O le Malumalu Sili Faaleagaga o Ieova

“Ua ia i tatou le ositaulaga sili e faapena, . . . o le auauna i le mea paia, ma le fale fetafai moni, sa faatuina e le Alii, a e le o tagata.”—EPERU 8:1, 2.

1. O le ā le sauniuniga alofa na faia e le Atua mo tagata agasala?

ONA o le alofa tele o Ieova le Atua mo tagata, na ia saunia ai le togiola mo le aveesea o agasala a le lalolagi. (Ioane 1:29; 3:16) Sa manaomia ai le faaliliuina mai o le ola o lona Alo ulumatua mai le lagi ma tuuina i le manava o se taupou Iutaia e igoa ia Maria. Na manino le faamalamalamaga a le agelu a Ieova ia Maria e faapea, o le tamaitiiti o le a ia fanauina “e taʻua . . . le tama paia, . . . o le Alo o le Atua.” (Luka 1:34, 35) Na taʻuina atu ia Iosefa, o lē na faamau atu ia Maria, e faatatau i le tulaga faavavega o le afuafuaina o Iesu ma iloa ai o ia lenei o le a “faaola e ia lona nuu ai a latou agasala.”—Mataio 1:20, 21.

2. O le ā na faia e Iesu ina ua tusa ma le 30 ona tausaga, ma aisea?

² A o tuputupu aʻe Iesu, atonu sa ia malamalama lelei i nisi o nei mea moni e faatatau i lona fanau mai faavavega. Na ia silafia sa iai i lona Tamā faalelagi se galuega faasaoola e tatau ona ia faia i le lalolagi. O lea, ina ua tusa ma le 30 ona tausaga ua avea o se tagata matua, ona afio atu lea o Iesu ia Ioane le perofeta a le Atua, ina ia papatisoina o ia i le Vaitafe o Ioritana.—Mareko 1:9; Luka 3:23.

3. (a) O le ā na uiga i ai Iesu i ana fetalaiga, “O manu fasia atoa ma taulaga ua e le finagalo i ai”? (e) O le ā le faaaoaoga mataina na faataatia e Iesu mo i latou uma o ē mananao e avea ma ona soo?

³ Sa tatalo Iesu i le taimi o lona papatisoga. (Luka 3:21) E foliga mai, i lona olaga mai lava i lena taimi, na ia faataunuu ai upu o le Salamo 40:6-8, e pei ona faaalia mai mulimuli ane e le aposetolo o Paulo e faapea: “O manu fasia atoa ma taulaga ua e le finagalo i ai, a ua saunia e oe le tino mo aʻu.” (Eperu 10:5) O lea na faaalia ai e Iesu lona iloaina lelei sa “le finagalo” le Atua ina ia faaauau pea ona osia taulaga i manu i le malumalu i Ierusalema. Nai lo lea, sa ia silafia lelei, ua saunia e le Atua se tino faaletagata lelei atoatoa mo ia, o Iesu lea, ina ia ofoina atu o se taulaga. O lenei taulaga o le a aveesea ai se toe manaoga mo ni taulaga e osia i manu. I le faaalia o lona faanaunauga loto atoa ina ia gauai atu i le finagalo o le Atua, na faaauau ai ona tatalo Iesu: “Le Atua e, silasila mai ia, ou te alu atu e faia lou finagalo, pei ona tusia ia te aʻu i le tusi taai.” (Eperu 10:7) Maeu se faaaoaoga uigaese o le lototele ma le tuutoina atu lē manatu faapito sa faataatia e Iesu i lena aso mo i latou uma o le a avea mulimuli ane ma ona soo!—Mareko 8:34.

