:1-3, 12, 13; 8:1; 11:18, 23-26; 14:26-35.

E foliga mai o le popole tele mo le lelei o o latou uso i sea ituaiga o siomaga ua pagatia faaleagaga, sa malaga atu ai loa Akaiko, Fotunato, ma Setefana e asia le aposetolo o Paulo  i Efeso. E lē gata ina avatu ia ituaiga o tala e faateʻia ai, ae foliga mai sa latou avatu foi ia Paulo se tusi mai le faapotopotoga o loo tusia ai fesili e faatatau i nei mataupu. (1 Korinito 7:1; 16:17) E mautinoa, o nei uso faaleagaga e toatolu sa lē na o i latou na iai popolega e faatatau i lea tulaga. O le mea moni, ua uma ona maua e Paulo faamatalaga mai “sa Keloē” faapea ua iai feeseeseaiga i tagata o le faapotopotoga. (1 Korinito 1:11) Ma le lē masalosalo, o lipoti mai nei uso e toatolu sa fesoasoani ia Paulo e mauaina ai se malamalamaga manino i lea tulaga, ina ia filifili ai po o le ā le ituaiga fautuaga e tuuina atu, ma le auala e taliina ai fesili na tulai mai. E foliga mai o le tusi lea ua tatou taʻua nei o le Tusi Muamua i Korinito o le tali atu lea a Paulo, lea sa taʻitaʻia e le agaga paia o le Atua. Atonu o Akaiko, Fotunato, ma Setefana sa latou auina atu le tusi i tagata Korinito.

O ai Akaiko, Fotunato ma Setefana? O le ā e mafai ona tatou aʻoaʻoina e ala i le suesueina o mea o fai mai ai le Tusi Paia e faatatau ia i latou?

Le Auaiga o Setefana

O le auaiga o Setefana o ‘uluai fua’ ia o le faiva a Paulo i Akaia o le itumalo o Roma, o loo i le itu i Saute o Eleni, e tusa o le tausaga e 50 T.A., ma na papatisoina ai i latou e Paulo lava ia. Ma le manino, sa manatu Paulo ia te i latou o se faataitaiga lelei, o se taaʻiga malosi ma taʻumatuaina mo tagata i Korinito. Sa ia viiviia i latou ma le māfana ona o a latou galuega sa faia mo le faapotopotoga: “Le au uso e, ua outou iloa le aiga o Setefana, o le faapolopolo i latou i Akaia, ma ua tuuina atu i latou e i latou e auauna i le au paia; ou te aioi atu ia te outou ia outou usiusitai i e o faapea, atoa ma i latou uma o e fesoasoani mai ma tautigaina.” (1 Korinito 1:16; 16:15, 16) E lē o taʻua mai po o ai tonu lava e faia aʻe ai le “auaiga” o Setefana. O le faamatalaga e mafai ona faatatau atu i tagata o le aiga ae mafai foi ona aofia ai ma pologa po o tagata faigaluega. Talu ai o Akaiko o se igoa Latina lea e masani ai mo se pologa, ma o Fotunato o le igoa lea e masani ai mo sē e saʻoloto, ua taumate ai la nisi tagata faimanatu e faapea atonu o i laua e i le auaiga lava lena e tasi.

Po o le ā lava le tulaga, ae sa manatu i ai Paulo o le auaiga o Setefana sa avea o se faataitaiga lelei. O ona tagata sa “tuuina atu i latou e i latou e auauna i le au paia.” Atonu sa iloa e le aiga o Setefana e faapea sa iai galuega e ao ona faia mo le lelei o le faapotopotoga ma sa ofo atu e talia lenei auaunaga e pei o se tiute tauave a i latou lava ia. O lo latou faanaunauga ia tuuina atu la latou auaunaga i le au paia sa mautinoa le tatau i ai o le lagolagosua ma le amanaiaina.

“Ua Latou Faamafanafanaina Loʻu Loto, Atoa ma lo Outou”

E ui ina sa popole Paulo i le tulaga o mea sa iai i Korinito, ae o le taunuu atu o avefeau e toatolu sa avea lea ma mea sa faagaeetia ai o ia. Ua faapea mai Paulo: “Ua ou fiafia i le oo mai o Setefana ma Fotunato ma Akaiko, auā ua latou faaatoatoa mai a outou mea sa totoe; auā ua latou faamafanafanaina loʻu loto, atoa ma lo outou.” (1 Korinito 16:17, 18) I le manatu i le tulaga o mea i Korinito, o lona lē faatasi ai i Korinito atonu sa avea ma puna o popolega mo Paulo, ae o lenei la o lo latou iai iina ua fai ai i latou ma sui o le faapotopotoga atoa. O la latou lipoti e foliga mai sa fesoasoani i le iloaina e Paulo o le ata atoa o le tulaga o  mea o loo iai, ma aveese ai ni nai isi o ona popolega. Atonu i le iuga sa lē matuā leaga naʻuā ai mea nai lo le mea sa ia mafaufau i ai.

