Pe e Talia e le Atua Ituaiga Uma o Tapuaiga?

NA FOAFOAINA e le Atua le tagata ma se manaoga faaleagaga—o se manaoga e fia tapuai. E lē o se mea e oso faafuasei aʻe. O se mea na avea ma vaega o le tagata mai le amataga.

Ae ui i lea, e faanoanoa lava e faapea atu, ua faavaeina e tagata le tele o auala e tapuai ai, ma i le tele o tulaga, ua lē o aumaia ai e nei auala se aiga faaletagata e fiafia, ma autasi. E nai lo lea, ua tauina pea taua faamasaatoto i le faatagaga a lotu. Ua faaosofia ai i lea mea le fesili tāua e faapea: Pe e tāua ea le auala e tapuai ai se tagata i le Atua?

Tapuaiga Masalomia i Aso Anamua

O malo anamua na aināina ai Sasaʻe Tutotonu, ua aumaia ai se faaaoaoga faatalafaasolopito e fesoasoani ia i tatou i le taliina o lena fesili. E toatele na tapuai i se atua na taʻua o Paala. Na latou tapuai foi i aumea fafine a Paala, e pei o Asaira. O le tapuaiga ia Asaira e aofia ai le faaaogaina o se pou paia e talitonu e faapea o se faatusa o feusuaiga faaleituaiga. O le ʻau suesue i toegā mea anamua na galulue ai i lena vaipanoa na latou eliina i luga le anoanoai o faatusa o fafine o loo telenonoa. Ua taʻua e le Encyclopedia of Religion e faapea o nei faatusa ua “faaāta mai ai se atua fafine ma ona totogasa o loo faamatilatila mai, o loo ia taofiina i luga ona susu,” ma “e leai se faaletonu o loo fai ma sui o . . . Asaira.” Ua mautinoa lava, o le tapuaiga ia Paala sa masani ona matuā lē mamā.

O lea la, e lē o se mea e ofo ai, o le tapuaiga ia Paala sa aofia ai poula ma feusuaiga lē mamā. (Numera 25:1-3) O Sekema, le sa Kananā, na ia faia faamalosi ni feusuaiga ma le taupou talavou o Tina. E ui i lenei tulaga, sa vaai pea i ai o se tagata sa sili ona agafaatamaalii i totonu o lona aiga. (Kenese 34:1, 2, 19) Sa taatele le mataifale, tauatane, ma feusuaiga ma manu. (Levitiko 18:6, 22-24, 27) O le upu lea “faasotoma,” o se faiga faatauatane, e sau mai le igoa o se aai sa iai muamua i lena vaega o le lalolagi. (Kenese 19:4, 5, 28) O le tapuaiga foi ia Paala sa aofia ai le faamasaatoto. Ioe, sa lafoolaina e tagata tapuai ia Paala a latou fanau i totonu o le afi mu saesae e fai ai taulaga i o latou atua! (Ieremia 19:5) O nei faiga uma lava sa fesootai atu i aʻoaʻoga faalotu. E faapefea?

Ua faamatala mai e Dr. Merrill Unger i lana tusi Archaeology and the Old Testament: “O le faasaunoa, le tuinanau leaga ma le olaga lē taupulea soonafai o talafatu a tagata Kanana, ua sili atu ona leaga nai lo se isi lava mea i Sasaʻe Lata Mai i lea taimi. Ma o uiga e faateʻia ai o atua o Kanana, e faapea sa matuā leai lava ni o latou uiga tau amio mamā, atonu ua faapogai ai le aumaia o uiga e sili ona leaga i ē o tapuai atu i ai ma aofia ai i mafuaaga o le tele o faiga e sili ona paʻū maulalo tau amio o lena taimi, e pei o gaoioiga faatalitane i totonu o malumalu, [ma le] ofoina atu o tamaiti e fai ma taulaga.”

Pe na talia e le Atua le tapuaiga a tagata Kanana? E mautinoa lava e leai. Na ia aʻoaʻoina tagata Isaraelu i le auala e tapuai ai ia te ia i le auala mamā. E tusa ai i faiga o loo taʻua i luga, na ia lapatai e faapea: “Aua lava neʻi leaga outou ia te outou i se tasi mea o ia mea; auā o mea uma lava ia ua leaga ai nuu ou te tulia i o outou luma. Ua leaga ai foi le laueleele; ou te taui atu ai le agasala ua i ai, e luai mai lava e le laueleele i e o nonofo ai.”—Levitiko 18:24, 25.

Ua Faaleagaina le Tapuaiga Mamā

O le toatele o tagata Isaraelu sa latou lei taliaina le silafaga a le Atua i le tapuaiga  mamā. Nai lo lena, na latou faatagaina le tapuaiga ia Paala e faia pea i lo latou laueleele. E lei pine ae seetia tagata Isaraelu i le taumafai e palu faatasi le tapuaiga a Ieova ma le tapuaiga ia Paala. Pe na talia ea e le Atua lea ituaiga o tapuaiga e palu faatasi? Seʻi manatu i le mea na tupu i le taimi o le pulega a le tupu o Manase. Na ia faatūina fata faitaulaga ia Paala, na susunuina lona lava atalii e fai ai se taulaga, ma faia faiga faataulaitu. “O le tupua foi o Asaira [ʼashe·rahʹ i le faa-Eperu] na ia faia, ua ia faatuina i le fale sa fetalai ai Ieova . . . o le fale nei . . . ou te tuu ai loʻu igoa e faavavau.”—2 Tupu 21:3-7.

Na mulimuli atu ē na pulea e Manase i le faaaoaoga a lo latou tupu. O le mea moni, “ua faasese foi Manase ia te i latou e fai le amio leaga e sili i le amio na faia e nuu na faaumatia e Ieova i luma o le fanauga a Isaraelu.” (2 Tupu 21:9) Nai lo le utagiaina o lapataiga na fai soo atu ai perofeta a le Atua, na faia lava e Manase le fasioti tagata i se tulaga na matuā faatumuina ai Ierusalema i le toto o ē lē sala. E ui sa iu ina toe suia Manase i se tulaga lelei, ae o lona atalii, lē na sosoo ane ai e fai ma tupu, le tupu o Amone, na ia toe faaolaolaina le tapuaiga ia Paala.—2 Tupu 21:16, 19, 20.

Na mulimuli ane amata ona fai faiga tau feusuaiga faatauatane i totonu o le malumalu. Na faapefea ona silasila le Atua i lenei faaaliga o le tapuaiga ia Paala? Na ia lapatai e ala mai ia Mose e faapea: “Aua neʻi e avatu i le fale o Ieova lou Atua le totogi o le fafine talitane, po o le tau o se ulī [e foliga mai o se tane e feusuai ma tama laiti], e fai ma mea na tauto ai; auā e inosia nei mea e lua e Ieova lou Atua.”—Teuteronome 23:17, 18, faaopoopoga i lalo o le NW.

O le atalii o le atalii o Manase, le tupu o Iosia, na faamamāina le malumalu mai tapuaiga lē mamā ia Paala. (2 Tupu 23:6, 7) Ae na lei tumau ai le toe faaleleiga. E lei leva lava ona mavae le maliu o le tupu o Iosia, ae toe faia foi tapuaiga i tupua i le malumalu o Ieova. (Esekielu 8:3, 5-17) O lea, na faapogaia ai e Ieova ia le tupu o Papelonia e faaumatia Ierusalema ma lona malumalu. O lenei mea moni e faanoanoa ai o le talafaasolopito, o le faamaoniga lea e faapea o nisi ituaiga o tapuaiga e lē taliaina e le Atua. Ae faapefea o tatou aso?