4. Na faapefea ona faaalia e le Atua lona faamaonia o le ofoina atu e Iesu o ia lava?

⁴ Pe sa faamaonia ea e le Atua le tatalo a Iesu i le taimi o lona papatisoga? Seʻi tali mai ia i tatou se tasi o aposetolo filifilia a Iesu: “Ua papatisoina Iesu, ona maliu ae loa lea o ia nai le vai, faauta foi, ua faaavanoaina le lagi ia te ia, ua ia iloa atu foi le Agaga o le Atua ua afio ifo e peiseai se lupe, ua oo i ona luga. Faauta foi, o le siufofoga mai le lagi, ua faapea mai, ‘O loʻu Atalii pele lena, ua ou fiafia lava ia te ia.’”—Mataio 3:16, 17; Luka 3:21, 22.

5. O le ā na fai ma ata o le fata faitaulaga faitino lea sa i le malumalu?

⁵ O le taliaina e le Atua o le foaiina atu o le tino o Iesu e osi ai le taulaga sa uiga, i se tulaga  faaleagaga, ua iai se fata faitaulaga lea e sili atu nai lo le fata faitaulaga na iai i le malumalu i Ierusalema. O le fata faitaulaga faitino lea na tuu ai luga manu mo taulaga sa fai ma ata o lena fata faitaulaga faaleagaga, lea sa uiga i le “finagalo” po o se faatulagaga a le Atua mo le taliaina o le tino faaletagata o Iesu e avea ma taulaga. (Eperu 10:10) O le mafuaaga lena na mafai ai e le aposetolo o Paulo ona tusi atu i ona uso Kerisiano: “Ua ia i tatou le fata faitaulaga, e le tatau ona ʻai i mea o i ai ē o auauna i le fale fetafai [po o le malumalu].” (Eperu 13:10) I se isi faaupuga, ua aogā i Kerisiano moni le taulaga silisili o le totogiina o agasala, lea sa teena e le toatele o faitaulaga Iutaia.

6. (a) O le ā na aliaʻi mai i le taimi o le papatisoga o Iesu? (e) O le ā e uiga i ai le taʻu o le Mesia, po o le Keriso?

⁶ O le uiga o le faauuina o Iesu i le agaga paia e faapea, ua faailoa mai nei e le Atua lona malumalu atoa faaleagaga, lea e auauna ai Iesu o se Faitaulaga Sili. (Galuega 10:38; Eperu 5:5) Sa faagaeeina le soo o Luka e taʻu saʻo mai le tausaga o lenei mea mataina na tupu e pei ona taʻua o “le tausaga e tasi le sefulu ma le lima i le nofoaiga a Tiperio Kaisara.” (Luka 3:1-3) E fetaui tonu lava lena i le tausaga e 29 T.A.—e 69 tonu i ai vaiasosa, po o le 483 tausaga, mai le taimi na auina atu ai e le tupu o Aretaseta le poloaiga ina ia toe fausia pa o Ierusalema. (Neemia 2:1, 5-8) E tusa ai o le valoaga, o le a aliaʻi mai le “Mesia le Alii” i lena tausaga faailogaina. (Tanielu 9:25) E toatele tagata Iutaia e foliga mai sa latou iloa lenei mea. Ua taʻua e Luka faapea sa “faatalitali le nuu” i le faaalia mai o le Mesia, po o le Keriso, o taʻu na e maua mai le upu Eperu ma le upu Eleni lea e tutusa o la uiga, o “lē ua faauuina.”—Luka 3:15.

7. (a) O anafea na faapaiaina ai e le Atua “le mea e silisili ona paia,” ma o le ā na uiga i ai lenei mea? (e) O le ā le isi mea na tupu ia Iesu i le taimi o lona papatisoga?

