O Manuia po o Malaia—O ni Faaaoaoga mo i Tatou i Aso Nei

“Na oo na mea uma ia te i latou e fai ma faailoga; ua tusia foi e fai ma apoapoaiga mo i tatou o e ua aulia mai ai tausaga e gata ai.”—1 KORINITO 10:11.

1. E pei lava ona iloiloina e se tasi se meafaigaluega, o le ā le iloiloga e tatau ona tatou faia?

I LE pito i totonu o le vali e lē iloa atu i fafo, e mafai ona amata ʻati e le ʻele se meafaigaluega e faia mai le uamea. Atonu e tau umi sina taimi faatoʻā amata ona aliali aʻe le ʻele o le uamea. Atonu e umi faapena ona amata faaleagaina uiga ma faanaunauga o le loto o se tasi, a o lei iu i ni āuga matautia pe oo lava foi ina mātauina mai e isi. E pei lava ona tatou iloiloina ma le atamai se meafaigaluega ina ia iloa pe ua amata ona ʻelea, ua faapena foi ona manaomia se iloiloina ma le faaeteete o o tatou loto ma le tausia lelei i taimi uma, atonu e faatumauina ai pea lo tatou faamaoni faa-Kerisiano. I se isi faaupuga, e mafai ona tatou mauaina manuia mai le Atua ma mafai ona alofia malaia mai le Atua. Atonu e manatu nisi o manuia ma malaia ia na folafola atu ia Isaraelu anamua, e itiiti lava se uigā mo i latou o loo fesagai ma le faaiuiuga o lenei faiga o mea. (Iosua 8:34, 35; Mataio 13:49, 50; 24:3) Ae peitai, ua lē o le tulaga lena. E tele se aogā mo i tatou o faaaoaoga lapatai ia na aafia ai Isaraelu, e pei ona taʻua mai i le 1 Korinito mataupu e 10.

2. O ā fa a le 1 Korinito 10:5, 6 e faatatau i mea na tutupu ia Isaraelu i uta i le vao?

² Ua faatutusa atu e le aposetolo o Paulo le iai o tagata Isaraelu i le taʻitaʻiga a Mose, ma le iai o Kerisiano i le taʻitaʻiga a Keriso. (1 Korinito 10:1-4) E ui lava sa ono mafai ona ulu atu tagata Isaraelu i le Nuu o le Folafolaga, ae “o le toatele o i latou ua le fiafia i ai le Atua, auā na faataatitia solo o latou tino i le vao.” Ona faapea atu ai lea o Paulo i ona uso Kerisiano: “Na fai foi na mea ma faailoga mo i tatou, ina neʻi tatou tuʻinanau atu i mea leaga, pei ona tuʻinanau lava i latou.” (1 Korinito 10:5, 6) O totonu o le loto e tuputupu aʻe ai faanaunauga, o lea ua manaomia  ai ona tatou utagia faaaoaoga lapatai ua sii mai e Paulo.

Le Lapataiga e Faatatau i le Ifo i Tupua

3. Na faapefea ona agasala tagata Isaraelu i le fesootai atu ma le tamai povi auro?

³ O le uluai lapataiga a Paulo e faapea: “Aua foi tou te ifo i tupua, pei o isi o i latou, pei ona tusia, Sa nonofo le nuu i lalo ma aai ma inu, ona latou tutū lea i luga e sisiva.” (1 Korinito 10:7) O lenei faaaoaoga lapatai sa faasino i le toe foi atu o tagata Isaraelu e faataitai i ala o Aikupito ma faia ai se tamai povi auro e ifo i ai. (Esoto, mataupu e 32) Na faaalia e le soo o Setefano le faafitauli na oo i ai ina ua ia faapea mai: “Ua le loto o tatou tamā ina ia anaana [ia Mose, le sui o le Atua], a ua tetee atu ai, ma toe foi atu i o latou loto i Aikupito, ua faapea atu ia Arona, Ina faia ia atua mo i tatou, latou te muamua atu ia i tatou; auā o lena Mose, sa taʻitaʻiina i tatou nai le nuu o Aikupito, tatou te le iloa se mea ua oo ia te ia. Na faia foi e i latou i ia ona po le tamai povi, ua latou fai foi le taulaga i le tupua, ua olioli foi i latou i galuega a o latou lava lima.” (Galuega 7:39-41) Seʻi mātau “i o latou loto” na faaputuputu ai pea e tagata Isaraelu ua feseaʻi ni tuʻinanauga sese ia na taʻitaʻia ai i le ifo i tupua. “Na faia foi e i latou . . . le tamai povi, ua latou fai foi le taulaga i le tupua.” E lē gata i lea, na “olioli foi i latou i galuega a o latou lava lima.” Sa iai musika, sa pepese, sisiva, aai, ma feinu. E manino mai, sa matuā seetia ma faafiafiaina i le ifo i tupua.