E tusa ai ma le faamatalaga a Paulo, o le auaunaga a nei avefeau e toatolu sa lē gata ina faamafanafanaina ai o ia lava ae sa fesoasoani foi e faamalosia ai le agaga o le faapotopotoga i Korinito. Ma le lē masalomia sa o se mapusaga mo le faapotopotoga i Korinito le iloa faapea o o latou sui sa auina atu sa latou faamatalaina lelei mea uma lava e faatatau i le tulaga o mea o iai ia Paulo ma toe foi mai ma ana fautuaga.

O lea la sa faamālō atu ai ma le māfana ia Setefana ma ana aumea e toalua mo a latou galuega tautiga ona o uso i Korinito. O le talisapaia e Paulo o nei tane sa avea ma mea, i lo latou toe foi atu sa tatau ona latou tuuina atu ai le taʻitaʻiga i le faapotopotoga i Korinito lea na fevaevaeai. Sa faamalosiau atu le aposetolo i le auuso: “Ia outou usiusitai i e o faapea, atoa ma i latou uma o e fesoasoani mai ma tautigaina. . . . O le mea lea ia outou tali lelei ai i e ua faapea [“ia amanaia tane faapena,” NW].” (1 Korinito 16:16, 18) O le faamamafa atu i ai o lea faamālō ua faaalia manino ai le faamaoni atoatoa o nei tane e ui i ni tulaga lē lelei sa iai i totonu o le faapotopotoga. O tane faapena ua tatau ona faapelepeleina.—Filipi 2:29.

O Aufaatasiga Faamaoni e Aumaia ai Iuga Lelei

E leai se masalosalo i ai, o aufaatasiga vavalalata ma le faalapotopotoga a Ieova ma ē o loo fai ma ona sui e aumaia ai iuga lelei. Ina ua tusia e Paulo le tusi lea ua taʻua i le taimi nei o le Tusi Lona Lua i Korinito, ina ua faatoʻā uma lava le tusi muamua, o le taimi lena ua amata ai ona toe sologa lelei mea i le faapotopotoga. O le faaauau ma le onosai o galuega a uso e pei o Akaiko, Fotunato, ma Setefana, atoa ai ma le asiasiga a Tito, sa aumaia ai iuga lelei.—2 Korinito 7:8-15; faatusatusa i le Galuega 16:4, 5.

O tagata o loo iai i faapotopotoga i aso nei o tagata o Ieova e mafai ona maua aogā i le manatunatu loloto i ni nai faamatalaga o loo taʻua ai nei tane faamaoni i le Tusi Paia. Mo se faataitaiga, seʻi faapea e iai se mea o loo tupu i totonu o le faapotopotoga ua lē mafai ona foia vave ona o nisi o mafuaaga, ma ua faatupuina ai le popole i le auuso. O le ā e ao ona fai? Ia faataitai ia Setefana, Fotunato, ma Akaiko, o ē sa lei solomuli mai i la latou avega tauave o le taʻuina atu ia Paulo le tulaga ua iai, ona tuu atu lea ma le mautinoa o le mataupu ia Ieova. Sa lei avea lo latou maelega mo le amiotonu latou te faia ai ni gaoioiga tutoatasi po o le “ita foi . . . ia Ieova.”—Faataoto 19:3.

O faapotopotoga e ā Iesu Keriso lea, ma i lana lava taimi fetaui, e pei lava ona iai i Korinito, o le a ia gaoioi ai e foia so o se faafitauli e ono aumaia ai se lamatiaga mo lo latou lelei faaleagaga ma le filemu. (Efeso 1:22; Faaaliga 1:12, 13, 20; 2:1-4) Ae i le taimi nei, afai tatou te mulimuli atu i le faataitaiga lelei sa faataatia e Setefana, Fotunato, ma Akaiko ma faaauau ona auauna tautiga mo o tatou uso, o le a avea foi i tatou ma lagolagosua faamaoni i faatulagaga a le faapotopotoga, e faamalosia ai o tatou uso, ma “taufaatupu ai le alofa ma galuega lelei.”—Eperu 10:24, 25.