⁷ I le taimi o le papatisoga o Iesu, sa faapaiaina ai pe faataatia ese le afioaga faalelagi o le Atua, e avea o “le mea e silisili ona paia” i le faatulagaga o le malumalu sili faaleagaga. (Tanielu 9:24) Ona amata faagaoioia ai lea o “le fale fetafai moni [po o, le malumalu], sa faatuina e le Alii, a e le o tagata.” (Eperu 8:2) E lē gata i lea, e ala i lona papatisoga i le vai ma le agaga paia, na toe fanauina ai le tagata o Iesu Keriso e avea ma Atalii faaleagaga o le Atua. (Faatusatusa i le Ioane 3:3.) O lona uiga, i le taimi atofa a le Atua, o le a ia toe valaauina ai lona Atalii i le olaga faalelagi, o iina o le a ia auauna ai i le itu taumatau o lona Tamā e avea ma Tupu ma Faitaulaga Sili “e uiga faatasi ma Mekisateko.”—Eperu 6:20; Salamo 110:1, 4.

Le Mea e Sili Ona Paia Faalelagi

8. O ā ni vala fou na iai loa i le nofoālii o le Atua i le lagi?

⁸ I le aso o le papatisoga o Iesu, na iai nisi vala fou o le nofoālii faalelagi o le Atua. O le faaalia mai o se taulaga ua osia i se tagata lelei atoatoa ina ia totogia agasala a le lalolagi, na faamamafaina ai le paia o le Atua i le faaeseesega ma le tulaga agasala o le tagata. Sa matilatila ai foi le alofa mutimutivale o le Atua ona o lenei ua faaalia lona lotomalie e faamalieina lona finagalo. O lea na avea ai le nofoālii o le Atua i le lagi ua pei o le vaega pito i totonu, po o le Mea e Sili ona Paia o le malumalu, lea sa faatasi i le tausaga ona ulu atu i ai le faitaulaga sili e avatu le toto o manu ina ia totogia ai agasala i se uiga faafaatusa.

9. (a) O le ā na fai ma ata o le ie puipui lea sa vavae ai le Mea Paia mai le Mea e Sili ona Paia? (e) Na faapefea ona ulu atu Iesu i tala atu o le ie puipui o le malumalu faaleagaga o le Atua?

⁹ O le ie puipui lea sa vavae ai le Mea Paia mai le Mea e Sili ona Paia na fai ma ata o le tino faaletino o Iesu. (Eperu 10:19, 20) O le pa puipui lena na taofia ai Iesu mai le ulu atu i le afioaga o lona Tamā a o avea o ia o se tagata i le lalolagi. (1 Korinito 15:50) I le taimi o le maliu o Iesu, na “saeluaina le ie puipui o le malumalu, ua amata ifo i luga, ua oo i lalo.” (Mataio 27:51) O lenei mea ua matuā faaalia mai ai le aveeseina o le pa puipui lea sa taofia ai le ulu atu o Iesu i le lagi. I le tolu aso  mulimuli ane, na faatino ai e Ieova le Atua se vavega mataina. Na ia faatūina aʻe Iesu mai le oti, e lē ina ia avea o se tagata o tino ma le toto e mafai ona oti, ae o se foafoaga agaga mamalu “ua tumau e faavavau.” (Eperu 7:24) I le fasefulu aso mulimuli ane, ona afio aʻe loa lea o Iesu i le lagi ma ulu atu i “le mea e silisili ona paia,” “ina ia iloa ai nei o ia i luma o le Atua mo i tatou.”—Eperu 9:24.

10. (a) O le ā na tupu ina ua uma ona foai atu e Iesu le tāua o lana taulaga i lona Tamā faalelagi? (e) O le ā na uiga i ai le faauuina i le agaga paia mo soo o Keriso?