4, 5. O ā faiga faaifo i tupua e manaomia ona tatou aloese mai ai?

⁴ O Aikupito faafaatusa i ona po nei—le lalolagi a Satani—ua matuā aafia foi i le tapuai atu i faafiafiaga. (1 Ioane 5:19; Faaaliga 11:8) Ua fai mo o latou tupua tagata taʻutaʻua i ata tifaga, o tagata pese, o tagata taʻutaʻua i taaloga, faapea foi ma a latou siva, o a latou musika, o o latou mafaufauga i taimi mālie ma taimi e faafiafiaina ai. E toatele ua tofotofoina ina ia auai atu atoatoa i faafiafiaga ae ua faapea mai foi o loo tapuai ia Ieova. Pe a tatau ona aoaia se Kerisiano ona o le faia o se mea sese, e masani lava ona sootaga atu lona tulaga vaivai faaleagaga ma le inu i le ava malosi, le auai i siva, ma le faia o ni taimi faafiafia i se tulaga ua toetoe lava pei o le ifo i tupua. (Esoto 32:5, 6, 17, 18) O nisi faafiafiaga e aogā ma faafiafiaina ai. Peitai, i aso nei, o le tele lava o musika, o siva, o tifaga, ma vitiō faalelalolagi ua aumaia ai mea e faamalieina ai tuʻinanauga leaga o le tino.

⁵ E lē lolo atu Kerisiano moni i tapuaiga i tupua. (2 Korinito 6:16; 1 Ioane 5:21) Tau ina ia tatou taitoatasi ma faaeteete ina ia lē soona faananau tele atu i faafiafiaga faaifo i tupua ma lamatia ai i le puapuagatia i aafiaga leaga ona o le matuā lofia i le faafiafiaina i auala faalelalolagi. Pe afai tatou te gauai atu i taaʻiga faalelalolagi, e auau mālie lava ona mafai e tuʻinanauga ma uiga leaga ona mautu ai i le mafaufau ma le loto. Pe a lē faasaʻoina, e mafai ona iu nei mea i le faapei ai ‘ua taatitia solo o latou tino i le vaomatua’ o le faiga o mea a Satani.

6. O le ā se gaoioiga mautinoa e manaomia ona tatou faia e tusa ai o faafiafiaga?

 ⁶ E pei o Mose i le taimi na fai ai le tamai povi auro, ua tai faapena “le auauna faamaoni ma le mafaufau” i le faapea mai: “O ai se ʻau ma Ieova? ina sau ia ia te au.” O le faia o se gaoioiga mautinoa e faaalia ai o loo tatou tutū mausalī mo le tapuaiga moni e mafai ona faasaoina ai le ola. Sa vave ona gaoioi le ituaiga o sa Levī lea e tupuga mai ai Mose, e faamamā ese uma aafiaga inosia. (Mataio 24:45-47; Esoto 32:26-28) O lea la, ia iloiloina ma le faaeteete lau filifiliga o faafiafiaga, o musika, o vitiō, ma isi mea faapena. Afai o iai ni itu o loo leaga ai, ia e gaoioi e ʻau atu ia Ieova. Faatasi ai ma lou tatalo faalagolago atu i le Atua, ia faia ni suiga i lau filifiliga o faafiafiaga ma musika, ma ia faatamaʻia mea e leaga ai faaleagaga, e pei lava ona sa faatamaʻia e Mose le tamai povi auro.—Esoto 32:20; Teuteronome 9:21.

