Pe Mafai Moni lava Ona E Alofa i le Atua?

“E LE mafai ona vaai mai lava se tagata ia te au, ma ola pea ia,” ua fetalai mai ai le Atua. (Esoto 33:20) Ma talu mai ona maeʻa le tuufaatasiga o le Tusi Paia, ua lē o toe iai se faamaoniga o le iai o ni fesootaiga tuusaʻo a so o se tagata ma ia. Pe e lē foliga mai ea la o se mea faigata—pe e lē mafai—ona atiina aʻe le alofa loloto mo se tasi e te lei vaai moni lava i ai pe faalogo foi i ai? Pe e mafai moni ea ona maua se faiā alofa ma Lē na Foafoaina le vateatea?

E lē tatau ona iai se masalosalo e mafai ona atiina aʻe se sootaga vavalalata totino ma le Atua. I le Teuteronome 6:5, ua tatou faitau ai i le poloaiina o le nuu o Isaraelu e faapea: “Ia e alofa atu ia Ieova lou Atua ma lou loto atoa, ma lou agaga atoa, ma lou malosi atoa.” I se taimi mulimuli ane, na toe faamautinoa atu ai e Iesu Keriso lenei tulafono i ona soo ma faaopoopo atu e faapea: “O le poloaiga muamua lena ma le sili.” (Mataio 22:37, 38) Pe o le a timaʻi mai ea la le Tusi Paia ia i tatou ina ia tatou alolofa i le Atua pe afai sa lei mafai ona ausia se faiā faapena?

Ae pe o faatalitalia mai ea i tatou e Ieova ina ia alolofa atu ia te ia ona ua ia poloai mai? E leai. Na foafoaina e le Atua le uluai ulugalii faaletagata ma le manaoga ina ia alolofa atu ia te ia. Sa lei faamalosia Atamu ma Eva i se faiā māfana ma Lē na Foafoaina i laua. Nai lo lena, na tuuina i laua e le Atua i tulaga matagofie ina ia o la atiina aʻe ai faalogona alofa loloto mo ia. Na pule i laua i le la filifiliga—pe ia vavalalata atu i le Atua pe ia tuumuli ese mai ia te ia.

Na filifili Atamu ma Eva e fouvale atu. (Kenese 2:16, 17; 3:6, 7) Ae peitai, o ē na tupuga mai ia i laua, ua iai le avanoa mo le atiina aʻe ai o se faiā māfana ma Lē na Foafoaina Mea.

Savavali ma le Atua Moni

O se faaaoaoga, i le Tusi Paia, ua taʻua ai Aperaamo o le “uo” a le Atua. (Iakopo 2:23) Ae peitai, sa lē na o Aperaamo na olioli i se faiā vavalalata ma le Atua. Ua taʻua i le Tusi Paia le tele o isi tagata lē lelei atoatoa o ē na faaalia le alofa moni mo Ieova ma ‘savavali ma le Atua moni.’—Kenese 5:24; 6:9; Iopu 29:4; Salamo 25:14; Faataoto 3:32.

Sa lei fananau mai auauna anamua a le Atua ma uiga alofa ma le māfana atu i le Atua. Sa tatau ona latou atiina aʻe ia uiga. E faapefea? E ala i le iloaina o ia i lona suafa totino, o Ieova. (Esoto 3:13-15; 6:2, 3) E ala i lo latou iloa o loo soifua o ia ma lona tulaga o le Atua. (Eperu 11:6) E ala i le manatunatu loloto e lē aunoa i ana gaoioiga alofa. (Salamo 63:6) E ala i le faaleo atu i le Atua i le tatalo o o latou mafaufauga i totonu o le loto. (Salamo 39:12) E ala i le aʻoaʻoina o ona lelei. (Sakaria 9:17) E ala i le atiina aʻe o se mataʻu lelei ina ia lē faia se mea e faatiga ai ia te ia.—Faataoto 16:6.

Pe e mafai ona avea oe ma uo a le Atua ma savavali faatasi ma ia? E moni, e lē mafai ona e vaai i le Atua pe faalogo i lona siufofoga. Ae ui i lea, ua valaaulia oe e Ieova ina ia avea ‘ma malo i lona fale fetafai,’ o sana uo. (Salamo 15:1-5) O lea, e mafai ona e alofa atu i le Atua. Ae e mafai faapefea ona e atiina aʻe se faiā vavalalata ma le māfana ma ia?