¹⁰ Pe na talia ea e le Atua le tāua o le toto masaa o Iesu e avea ma togisala mo agasala a le lalolagi? E mautinoa lava sa ia talia. O le faamaoniga o lenei mea na tupu ina ua atoa tonu lava aso e 50 talu ona mavae le toetu o Iesu, i le aso o le tausamiga o le Penetekoso. Sa liligi ifo le agaga paia o le Atua i luga o soo e 120 o Iesu a o latou potopoto faatasi i Ierusalema. (Galuega 2:1, 4, 33) I le pei o lo latou Faitaulaga Sili, o Iesu Keriso, na faapena ai foi ona faauuina i latou e auauna o “le au ositaulaga paia, e avatu taulaga faaleagaga” i le malumalu sili faaleagaga a le Atua. (1 Peteru 2:5) E lē gata i lea, ua faia aʻe ia i latou nei faauuina se nuu fou, o le “nuu paia” o le Isaraelu faaleagaga a le Atua. O lea la, o valoaga uma o mea lelei e faatatau ia Isaraelu, e pei o le folafolaga i le “feagaiga fou” lea o loo taʻua i le Ieremia 31:31, o le a faatatau atu i le faapotopotoga o Kerisiano faauuina, le “Isaraelu [moni a] le Atua.”—1 Peteru 2:9; Kalatia 6:16.

Isi Vala o le Malumalu Faaleagaga a le Atua

11, 12. (a) O le ā sa fai ma ata o le lotoā mo faitaulaga i le tulaga o Iesu, ae faapefea i le tulaga o ona soo faauuina? (e) O le ā ua fai ma ata o le tanoa vai, ma ua faapefea ona faaaogaina?

¹¹ E ui lava o le Mea e Sili ona Paia sa fai ma ata o le “lagi lava” ia, lea o loo nofotupu ai le Atua, ae o isi vala uma o le malumalu faaleagaga o le Atua e fesootai atu i mea o i le lalolagi. (Eperu 9:24) I le malumalu i Ierusalema, sa iai se lotoā i totonu mo faitaulaga, na iai iina se fata faitaulaga mo taulaga ma se tanoa vai telē, sa faaaogā e faitaulaga latou te mulumulu ai a o lei faatinoina a latou auaunaga paia. O le ā ua fai ma ata o nei mea i le malumalu faaleagaga o le Atua?

¹² I le tulaga o Iesu Keriso, o le lotoā i totonu mo faitaulaga ua fai ma ata o lona tulaga lē agasala i le avea o le Alo faaletagata lelei atoatoa o le Atua. E ala i le faaalia o le faatuatua i le taulaga a Iesu, ua taʻuamiotonuina ai soo faauuina o Keriso. O lea, ua mafai ai e le Atua ona feutagai ma le tonu ma i latou e pei lava latou te lē o agasala. (Roma 5:1; 8:1, 33) O lea, ua fai lenei lotoā ma ata o le tulaga amiotonu faaletagata o loo olioli ai i luma o le Atua i latou taitoatasi o loo i le tulaga paia faafaitaulaga. I le taimi lava e tasi, o loo lē lelei atoatoa pea Kerisiano faauuina ma e ono lolo atu i le faia o le agasala. O le tanoa vai i le lotoā ua fai ma ata o le Afioga a le Atua, lea e faaaogā e le Faitaulaga Sili e faasolosolo ona faamamāina ai le tulaga faafaitaulaga paia. O le gauai atu i lenei faagasologa o le faamamāina, ua latou maua ai se foliga vaaia mamalu lea e faamamaluina ai le Atua ma tosina mai ai tagata o i tua i le tapuaiga mamā.—Efeso 5:25, 26; faatusatusa i le Malaki 3:1-3.

Le Mea Paia

13, 14. (a) O le ā ua fai ma ata o le Mea Paia i le malumalu, i le tulaga o Iesu ma ona soo faauuina? (e) O le ā ua fai ma ata o le tuugalamepa auro?