7. E mafai faapefea ona tatou puipuia le loto faafaatusa?

⁷ E mafai faapefea ona tatou tineia le ʻele lea ua ʻatiina le loto? E ala i le tinoū e suesueina le Afioga a le Atua, i le faagoto ifo o ana upu moni i o tatou mafaufau ma loto. (Roma 12:1, 2) O le mea moni, e tatau ona tatou auai e lē aunoa i sauniga faa-Kerisiano. (Eperu 10:24, 25) O le tau ina auai i sauniga e aunoa ma le faia o se vaega ua faatusaina i le na ona valiina o se vaega o loo ʻelea. Atonu e faaoso ai lo tatou fiafia e lenei mea mo sina taimi, ae lē o faaleleia ai le faafitauli lea o loo iai. Nai lo lea, o muai sauniuniga e fai, le mafaufau loloto, ma le faia o se sao uigā i sauniga, e mafai ai ona tatou matuā aveesea vaega ʻelea na atonu o loo lafi i vaega lilo o o tatou fatu faafaatusa. O le a fesoasoani lenei mea ia i tatou e utagia ai le Afioga a le Atua ma o le a faamalosia ai i tatou e tutumau i tofotofoga o le faatuatua ma “ia sao ona lelei ai” i mea uma lava.—Iakopo 1:3, 4; Faataoto 15:28.

Le Lapataiga e Faatatau i le Faitaaga

8-10. (a) O le ā le faaaoaoga lapatai o loo faasino i ai i le 1 Korinito 10:8? (e) E mafai faapefea ona aogā le faatatauina o fetalaiga a Iesu na o loo i le Mataio 5:27, 28?

⁸ I le faaaoaoga na sosoo ai a Paulo, ua fautuaina i tatou e faapea: “Aua foi tatou te faitaaga, pei ona faitaaga o isi o i latou, ma fano ai i le aso e tasi e lua sefulu o afe ma afe e tolu.” * (1 Korinito 10:8) Sa faasino atu upu a le aposetolo i le taimi ina ua ifo ai tagata Isaraelu i atua sese ma faia le “faitaaga . . . ma fafine o Moapi.” (Numera 25:1-9) O amioga lē mamā faaleituaiga e faasalaina ai i le oti! O le faataga o mafaufauga ma tuʻinanauga lē mamā e mafaufau pea i ai ua tutusa lena ma le “faaʻeleaina” o le loto. Na fetalai Iesu: “Ua outou faalogo, na fai mai i e anamua, Aua e te mulilua. A ou te fai atu aʻu ia te outou, ai se vaai atu i le fafine ina ia manao i ai, ua uma ona mulilua ma ia i lona loto.”—Mataio 5:27, 28.

⁹ O le faamaoniga o āuga o le ‘vaai atu i le fafine ina ia manao i ai’ o le iuga lea na oo i ai ona o mafaufauga leaga o agelu lē usiusitai i le taimi a o lei oo i le Lolo i ona po o Noa. (Kenese 6:1, 2) Seʻi manatua foi, o le tasi o mea e sili ona matautia lea na tupu i le olaga o le tupu o Tavita, na faaosofia ona o lona tilotilo atu pea ma le lē tatau i se fafine. (2 Samuelu 11:1-4) I se faaeseesega, o le tane amiotonu ua faaipoipo o Iopu, ‘sa ia osia se feagaiga ma ona mata ina ia lē tilotilo manaonao atu o ia i se taupou,’ ma alofia ai amioga lē mamā ae faamaonia o ia o sē tausia le faamaoni. (Iopu 31:1-3, 6-11) E ono faatusaina mata i faamalama o le loto. Ma e māfua i se loto ua faaleagaina ona puna mai ai mea leaga e tele.—Mareko 7:20-23.