¹³ O le potu muamua o le malumalu ua fai ma ata o se tulaga e sili atu nai lo le lotoā. I le tulaga o le tagata lelei atoatoa o Iesu Keriso, o lena potu muamua e fai ma ata o lona toe fanau mai o le Alo faaleagaga o le Atua ua fuafuaina e toe foi atu i le olaga faalelagi. Ina ua uma ona taʻuamiotonuina e faavae i lo latou faatuatua atu i le toto masaa o Keriso, ua tofo ai foi nei soo faauuina i le faagaoioiga faapitoa a le agaga o le Atua. (Roma 8:14-17) E ala i le “vai [o lona uiga, o lo latou papatisoga] ma le Agaga,” ua latou “toe fanau mai” ai o ni atalii faaleagaga o le Atua. I lena tulaga, ua latou maua ai le faamoemoe o le toe faatutūina aʻe i le ola faalelagi o ni atalii agaga o le Atua, pe  afai latou te tutumau i le faatuatua seia oo i le oti.—Ioane 3:5, 7; Faaaliga 2:10.

¹⁴ O faitaulaga sa auauna i totonu o le Mea Paia o le malumalu faalelalolagi sa lē mafai ona iloa atu i latou e tagata tapuai sa i fafo o le malumalu. I le tulaga tutusa, ua tofo Kerisiano faauuina i se tulaga faaleagaga lea e lē o mauaina pe malamalama atoatoa i ai le toatele o tagata tapuai o le Atua, o ē o loo faamoemoe e ola e faavavau i le parataiso i le lalolagi. O le tuugalamepa auro o le fale fetafai ua fai ma ata o le tulaga faamalamalamaina o Kerisiano faauuina. O le faagaoioia o le agaga paia o le Atua, e pei o suauu i lamepa, ua faamalamalamaina le Tusi Paia. O le malamalama ua maua mai ai e Kerisiano, latou te lē o taofiofia mo na o i latou. Nai lo lea, ua latou usiusitai ia Iesu, o lē na fetalai: “O le malamalama o le lalolagi outou. . . . Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tamā o i le lagi.”—Mataio 5:14, 16.

15. O le ā ua fai ma ata o le areto o loo i luga o le laulau o areto sa?

¹⁵ Ina ia tumau ai i lenei tulaga faamalamalamaina, e tatau i Kerisiano faauuina ona fafagaina pea i latou i mea ua fai ma ata o le areto o loo i luga o le laulau o areto sa. O le puna autū o a latou meaʻai faaleagaga o le Afioga a le Atua, lea latou te taumafai e faitau ma manatunatu loloto i ai i aso taitasi. Na folafola foi e Iesu lona saunia mo i latou o “mea e ʻai i ona itu aso” e auala mai i lana “auauna faamaoni ma le mafaufau.” (Mataio 24:45) O lenei “auauna” o le tino atoa lea o Kerisiano faauuina o loo i luga o le lalolagi i so o se taimi patino. Ua faaaogā e Keriso lenei vaega faauuina e faasalalau atu faamatalaga e faatatau i le faataunuuga o valoaga o le Tusi Paia ma avatu taʻiala fetaui e uiga i le faatatauina o mataupu silisili o le Tusi Paia i le olaga i aso nei i aso taitasi. O lea, ua faaaogaina ai ma le talisapaia e Kerisiano faauuina na sauniuniga uma faaleagaga. Peitai o le tausiaina pea o o latou olaga faaleagaga e sili atu nisi mea e faalagolago i ai nai lo le aveina i o latou mafaufau ma loto o le poto e uiga i le Atua. Na fetalai Iesu: “O laʻu mea e ʻai, ia ou faia le finagalo o le na auina mai aʻu, ma faaiu lana galuega.” (Ioane 4:34) Ua faapena foi ona faamalieina  Kerisiano faauuina e ala i lo latou faia i aso taitasi o le finagalo ua faaalia o le Atua.

16. O le ā ua fai ma ata o le auaunaga i le fata faitaulaga o mea manogi?

¹⁶ I le taeao ma le afiafi, sa ofo atu ai e se faitaulaga mea manogi e mu i le Atua i luga o le fata faitaulaga o mea manogi i totonu o le Mea Paia. O le taimi lava lena, e tatalo atu ai i le Atua tagata tapuai e lē o ni faitaulaga a o latou tutū i lotoā i fafo o lona malumalu. (Luka 1:8-10) O “mea manogi e mu,” e pei ona faamatala mai e le Tusi Paia, “o talosaga ia a le au paia.” (Faaaliga 5:8) Na tusi mai le faisalamo o Tavita: “Ia saunia laʻu tatalo e faapei o le mea manogi e mu i ou luma.” (Salamo 141:2) Ua faapelepeleina foi e Kerisiano faauuina lo latou faaeaga o le faalatalata atu ia Ieova i le tatalo e ala ia Iesu Keriso. O tatalo faatauanau e sau mai le loto ua faapei o ni mea manogi suamalie. Ua vivii atu foi Kerisiano faauuina i le Atua i isi auala, i le faaaogaina lea o o latou laugutu e aʻoaʻo atu ai i isi. O lo latou tutumau a o fetaiai ma faigata ma lo latou faamaoni i lalo o tofotofoga ua matua faapitoa ona faafiafiaina ai le Atua.—1 Peteru 2:20, 21.

17. O le ā sa aofia ai i le faataunuuga o le ata faavaloaga i le uluai ulu atu o le faitaulaga sili i le Mea e Sili ona Paia i le Aso o le Togisala?

¹⁷ I le Aso o le Togisala, sa ulu atu le faitaulaga sili a Isaraelu i le Mea e Sili ona Paia ma susunu mea manogi i luga o le ipu auro o loo iai malala ola. Sa tatau ona faia lenei mea a o ia lei avatuina le toto o taulaga mo agasala. I le faataunuuga o lenei ata faavaloaga, sa faamaoni atoatoa atu ai le tagata o Iesu ia Ieova le Atua a o lei ofoina atu lona ola e fai ma taulaga tumau mo a tatou agasala. Ua ia faataitaia mai ai, e mafai e se tagata lelei atoatoa ona tausia lona faamaoni i le Atua, e tusa lava po o ā omiga e tuu i ai e Satani. (Faataoto 27:11) Ina ua tofotofoina Iesu, sa ia tatalo atu ai “ma le tagi tele ma loimata . . . na faafofogaina foi o ia ona o lona migao.” (Eperu 5:7) I lenei auala na ia faamamaluina ai Ieova o le Pule Silisili Ese aoao e amiotonu ma saʻo. Na tauia e le Atua Iesu e ala i le faatūina aʻe o ia mai le oti i se olaga faalelagi e lē toe oo i ai le oti. I lenei tulaga maualuga, ua uaʻi atu ai Iesu i le mafuaaga lona lua mo lona afio mai i le lalolagi, o lona uiga, ia faia se leleiga i le va o tagata agasala ua salamō ma le Atua.—Eperu 4:14-16.