¹⁰ Pe afai tatou te faatatauina fetalaiga a Iesu, o le a tatou lē saʻoloto ai e mafaufau i mea leaga e ala i le matamata i ata o faiga lē mamā pe i le manatunatu pea i mafaufauga lē mamā e faatatau i se uso Kerisiano,  se aumea i le galuega, po o se isi lava tagata. E lē matafi ese le ʻele mai le uamea i le na ona salusalu ese o le ʻele. O lea la, aua le tau ina faateʻa ese manatu ma faanaunauga lē mamā e pei e lē tāua tele. Ia faia ni gaoioiga malolosi e aveesea mai ia te oe mafaufauga lē mamā. (Faatusatusa i le Mataio 5:29, 30.) Ua timai atu Paulo i uso talitonu: “Ia outou fasiotia o outou itu tino o i le lalolagi, o le faitaaga, o le amio leaga, o le faamatāitu, o le tuʻinanau leaga, ma le matapeapea, o le ifo i tupua lava lea; o mea ia e oo mai ai le toasa o le Atua.” Ioe, o mea faapena e pei o feusuaiga lē mamā, “e oo mai ai le toasa o le Atua” e avea o se faailoaina mai o lana faamalaiaga. O lea e manaomia ai ona tatou “fasiotia” o tatou itu tino mai nei mea.—Kolose 3:5, 6.

Le Lapataiga e Faatatau i Faitioga Fouvale

11, 12. (a) O le ā le lapataiga o loo aumaia i le 1 Korinito 10:9, ma o le ā le mea na tupu o loo faasino atu i ai? (e) E ao faapefea ona aafia i tatou i le lapataiga a Paulo?

¹¹ O le isi lapataiga na sosoo ai a Paulo e faapea: “Aua foi tatou te faaonoono [“ia  Ieova,” NW], pei ona faaonoono o isi o i latou, ma fano ai i gata.” (1 Korinito 10:9) A o faataamilo solo le savaliga a le fanauga a Isaraelu i le vaomatua e latalata i le tuaoi o Etoma, “ona fai upu ai lea o le nuu i le Atua ma Mose, ua faapea, Se a ea le mea na oulua aveina ae ai i matou nai Aikupito e oti ai i le vao? auā e leai ni mea e ʻai, e leai foi ni vai, o loo ʻinoʻino foi o matou loto i nei mea e ʻai faatauvaa,” o le manai lea sa saunia faavavega mai. (Numera 21:4, 5) Seʻi manatu foi! O na tagata Isaraelu sa latou “fai upu . . . i le Atua,” ma fai mai e faatauvaa ana sauniuniga!

¹² Ona o a latou faitioga, na tofotofoina ai e le fanauga a Isaraelu le onosai o Ieova. Sa lei taofia mai ai le faasalaga, auā na auina atu e Ieova ni gata uogo ia i latou, ma e toatele na feoti ina ua ūtia e gata. Ina ua uma ona salamō tagata ma oo ane Mose e faatoga mo i latou, ona muta ai lea o le mala. (Numera 21:6-9) E mautinoa, sa tatau ona avea lenei mea na tupu ma lapataiga mo i tatou ina ia tatou lē faaalia se uiga fouvale, ma le faitio, ae maise lava e faasagatau ai i le Atua ma ana faatulagaga faatiokarate.

Le Lapataiga e Faatatau i le Muimui

13. E faatatau i le ā o loo lapatai i ai le 1 Korinito 10:10, ma o le ā le fouvale lea sa mafaufau i ai Paulo?

¹³ I le sii mai o lana faaaoaoga mulimuli lea o loo aofia ai le fanauga a Isaraelu a o iai i le vaomatua, ua tusi ai Paulo: “Aua foi tou te muimui, pei ona muimui o isi o i latou, ma fano ai i le na te fasiotia.” (1 Korinito 10:10) Na mapuna aʻe fouvalega ina ua faia e Koru, Tatano, Apiramo, ma a latou aumea, ni uiga lē faatiokarate ma latou luʻia le pule a Mose ma Arona. (Numera 16:1-3) Ina ua uma ona faaumatia le ʻau fouvale, sa toe amata foi ona muimui tagata Isaraelu. Na māfua lenei mea ona ua amata ona latou manatu faapea sa lē saʻo le faaumatiaga ua oo i tagata fouvale. Ua faapea mai le Numera 16:41: “O le taeao na muimui ai le faapotopotoga uma o le fanauga a Isaraelu ia Mose ma Arona, ua faapea mai, Ua fasiotia e oulua le nuu o Ieova.” O lo latou faitioina o le auala na faia ai le faamasinoga tonu, na iu ai i le fasiotia o tagata Isaraelu e toʻa 14,700 i le mala na faatotōina ifo e le Atua.—Numera 16:49.