Le Mamalu e Sili Atu o le Malumalu Faaleagaga o le Atua

18. Ua faapefea ona aumaia e Ieova le mamalu uigaese i lona malumalu faaleagaga?

¹⁸ Na valoia e Ieova: “E sili le mamalu o lenei fale ua mulimuli i le na muamua.” (Hakai 2:9) E ala i le faatūina aʻe o Iesu o se Tupu ma o le Faitaulaga Sili e lē mafai ona oti, na aumaia ai e Ieova se mamalu uigaese i lona malumalu faaleagaga. Ua iai nei Iesu i se tulaga na te aumaia ai le “faaolataga faavavau ia i latou uma o e usiusitai ia te ia.” (Eperu 5:9) O ē na muai faaalia lena usiusitai o soo ia e toʻa 120 na mauaina le agaga paia i le Penetekoso e 33 T.A. I le tusi o Faaaliga ua valoia mai ai o nei atalii faaleagaga o Isaraelu o le a taaofaia i lo latou aofai e 144,000. (Faaaliga 7:4) Ina ua maliliu, e toatele i latou sa tatau ona momoe ai pea i tuugamau, e faatalitali ai mo le taimi e faatasi mai ai Iesu i le mana tautupu. O le faitauga o taimi faavaloaga o loo i le Tanielu 4:10-17, 20-27 ua faasino atu i le 1914 e avea o le taimi mo Iesu e amata ai ona pule i le lotolotoi o ona fili. (Salamo 110:2) Mo le faitau sefulu o tausaga a o lei oo i lena taimi, sa faatalitali  atu ai ma le naunautai Kerisiano faauuina i lea tausaga. O le taua muamua a le lalolagi ma puapuaga na aumaia ai i tagata ua manino ai le faamaoniga e faapea sa faanofoina moni lava Iesu i le nofoālii e avea ma Tupu i le 1914. (Mataio 24:3, 7, 8) E lei leva mulimuli ane ina ua mavae lena, ina ua oo mai le itula “e amata ai le faamasinoga i le aiga o le Atua,” na faataunuu ai e Iesu lana folafolaga lea sa fai atu i ona soo faauuina o ē na momoe i le oti: “Ou te toe sau, ou te talia foi outou ia faatasi ma aʻu.”—1 Peteru 4:17; Ioane 14:3.

19. O le a faapefea ona maua e le vaega totoe o le 144,000 le avanoa e ulu atu ai i le Mea e Sili ona Paia i le lagi?

¹⁹ O le toʻa 144,000 o ē ua iai i le tofiga faafaitaulaga e lei faamaufaailogaina uma i latou ma aoaoina i lo latou nofoaga faalelagi. O loo iai pea i le lalolagi se vaega totoe o i latou i se tulaga faaleagaga e fai ma ata o le Mea Paia, ua vavae ese mai le afioaga paia o le Atua e le “ie puipui,” po o le pa puipui, o o latou tino faaletino. Pe a maliliu i latou nei a o faatuatua pea, e faafuasei loa ona faatutūina aʻe i latou e avea o ni foafoaga agaga e lē mafai ona oti ina ia aufaatasi atu i le isi vaega o le 144,000 lea ua uma ona iai i le lagi.—1 Korinito 15:51-53.

20. O le ā le galuega tāua o loo faatinoina e ē totoe o loo i le faiva faafaitaulaga paia i le taimi nei, faatasi ai ma ā iuga?

²⁰ Ona o le toatele o faitaulaga o loo auauna faatasi ma le Faitaulaga Sili i le lagi, ua faaopoopo ai le mamalu i le malumalu faaleagaga o le Atua. Ae i le taimi nei, o loo faatinoina ai e ē totoe o loo i le faiva faafaitaulaga paia se galuega tāua i le lalolagi. E ala i la latou talaʻiga, ua ‘lūlūina ai e le Atua nuu uma’ i fetalaiga o lana faamasinoga, e pei ona valoia i le Hakai 2:7. I le taimi lava e tasi, e faitau miliona tagata tapuai ua faamatalaina e pei “o mea ua manaomia e nuu uma” o loo lolofi atu i totonu o lotoā faalelalolagi o le malumalu o Ieova. Ua faapefea ona ofi atu i latou nei i le faatulagaga faaletapuaiga a le Atua, ma o ā ni mamalu i le lumanai e mafai ona tatou faatalitalia mo lona malumalu sili faaleagaga? O fesili nei o le a iloiloina i le mataupu o loo sosoo mai.

Fesili Autalu

□ O le ā le faaaoaoga mataina na faataatia e Iesu i le 29 T.A.?

□ O le ā le faatulagaga na faagaoioia i le 29 T.A.?

□ O le ā ua fai ma ata o le Mea Paia ma le Mea e Sili ona Paia?

□ Ua faapefea ona faamamaluina le malumalu sili faaleagaga?

[Fesili mo le Suʻesuʻega]

[Ata i le itulau 17]

Ina ua faauuina Iesu i le agaga paia i le 29 T.A., sa amata ai loa ona faagaoioia le malumalu sili faaleagaga o le Atua