14, 15. (a) O le ā se tasi o agasala a tagata “faalematau” o ē na ō ane faaleiloga i totonu o le faapotopotoga? (e) O le ā e mafai ona aʻoaʻoina mai le mea na tupu lea sa aafia ai Koru?

¹⁴ I le uluai senituri T.A., o tagata “faalematau” o ē na ō ane faaleiloga i totonu o le faapotopotoga Kerisiano sa faamaonia o i latou o ni aʻoaʻo pepelo ma o ē muimui. O nei tagata sa latou “taʻufaatauvaa i alii, ma upu leaga i e ua mamalu,” o tane faauuina sa faaee atu i ai i lena taimi le vaavaaiga faaleagaga o le faapotopotoga. Na faapea mai foi le soo o Iuta, e faatatau i aposetate faalemataʻu: “O e muimui i latou ma faameo, o loo o savavali i latou e tusa ma o latou tuʻinanau.” (Iuta 3, 4, 8, 16) I aso nei, ua avea nisi tagata ma ē muimui ona o lo latou faatagaina o se uiga e faaleagaina ai faaleagaga ina ia tuputupu aʻe i o latou loto. E masani ona latou mataʻitūina tulaga lē lelei atoatoa o ē o loo iai i tulaga o le vaavaaia o le faapotopotoga, ma amata ai ona latou muimui i na tagata. O a latou muimuiga ma faitioga e ono oo atu lava i le faitioina o tusitusiga a le ‘auauna faamaoni ma le mafaufau.’

¹⁵ Ua talafeagai ona fesiligia fesili faamaoni e faatatau i se mataupu faale-Tusi Paia. Ae faapefea pe afai tatou te faatupuina aʻe se uiga lē lelei lea na aliali aʻe i ni talanoaga faitio ma nisi o uo mamae? O se mea lelei pe a tatou fesili ifo ia i tatou lava, ‘Pe o le a tua i ni ā lenei muimui? Pe ua lē sili ea ona lelei pe a taofi le muimui ae tatalo atu ma le lotomaulalo mo le atamai?’ (Iakopo 1:5-8; Iuta 17-21) Atonu sa matuā maumaututū lava Koru ma ē na lagolagoina o ia, o ē na latou tetee i le pule a Mose ma Arona, e faapea sa talafeagai o  latou manatu, ma na latou lē toe iloiloina ai uunaiga moni o o latou loto. Peitai, sa matuā sese lava i latou. Sa faapena foi i le fanauga a Isaraelu o ē na muimui e faatatau i le faaumatiaga o Koru ma isi tagata fouvale. Maeu le atamai o le faaaogā o na faaaoaoga e uunaia ai i tatou ina ia iloiloina uunaiga o o tatou loto, ia faateʻa ese ai le muimui po o le faitio, ae faataga Ieova ina ia ona faamamāina i tatou!—Salamo 17:1-3.

Aʻoaʻo Mai Faaaoaoga Faale-Tusi Paia, ma Olioli ai i Manuia

16. O le ā le uiga moni o le timaʻiga lea o loo i le 1 Korinito 10:11, 12?

¹⁶ E ala i le faagaeega tauatua, ua faaiu mai ai e Paulo le lisi o feau lapatai i le timaʻiga lenei: “Na oo na mea uma ia te i latou e fai ma faailoga; ua tusia foi e fai ma apoapoaiga mo i tatou o e ua aulia mai ai tausaga e gata ai. O lenei, o lē manatu o loo o tu ia, ina faaeteete ia neʻi paū.” (1 Korinito 10:11, 12) Tau ina ia tatou lē manatu māmā i lo tatou tulaga i totonu o le faapotopotoga Kerisiano.

17. Pe a tatou lagona se uunaiga lē talafeagai ua iai i o tatou loto, o le ā e ao ona tatou faia?

¹⁷ E pei ona ono ʻelea le uamea, ua faapena foi ia i tatou o ē na tupuga mai ia Atamu le tagata agasala, ona tuufaasolo mai ia i tatou se faanaunauga i le faia o le mea leaga. (Kenese 8:21; Roma 5:12) O lea, e lē tatau ai ona tatou lotovaivai pe a tatou lagona ni uunaiga lē talafeagai ua iai i o tatou loto. Nai lo lea, ia tatou faia ni gaoioiga maumauai. Pe afai o loo sao atu se ea susū i le uamea pe o loo taatia i se vaipanoa e ono ʻelea ai, e vave lava ona sosolo atu le ʻele. E manaomia ona tatou alofia le ofi atu i le “ea” o le lalolagi a Satani, ma ona faafiafiaga matagā, le sasao faaafi o amioga lē mamā, ma uiga lē lelei o le mafaufau.—Efeso 2:1, 2.

18. O le ā ua faia e Ieova e tusa ai ma faanaunauga sese o tagata?

¹⁸ Ua saunia e Ieova mo tagata se auala e teena ai faanaunauga sese ia ua tuufaasolo mai ia i tatou. Na ia foaiina mai lona Alo pele e toatasi ina ia maua ai e i latou o loo faatuatua ia te ia le ola e faavavau. (Ioane 3:16) Pe afai tatou te mulimulitui i tulagāaao o Iesu ma faaalia uiga e pei o Keriso, o le a avea ai i tatou o se faamanuiaga i isi. (1 Peteru 2:21) O le a tatou mauaina ai foi, e lē o malaia ae o manuia mai le Atua.

19. E mafai faapefea ona tatou maua aogā mai le manatunatu i faaaoaoga faale-Tusi Paia?

¹⁹ E ui lava ina ono mafai ona tatou faia ni mea sese i aso nei e pei ona sa iai le fanauga a Isaraelu anamua, ae ua ia i tatou le Afioga tusitusia atoatoa a le Atua e taʻitaʻia ai i tatou. O lo tatou faitauina ua tatou iloa ai feutagaiga sa faia e Ieova ma tagata faapea ma ona uiga sa faataitaia mai e Iesu, o ‘le pupula o le mamalu o le Atua ma ua matuā tusa lava ma Ia.’ (Eperu 1:1-3; Ioane 14:9, 10) O le tatalo ma le suesueina maeʻaeʻa o le Tusi Paia, e mafai ai ona tatou maua “le finagalo o Keriso.” (1 Korinito 2:16) Pe a tatou fetaiai ma faaosoosoga ma isi tofotofoga o lo tatou faatuatua, e mafai ona tatou maua aogā mai le manatunatu i faaaoaoga anamua faale-Tusi Paia, ae maise lava le faaaoaoga sili a Iesu Keriso. Pe a tatou faia faapea, o le a tatou lē tofo ai i āuga o malaia mai le Atua. Nai lo lea, o le a tatou olioli i le finagalo malie o Ieova i aso nei ma ana faamanuiaga e faavavau.

[Faaopoopoga i lalo]

O le a Faapefea Ona E Tali Mai?

□ E mafai faapefea ona tatou faatatauina le fautuaga a Paulo ina ia lē avea o ni ē ifo i tupua?

□ O le ā e mafai ona tatou faia ina ia utagia ai le lapataiga a le aposetolo e faatatau i le faitaaga?

□ Aisea e tatau ai ona tatou alofia le muimui ma le faitio?

□ E mafai faapefea ona tatou mauaina manuia mai le Atua, ae lē o malaia?

[Fesili mo le Suʻesuʻega]

[Ata i le itulau 18]

Pe afai tatou te mananao i manuia mai le Atua, e ao ona tatou aloese mai le ifo i tupua

[Ata i le itulau 20]

E pei lava ona manaomia le aveesea o le ʻele, ia faapena foi ona tatou faia ni gaoioiga mautinoa e aveesea ai ni faanaunauga lē talafeagai mai o tatou loto